Likozi za ka taho liatile hahulu mazazi a. Hakuba ni kozi, tukiso ya kutusa babatahezwi ki kozi itokwanga kuonga-ongiwa ni kuokamelwa hande. Ka libaka leo, ba Sitopa Sesietelela balukisize kuli fa liofisi kaufela za mutai kube ni Liluko Lelitalima za Kutusa Babatahezwi ki Likozi.

Mizwale baba mwa liluko leo basautwa feela kuli kunani kokubile ni kozi, balizezanga baana-bahulu ba kwa sibaka seo ka bubebe ilikuli bazibe tuso yekona kufiwa kwa bahasanyi. Haiba muinelo utaata hahulu kuli mane bahasanyi ba mwa sibaka seo habakoni kuutatulula, ofisi ya mutai ikaluma mizwale babacuukile kuli baetelele mwa musebezi wa kutusa babatahezwi ki kozi. Mizwale bao bakona kukupa baitateli kamba linubu zeswana ni lika zesinyehile, kamba bakona kuleka ni kufa bahasanyi lika zetokwahala.

Kunani bunde bobuñata bwa kulukisa miinelo ka nzila ye. Kutahisa kuli kusike kwaba ni musebezi omuñata, filikanyo, ni lisinyehelo za masheleñi ni liitusiso, ili zekona kuba teñi haiba mizwale baikezeza musebezi bona bañi.

Mizwale babaketilwe ki ofisi ya mutai bakona kubona teñi kuli ki masheleñi akuma kai akatokwahala ni kuli ki baitateli babakai babaka tokwahala mwa musebezi wa kutusa babatahezwi ki kozi. Hape bakona kusebelisana hamoho ni makwambuyu ba muuso, ili babakona kulutusa kuli lueze ka bubebe musebezi. Kacwalo, mizwale ni likaieli habaswaneli kueza buikatazo bwa kuzwisa linubu, kuluma lituso, kamba kuya kwa sibaka kokubile ni kozi konji haiba bakupiwa kueza cwalo.

Nihakulicwalo, hakuba ni kozi, lubatanga kutusa. (Maheb. 13:16) Lwalata mizwale baluna! Lukona kueza cwañi? Sa butokwa ni kufita, lwakona kulapelela mizwale babatahezwi ki likozi hamoho cwalo ni mizwale baba batusa. Hape lwakona kutusa ka kufa nubu kwa musebezi wa mwa lifasi kaufela. Liofisi za mutai ki zona ze ka bona kolikona kuitusiswa hande linubu zeo ka kuetelelwa ki Sitopa Sesietelela. Mi haiba lwatabela kuabana luli ka butu, lwakona kubonisa kuli lulukuluhile kutusa ka nako ifi kamba ifi ka kutaleleza fomu ya Kupo ya Buitateli Kwa Misebezi ya LDC (DC-50).

MUBUHE VIDIO YELI, MUUNDA ONE USINYIZE LIKA MWA BRAZIL, MI KIHONA MUKAALABA PUZO YELATELELA:

Ki lika mañi zemitabisize ka za buikatazo bone baezize Lipaki za Jehova kuli batuse bane batahezwi ki likozi hane kubile ni muunda kwa Brazil mwa 2020?