Litaba Ze Ekelizwe

 Mulalelo wa Mulena Ki Mukiti O Lumbekisa Mulimu

BAKRESTE ba laezwi ku ezanga Kupuzo ya lifu la Kreste. Mukiti wo hape u bizwa “Silyela sa Mulena” kamba Mulalelo wa Mulena. (1 Makorinte 11:20) Ki bufi butokwa bwa ona? U swanela ku eziwanga lili mi ki ka nzila ifi?

Jesu Kreste n’a tomile mukiti wo busihu bwa Paseka ya Sijuda ka 33 C.E. Paseka ne li  mukiti o n’o ezwanga hañwi ka silimo, mwa kweli ya Sijuda ya Nisani, ka lizazi la bu-14. Kuli ba zibe lizazi leo, Majuda ku bonahala kuli ne ba libelelanga lizazi la mwa maliha muta butelele bwa busihu ni bwa musihali bu batanga ku likanelela, ha ku banga ni lihora ze bat’o eza 12 musihali ni ze bat’o eza 12 busihu. Kweli ye nca ye ne tasanga bukaufi ni lizazi leo ne li ona makalelo a Nisani. Paseka ne i eziwanga hamulaho wa mazazi a 14 ku zwa f’o, lizazi ha se li likezi.

Jesu n’a ezize mukiti wa Paseka ni baapositola ba hae, a leleka Judasi Isikariota, mi kihona a toma Mulalelo wa Mulena. Mukiti wo ne u yolile Paseka ya Sijuda mi kacwalo u swanela ku eziwanga fela hañwi ka silimo.

Buka ya Evangeli ya Mateu i biha kuli: “Jesu a nga buhobe [kamba sinkwa], a lumba, a bu komauna, a bu fa balutiwa ba hae, a li: Mu nge, mu ce; se, ki mubili wa ka. A nga ni sinwiso, a itumela, mi a ba fa sona, a li: Mu nwele mwateñi kaufela. Kakuli se ki mali a ka, a’ sululelwa ba bañata, bakeñisa swalelo ya libi.”—Mateu 26:26-28.

Ba bañwi ba nahana kuli Jesu n’a fetuzi sinkwa ku ba mubili wa hae luli mi n’a fetuzi veine ku ba mali a hae tota. Kono mubili wa Jesu ne u sa iketile ha n’a fa baapositola sinkwa seo. Kana baapositola ba Jesu ne ba cile luli nama ni mali a hae? Batili, kakuli ku eza cwalo neikaba ku ca nama ni mali a mutu mi neikaba ku loba mulao wa Mulimu. (Genese 9:3, 4; Livitike 17:10) Ka ku ya ka Luka 22:20, Jesu n’a ize: “Sinwiso se, ki bulikani bo bunca bwa mwa mali a ka, a’ sululelwa mina.” Kana sinwiso seo ne si fetuhile “bulikani bo bunca” luli? Ne ku si ke kwa ba cwalo, kakuli bulikani ki tumelelano, haki nto ye kona ku swaliwa.

Kabakaleo, sinkwa ni veine ne li liswanisezo fela. Sinkwa si yemela mubili wa Kreste o petahalile. Jesu n’a itusisize sinkwa se ne si siyezi kwa mukiti wa Paseka. Sinkwa seo ne si besizwe ku si na mumela kamba isiti.  (Exoda 12:8) Bibele i itusisa mumela ku swaniseza sibi kamba bumaswe. Kacwalo sinkwa si yemela mubili o petahalile wa n’a fanile Jesu sina sitabelo. Ne u si na sibi.—Mateu 16:11, 12; 1 Makorinte 5:6, 7; 1 Pitrosi 2:22; 1 Joani 2:1, 2.

Veine ye fubelu i yemela mali a Jesu. Mali ao ki ona a n’a tisize kuli bulikani bo bunca bu konahale. Jesu n’a bulezi kuli mali a hae ne a suluzwi “bakeñisa swalelo ya libi.” Kacwalo batu b’a kona ku ba ba ba kenile fapil’a Mulimu mi b’a kona ku itama bulikani bo bunca ni Jehova. (Maheberu 9:14; 10:16, 17) Bulikani kamba tumelelano yeo i konisa Bakreste ba ba sepahala ba 144,000 ku ya kwa lihalimu. Teñi k’o ba ka yo ba malena ni baprisita ku tusa batu kamukana.—Genese 22:18; Jeremia 31:31-33; 1 Pitrosi 2:9; Sinulo 5:9, 10; 14:1-3.

Ki bomañi ba ba swanela ku ca kamba ku nwa kwa liswanisezo zeo za fa Kupuzo? Ba ba swanela fela ku ca kwa sinkwa ni ku nwa kwa veine ki ba ba mwa bulikani bo bunca—bona ba ba na ni sepo ya ku ya kwa lihalimu. Moya o kenile wa Mulimu u kolwisa batu ba ba cwalo kuli ba ketilwe ku ba malena ba kwa lihalimu. (Maroma 8:16) Hape ba mwa bulikani bwa Mubuso ni Jesu.—Luka 22:29.

Ku cwañi ka za ba ba na ni sepo ya ku pila ku ya ku ile mwa Paradaisi fa lifasi-mubu? Ba utwa taelo ya Jesu mi b’a fumanehanga kwa Mulalelo wa Mulena, kono ba tahanga fela sina bashalimeli ka ku bonisa likute, isiñi ku ca kamba ku nwa kwa liswanisezo. Hañwi ka silimo lizazi ha se li likezi ka la Nisani 14, Lipaki za Jehova ba ezanga Mulalelo wa Mulena. Nihaike kuli batu ba ba ipala ku ba ni sepo ya ku ya kwa lihalimu ki ba ba eza fela likiti ze sikai, mukiti wo ki wa butokwa hahulu kwa Bakreste kaufela. Ki nako ya kuli mañi ni mañi a nahane za lilato le lituna hahulu l’a bonisize Jehova Mulimu ni Jesu Kreste.—Joani 3:16.