Manyalo amande a Bakreste alumbekehisa Jehova mi atahisa kuli bo muuna ni musali babanyalani babe ni tabo. (Mare. 10:9) Kuli Bakreste babe ni linyalo lelitiile ni la tabo, baswanela kuitusisa likuka za mwa Bibele habaketa mutu wa kunyalana ni yena.

Mukaeza hande haiba musakeni mwa libato ni mutu yomuñwi konji hase mufitelezi “nako ya litakazo za kwa bunca,” ili nako yeo litakazo za somano libanga zetuna hahulu kuli mane mutu wakona kupalelwa kueza likatulo zende. (1 Makor. 7:36) Muitusise hande nako yemusali makwasha kuli mutiise silikani samina ni Mulimu ni kuba ni tulemeno twa Sikreste. Kueza cwalo kuka mitusa kukondisa hamuka kena mwa linyalo.

Musika lumela kale kunyalana ni mutu yomuñwi, mubone teñi kuli muba ni nako yeñata ya kuziba “mutu wa mwahali, wa mwa pilu.” (1 Pit. 3:4) Haiba mulemuha kuli kunani lika zemibilaeza ka za mutu yemubata kunyalana ni yena, munyakisise lika zeo ni yena. Sina feela mokubelanga mwa bulikani kaufela, mwa linyalo muswanela kuisa hahulu pilu kwa lika zemukona kufa mutu yemunyalani ni yena kufita kuisa hahulu pilu kwa lika zemukona kufiwa. (Mafil. 2:3, 4) Haiba muitusisa likuka za mwa Bibele pili musika kena kale mwa linyalo, ku ka mibela bunolo kuzwelapili kuezanga cwalo ni hasemukeni mwa linyalo mi mukaba ni tabo mwa linyalo.

MUBUHE VIDIO YELI, KUITUKISEZA KUKENA MWA LINYALO—KALULO 3: “KUBALA LISINYEHELO,” MI KIHONA MUKAALABA LIPUZO ZELATELELA:

• Libato la kaizeli yeluboni mwa vidio ni bo Shane nelizwezipi cwañi?

• Ki lika mañi zanaalemuhile kaizeli hasaazibile hande bo Shane?

• Kaizeli yo naatusizwe cwañi ki bashemi bahae, mi ki katulo mañi yende yanaaezize?