LIBAKA KUEZA CWALO HAKULI KWA BUTOKWA: Tuto yaluna ya Bibele ya ka butu ilutusa kuutwisisa “fokukuma bupala ni butelele ni bupahamo ni butungi bwa niti.” (Maef. 3:18) Hape ilutusa kuzwelapili kuba babasa nyazahali ni babasina sesinyazahala mwa lifasi lelimaswe ni kuzwelapili ‘kukumalela linzwi la bupilo.’ (Mafil. 2:15, 16) Tuto ya Bibele ya ka butu ilufa kolo ya kuituta litaba zekona kulutusa ka butu. Ki lika mañi zeluswanela kueza kuli lukone kutusiwa hahulu ki kubala ni kuituta Bibele?

MWAKUEZEZA CWALO:

• Mulale litimana ni kuñola lisupo lisikai mwa Bibele yamina yemuitusisanga kwa kuituta, ibe kuli ki yehatisizwe kamba ki ya kubalela fa kapangaliko

• Hamubala Linzwi la Mulimu, muipuzange lipuzo ze: ‘Ki mañi yabulelwa fa? Ki lika mañi zeneezahala? Neli lili? Neli kwa sibaka mañi? Ki kabakalañi hane kubile cwalo? Nekutahile cwañi?’

• Muutwisise litaba zemubala. Mubatisise taba kamba timana ya mwa Bibele ka kuitusisa lihatiso zetusa kwa kueza lipatisiso zefumaneha mwa puo yamina

• Munahanisise litaba zemubala kuli muzibe molikona kumituseza mwa bupilo bwamina

• Muitusise litaba zeo mwa bupilo bwamina bwa ka zazi ni zazi.—Luka 6:47, 48

MUBUHISE VIDIO YELI MUKUMALELE KU JEHOVA KA KUBA NI TUTO YA KA BUTU YETUSA, MI KIHONA MUKA ALABA LIPUZO ZELATELELA:

• Mizwale ni likaizeli babañwi babuleziñi ka za tuto ya ka butu?

• Ki kabakalañi haluswanela kukalisanga tuto yaluna ya ka butu ka tapelo?

• Ki lika mañi zeluswanela kueza kuli luutwisise hande litaba zeluituta mwa Bibele?

• Ki lisupo zecwañi zemuswanela kubeya mwa Bibele yamina yemuitusisanga kwa kuituta?

• Ki kabakalañi hakuli kwa butokwa kuba ni nako ya kuyeya haluituta Linzwi la Mulimu?

• Luswanela kuitusisa cwañi litaba zeluituta?