Mwa kweli ya September lukabeleka ka taata kuli lukalise lituto za Bibele kwa batu kaufela boluka kutaza ku bona ka kuitusisa broshuwa ya Muikole Bupilo Kuya Kuile! Bahasanyi bakona kuketa kueza bupaina bwa kutusa bwa kubiha lihora ze 30. Lukaeza cwañi musebezi oipitezi wo?

• Fa Musipili Wapili: Muitusise likepe la mafelelezo la broshuwa ye kuli mutuse mutu kutabela kuituta, mi mubonise moiezezwanga tuto. Muhupule bane babonisize kutabela kwamulaho, hamoho cwalo ni misipili ya makutisezo. Nihaike kuli batu babañwi nebahanile kuituta Bibele kwamulaho, mwendi bakona kutabela mulutelo waluna omunca ni broshuwa yenca. Libroshuwa haliswaneli kusiiwa fa mandu fo kusina batu kamba kulumelwa batu bane basika bonisa kutabela kwamulaho. Katengo ka Sebelezo ya Puteho kakona kulukisa kuli kube ni mikopano yemiñwi ya kuzwela mwa simu mwa kweli yeo.

• Mikutalezo Yemiñwi: Haiba puteho yamina ikutazanga ka kuitusisa likalani za lihatiso, mubeye fateñi broshuwa ya Muikole Bupilo Kuya Kuile! Mutaluseze batu bababonisa kutabela kuli broshuwa ye iitusiswanga kwa tuto ya Bibele yesalifelwi. Mubonise ka bukuswani moiezezwanga tuto ya Bibele, kamba mulukise kueza cwalo hasamulaho. Muokameli wa sebelezo wakona kulukisa kuli bahasanyi babaswanela bayo kalisa lituto za Bibele mwa libaka za lipisinisi ze mwa kalulo yamina ya simu. Hape mwendi mwakona kukalisa tuto ya Bibele kwa batu bomubeleka ni bona kamba kwa batu bomukutaza ku bona ka kutandalelwa.

Jesu naalulaezi kuli ‘lulute batu kuba balutiwa.’ (Mat. 28:19, 20) Haike musebezi oipitezi wo ulutuse kupeta mulelo wo ka kuitusisa hatiso ya Muikole Bupilo Kuya Kuile!