KUPILA SINA BAKRESTE
Mwakuitusiseza Mavidio Atalusa ka za Tuto ya Bibele
Lunani mavidio amane atalusa ka za tuto ya Bibele a kuitusisa mwa bukombwa. Ki ufi mulelo wa yeñwi ni yeñwi ya mavidio ao?
-
Ki Kabakalañi Haluswanela Kuituta Bibele?—Vidio Kaufela neilukiselizwe kutusa batu kutabela kuituta Bibele kusina taba ni tumelo yabona. Isusueza babaibuha kubatisisa mwa Bibele kuli bafumane likalabo kwa lipuzo zebaipuzanga batu mwa bupilo ni kufa litaba zeñwi za niti zefumaneha mwateñi. Italusa mwa kukupela tuto ya Bibele.
-
Ki Kabakalañi Haluswanela Kuituta Bibele? (vidio yekuswani) yaswana ni vidio kaufela kono yona ki yekuswani. Ikona kutusa hahulu kwa libaka kobapatehile hahulu batu.
-
Tuto ya Bibele I Eziwanga Cwañi? neilukiselizwe kutusa batu kutabela tukiso yaluna ya kuituta Bibele yesalifelwi ni kualaba lipuzo zebakona kuipuza batu ka za tukiso yeo, ni mwa kukupela tuto ya Bibele.
-
Muikole Tuto Yamina ya Bibele neilukiselizwe kubuhiswa kwa baituti ba Bibele. Nihaike kuli vidio ye ibonisizwe fa likepe la bubeli la buka ya Muikole Bupilo Kuya Kuile!, yakona kubuhiswa hamuituta mwa broshuwa ya Muikole Bupilo Kuya Kuile! Vidio ye italusa litaba ze mwa buka ni zaswanela kulibelela muituti ka nako ya tuto.
Nihaike kuli vidio yeñwi ni yeñwi neilukiselizwe mulelo usili, lwakona kuluma kamba kubuhisa yeñwi ya ku ona kwa batu haiba kutokwahala. Bahasanyi basusuezwa kuziba hande mavidio ao ni kuitusisa ona hande mwa bukombwa.
