Paseka yanaaezize Jesu ya mafelelezo neli ya butokwa hahulu. Bakeñisa kuli naatuha abulaiwa, naalukisize kuli ace Paseka hamoho ni baapositola bahae ni kukalisa tukiso yenca yene ikahupulwanga silimo ni silimo, ili ona Mulalelo wa Mulena. Kacwalo, aluma Pitrosi ni Joani kuli bayo lukisa muzuzu. (Luka 22:7-13; mubone siswaniso sesi fa kava.) Taba yeo iluhupulisa kuli luswanela kuitukiseza Kupuzo yekaeziwa la March 27. Kusina kukakanya, liputeho zeñata liezize litukiso ka za mubuleli, liswanisezo, ni litukiso zeñwi. Kono ki lika mañi zelukona kueza ka butu kuli luitukiseze Kupuzo?

Muitukiseze mwa pilu. Mubale ni kunahanisisa Mañolo A Kupuzo. Mwakona kufumana tomahanyo ya mañolo ao mwa kabukanyana ka Kutatuba Mañolo ka Zazi ni Zazi. Mi mwa Litaba Zeekelizwe B12 ze mwa Bibele ya Toloko ya Lifasi Lelinca, kunani tomahanyo yenani litaba zeñata. (Mubone ni Buka ya Mukopano wa Bupilo ni Bukombwa ya April 2020.) Mabasi akona kufumana litaba za kunyakisisa ka nako ya kulapela sina lubasi zebonisa butokwa bwa tiululo mwa Watch Tower Publications Index kamba mwa Buka ya Lipatisiso ya Lipaki za Jehova.

Mumeme babañwi. Muabane ka kutala mwa musebezi wa kumemela batu kwa Kupuzo. Munahane ka za batu bemukona kumema, babacwale ka batu bemuezize ku bona misipili ya makutisezo, bene muitutanga ni bona Bibele kwamulaho, mane ni bahabo mina. Baana-bahulu baswanela kubona teñi kuli bamema bahasanyi babafokozi. Muhupule kuli haiba mutu haapili mwa sibaka semupila ku sona, mwakona kufumana nako ni sibaka koika ezezwa Kupuzo mwa sibaka sapila ku sona, ka kuya fa kalulo yeli KA ZA LUNA ye fa webusaiti yaluna ya jw.org, ni kusina fa kalulo yeli “Kupuzo.”

Ki lika mañi zeñwi zelukona kueza kuli luitukiseze Kupuzo?