Luitusisa hande maata aluna haluitomela likonkwani za kwa moya. (1 Makor. 9:26) Kuitomela likonkwani kulutusa kuitusisa hande nako yesiyezi pili mafelelezo a lifasi le asika fita kale. (Maef. 5:15, 16) Ka nako ya kulapela sina lubasi mwakona kuikambota ka za likonkwani zemukona kuitomela mwa silimo sa sebelezo sesinca. Kuli muzibe momukona kuezeza cwalo, buka ya mukopano ye, inani litaba ka za likokwani zeñata zemukona kunyakisisa mina bañi ka tapelo.—Jak. 1:5.

Ka mutala, kana mwakona kuswalisana kuli mutuse mutu alimuñwi mwa lubasi lwamina kueza bupaina bwa kamita? Haiba muikutwa kuli hamuna kukona kukwanisanga lihora zetokwahala, mubuze babañwi kwa mapaina ili babanani miinelo yeswana ni yamina. (Liprov. 15:22) Mwendi mane mwakona kubuisana ni paina yomuñwi ka nako ya kulapela sina lubasi. Mi muñole tomahanyo yemukona kukwanisa. Haiba nemuezanga bupaina kwamulaho, munyakisise haiba miinelo yamina yamilumeleza kueza bupaina ka nako yacwale.

Kana yomuñwi mwa lubasi lwamina wakona kueza bupaina bwa kutusa ka kweli iliñwi kamba kufitelela? Haiba hamuna hande maata, mwendi mwakona kueza bupaina bwa kutusa ka kufumanehanga mwa simu ka nakonyana zazi ni zazi. Haiba hamuna hande nako ya kuyanga mwa simu mwahalaa sunda bakeñisa kuli mubelekanga nako kaufela kamba mwakena sikolo, mwendi mwakona kuketa kweli yenani mafelelezo a sunda a ketalizoho kamba yenani mazazi a pumulo. Fa kalenda yamina mubonise fo mulela kuezeza bupaina bwa kutusa mi muñole tomahanyo.—Liprov. 21:5

MUBUHE VIDIO YELI MUBE NI BUNDUME . . . MAPAINA, MI KIHONA MUKAALABA PUZO YELATELELA:

• Muinelo wanaaipumani ku ona kaizeli Aamand ululutañi ka za mo Jehova ababalelanga batu babaeza buitomboli kuli babe mapaina?