Kukala feela mwa January 2018, fa likepe lapili la Buka ya Mukopano wa Bupilo Bwaluna Bwa Sikreste ni Bukombwa kubeiwanga liakalezo za mwakuambolisanela ni batu. Mukona kuitusisa cwañi liakalezo zeo?

Hamufa Likalulo za Baituti: Muitusise puzo, liñolo, ni puzo ya musipili otatama ze mwa liakalezo za mwakuambolisanela ni batu. Nihakulicwalo, hakutalusi kuli muswanela kukutela kubulela manzwi aitusisizwe mwa vidio ya liakalezo za mwakuambolisanela ni batu. Mwakona kuitusisa muinelo oshutana, mutahisezo, kutalusa liñolo ka nzila yeshutana, ni zeñwi cwalo. Hape mwakona kufa hatiso yeñwi kwa lihatiso zeluitusisanga kwa kuluta batu, nihaike kuli hakusika boniswa cwalo mwa litaelo.

Hamuli Mwa Bukombwa: Liakalezo za mwakuambolisanela ni batu lilukiselizwe kulutusa. Haiba mutu watabela, lwakona kuzwiseza pili puisano, mi mwendi lwakona kuitusisa litaba ze mwa akalezo ya mwa kuezeza musipili wa makutisezo. Mwakona kucinca hanyinyani liakalezo za mwakuambolisanela ni batu kamba kuitusisa mutahisezo usili. Kana akalezo ya mwakuambolisanela ni batu ya kweli yefelile kamba liñolo leliñwi, zakona kutusa batu mwa kalulo yamina ya simu? Kana kunani taba yeñwi yesazo ezahala yebatabela hahulu batu mwa kalulo yamina ya simu? Kusina taba ni momuitusiseza liakalezo za mwakuambolisanela ni batu, mulelo wamina uswanela kuba wa ‘kueza lika kaufela kabakala taba yende, kuli muiabele babañwi.’—1 Makor. 9:22, 23.