Ki kabakalañi hamuswanela kuitukiseza? Mutu wakona kukula ni kuipumana mwa sipatela ka nako yesika libelelwa. Kacwalo, mueze momukonela kaufela ka nako ya cwale kuli muamuhele tuso yeliteñi, ilikuli haiba muipumana mwa muinelo ocwalo kwapili mukone kufumana likalafo zeswanela. Haiba mueza cwalo, mukabonisa kuli mwakuteka bupilo ni mulao wa Jehova ka za mali.—Lik. 15:28, 29.

Ki lika mañi zemukona kueza kuli muitukiseze?

• Mulapele ni kutaleleza ka tokomelo kadi ya DPA. a Bahasanyi babakolobelizwe bakona kuikungela kadi ya DPA ku sikombwa sa lihatiso ni kuungela bana babona babanyinyani kadi yebizwa Identity Card (ic)

• Haiba muitwezi, mukupe fomu ya Litaba Zeama Basali Babaitwezi (S-401). Fomu ye ika mitusa hahulu kueza likatulo zende ka za likalafo zekatokwahala ka nako yemunani mulwalo ni hamulaho wa kupuluha

• Haiba mutalusezwa kuli mutokwa kufiwa likalafo zetokwa mali kamba kutalusezwa kuli mutokwa kuswaliwa mwa sipatela, muzibise baana-bahulu inze kusanani nako mi muzibise ba sipatela kuli mukatabela kupotelwa ki sikombwa sa Lipaki za Jehova

Baana-bahulu bakona kutusa cwañi? Bakona kumitusa kutaleleza kadi ya DPA. Nihakulicwalo, baana-bahulu habana kumiezeza likatulo zeama likalafo kamba kufitisa maikuto abona a ka butu mwa litaba zetokwa kuli mañi ni mañi aikezeze katulo. (Maro. 14:12; Magal. 6:5) Haiba mutaluseza Baana-bahulu kuli muinelo omuli ku ona utokwa kuli mupompelwe mali, kapili-pili baka mitusa kuambola ni baba mwa Katengo Kakaswalisanisa Lipaki ni ba Sipatela (HLC).

Ba HLC bakona kutusa cwañi? Mizwale babasebeza mwa katengo ka HLC balutilwe kutusa baalafi ni ba mulao kuli bautwisise likatulo za bulapeli bwaluna zeama mali. Bakona kunyakisisa ni baalafi bamina ka za mialafelo yemiñwi yesatokwi kupompelwa mali. Haiba kwatokwahala, bakona kumitusa kufumana mualafi yakaitatela kumialafa kusina kupompelwa mali.

MUBUHE VIDIO YELI, ZEKONA KUMITUSA KUKETA MIALAFELO YEMINDE KUSINA KUPOMPELWA MALI, MI KIHONA MUKAALABA PUZO YELATELELA:

• Muitutileñi mwa vidio ye ka za lika zekona kumitusa kuitukiseza miinelo ya ka sipundumukela ka za likalafo zeama mali?

  Your answer