Kauhanyo 23

Mu Talimele ku Jehova

Isaya 30:1-33

1, 2. (a) Ki lika mañi ze fumaneha mwa Isaya kauhanyo 30? (b) Ki lipuzo mañi ze lu ka nyakisisa cwale?

MWA Isaya kauhanyo 30, lu bala za likatulo ze ñwi za Mulimu fahalimw’a ba ba maswe. Nihakulicwalo, kalulo ye ya bupolofita bwa Isaya i bonisa mikwa ye miñwi ya Jehova ye minde. Mane, mw’a inezi Jehova ku talusizwe hande kuli mane lu kona ku ikutwa inge ba ba bona ku ba teñi kwa hae ko ku omba-omba, ku utwa linzwi la hae le li etelela, ni ku utwa lizoho la hae le li folisa.—Isaya 30:20, 21, 26.

² Nihakulicwalo, bana bahabo Isaya ba baipanguli ba ba yahile mwa Juda, ba hana ku kutela ku Jehova. Kono ba sepa batu. Jehova u ikutwa cwañi ka za seo? Mi yona kalulo ye ya bupolofita bwa Isaya i tusa cwañi Bakreste kacenu ku zwelapili ku talimela ku Jehova? (Isaya 30:18) Ha lu batisiseñi.

Butoto ni Ku Liba mwa Kozi

3. Jehova u shitula mulelo mañi?

³ Ka nako ye telelenyana, baeteleli ba Juda ba sweli ku lelisana kwa mukunda kuli ba fumane nzila ya ku picuka ku busiwa ki Asirya. Kono Jehova u sweli wa bona ze ba eza. Cwale u shitula mulelo wa bona, u li: “Bumai ki bwa bana ba ba ikuhumusa, ku bulela [Muñ’a] Bupilo, ba ba lela taba kwande ku Na; ba ba eza tumelelano kono isi ka ku susumezwa ki Moya wa ka; kuli ba ekeze sibi kwa sibi. Ba ba shetumukela kwa Egepita.”—Isaya 30:1, 2a.

4. Batu ba Mulimu ba ba fetuhile ba beile cwañi Egepita mwa sibaka sa Mulimu?

 ⁴ Baeteleli bao ba swaba maswe ha ba utwa kuli mulelo wa bona u zibahezi! Ku ya kwa Egepita ku yo eza swalisano ni yona ha ku ami fela ku lwanisa Asirya; ki ku fetuhela ni Jehova Mulimu. Mwa linako za Mulena Davida, sicaba ne si sepile m’ata a Jehova mi ne si sabela ‘mwa muluti wa mafufa a hae.’ (Samu 27:1; 36:7) Cwale se “ba li ba fumane mata a Faro” mi “ba y’o bata mukunda mwa muluti wa Egepita.” (Isaya 30:2b) Ba beile Egepita mwa sibaka sa Mulimu! Yeo ki petuhelo luli!—Mu bale Isaya 30:3-5.

5, 6. (a) Ki kabakalañi ku eza swalisano ni Egepita ha ku li mafosisa a’ kona ku tisa kozi? (b) Ki musipili mañi o ne si ezize sicaba sa Mulimu mwa mazazi a kwamulaho o’ bonisa bukuba bwa musipili wo, wa ku ya kwa Egepita?

⁵ Isaya u ekeza ku bulela litaba ze ñwi, ili ku bonisa kuli musipili wa ku ya kwa Egepita haki musipili-sipili fela wa ku yo pota. U li: “Ki bo bupolofita bo bu bulelwa fahalimu a libatana za kwa Mboela: Ba kaula naha ya maziyezi ni ya maswenyeho, mo ku pila tau ye sihali ni ya munna, hamoho ni sibili ni noha ye fufa, ye cisa; ba lwalisize limbongolo tutu ya bona; maluwo a bona a fa mikokoto ya likamele.” (Isaya 30:6a) Ku si na kuli cwañi, musipili w’o u lelilwe hande. Mandumeleti ba lukisa mulongolongo wa likamele ni limbongolo, mi ba li lwalisa tutu ye tula ni ku li libisa kwa Egepita. Ba fita mwa lihalaupa la mubu o otile mo ku na ni litau ze puluma ni linoha za lifanu. Mandumeleti bao kwa mafelelezo ba yo punya mwa Egepita ni ku fa tutu ya bona kwa Maegepita. Ba lekile silelezo—kamba lu bulele kuli, kona mo ba nahanela. Niteñi, Jehova u li: “Sicaba se si si na ku ba tusa se siñwi. Kakuli tuso ya Egepita ki mbango ni bupumi; kabakaleo ni mu biza cwana: Buipubeko bo bu sa sebezi se siñwi.” (Isaya 30:6b, 7) Egepita i ka sepisa kuli i ka eza ze tokwahala kaufela, kono ha ku na se i eza. Juda i eza mafosisa a’ ka tisa kozi ha i swalisana ni yona.

 ⁶ Isaya h’a nze a talusa za musipili wa mandumeleti bao, mwendi bateelezi ba hae ba hupula musipili o swana ni ona o ne u ezizwe mwa mazazi a Mushe. Bokukw’a bona ne ba zamaile ku lona lihalaupa le li swana leo, “le lituna, le li sabisa.” (Deuteronoma 8:14-16) Kono mwa mazazi a Mushe, Maisilaele ne ba zwa mwa Egepita, ili ku zwa mwa butanga. Ka nako ye, mandumeleti bao ba ya kwa Egepita, ili ku ya mwa butanga. B’o ki butoto luli! Haike ni kamuta lu si ezi katulo ye maswe cwalo, ili ku yumba tukuluho ya luna ya kwa moya ni ku ikenya mwa butanga!—Mu bapanye Magalata 5:1.

Lushango lwa Mupolofita Lwa Lwaniswa

7. Jehova h’a fa Juda temuso, ki kabakalañi h’a ezisa Isaya ku i ñola?

⁷ Jehova u bulelela Isaya kuli a ñole litaba za sa z’o fa ilikuli “li bulukelwe linako ze sa ta kwapili, ibe bupaki bwa kamita ni mita.” (Isaya 30:8) Jehova u nyaza za k’u nga liswalisano ni batu ku ba za butokwa ku fita ku itinga ku Yena. Mi nto yeo i lukela ku ñolwa kuli i to tusa masika a’ sa taha—ili ku kopanyeleza ni lusika lwa luna kacenu. (2 Pitrosi 3:1-4) Kono zona litaba zeo li tokwa ku ñolwa ka bubebe. “Sicaba se, sa ikuhumusa, ki bana ba ba puma, bana ba ba hana ku utwa mulao wa [Muñ’a] Bupilo.” (Isaya 30:9) Batu ba hanile likelezo za Mulimu. Kacwalo, taba yeo i lukela ku ñolwa, kuli hasamulaho ba si ke ba latula kuli ne ba filwe temuso ye swanela.—Liproverbia 28:9; Isaya 8:1, 2.

8, 9. (a) Baeteleli ba Juda ba lika cwañi ku kelusa bapolofita ba Jehova? (b) Isaya u bonisa cwañi kuli h’a na ku saba?

⁸ Isaya cwale u fa mutala wa moya wa buipanguli o ba na ni ona batu bao, u li: “Ba li kwa baboni: Mu si ke mwa bona! Ni kwa bapolofita, ba li: Mu si ke mwa lu polofitela  za niti; mu lu bulelele litaba ze munati, mu lu polofitele za bupumi.” (Isaya 30:10) Ka ku laela bapolofita ba ba sepahala kuli ba tuhele ku polofita “za niti,” ni kuli ba bulele “ze munati” ni “za bupumi,” baeteleli ba Juda ba bonisa kuli ba bata ku tiinyiwa mwa lizebe. Ba bata ku lumbiwa, isiñi ku nyaziwa. Ku bona, mupolofita kaufela ya sa lati ku polofita ka mo ba batela u swanela ku ‘zwa mwa nzila, a keluhe mutala.’ (Isaya 30:11a) U swanela ku bulela lika ze ba tabela ku utwa, hakusicwalo a tuhele ku kutaza!

⁹ Bahanyezi ba Isaya ba tundamena kuli: “Mu lisele ku beya Ya-Kenile wa Isilaele fapil’a meto a luna!” (Isaya 30:11b) Isaya a tuhele ku polofita ka libizo la Jehova, yena “Ya-Kenile wa Isilaele”! Lona lilumbatina fela leo la ba filikanya kakuli z’a tokwa Jehova ze pahami li bonisa kuli ze ba eza z’a nyenyisa. Isaya u eza cwañi? U zibahaza kuli: “Ya-Kenile wa Isilaele s’a bulela ki se.” (Isaya 30:12a) A sa kata-kati, Isaya u bulela ona manzwi luli e ba sa lati ku utwa bahanyezi ba hae. Ha na ku saba nihaiba yo mukana. W’o ki mutala o munde luli ku luna! Ha ku taha ku za ku shaela lushango lwa Mulimu, ni kamuta Bakreste ha ba lukeli ku lumela ku tuhela. (Likezo 5:27-29) Sina Isaya, ba zwelapili ku shaela kuli: ‘Jehova s’a bulela ki se’!

Ze Bu Tahisa Buipanguli

10, 11. Buipanguli bwa Juda bu ka tahisa lika mañi?

¹⁰ Juda i hanile linzwi la Mulimu, i sepile mashano, ni ku isepisa “ka bumaswe.” (Isaya 30:12b) Ki lifi ze ka zwa mwateñi? Jehova, ku fita kuli a ishimbulule, ka mo si batela sicaba, u ka ezisa kuli sicaba seo si yundiswe! Nto yeo i ka ezahala ka ku sa libelela, mi ili ka ku tala, sina mo i koñomekela swanisezo ya Isaya. Buipanguli bwa sicaba seo bu swana inge “lwandala lo lu ka tuha lu wisa lukwakwa, lo lu tisa mba mwa lukwakwa lo lutelele, mane ku bulumuka kwa lona ki ka nako i li ñwi fela, pundu-pundu.” (Isaya  30:13) Lukwakwa lo lutelele ha lu nze lu tunduluka, kwa mafelelezo lu kana lwa wa. Ka nzila ye swana, ku ekezeha kwa buipanguli bwa batu ba ba pila mwa linako za Isaya ni kona ku ka wisisa sicaba.

¹¹ Ka swanisezo ye ñwi, Isaya u bonisa kuli sinyeho ye taha ikaba ye tezi, u li: “U ka bulaya lukwakwa, sina mo ku bulaelwa piza ya lizupa ye tubwa biemba-emba, ye sa katwi, ku si na ni liñetana le li siyala l’a ka yakela mulilo, kamba l’a ka y’o kisa mezi kwa siliba [muñ’a] yona.” (Isaya 30:14) Sinyeho ya Juda ikaba ye tuna hahulu kuli ha ku na sika sa butokwa se si ka siyala—mane nihaiba liñetana le li kona ku yakelwa teñi mashala a cisa a’ zwa fa liso kamba ku kela teñi mezi kwa siliba. Ki sinyeho kwa ku swabisa! Ba ba ipangula kwa bulapeli bwa niti kacenu ni bona ba ka ba mwa sinyeho ye swana, ya ka sipundumukela, ili ye tezi.—Maheberu 6:4-8; 2 Pitrosi 2:1.

Tuso ya Jehova Ya Haniwa

12. Batu ba Juda ba kona ku pima cwañi sinyeho?

¹² Kono bateelezi ba Isaya b’a kona ku pima sinyeho yeo. B’a kona ku puluswa. Mupolofita u talusa kuli: “Mulena [Muñ’a] Bupilo, Ya-Kenile wa Isilaele s’a bulela ki se, u li: Mwa ku sikuluha ni ku pumula, ki mo mu ka fumana bupilo; mwa ku ikuzeza ni ku sepa, ki mo mu ka fumana mata.” (Isaya 30:15a) Jehova u bata ku pulusa batu ba hae—haiba ba bonisa kuli ba na ni tumelo ka “ku pumula,” kamba ku tuhela ku lika ku bata puluso ka liswalisano za butu, ni ka “ku ikuzeza,” kamba ku sa saba, ili ku bonisa kuli ba sepile m’ata a Mulimu a silelezo. Isaya u bulelela batu kuli: “Kono mu hanile.”—Isaya 30:15b.

13. Baeteleli ba Juda ba sepa nto mañi, mi kana yona sepo yeo ya swanela?

¹³ Isaya cwale u talusa hande kuli: “Mane mwa li: Batili, kono lu ka mata lu pahami fa lipizi; kabakaleo mu ka  matiswa. Hape mwa li: Lu lata ku pahama lipizi ze lubilo; kabakaleo, ba ba ka mi lelekisa ba ka ba ni lubilo.” (Isaya 30:16) Majuda ba nahana kuli Jehova h’a na ku ba pulusa, kono ba ka puluswa ki lipizi ze lubilo. (Deuteronoma 17:16; Liproverbia 21:31) Nihakulicwalo, mupolofita u li sepo ya bona i ka ba ya mbango kakuli lila za bona li ka ba fita kwa lubilo. Niha ba ka ba bañata ha ku na ku tusa se siñwi. “Batu ba ba eza lule ba ka saba, mi ki ku sabiswa ki mufumbo wa mutu a li muñwi; baketa-lizoho ha ba mi fumbela mu ka saba.” (Isaya 30:17a) Mpi ya Juda i ka saba ni ku balehiswa ki mufumbo wa palonyana fela ya lila. * Kwa mafelelezo, ku ka siyala fela batu ba banyinyani mi ba ka siyala ba nosi, ba “yemi sikakunka fa lilundu, kamba sina ndembela fa kalundu.” (Isaya 30:17b) Bupolofita b’o bwa talelezwa Jerusalema ha i sinyiwa ka 607 B.C.E., mi ku punyuha fela batu ba banyinyani.—Jeremia 25:8-11.

Ku Omba-Ombiwa Mwahal’a ku Nyaziwa

14, 15. Manzwi a’ kwa Isaya 30:18 a omba-omba cwañi bayahi ba Juda ba mwa linako za kale ni Bakreste ba niti kacenu?

¹⁴ Bateelezi ba Isaya ko ba sa nahana za manzwi a’ kakamalisa ao, lushango lwa hae lu utwahala ku ba lo lu cinca. Mufumbo wa kozi wa fela mi ku taha sepiso ya limbuyoti. “Kabakaleo, [Muñ’a] Bupilo u talimezi ku mi shemuba, mi cwale u ka nanuha kuli a mi utwele butuku; kakuli [Muñ’a] Bupilo ki Mulimu ya atula ka buniti bwa taba; ba ba talimezi ku Yena ba fuyauzwi.” (Isaya 30:18) Ki manzwi kwa ku susueza! Jehova ki Ndate ya mufelañeke ya lakaza hahulu ku tusa bana ba hae. U lata ku bonisa sishemo.—Samu 103:13; Isaya 55:7.

¹⁵ Manzwi a’ tiisa ao a sebeza ku bomasiyaleti ba Majuda,  bao ka sishemo ba tuhelelwa ku punyuha sinyeho ya Jerusalema ya mwa 607 B.C.E. Hape a sebeza kwa batu ba banyinyani ba ba kutela kwa Naha ya Sepiso ka 537 B.C.E. Nihakulicwalo, manzwi a mupolofita ao hape a omba-omba Bakreste kacenu. Lu hupuliswa kuli Jehova u ka “nanuha” kabakala luna, ili ku felisa muinelo wa linto wo o maswe. Balapeli ba ba sepahala ba kona ku kolwa kuli Jehova—yena “Mulimu ya atula ka buniti bwa taba”—h’a na ku tuhelela lifasi la Satani ku zwelapili ku ba teñi nihaiba ka lizazi li li liñwi ku fitelela nako ye tokwahala ya ku fa katulo ye lukile. Kacwalo, “ba ba talimezi ku Yena” ba swanela ku taba luli.

Jehova U Omba-Omba Batu ba Hae ka ku Alaba Litapelo

16. Jehova u omba-omba cwañi ba ba zwafile?

¹⁶ Niteñi, ba bañwi ba kana ba zwafa kakuli punyuho ha i si ka taha ka bubebe ka mo ne ba sepezi kuli i ka taha. (Liproverbia 13:12; 2 Pitrosi 3:9) Haike ba omba-ombiwe ki manzwi a Isaya a’ tatama, a bonisa kalulo y’e ipitezi ya mw’a inezi Jehova. “Kakuli sicaba se si yahile mwa Sione, mwa Jerusalema, ha si sa na ku lila; luli u ka ku shemuba h’a ka utwa linzwi la hao ha u lila; h’a ka ku utwa, u ka ku alaba.” (Isaya 30:19) Isaya u bonisa moya wa musa o mwa manzwi ao ka ku cinca ku itusisa pulelo ye bonisa kuli u bulela za batu ba bañata ya “mi” mwa timana 18, ni ku itusisa ye bulela za mutu a li muñwi ya “u” mwa timana 19. Jehova h’a omba-omba ba ba ziyelehile, u ezanga mañi ni mañi ka ku ya ka miinelo ya hae. Ka ku ba Ndate, h’a buzangi mwana ya zwafile kuli, ‘Ki kabakalañi ha u sa tiyi inge mwanahenu?’ (Magalata 6:4) Kono, u teelezanga ku mañi ni mañi ka tokomelo. Mane, ‘h’a ka utwa, u ka alaba.’ Manzwi ao a kolwisa luli! Ba ba zwafile ba kona ku tiiswa hahulu haiba ba lapela ku Jehova.—Samu 65:2.

 Mu Utwe Linzwi Le Li Etelela la Mulimu ka ku Bala Linzwi la Hae

17, 18. Nihaiba mwa linako ze t’ata, Jehova u fa cwañi ketelelo?

¹⁷ Isaya h’a zwelapili mwa ngambolo ya hae, u hupulisa bateelezi ba hae kuli manyando a ka taha. Batu ba ka fiwa “buhobe [bwa, NW] manyando . . . ni mezi [a, NW] maswenyeho.” (Isaya 30:20a) Ona manyando ni maswenyeho ao e ba ka ba ku ona ha ba ka tasezwa, ba ka iponela hahulu ona kuli mane a ka ba inge buhobe ni mezi. Niteñi, Jehova u lata ku pulusa ba lipilu ze lukile. “[Muluti wa mina ya Makaza h’a, NW] sa na ku ipata, kono u ka talima [Muluti wa hao ya Makaza, NW] ka meto. Mi ha mu ka ya ku la bulyo kamba la nzohoto, lizebe za mina li ka utwa mwamulaho a mina linzwi le li li: Nzila ki yona ye, mu zamaye ku yona!”—Isaya 30:20b, 21.

¹⁸ Jehova ki yena “Muluti ya Makaza.” Kwa baluti kaufela, ha ku na ya likana ni yena. Kono cwale batu ba kona ku mu “talima” ni ku mu “utwa” cwañi? Jehova u itibahazanga ka bapolofita ba hae, mi manzwi a bona a ñozwi mwa Bibele. (Amosi 3:6, 7) Kacenu, balapeli ba ba sepahala ha ba bala Bibele, ku swana inge kuli linzwi la Mulimu la bushemi li ba bulelela nzila ye ba lukela ku ya ka yona, ni ku ba susueza ku cinca mizamao ya bona kuli ba zamaye ku yona nzila yeo. Jehova h’a nze a bulela ka Bibele ni ka lihatiso ze tomile fa Bibele ze fiwa ki “mutanga ya sepahala, ya na ni kutwisiso,” Mukreste kaufela u lukela ku Mu teeleza ka tokomelo. (Mateu 24:45-47) Haike mañi ni mañi a ise pilu kwa ku bala Bibele, kakuli ‘ki ya bupilo bwa hae.’—Deuteronoma 32:46, 47; Isaya 48:17.

Mu Nahane za Limbuyoti Ze Taha

19, 20. Ba ba latelela linzwi la Muluti ya Pahami ba ka fumana limbuyoti mañi?

¹⁹ Ba ba ka latelela linzwi la Muluti ya Makaza ba ka latela  kwahule maswaniso a bona a’ betilwe, ili ku a’ nga ku ba nto ye nyenyisa. (Mu bale Isaya 30:22.) Mi, bona ba ba latelezi linzwi bao ba ka ikola limbuyoti ze makaza. Zona limbuyoti zeo z’a talusize Isaya, ze ñozwi kwa Isaya 30:23-26, ki bupolofita bo bunde bwa ku kutiswa sinca bo bu talelezwa lwa pili muta bomasiyaleti ba Majuda ba kuta ku zwa mwa buhapiwa ka 537 B.C.E. Kacenu, bona bupolofita b’o bu lu tusa ku bona limbuyoti ze nde z’a tisa Mesiya mwa paradaisi ya kwa moya ya cwale ni mwa Paradaisi ya luli ye taha.

²⁰ “U ka neliseza lipeu z’o calile mwa mubu; mi buhobe bo mubu u ka mi tahiseza bona, i ka ba bo bu munati, bo bu kulisa; ka linako zeo, mitapi ya mina i ka fula mwa mafulisezo a patami. Lipulu ni limbongolo ze lima naha li ka ca bucwañi bo bu lungilwe lizwai, bo bu ulusizwe ka focolo ni ka liselo le lituna.” (Isaya 30:23, 24) Buhobe “bo bu munati, bo bu kulisa”—ili lico ze tiisa mubili—li ka ba zona ze ba ka ca batu ka zazi. Naha i ka ba ni lukau lo lutuna kuli mane nihaiba lifolofolo li ka tuseha. Mitapi i ka fepiwa ka “bucwañi bo bu lungilwe lizwai”—ili bucwañi bo bu tabusa  bo bu ciwanga fela ka linako ze ipitezi. Zona lico zeo mane li “ulusizwe”—ili nto ye eziwanga fela kwa bubeke bo bu ka ciwa ki batu. Litaba ze tungile z’a fa Isaya zeo ki ze makaza luli! Li bonisa limbuyoti ze tuna zeo Jehova a ka fa batu ba ba sepahala.

21. Mu taluse kuli limbuyoti ze taha ki ze tezi cwañi.

²¹ “Fa lilundu ni lilundu le litelele, ni fa kalundunyana ni kalundunyana ka ka lumbile, maweluwelu . . . [a] ka ba teñi.” (Isaya 30:25a) * Isaya u fa taluso ye swanela ye koñomeka kuli limbuyoti za Jehova ki ze tezi. Mezi h’a na ku kala. Mezi a’ li nto ya butokwa, a ka buba isi mwa mabala  fela, kono ni fa malundu kaufela, mane ni “fa lilundu ni lilundu le litelele, ni fa kalundunyana ni kalundunyana ka ka lumbile.” Ee, tala ha i sa na ku ba teñi. (Samu 72:16) Ku tuha f’o, mupolofita u isa mamelelo kwa lika ze pahami ku fita malundu. “Liseli la kweli li ka swana inge liseli la lizazi; mi liseli la lizazi li ka ekezwa ha 7, i be sina la mazazi a 7, mwa lizazi la [Muñ’a] Bupilo, h’a ka alafa mi a tama sitombo sa ba sicaba sa hae, mi a folisa mañiba a miupa ya bona.” (Isaya 30:26) B’o ki bupolofita bo bunde hahulu bo bu fela ka nzila ye nyangumuna luli! Kanya ya Mulimu i ka benya ku feleleza. Limbuyoti ze ba libelezi balapeli ba Mulimu ba ba sepahala li ka fitelela hahulu-hulu nto ifi kamba ifi ye ba kile ba ba ni yona, ili ku i fita h’a 7.

Katulo ni Tabo

22. Ka ku fapana ni limbuyoti ze ba libelezi ba ba sepahala, Jehova u lelile ku ezañi ku ba ba maswe?

²² Lushango lwa Isaya lu utwahala ku ba lo lu cinca hape. U li: “A mu bone,” inge kuli u bata ku hoha mamelelo ya bateelezi ba hae. “Libizo la [Muñ’a] Bupilo la ta, li zwa kwahule, li taha ka mulilo wa buhali bwa hae ni ka musi o’ pahami; mulomo wa hae u tezi mabifi, mi lilimi la hae li swana inge lilimi la mulilo le li ciseleza.” (Isaya 30:27) Ku to fita nako ye, Jehova h’a si ka ikenya mwa taba, mi u tuhelezi lila za batu ba hae ku ikezeza mo ba latela. Cwale fa wa sutelela—inge pula ye buhali ye taha i sindumukile—ku to fitisa katulo. “Ku buyela kwa hae ku swana sina nukana ye bayula, mezi a yona h’a kumisa mwa mulala. Wa ta, kuli a sefe macaba ka sefa ya mbango; a beye mwa milomo ya macaba tumo ye kelusa.” (Isaya 30:28) Lila za batu ba Mulimu li ka potolohiwa ki “nukana ye bayula,” li ka nyungiwa maswe ili ku ‘sefiwa,’ ni ku zamaiswa ka “tumo.” Li ka sinyiwa.

23. Kiñi se si ezisa Bakreste kacenu ku ba ni “tabo mwa pilu”?

 ²³ Mubulelelo wa Isaya hape w’a cinca h’a talusa ka za tabo ye ba ka ba ni yona balapeli ba ba sepahala ba ba ka kutela habo bona zazi le liñwi. “Mu ka opela pina mo ku opelelwa busihu, nako ya mukiti o kenile; mu ka ba ni tabo mwa pilu, sina ha ku kambamiwa ku nze ku lizwa pala, ku y’o fita fa lilundu la [Muñ’a] Bupilo, ku Yena Licwe la Isilaele.” (Isaya 30:29) Bakreste ba niti kacenu ni bona ba ba ni “tabo mwa pilu” ha ba nahana za ku atuliwa kwa lifasi la Satani; silelezo ye ba fiwa ki Jehova, yena “Licwe le li lu pilisa;” ni limbuyoti za Mubuso ze taha.—Samu 95:1.

24, 25. Bupolofita bwa Isaya bu koñomeka cwañi kuli katulo ye taha fahalimw’a Asirya i ka ezahala luli?

²⁴ Ha s’a felize ku bulela manzwi ao a tabo, Isaya u kutela kwa taba ya katulo mi u zibahaza kuli buhali bwa Mulimu bu tahela bomañi. “[Muñ’a] Bupilo u ka utwahaza linzwi la bulena bwa hae; mwa butuna bwa buhali bwa hae, u itukiseza ku nata ka lizoho la hae, ka malimi a mulilo [a’ ciseleza], ni ka liñungwa, ni ka ku palakata kwa pula, ni ka ñuli ya macwe. Kakuli Muasirya u ka ngangamiswa ki linzwi la [Muñ’a] Bupilo, a mu nate ka tupa ya hae.” (Isaya 30:30, 31) Ka yona swanisezo ye ñozwi yeo, Isaya u koñomeka kuli katulo ya Mulimu fahalimw’a Asirya i ka ezahala luli. Ku swana inge kuli Asirya i yema fapil’a Mulimu mi y’a ngangama ha i bona ‘lizoho la hae le li nata’ la katulo.

²⁵ Mupolofita u zwelapili u li: “Ka tupa y’a ka mu nata [Muñ’a] Bupilo, milupa ni lihalepa li ka utwahala, mi u ka ba lwanisa ka lindwa ze kuñisa. Kakuli Tofeti i lukisizwe kale; i lukiselizwe mulena wa Asirya; i tungile, i atami; fulaha ya yona ki likota ze ñata; mi mulilo wa yona u ka tumbulwa ki ku bulula kwa [Muñ’a] Bupilo, ko ku swana sina nuka ya sulufula.” (Isaya 30:32, 33) Tofeti, ye mwa Musindi wa Hinomu fa, i itusiswa ku ba sibaka sa swanisezo se si tuka mulilo. Isaya h’a bulela kuli Asirya ki kona ko i ka ya,  u koñomeka kuli sinyeho ya sicaba seo i ka ba ya ka sipundumukela ili ka ku tala.—Mu bapanye 2 Malena 23:10.

26. (a) Lizibahazo za Jehova fahalimw’a Asirya li sebeza cwañi mwa linako za cwale? (b) Bakreste kacenu ba libelela cwañi Jehova?

²⁶ Nihaike lushango lwa katulo l’o lu bulelwa fahalimw’a Asirya, butokwa bwa bupolofita bwa Isaya ha bu feleli honaf’o. (Maroma 15:4) Jehova u ka zwa hape kwahule ka swanisezo, ili ku to tibisa, ku nyunga, ni ku tama bote ba ba nyandisa batu ba hae. (Ezekiele 38:18-23; 2 Pitrosi 3:7; Sinulo 19:11-21) Haike lizazi leo li tahe ka bubebe! Ka nako ye, Bakreste ba libelela lizazi la ku puluswa ka cisehelo ye tuna. Ba matafazwa ka ku kengeyela manzwi a’ ikutwahalela hande a’ ñozwi mwa Isaya kauhanyo 30. Ona manzwi ao a susueza batanga ba Mulimu ku lata hahulu tohonolo ya tapelo, ku tukufalelwa ku ituta Bibele, ni ku kengeyela limbuyoti za Mubuso ze taha. (Samu 42:1, 2; Liproverbia 2:1-6; Maroma 12:12) Kacwalo, manzwi a Isaya a tusa luna kaufela ku talimela ku Jehova.

[Litaluso za kwatasi]

[Lipuzo za Tuto]

 [Maswaniso a fa likepe 305]

Mwa mazazi a Mushe, Maisilaele ne ba bandukile mwa Egepita. Mwa mazazi a Isaya, Juda i yo kupa tuso kwa Egepita

[Siswaniso se si fa likepe 311]

“Fa kalundunyana ni kalundunyana ka ka lumbile, maweluwelu . . . [a] ka ba teñi”

[Siswaniso se si fa likepe 312]

Jehova u ka taha “ka mulilo wa buhali bwa hae ni ka musi o’ pahami”