Kuli baituti ba Bibele batabise Mulimu, batokwa kuba ni tumelo yetiile. (Maheb. 11:6) Lukona kubatusa kueza cwalo ka kuitusisa buka ya Muikole Bupilo Kuya Kuile! Mwa buka ye kunani mañolo akoñomekilwe, litaba zetusa baituti kunahanisisa, lipuzo zetusa, mavidio asusueza, ni maswaniso amande. Luyaha ka kuitusisa liyahiso zesaci mulilo halunze lutusa baituti baluna ba Bibele kuba ni tulemeno twa Sikreste ni kuba ni silikani ni Mulimu.—1 Makor. 3:12-15.

Batu babañwi kubabelanga hahulu taata kulumela kuli bakona kuba balikani ba Mulimu, ili yebasa boni. Kacwalo lutokwa kubatusa kuli bazibe Jehova ni kumusepa.

MUBUHE VIDIO YELI MUTIISE TUMELO YAMINA KU JEHOVA KA KUITUSISA BUKA YA “MUIKOLE BUPILO KUYA KUILE!” MI KIHONA MUKAALABA LIPUZO ZELATELELA:

• Luziba cwañi kuli kaizeli naaitukiselize hande tuto?

• Naaitusisize cwañi hande lipuzo zeñwi kuli atuse muituti kutalusa maikuto ahae ka za liñolo la Isaya 41:10, 13?

• Vidio ni litimana za mwa Bibele nelitusize cwañi muituti?

Batu babañata habautwisisi taluso ya tiululo, kamba kuiinga sina mpo yabafile Mulimu. (Magal. 2:20) Kabakaleo, luswanela kubatusa kuli babe ni tumelo mwa sitabelo sa tiululo ya Jesu.

MUBUHE VIDIO YELI MUTIISE TUMELO YAMINA KU JESU KA KUITUSISA BUKA YA “MUIKOLE BUPILO KUYA KUILE!” MI KIHONA MUKAALABA LIPUZO ZELATELELA:

• Luziba cwañi kuli muzwale naaitukiselize hande tuto?

• Naatalusize cwañi hande litaba ze mwa kalulo yeli “Mubone Litaba Zeñwi” kuli atuse muituti?

• Ki kabakalañi tapelo haili ya butokwa ku muituti?