Mulao wa Mushe neubonisa kuli muuna yabata kuleleka musalaa hae naaswanela kuñola liñolo la teleko. Mulao wo neutusa kuli batu basike bamatukela kufelisa linyalo labona. Nihakulicwalo, baeteleli ba bulapeli bane bapila mwa linako za Jesu nebatahisize kuli kulelekana kube hahulu bunolo. Baana nebalelekanga basali babona ka mabaka ashutana-shutana. (nwtsty litaba za kuituta Mare. 10:4, 11) Jesu naabonisize kuli linyalo litomilwe ni kulumelezwa ki Jehova. (Mare. 10:2-12) Muuna ni musali babanyalani nebaka ba “nama iliñwi” mi nebasike bakauhana. Ka kuya ka taba yeñozwi kwa Mateu ili yeswana ni taba yeo ya kwa Mareka, libaka lililiñwi feela la mwa Mañolo lelikona kutahisa kuli kube ni teleko mwa linyalo ki haiba yomuñwi wabona aba ni “muzamao wa buhule.”—Mat. 19:9.

Kacenu, batu babañata habaangi linyalo sina mwanaaliingela Jesu, kono baliinga sina mone baliingela Bafalisi. Hakuba ni matata mwa linyalo, batu mwa lifasi bamatukelanga kufelisa linyalo. Kono Bakreste babanyalani baanga buitamo bone baezize kuli ki bwa butokwa hahulu mi balikanga mobakonela kaufela kuitusisa likuka za mwa Bibele kutatulula miinelo yetaata yebakopana ni yona. Hamulaho wa kubuha vidio yeli, Lilato ni Likute Litahisa Kuli Lubasi Luswalisane, mualabe lipuzo zelatelela:

• Mukona kusebelisa cwañi taba ye kwa Liproverbia 15:1 mwa linyalo lamina, mi ki kabakalañi kueza cwalo hakuli kwa butokwa?

• Taba ye kwa Liproverbia 19:11 ikona kumitusa cwañi kutibela matata amañwi mwa linyalo lamina?

• Haiba mukopana ni butata bobutuna hahulu mwa linyalo lamina, ki kabakalañi hamusa swaneli kunahana za kufelisa linyalo lamina, mi ki lipuzo mañi zemuswanela kuipuza?

• Kulatelela zeñozwi kwa Mateu 7:12 kukona kumitusa cwañi kuba muuna kamba musali yomunde mwa linyalo?