Hona cwale-cwale fa, Jehova ukatuhela kubonisa pilu-telele yahae kwa lifasi lelimaswe le. Bulapeli bwa buhata bukasinyiwa, linaha zeswalisani likalwanisa batu ba Mulimu, mi Jehova ukayundisa babamaswe fa Armagedoni. Bakreste banyolezwi hahulu kubona likezahalo za butokwa ze.

Ki niti kuli, haluzibi litaba kaufela ka za ñalelwa yetuna. Ka mutala, haluzibi luli foika kalela. Haluzibi mabaka akatahisa kuli baeteleli ba lipolitiki balwanise bulapeli. Haluzibi kuli linaha likaanga nako yekuma kai inze lilwanisa batu ba Mulimu mi haluzibi ni zekaamiwa mwa twaniso yeo. Hape haluzibi luli zakaitusisa Jehova kwa kuyundisa batu babamaswe fa Armagedoni.

Nihakulicwalo, Bibele ilutaluseza litaba kaufela zelutokwa ilikuli lube ni buikolwiso ni bundume ka za lika zekaezahala kwapili. Ka mutala, lwaziba kuli lupila kwa mafelelezo a “mazazi a mafelelezo.” (2 Tim. 3:1) Lwaziba kuli kulwaniswa kwa bulapeli ‘kukafukuzwa,’ ilikuli bulapeli bwa niti busike bwayundiswa. (Mat. 24:22) Lwaziba kuli Jehova ukapilisa batu bahae. (2 Pit. 2:9) Mi lwaziba kuli mutu yaketile Jehova kuli ayundise babamaswe ni kupilisa buñata bobutuna bwa batu fa Armagedoni ki yalukile mi unani maata amatuna hahulu.—Sin. 19:11, 15, 16.

Zekaezahala kwapili likatahisa kuli batu ‘baweleliswe ki sabo.’ Nihakulicwalo, haiba lubala ni kunahanisisa ka za mo Jehova naapiliselize batu bahae kwamulaho ni zabulezi ka za zekaezahala kwapili, lwakona ‘kuyema ni kunangukisa litoho zaluna’ ka buikolwiso kuli kupiliswa kwaluna kusutelezi.—Luka 21:26, 28.