Bakeñisa kuli ñalelwa yetuna isutelezi, musebezi waluna wa kukutaza uswanela kuezwa ka putako. (Liprov. 24:11, 12, 20) Kuli lutuse batu, lwakona kuitusisa makadi azibahaza webusaiti ya jw.org kulibisa mamelelo yabona kwa Linzwi la Mulimu ni kwa webusaiti yaluna yeo. Kadi yeo inani kodi yelibisa batu kwa vidio ya toho ya taba yeli Ki Kabakalañi ha lu Swanela ku Ituta Bibele? mi imema batu kuli baikupele kuziba litaba zeñata kamba baikupele tuto ya Bibele. Batu babañwi habatabeli kuamuhela lihatiso zaluna kono batabela kukena fa webusaiti yaluna. Musike mwakata-kata kubafa kadi yeo. Nihakulicwalo, musike mwasiya makadi ao kwa batu babasa bonisi cisehelo.

Hamunze mueza misebezi yamina ya ka zazi, mwakona kutahisa kuli mutu yomuñwi atabele kuteeleza ku mina ka kubulela kuli: “Kunani nto yeñwi yenibata kumifa. Kadi ye imilibisa kwa webusaiti yenani litaba ni mavidio abulela za litaba zeshutana-shutana emusa tokwi kulifela sesiñwi.” (Joa. 4:7) Bakeñisa kuli makadi ao apangilwe ka bunyinyani, mwakona kushimbanga asikai kuli muikambote ni babañwi ka nako kaufela fomufumanela kolo ya kueza cwalo.