KUPILA SINA BAKRESTE
Mwakuezeza Mikopano ya Kuzwela Mwa Sebelezo ya Mwa Simu Yetusa
Sina feela mikopano kaufela ya puteho, mikopano ya kuzwela mwa sebelezo ya mwa simu ki mpo yezwa ku Jehova ili yelutusa kususuezana kuba ni lilato ni misebezi yeminde. (Maheb. 10:24, 25) Mikopano ye iswanela kutanda mizuzu ye mwahalaa 5 kuisa 7, mi nako ye ikopanyeleza kuonga-onga likwata, kutaluseza bahasanyi kalulo ya simu ko bakayo kutaleza, ni kulapela. (Haiba mukopano wa kuzwela mwa simu uezwa hamulaho wa mikopano ya puteho, mukopano wo uswanela kuba omukuswani ni kufita.) Muzwale ya ka zamaisa mukopano wo uswanela kuitukiseza kuitusisa litaba zekatusa bahasanyi babaka abana mwa bukombwa fa lizazi leo. Ka mutala, la Mukibelo ili fo buñata bwa bahasanyi nebasika abana mwa bukombwa mwahalaa sunda, neikaba hande kunyakisisa zelukona kubulela ku muñaa ndu. Ki litaba lifi zeñwi zetusa zekona kunyakisiswa kwa mukopano wo?
-
Kuitusisa yeñwi ya liakalezo za mwakuambolisanela ni batu zefumaneha mwa Buka ya Mukopano wa Bupilo Bwaluna Bwa Sikreste ni Bukombwa
-
Mwakukaliseza puisano ka kuitusisa kezahalo yeezahezi cwanoñu fa kamba taba yeñwi ye bihilwe mwa makande
-
Mwakualabela mutu yabulela taba yebaitusisanga hahulu batu mwa simu hababata kukauleza puisano
-
Mwakualabela mutu yasalumeli kuli Mulimu uteñi, mutu yalumela mwa tuto ya kuli lika nelitile ka kuipilaula, mutu yabulela puo isili, kamba mutu yaswalisana ni bulapeli bobusa zibahali hahulu mwa kalulo yamina ya simu
-
Mwakuitusiseza kalulo yeñwi ya fa webusaiti ya jw.org, ya fa progilamu ya JW Library, kamba ya mwa Bibele
-
Mwakuitusiseza yeñwi ya lihatiso zeluitusisanga kwa kuluta batu
-
Mwakuezeza kalulo yeñwi ya bukombwa, inge cwalo kukutaza ka kuitusisa foni, kuñola mañolo, kueza bupaki bwa fa nyangela, kueza misipili ya makutisezo, kamba kuzamaisa lituto za Bibele
-
Kunyakisisa likupuliso ka za mwakuisileleleza kwa likozi, mwakuezeza licinceho haiba kwa tokwahala, mwakuboniseza mikwa yeminde, mwakubela ni mubonelo omunde, kamba taba yeñwi yeswana ni ze
-
Kunyakisisa tuto kamba vidio ya mwa broshuwa ya Muikataze Kubala ni Kuluta
-
Momukona kutuseza ni kususueza mutu yemusebeza ni yena mwa bukombwa
-
Kunyakisisa liñolo lelikona kutusa mwa bukombwa kamba kutalusa mutala omuñwi osusueza wa zeezahezi mwa bukombwa
