Ki kabakalañi haluikolanga hahulu mikopano yemituna ya ka silimo? Sina mone kubelanga kwa Maisilaele ba kwamulaho, hañata mikopano yaluna ilufanga kolo ya kulapela Jehova ni mizwale ni likaizeli baluna babañata. Lwaikolanga lico zeñata za kwa moya. Hape lwaitebuha hahulu nako yelubanga ni balikani ni lubasi lwaluna. Bakeñisa kuli lwaitebuha hahulu mikopano ye, lwasusuezwanga kufumaneha ku yona ka mazazi kaufela a malaalu.

Haluba ni kolo ya kukopana hamoho, haluswaneli kunahana feela ka za molukatusezwa kono luswanela kunahana ni molukona kuboniseza lilato ku babañwi. (Magal. 6:10; Maheb. 10:24, 25) Haluswalela muzwale kamba kaizelaa luna munyako kamba halubuluka feela lipula zelutokwa, lubonisa kuli luisa pilu ku za babañwi. (Mafil. 2:3, 4) Mikopano yemituna ilufanga kolo ya kufumana balikani babanca. Lwakona kuitusisa nako ya kakusasana pili tukiso isika kalisa kale, nako ya kupumula musihali, ni nako ya manzibwana hamulaho wa tukiso kuli luzibane ni mizwale bolusa zibi. (2 Makor. 6:13) Batu boluzibananga ni bona fa mikopano yemituna bakona kuba balikani baluna kuya kuile! Mi sabutokwa ki kuli, batu baba lubona inze lubonisana lilato la niti, bakona kuikatulela kuswalisana ni luna kusebeleza Jehova.—Joa. 13:35.

MUBUHE VIDIO YELI, “LILATO HALIPALELWI”! MUKOPANO OMUTUNA WA MACABA, MI KIHONA MUKA ALABA LIPUZO ZELATELELA:

• Mizwale babazwa mwa linaha lisili nebabonisizwe cwañi lilato kwa mikopano ya macaba ya 2019?

• Ki kabakalañi swalisano ni lilato zebabonisana batu ba Jehova halili zemakaza?

• Ki linzila mañi zelukona kubonisa ka zona lilato zene batalusize mizwale ba mwa Sitopa Sesietelela?

• Lilato la Sikreste liswalisanisize cwañi mizwale mwa Germany ni mwa South Korea?

• Luswanela kuikatulela kuezañi?