Bibele ya kuteeleza ki nto mañi? Bibele ya kuteeleza ki litaba zebalilwe za Bibele ya Toloko ya Lifasi Lelinca yebolosozwi. Izwisiwanga hanyinyani-hanyinyani mwa lipuo zeñata-ñata. Bunde bwa Bibele ya kuteeleza ki bwa kuli kuitusisizwe manzwi a batu babashutana-shutana ku mutu ni mutu yabulezwi mwa Bibele. Litaba za mwateñi libalilwe ka nzila yekoñomeka hande mihupulo ni maikuto ili kutahisa kuli litaba za mwa Bibele litaluswe ka kunepahala.

Batu babañwi basweli kutusiwa cwañi ki Bibele ya kuteeleza? Batu babañata babateelezanga kamita kwa Bibele ya kuteeleza, batabelanga mo litaba zeo libatusezanga kuikutwa inge baba libona inze liezahala luli. Baikutwanga kuli ka kuutwa batu babashutana-shutana bababalile fa batu bababulezwi mwa Bibele, bakona kubeya hande mwa pono likezahalo za mwa Bibele ni kuutwisisa hande litaba zeñozwi mwateñi. (Liprov. 4:5) Babañata hape bafumani kuli kuteelezanga kwa Bibele ya kuteeleza kwabaomba-ombanga habanani lipilaelo.—Samu 94:19.

Kuutwa Linzwi la Mulimu inze libaliwa ka kutumusa kwakona kulutusa hahulu mwa bupilo bwaluna. (2 Makol. 34:19-21) Haiba kalulonyana kamba Bibele mukatumbi ya kuteeleza yafumaneha mwa puo yemuutwisisa, kana mwakona kulukisa kuli muteelezange ku yona kamita mwa bupilo bwamina?

MUBUHE VIDIO YELI, KULUKISA BIBELE YA KUTEELEZA—KALULONYANA YA VIDIO, MI KIHONA MUKAALABA PUZO YELATELELA:

Ki lika mañi zemitabisize ka za kulukiswa kwa Bibele ya kuteeleza?