Kuba ni mafulofulo kususueza batu beluambola ni bona. Haluba ni mafulofulo, lwakona kuhoha mamelelo ya bateelezi baluna. Hape halubulela ka mafulofulo, lubonisa kuli luunga taba yelukutaza kuba ya butokwa. Kusina taba ni simuluho yaluna kamba butu bwaluna, lwakona kuba ni mafulofulo. (Maro. 12:11) Ka mukwa ufi?

Sapili, muhupule kuli taba yemukutaza ki ya butokwa. Munani tohonolo ya kushaela “taba yende ya lika zende!” (Maro. 10:15) Sa bubeli, munahanisise mo taba yende ikona kutuseza batu bemukutaza ku bona. Batokwa luli kuutwa lushango lwamina. (Maro. 10:13, 14) Sa mafelelezo, mubulele ka mafulofulo, muitusise hande liponiso za lilama za mubili, mi mubonise silikani ka kubamenyeza.

MUBUHE VIDIO YELI, MUBE NI TABO MWA MUSEBEZI WA KUTUSA BATU KUBA BALUTIWA KA KUEKEZA KWA BUIKONELI BWAMINA MWA BUKOMBWA—MULUTANGE KA MAFULOFULO, MI KIHONA MUKAALABA LIPUZO ZELATELELA:

• Ki nto mañi yenetahisize kuli bo Neeta bafelelwe ki mafulofulo hane baituta ni bo Tabo?

• Ki nto mañi yenetusize bo Neeta kuba ni mafulofulo hape?

• Ki kabakalañi haluswanela kuisa pilu kwa mikwa yeminde ya bateelezi baluna?

• Haluba ni mafulofulo, lukona kutusa cwañi baituti baluna ba Bibele ni batu babañwi?