Samuele naasepahalile ku Jehova mwa bupilo bwahae kaufela. Hanaasali mwanana nasika likanyisa mitala yemaswe ya bo Hofini ni Finehasi bana ba Eli babashimani. (1 Sam. 2:22-26) Samuele azwelapili kuhula, mi Jehova naali ni yena. (1 Sam. 3:19) Hasaasupezi azwelapili kusebeleza Jehova ka busepahali, nihaike kuli bana bahae bona nebasika sepahala ku Jehova.—1 Sam. 8:1-5.

Lukona kuitutañi kwa mutala wa Samuele? Haiba mubabanca mukolwe kuli Jehova wautwisisa miinelo yetaata yemukopana ni yona ni momuikutwela. Wakona kumitusa kuba ni bundume. (Isa. 41:10, 13) Haiba mu bashemi babanani mwana yatuhezi kusebeleza Jehova, muomba-ombiwe ka kuziba kuli Samuele naasika hapeleza bana bahae babahulile babashimani kuzwelapili kusepahala ku Jehova. Naazwezipili kusepahala ni kutabisa ndatahe wa kwa lihalimu yena Jehova, mi naasiile lika kaufela mwa mazoho ahae. Mwendi mutala wamina omunde ukatusa mwana mina kukutela ku Jehova.

MUBUHE VIDIO YELI MUITUTE KU BONA—SAMUELE , MI KIHONA MUKAALABA LIPUZO ZELATELELA:

• Samuele naabonisize cwañi bundume hanaasali mwanana?

• Danny naabonisize cwañi bundume?

• Samuele naatomile cwañi mutala omunde hanaali musupali?

• Bashemi ba Danny nebatomile cwañi mutala omunde?