• SILIMO SENE BAPEPILWE: 1941

• NAHA KONE BAPEPEZWI: BENIN

• LITABA ZEEZAHEZI: NEBANYALANGA LIBALI, MI NEBALWANISANGA LIPAKI ZA JEHOVA

BUPILO BWAKA KWAMULAHO:

Nisimuluha mwa Cotonou, ili muleneñi omutuna mwa naha ya Benin. Lubasi lwaka nelulapela kwa keleke ya Katolika, kono na nenisa yangi kwa keleke kamita. Mwa sibaka sene nipila ku sona, batu babañata bane balapela kwa Katolika nebanyalanga libali, mi manyalo abona naangiwa kuba a ka mulao. Hamulaho wa nako, ni na nanyala basali babane.

Mwa lilimo za ma 1970, sikwata sa batu babañwi safetuhela muuso, mi nanahana kuli kueza cwalo nekuka tusa kuli lika libe hande mwa naha yaluna. Naswalisana ni sikwata sa batu bao mi naikenya mwa litaba za bupolitiki. Sikwata sa batu bane bafetuhezi muuso bao nesisa tabeli Lipaki za Jehova, bakeñisa kuli Lipaki nebasa ikenyi mwa lipolitiki. Nenili yomuñwi wa batu bane banyandisize Lipaki. Lipaki bane bali balumiwa hane balunduzwi mwa naha ka silimo sa 1976, neninani buikolwiso bwa kuli nebasike bakuta nikamuta.

BIBELE MONE ICINCELIZE BUPILO BWAKA:

Sikwata sa batu bane bafetuhezi muuso nesituhezi kueza cwalo mwa silimo sa 1990. Nto yene nikomokisize hahulu ki kubona Lipaki bane bali balumiwa habakutela mwa naha yaluna hape. Nakalisa kunahana kuli mwendi Mulimu naainzi ni bona batu bao. Ka yona nako yeo, nafumana musebezi kwa kampani isili. Yomuñwi wa batu bane nibeleka ni bona kwa kampani yeo neli Paki, mi kapili-pili akalisa kunitalusezanga ka za bulapeli bwahae. Naanibonisize Mañolo a mwa Bibele abonisa kuli Jehova ki Mulimu yalilato ni yanani katulo yelukile. (Deuteronoma 32:4; 1 Joani 4:8) Tulemeno to netu nitabisize hahulu. Nenibata kuituta zeñata ka za Jehova, kacwalo nalumela kuituta Bibele.

Nakonyana kuzwa fo, nakalisa kufumanehanga kwa mikopano ya Lipaki za Jehova. Nenitabisizwe hahulu ki lilato la luli lene niboni, nekusina ketululo ya mubala, mi hakuna sikwata sa batu sene siingiwa kuba sa butokwa hahulu kufita babañwi. Kufumanehanga kwa mikopano ya Lipaki za Jehova kamita neku nitusize kulemuha kuli neli balutiwa ba Jesu ba niti.—Joani 13:35.

Nenilemuhile kuli nenitokwa kuzwa mwa Keleke ya Katolika kuli nisebeleze Jehova. Kueza cwalo nesi nto yebunolo kakuli nenisaba mone baka niingela batu babañwi hane nikaeza cwalo. Hamulaho wa nako, Jehova anitusa kuba ni bundume mi nazwa mwa Keleke ya Katolika.

Nekunani cinceho yeñwi yetuna yene nitokwa kueza. Kuituta Bibele neku nitusize kulemuha kuli Mulimu halumelezi kunyala libali. (Genese 2:18-24; Mateu 19:4-6) Jehova naanga kuli musali yene nikalile kunyala pili ki yena musalaa ka luli. Kacwalo, nañolisa linyalo laluna ni musalaa ka wapili, mi nalukulula basali babañwi bao ni kubafa lituso zene batokwa za kwa mubili. Hamulaho wa nako, bababeli kwa basali bane ninyalanga baba Lipaki za Jehova.

MONITUSELIZWE:

Nihaike kuli musalaa ka usalapela kwa Katoloka, wakuteka katulo yeniezize ya kusebeleza Jehova. Sibeli sa luna luikutwa kuli senili muuna yomunde.

Neninahananga kuli ka kuikenya mwa litaba za lipolitiki nenika tusa batu mwa silalanda senipila ku sona, kono buikatazo bo neli bwa mbango. Ka nako ya cwale, nilemuhile kuli ki Mubuso wa Mulimu feela okatatulula miinelo yetaata yebakopana ni yona batu. (Mateu 6:9, 10) Niitebuha hahulu ku Jehova yanitusize kuba ni tabo ya luli mwa bupilo.

• SILIMO SENE BAPEPILWE: 1977

• NAHA KONE BAPEPEZWI: BRAZIL

• LITABA ZEEZAHEZI: PASITA MWA KELEKE YA PENTEKOSITI

BUPILO BWAKA BWA KWAMULAHO:

Nihuliselizwe kwa sibaka sesi kwahule ni tolopo sesibizwa Itu, mwa São Paulo. Mwa sibaka seo nekunani hahulu bukebenga.

Neninili mutu yanaalata hahulu mifilifili mi neninani muzamao wa buhule. Mane nenilekisanga milyani yekola. Hamulaho wa nako, nalemuha kuli mupilelo waka neuka tahisa kuli nitamiwe kamba mane kubulaiwa, kacwalo natuhela mikwa yeo. Mi nakala kuswalisana ni Keleke ya Pentekositi, mi mane naba pasita mwateñi.

Neniikutwa kuli nenika kutusa hahulu batu ka kuswalisana ni keleke yeo. Mi mane neniyanga kwa ndu ya moya mwa sibaka sene nipila ku sona ni kuyo bulela litaba zeama bulapeli, mi nenizibahalile hahulu mwa silalanda seo. Kono hanyinyani-hanyinyani, nalemuha kuli batu ba mwa keleke yeo kaufelaa bona nebasa iyakatwi batu babañwi, mi mane nebasa kuteki Mulimu. Neniikutwa kuli bulapeli bo nebubata feela kufumana masheleñi. Kacwalo, naikatulela kuzwa mwateñi.

BIBELE MONE ICINCELIZE BUPILO BWAKA:

Hane nikalile kuituta Bibele ni Lipaki za Jehova, onafo feela nalemuha kuli bashutana ni bulapeli bobuñwi kaufela. Nenitabisizwe hahulu ki lika zepeli. Sapili, Lipaki za Jehova hababulelangi feela za kulata Mulimu ni batu babañwi; kono babonisanga lilato leo. Sabubeli, habaikenyangi mwa lipolitiki kamba kuya kwa ndwa. (Isaya 2:4) Lika zepeli zeo neli nikolwisize kuli nifumani bulapeli bwa niti, ili munyako okumbani oya kwa bupilo bobusa feli.—Mateu 7:13, 14.

Nenilemuhile kuli nenitokwa kueza licinceho zetuna kuli nitabise Mulimu. Nenitokwa kuisa hahulu pilu kwa lubasi lwaka. Mi hape nenitokwa kuba ni buikokobezo. Nesi nto yebunolo kueza licinceho zeo, kono ka tuso ya Jehova, nenikonile kueza cwalo. Bakuluna nebatabisizwe hahulu ki licinceho zene niezize zeo. Nihaike kuli bona nebakalile kuituta Bibele pili na nisika kalisa kale, nebaezize zwelopili yetuna hamulaho wa kubona licinceho zene niezize. Nakonyana kuzwa fo, sibeli saluna lwaikatulela kuba Lipaki za Jehova. Nelukobelizwe fa lizazi leliswana.

MONITUSELIZWE:

Na ni bakuluna lunani tabo kabakala kutusa bana baluna babalaalu kuba ni silikani sesinde ni Jehova. Lubasi lwaluna lutabile luli. Niitumela ku Jehova kabakala kunitusa kuziba niti ye mwa Linzwi lahae yona Bibele. Kaniti luli, Bibele yacincanga bupilo bwa batu! Zeezahezi ku na lipaka buniti bwa taba yeo.

• SILIMO SENE BAPEPILWE: 1957

• NAHA KONE BAPEPEZWI: AUSTRALIA

• LITABA ZEEZAHEZI: KUNYANDISWA INZE NISALI MWANANA

BUPILO BWAKA BWA KWAMULAHO:

Nenihulezi mwa tolopo ya Newcastle, mwa New South Wales. Ki na mweli mwa lubasi lwa bana ba 7, bashemi baluna nebanani situhu, mi bo ndataa luna hape nebanwa hahulu bucwala. Bo ma neba ninyandisa, mi hape nebaitusisanga lipulelo zemaswe. Kamita, nebabulelanga kuli ni mutu yamaswe mi nikayo tukufazwa mwa lihele. Nenisabiswanga hahulu ki manzwi abona ao.

Fokuñwi nenipalelwanga kuya kwa sikolo bakeñisa kuli bo ma neba ninatanga mi neni holofalanga. Hane nikwanisize lilimo ze 11, nazwisiwa mwa lapa la bashemi baka, naisiwa kwa sibaka sesiñwi sa muuso, mi hamulaho wa nako, nazwisiwa mwa sibaka seo ni kuisiwa kwa sibaka sesiñwi sa bulapeli bwa katolika. Hase nikwanisize lilimo ze 14, natoba mwa sibaka seo sa bulapeli bwa katoloka. Bakeñisa kuli nenisa tabeli kukutela kwa lapa la bashemi baka, nakala kupila mwa makululu a mwa Kings Cross, ili sibaka sesi kwahule sa muleneñi wa Sydney.

Ka nako yene nipila mwa makululu ao, nakalisa kuitusisa milyani yekola, kunwa maswe bucwala, kubuhanga maswaniso a mapunu, ni kuba ni muzamao wa buhule. Zeneezahezi ku na nako yeñwi neli nisabisize hahulu. Nenipila mwa ndu ya muuna yomuñwi yanaanani sibaka kone banwelanga bucwala batu. Zazi leliñwi manzibwana, atopotelwa ki baana bababeli. Anitaluseza kuli niye kwa musiyo, kono neniutwa litaba kaufela zene baambola. Muñaa sibaka seo naaeza litukiso za kuli anilekise kwa baana bao. Baana bao nebaka nipata mwa sisepe sesilwalanga libyana ni kuniisa kwa naha ya Japan kuli niyo sebeza mwa sibaka mokulekiswa bucwala. Nenisabile hahulu mi nazwela mwa lihaulo ka kuswala kwa tusipi ni kutulela fafasi.

Hane ninze ni mata cwalo, nakatana muuna yanaatilo pota mwa muleneñi wa Sydney mi namutaluseza muinelo one nili ku ona, mi neninahana kuli mwendi muuna yo naaka nifa masheleñi. Kono muuna yo animemela kwa sibaka kwanaaina kuli niyo tapa ni kuca sico. Mi nenizwezipili kupila ni muuna yo. Hamulaho wa silimo, lwanyalana.

BIBELE MONE ICINCELIZE BUPILO BWAKA:

Hane nikalile kuituta Bibele ni Lipaki za Jehova, naaamiwa hahulu ki litaba zene niituta. Neniikutwile hahulu bumaswe hane nitutile kuli Satani ki yena yatahisa lika zemaswe; kakuli kuzwa feela kwa bwanana, nenilutilwe kuli Mulimu ki yena yalutahiseza manyando. Nenitabile hahulu hane niitutile kuli Mulimu hafangi batu koto ka kubatukufaza mwa lihele ili tuto yene nitahisezanga hahulu sabo.

Nenitabisizwe hahulu ki Lipaki kakuli baezanga likatulo zabona ka kulatelela likuka za mwa Bibele. Habalutangi feela babañwi zeibulela Bibele kono bapila ka kulatelela zeibulela Bibele. Nihaike kuli nenili mutu yataata, mi nenibulelanga ni kueza lika zemaswe, Lipaki nebazwezipili kunibonisa lilato mi neba nikuteka.

Nenizwezipili kuikutwa kuli hanina tuso mi hani wa butokwa. Nenizwezipili kuikutwanga hahulu bumaswe nihaiba hamulaho wa kukolobezwa sina yomuñwi wa Lipaki za Jehova. Nenilata Jehova, kono neniikutwanga kuli Jehova hakoni kulata mutu yaswana sina na.

Neniezize licinceho zetuna hamulaho wa lilimo ze 15 kuzwa fonikolobelezwa. Hane nili kwa Ndu ya Mubuso ya Lipaki za Jehova, mubuleli yanaafa ngambolo aama kwa liñolo la Jakobo 1:23, 24. Litimana zepeli zeo libapanya Linzwi la Mulimu kwa siiponi sesi lutusa kuipona luna bañi sina mwalubonela Jehova. Naipuza kuli kana moniiponela kona mwanibonela Jehova?. Sapili nenisika isa pilu kwa taba yeo. Nenisa ikutwa kuli Jehova haakoni kunilata.

Hamulaho wa mazazinyana, nenibalile liñolo leliñwi mwa Bibele lene linitusize kucinca mubonelo waka. Neli liñolo la Isaya 1:18, iliko Jehova abulela kuli: “Hamutahe cwale, lulukise litaba mwahalaa luna. Libi zamina niha likaba za bufubelu bobutona, likafetuha zesweu sina litwa.” Neniikutwa inge kuli Jehova naanibulelela kuli: “Taha Vicky, lulukise litaba mwahalaa luna. Nakuziba hande, naziba libi zahao, naziba pilu yahao, mi nakulata.”

Nenisika bona buloko zazi lale. Nenisa kakanya ka za kuli Jehova wakona kunilata, nihakulicwalo, nanahanisisa ka za sitabelo sa Jesu sa Tiululo. Hona fo feela, nalemuha kuli Jehova uzwezipili kunibonisa pilu-telele yahae ni lilato. Nekuswana feela inge kuli nenibulelela Jehova kuli: “Lilato lahao ki lelituna hahulu mi hali niswaneli. Sitabelo sa Mwanaa hao hasikoni kukwahela libi zaka.” Nekuswana feela inge kuli nenisa tabeli kuamuhela sitabelo sa Jesu sanifile Jehova. Kono hasamulaho wa kunahanisisa ka za mpo ya tiululo yezwa ku Jehova, nakala kuikutwa kuli Jehova wanilata.

MONITUSELIZWE:

Ka nako ya cwale niikutwa kuli nipila bupilo bobunde. Mwa linyalo laka sekunani kozo, mi nitabile kuli nakona kutusa batu babañwi babakopana ni miinelo yeswana ni yenikopana ni yona. Seniikutwa kuba bukaufi ni Jehova.

• SILIMO SENE BAPEPILWE: 1974

• NAHA KONE BAPEPEZWI: RUSSIA

• LITABA ZEEZAHEZI: NENILATA HAHULU LIPINA ZELILATA

BUPILO BWAKA BWA KWAMULAHO:

Nenipepezwi mwa Votkinsk, ili sibaka mwanaapepezwi muopeli yatumile hahulu yabizwa Pyotr Ilich Tchaikovsky. Lubasi lwaluna nelubotanile hahulu. Bo ndate nebanani tulemeno totunde, kono nebanwanga hahulu bucwala, kacwalo, kamita nekusa bangi ni kozo fa ndu.

Nenisi muituti yomunde, kacwalo nako hane inze iya, nakala kuikutwa kuli hani wa butokwa. Neniikambusanga ku babañwi mi nenituhezi kubasepa. Nekunibelanga taata kuisa pilu kwa sikolo. Ka mutala, hane nikupiwanga kufa piho yeñwi ka za litaba za kwa sikolo, fokuñwi nenipalelwanga kutalusa nihaiba litaba zebunolo. Hane nifelize sitopa sabu 8, muluti naañozi cwana fa kadi yaka: “Hazibi hande puo, mi haakoni kutalusa maikuto ahae.” Litaba zeo neli niutwisize hahulu bumaswe mi mane naikutwa kuli hani wa butokwa. Naikutwa kuli hakuna zenipilela.

Hane nili mwa lilimo za kunonoboka, nakalisa kunwa hahulu bucwala. Kwa makalelo, neniikutwanga hande haninwa bucwala. Kono hane ninwanga hahulu, lizwalo laka neli nisisitanga. Naikutwa kuli hakuna zenipilela. Neniikutwanga hahulu bumaswe kuli mane fokuñwi nenisa zwangi fa ndu. Nakenelwa ki muhupulo wa kubata kuipulaya.

Hane nikwanisize lilimo ze 20, nafumana nto yeñwi yene nitusize ka nakonyana. Nakala kuteelezanga kwa lipina zelilata. Nenitabiswanga hahulu ki lipina zeo mi mane nakala kubata batu babañwi bane bateelezanga ku zona. Nakala kuuta milili yemitelele, napunya mazebe, mi mane nakala kutina sina mone batinelanga balizi babañwi bane nitabela. Hamulaho wa nako, nakala kuba wa mifilifili ni lindwa mi nenikanananga hahulu ni batu babañwi mwa lubasi lwaluna.

Neninahana kuli kuteeleza kwa lipina zelilata nekuka nitahiseza tabo, kono mane kuteeleza kwa lipina zecwalo nekutahisize kuli nifelelwe ki tabo. Mupilelo waka neucincize luli! Mi neniikutwanga hahulu bumaswe hane nilemuhile kuli batu bane opelanga lipina zene niteelezanga ku zona neli batu babamaswe.

Nako yeñwi hape nakenelwa ki muhupulo wa kubata kuipulaya, mi fo nenitiisize luli. Nto yene nipalelwisize kuipulaya, neli kunahana mone baka ikutwela bo ma. Neba nilata hahulu, mi neba niezelize lika zeñata mwa bupilo. Nenili mwa muinelo otaata luli. Nenisa tabeli kuzwelapili kupila, kono hape nenisa lati kuipulaya.

Kuli nisike nazwelapili kuba ni maikuto a kubata kuipulaya, nakala kubalanga lihatiso za puo ya Sirussia. Nenibalile likande la mutu yomuñwi yatumile hahulu yanaaswalisana ni keleke yeñwi. Honafo nakala kuba ni takazo yetuna ya kusebeleza Mulimu ni batu babañwi. Nalapela ku Mulimu kumutaluseza mone niikutwela, ili nto yene nisika eza kale mwa bupilo bwaka. Nakupa Mulimu kuli anituse kupila bupilo bobunde. Hamulaho wa kulapela, naikutwa hande. Kono nenitabisizwe hahulu ki nto yeneezahezi nakonyana kuzwa fo. Hamulaho wa lihora zepeli, Paki ya Jehova angongota fa munyako waka, mi anikupa kuli aitutange Bibele ni na. Yeo neli kalabo kwa tapelo yaka. Kuzwa ona zazi leo, nakala kuba ni tabo mwa bupilo.

BIBELE MONE ICINCELIZE BUPILO BWAKA:

Nihaike kuli nesi nto yebunolo, nayumba lika kaufela zene ama lipina zelilata. Kono nenizwezipili kuhupulanga lipina zeo. Nako kaufela hane nifitanga bukaufi ni fokulila mufuta wa lipina zecwalo, nenihupulanga mupilelo waka wa kwamulaho. Nenisa lati kuhupulanga lika zemaswe zene niezanga kwamulaho ili zesalumelelani ni lika zende zene nikalile kueza mwa bupilo. Kacwalo, natuhela kufitanga bukaufi ni libaka zeo. Mi nako kaufela hane nihupulanga zene niezanga kwamulaho, nenilapelanga hahulu ku Jehova. Kueza cwalo neku nitusize kuba ni “kozo ya Mulimu yefita kutwisiso kaufela.”—Mafilipi 4:7.

Hane ninze niituta Bibele, nalemuha kuli Bakreste banani buikalabelo bwa kutaluseza babañwi ka za tumelo yabona. (Mateu 28:19, 20) Neniikutwanga kuli hanikoni kueza musebezi wo nihanyinyani. Mi hape lika zene niituta, neli nitusize kuba ni tabo yetuna ni kuba ni kozo ya mwa munahano. Neniziba kuli babañwi ni bona batokwa kuziba niti. Nihaike kuli neninani sabo, nakala kutaluseza babañwi ka za lika zene niituta. Kueza cwalo neku nitusize kuba ni bundume bwa kukutaza. Hape neku nitusize kuikolwisa kuli zene niituta neli za niti luli.

MONITUSELIZWE:

Ka nako ya cwale ninyezi, ninani tabo, mi nibile ni tohonolo ya kutusa babañwi kuituta Bibele ili kukopanyeleza cwalo ni kaizelaa ka, ni bo ma. Kusebeleza Mulimu ni kutusa batu babañwi kuituta ka za hae, kunitusize kuba ni tabo mwa bupilo.