Mulikani utaluswa kuba “mutu yautwana ni yomuñwi kabakala lilato ni likute lebabonisana.” Ka mutala, Jonatani ni Davida nebabile ni silikani sesitiile Davida hasaabulaile Goliati.(1 Sam. 18:1) Yomuñwi ni yomuñwi wabona naabonisize mikwa yenetahisize kuli batabele kuba balikani. Kacwalo, bulikani bobutiile buitingile fa kuba ni zibo yenepahezi. Kufita fa kuziba mutu yomuñwi hañata kutokwa nako ni buikatazo. Kono fa Intaneti mutu wakona kuba mulikanaa mutu yomuñwi ka kusina feela fa libizo la hae. Bakeñisa kuli batu fa Intaneti bakona kunahana cimo zebaswanela kubulela, kukona kubabela bunolo kupata mikwa yabona ka kubeya feela litaba zekona kutahisa kuli batu babaange ka nzila isili. Kacwalo, ki kwa butokwa kunahana ka tokomelo ka za batu bemuketa kuli babe balikani bamina fa Intaneti. Haiba mutu yemusazibi amikupa bulikani fa Intaneti, musike mwa saba kumuhanela ka kunahana kuli muka muutwisa butuku. Babañwi baketile kusaitusisa mawebusaiti a kulumelana ka ona litaba ka kusaba likozi zekona kuba teñi. Kono haiba muketa kuitusisa mawebusaiti a kulumelana ka ona litaba, ki lika mañi zemuswanela kuhupula?

MUBUHE VIDIO YELI MUITUSISE HANDE MAWEBUSAITI A KULUMELANA KA ONA LITABA, MI KIHONA MUKAALABA LIPUZO ZELATELELA:

• Ki lika mañi zemuswanela kunyakisisa pili musika ñola taba yeñwi kamba kubeya maswaniso fa Intaneti?

• Ki kabakalañi hamuswanela kuketa hande balikani bamina fa Intaneti?

• Ki kabakalañi hamuswanela kuitomela nako yemutanda fa mawebusaiti a kulumelana ka ona litaba?—Maef. 5:15, 16