LIBAKA KUEZA CWALO HAKULI KWA BUTOKWA: Baituti ba Bibele habaitukiseza, bakona kuutwisisa hande ni kuhupula litaba zelubaluta. Habanze bautwisisa ni kuhupula zebaituta, bakaeza zwelopili kabubebe. Nihase bakolobelizwe, bakatokwa kuitukisezanga mikopano ni bukombwa kuli ‘bazwelepili kutona.’ (Mat. 25:13) Kacwalo, haiba baituti ba Bibele baziba mwakuezeza tuto ya ka butu ni kuezanga cwalo nako ni nako, bakatusiwa mwa bupilo bwabona kaufela. Kuzwa feela halukala kuituta ni bona, luswanela kubatusa kuli babe ni mukwa wa kuitukisezanga tuto ya Bibele.

MWAKUEZEZA CWALO:

• Mubatomele mutala omunde. (Maro. 2:21) Hamuitukiseza tuto, munyakisisange mo tuto yeo ikayo tuseza muituti wamina. (km 11/15 3) Muituti wamina uswanela kubona kuli mulalile likalabo mwa hatiso yamina

• Mumususueze kuli aitukisezange. Hase mukalile kuituta Bibele ni mutu yomuñwi, mumutuse kulemuha butokwa bwa kuitukisezanga tuto mi mumubulelele bunde bwa kueza cwalo. Mumufe liakalezo za mwakona kufumanela nako ya kuitukisezanga. Bahasanyi babañwi bafanga muituti wabona kuli aitusise buka yabona yelalilwe hande habaituta mi baezanga cwalo kuli batuse muituti wabona kubona libaka kuitukiseza hakuli kwa butokwa. Mubabaze muituti wamina haitukiselize

• Mubonise muituti wamina mwakuitukiselezanga. Basakala feela kuituta Bibele ni mutu, bahasanyi babañwi babonisanga muituti wabona mwakuitukiseleza tuto ka kuitusisa litaba kaufela zene baswanela kuituta fa lizazi leo