Lupila mwa lifasi lelilika kulutahiseza kuli lunahane kuli bunde ki bumaswe mi bumaswe ki bunde. (Isa. 5:20) Ka bumai, batu babañwi baeza lika zatoile Jehova, zekopanyeleza muuna kueza somano ni muuna yomuñwi, kamba musali kueza somano ni musali yomuñwi. Babanca kwa sikolo kamba mutu yomuñwi bakona kutahisa kuli bana bamina balikanyise mikwa yabona. Mukona kutusa cwañi bana bamina kuitukiseza ni kutula miliko yeo?

Mutuse bana bamina kuziba likuka za Jehova. (Liv. 18:3) Muzwelepili kuluta bana bamina litaba za mwa Bibele ka za somano kulikana ni lilimo za bona. (Deut. 6:7) Muipuze kuli: ‘Kana nilutile bana baka mobakona kuboniseza lilato ka nzila yeswanela, libaka habaswanela kuapalanga litino zekutekeha, ni libaka batu babañwi habaswanela kukuteka litaba zabona za ka butu? Kana bana baka baziba zebaswanela kueza haiba mutu yomuñwi alika kubabuhisa maswaniso a mapunu kamba haiba mutu yomuhulu abataluseza kueza lika zabulela Jehova kuli limaswe?’ Kuba ni zibo yecwalo kukatusa bana bamina kuambuka likozi. (Liprov. 27:12; Muek. 7:12) Hamuluta bana bamina, mubonisa kuli mwalata saanda sa butokwa sa mifile Jehova.—Samu 127:3.

MUBUHE VIDIO YELI, MUYAHE NDU YESIKE YASINYEHA—MUSILELEZE BANA BAMINA “KU ZEMASWE,” MI KIHONA MUKAALABA LIPUZO ZELATELELA:

• Ki kabakalañi babañwi habapalelwanga kuluta bana babona ka za somano?

• Ki kabakalañi bashemi habatokwa kuluta bana babona “ka kalimelo ni kelezo ya Jehova”?—Maef. 6:4

• Ki liitusiso mañi zelukisizwe ki kopano ya Jehova zekona kutusa bashemi kuluta bana babona ka za somano?—w19.05 12, mbokisi

• Ki kabakalañi hamuswanela kuambolanga kamita ni bana bamina pili kusika zuha kale butata bobutuna?