Kupuzo ya lifu la Jesu ilufanga kolo yende yakunahanisisa limbuyoti zekatiswa ki tiululo, zecwale ka zuho ya bafu. Mulelo wa Jehova nesi wa kuli batu bashwange. Ki lona libaka kushwelwa ki mulatiwa waluna haili yeñwi ya lika zelutahisezanga hahulu masitapilu. (1 Makor. 15:26) Jesu naautwile hahulu bumaswe hanaaboni balutiwa bahae inze balila, bakeñisa lifu la Lazaro. (Joa. 11:33-35) Bakeñisa kuli Jesu ki siswaniso sa Ndatahe, lunani buikolwiso bwa kuli Jehova ni yena waikutwanga bumaswe halubona inze luli mwa masitapilu akushwelwa ki balatiwa baluna. (Joa. 14:7) Jehova unyolelwa hahulu kuzusa batanga bahae kwa bafu mi ni luna luswanela kunyolelwa kubona batu bao habaka zuha kwa bafu.—Jobo 14:14, 15.

Bakeñisa kuli Jehova ki Mulimu yaezanga lika ka mukwa oswanela, lunani buikolwiso bwa kuli zuho ya bafu ni yona ikaeziwa ka mukwa oswanela. (1 Makor. 14:33, 40) Mwa sibaka sakuba ni malilo, lukakopananga hamoho kuamuhela batu babazusizwe kwa bafu. Kana mwanahanisisanga hahulu ka za zuho sihulu hamuli mwa masitapilu? (2 Makor. 4:17, 18) Kana mwaitumelanga ku Jehova bakeñisa kulufa tiululo ni kulutaluseza mwa Bibele kuli babashwile baka zuha?—Makolo. 3:15.

• Ki bomañi kwa balikani bamina kamba bana bahabo mina bamunyolelwa hahulu kuto bona habaka zusiwa kwa bafu?

• Ki bomañi kwa batu bababulezwi mwa Bibele bamunyolelwa hahulu kuto bona ni kuambola ni bona?