Kauhanyo 25

Mulena ni Makwambuyu ba Hae

Isaya 32:1-20

1, 2. Ku kona ku bulelwañi ka za litaba ze ñozwi mwa muputo wa Isaya wa kwa liwate la Dead Sea?

KU SUTELELA kwa mafelelezo a lilimo za ma-1940, miputo ye butokwa hahulu ne i fumanwi mwa Palestine, mwa mahaha a’ li bukaufi ni liwate la Dead Sea. Miputo yeo ne i bizizwe Dead Sea Scrolls, mi ku lumelwa kuli ne i ñozwi mwahal’a lilimo za 200 B.C.E. ni 70 C.E. Ku yona miputo yeo, o’ zibahala hahulu ki wa Isaya o n’o ñozwi mwa puo ya Siheberu fa litalo le li tiile hahulu. Ona muputo w’o u bat’o ba o kwanelezi, mi ze ñozwi ku ona li shutana hanyinyani fela ni litaba ze n’e ñozwi ki bo Masorete, ze boniswa kuli ne li ñozwi hamulaho wa lilimo ze 1,000 ku zwa nako ya muputo w’o. Kacwalo, muputo w’o u bonisa kuli litaba za Bibele ne li ñololozwi ka ku nepahala.

² Nto ye lemuseha ka za muputo wa Isaya wa kwa liwate la Dead Sea ki kuli kalulo yeo kacenu i li Isaya kauhanyo 32 i beilwe liswayo la “X” le ne li ñozwi ku yona ki muñoli yo muñwi. Ha lu zibi libaka muñoli y’o ha n’a beile liswayo leo, kono lwa ziba kuli ku na ni nto ye ipitezi ka za yona kalulo yeo ya Bibele ye Kenile.

Ku Busa ka Ku Luka ni ka Mulao

3. Ki puso mañi ye polofitilwe mwa libuka za Isaya ni Sinulo?

³ Isaya kauhanyo 32 i kala ka bupolofita bo bu nyangumuna bo bu talelezwa ka nzila ye makaza mwa mazazi a luna: “[A mu bone!, NW] mulena u ka busa ka ku luka, mi ni bona  makwambuyu ba ka zamaisa ka mulao.” (Isaya 32:1) Ee, “A mu bone!” Pulelo yeo i lu hupulisa pulelo ye swana ni yona ye mwa buka ya mafelelezo ya bupolofita ya Bibele, ye li: ‘Ya inzi mwa Lubona a li: A mu bone, linto kaufela ni li eza ze nca.’ (Sinulo 21:5) Libuka za Bibele za Isaya ni Sinulo ne li ñozwi ka linako ze shutana. Ne ku fitile lilimo ze bat’o ba 900 ku zwa fo i ñolelwa ye ñwi ku ya fo i ñolelwa ye ñwi. Sibeli sa zona li talusa ka nzila ye tabisa puso ye nca—ili “lihalimu le linca,” le li yemela Mulena, yena Kreste Jesu, ya kalile ku busa mwa mahalimu ka 1914, ni ba ba busa ni yena b’a 144,000, “ba ba liuluzwi mwahal’a batu.” Hape ku na ni “lifasi le linca,” ili nyangela ya mwa lifasi kaufela ya batu ba ba swalisani. * (Sinulo 14:1-4; 21:1-4; Isaya 65:17-25) Yona tukiso yeo kaufela i konahalisizwe ki sitabelo sa tiululo sa Kreste.

4. Ki sifi sikwata se si ka ba mutomo wa lifasi le linca se si li teñi cwale?

⁴ Muapositola Joani ha s’a boni mwa pono ya hae mafelelezo a ku swaiwa kwa ba ba ka busa ni Kreste b’a 144,000 bao, u biha kuli: “Na talima mi na [bona!, NW] buñata bo butuna bwa batu, ku si na ya kona ku ba bala; ba zwa mwa macaba kaufela, ni mwa mishobo, ni mwa masika, ni mwa lipuo kaufela, ba yemi fapil’a Lubona ni fapil’a Ngunyana.” Seo ki sona sikwata se si eza mutomo wa lifasi le linca—ili buñata bo butuna bwa batu be se ba eza bolule-lule cwale. Bona bao ba kubukanyelizwe kwa lineku la b’a 144,000 ba banyinyani fela ba ba sa siyezi. Buñata bwa bona bomasiyaleti bao se ba supezi. Buñata bo butuna ba ka punyuha ñalelwa ye tuna y’e nze i sutelela ka bubebe mi mwa Paradaisi ya fa lifasi-mubu ba ka kopana ni basepahali ba ba ka zuswa kwa bafu ni bolule-lule ba bañwi ba ba ka fiwa sibaka sa ku bonisa haiba ba na  ni tumelo. Ba ba ka bonisa tumelo kaufela ba ka fiwa bupilo bo bu sa feli.—Sinulo 7:4, 9-17.

5-7. “Makwambuyu” ba ba polofitilwe ba peta kalulo mañi mwa mutapi wa Mulimu?

⁵ Nihakulicwalo, ibile fela lifasi le, le li tezi sitoyo li zwelapili ku ba teñi, ba buñata bo butuna ba tokwa silelezo. Yona silelezo yeo sihulu i fiwa ki “makwambuyu” ba ba “zamaisa ka mulao.” Yeo ki tukiso ye nde luli! Bona “makwambuyu” bao ba ekezwa ku taluswa mwa manzwi a bupolofita a Isaya a’ susueza a’ li: “Mutu kih’a ka ba sina mukunda ha ku fuka moya, ni sina sisabelo ha ku taha liñungwa; a be sina linuka ze isa mezi mwa naha ye omile, ni sina muluti wa licwe le lituna mwa naha ye shukezwi mezi.”—Isaya 32:2.

⁶ Ka yona nako ye, f’o lifasi li tezi maziyezi, ku tokwahala “makwambuyu,” ee, bona maeluda ba ba ‘lisa mutapi kaufela,’ ili ku babalela lingu za Jehova ni ku eza likatulo ze lukile ka ku lumelelana ni likuka za Jehova ze lukile. (Likezo 20:28) Bona “makwambuyu” ba ba cwalo bao ba lukela ku kwanisa ze tokwahala ze bonisizwe kwa 1 Timotea 3:2-7 ni Tite 1:6-9.

⁷ Mwa bupolofita bwa hae bo butuna bo ne bu talusa za linako ze t’ata za “ku fela kwa lifasi,” Jesu n’a ize: “Mu bone kuli mu si ke mwa saba.” (Mateu 24:3-8) Ki kabakalañi balateleli ba Jesu ha ba sa sabiswi ki muinelo o’ lubeta wa lifasi kacenu? Libaka li li liñwi kikuli “makwambuyu”—ibe ba ba tozizwe kamba “lingu ze ñwi”—ba sweli ku sileleza mutapi ka busepahali. (Joani 10:16) Ba babalela mizwale ni likaizeli ba bona ka bundume, niha ku na ni likozi ze tuna ze cwale ka lindwa za mwahal’a mishobo ni ku bulaiwa kwa linyangela mutumbi. Mwa lifasi le, le li mwa tala kwa moya, ba tokomela kuli batu ba ba si na tabo ba fepiwa ka liniti ze yahisa za Linzwi la Mulimu, yona Bibele.

8. Jehova u luta ni ku itusisa cwañi “makwambuyu” ba ba li lingu ze ñwi?

 ⁸ Mwahal’a lilimo ze 50 ze s’e fitile, “makwambuyu” se ba bonahezi hande kuli ki bafi. “Makwambuyu” ba ba li ba lingu ze ñwi ba sweli ku lutiwa ku ba sitopa sa “mulena” ilikuli hamulaho wa ñalelwa ye tuna, ba ba ka fita ku ze konisa mwahal’a bona ba be ba ba kona ku ketiwa ku ba bazamaisi mwa “lifasi le linca.” (Ezekiele 44:2, 3; 2 Pitrosi 3:13) Ka ku fa ketelelo ni kimululo ya kwa moya ha ba nze ba etelela mwa sebelezo ya Mubuso, ba ba “sina muluti wa licwe le lituna,” o’ fa kimululo kwa mutapi mwa bulapeli bwa ona. *

9. Ki miinelo mañi ye bonisa kuli “makwambuyu” b’a tokwahala kacenu?

⁹ Mwa mazazi a mafelelezo a t’ata a, a lifasi la Satani le li maswe, Bakreste ba ba ineezi ba tokwa hahulu-hulu silelezo ye cwalo. (2 Timotea 3:1-5, 13) Moya o m’ata wa lituto ze fosahezi ni mihupulo ye kopami u sweli wa fuka. Mañungwa a’ sweli ku fuka ki a lindwa mwahal’a linaha ni mwahal’a batu ba ba yahile mwa linaha. Hape ki a ku lwaniswa kwa balapeli ba Jehova Mulimu ba ba sepahala. Mwa lifasi le, le li omisizwe ki linanga la kwa moya, Bakreste ba tokwa hahulu linuka za mezi a kenile, ao niti ya ona i si ka zwakiwa, kuli linyolwa la bona la kwa moya li fele. Ka litohonolo, Jehova u sepisize kuli Mulena wa hae ya busa, u ka itusisa banyani ba hae ba ba tozizwe ni “makwambuyu” ba ba tusa ba lingu ze ñwi. Ka bona u ka fa susuezo ni ketelelo ku ba ba felezwi ki tabo ni ba ba zwafile ka nako ye, ye ku tokwahala hahulu tuso. Jehova u ka bona teñi kuli lika li eziwa ka ku luka ni ka mulao.

Ku Tokomela ka Meto, Lizebe, ni Lipilu

10. Jehova u ezize litukiso mañi ilikuli batu ba hae ba ‘bone’ ni ku “utwa” lika za kwa moya?

¹⁰ Buñata bo butuna ba amuhezi cwañi tukiso ya Jehova ya  teokratiki? Bupolofita bu zwelapili bu li: “Meto a ba ba bona h’a na ku fokola; lizebe za ba ba utwa li ka teeleza.” (Isaya 32:3) Lilimo ha li nze li fita, Jehova u lukisize kuli batanga ba hae ba ba butokwa ba lutiwe ni ku fitiswa fa ku hula. Sikolo sa Bukombwa sa Teokratiki ni mikopano ye miñwi ye eziwa mwa liputeho za Lipaki za Jehova mwa lifasi kaufela; mikopano ya likiliti, ya mwa linaha, ni ya mwahal’a linaha; hamoho ni lituto ze ipitezi ze ba fiwa “makwambuyu” kuli ba babalele mutapi ka lilato, kaufela li tahisize kuli sizwale sa mwa lifasi kaufela sa batu ba ba swalisani, ba ba eza bolule-lule si tiye. Ko ba inzi kaufela mwa lifasi, bona balisana bao ba kwaluzi lizebe za bona kuli ba utwe licinceho za kutwisiso ya linzwi la niti le li sweli ku hula. Ka mazwalo a twaelizwe ka Bibele, ba itukiselize kamita ku utwa ni ku latelela ze ba utwa.—Samu 25:10.

11. Ki kabakalañi batu ba Mulimu cwale ha ba bulela ka buikolwiso, isi ku kukuma ka ku kakanya ze ba bulela?

¹¹ Ku tuha f’o, bupolofita bu lemusa kuli: “Ba lipilu ze bubebe ba ka utwiseza tuto; lilimi la ba sikukuma li bulele hande.” (Isaya 32:4) Haike ku si ke kwa ba ni ya bubebe kwa ku keta ze lukile ni ze si ka luka. Bibele i li: “Kana u lemuhile mutu ya sa ikupuli kwa ku bulela? Litanya li ka sepisa ku fita yena.” (Liproverbia 29:20; Muekelesia 5:2) Pili 1919 i si ka fita kale, batu ba Jehova ni bona ne ba silafalizwe ki mihupulo ya Sibabilona. Kono ku kala ka sona silimo seo, Jehova u ba ezisize ku utwisisa hande milelo ya hae. Ba fumani kuli liniti z’a ba file haki za ku matukela, kono li nahanisizwe hande. Mi cwale, ba bulela lika ze ba lumela ka buikolwiso, isi ku kukuma ka ku kakanya.

“Litanya”

12. ‘Matanya’ kacenu ki bomañi, mi ba tokwile cwañi bufani?

¹² Ku tuha f’o, bupolofita bwa Isaya bu bulela za nto ye shutana, u li: “Litanya ha li sa na ku bizwa kuli ki mutu ya kutekeha, ni mupumi h’a sa na ku bizwa kuli ki mutu wa loliso.  Kakuli litanya li bulela linyefulo fela.” (Isaya 32:5, 6a) “Litanya” ki mañi? Ka ku eza inge kuli u bata ku koñomeka, Mulena Davida habeli u fa kalabo u li: “Litanya mwa pilu ya lona li li: Ha ku na Mulimu. Ba bolile, misebezi ye ba eza ki ye nyenyisa; ha ku na ya eza hande.” (Samu 14:1; 53:1) Ki niti kuli batu ba bañwi ba lumela ka ku tiya kuli Jehova h’a yo. Ba ba twi ki ba ba butali ni bona lu ka li ba lumela cwalo, hamoho ni ba ba ezanga inge kuli Mulimu h’a yo, ili ku lumela kuli ha ku na ye ba ka ikalabela ku yena. Niti ha i yo kwa batu ba ba cwalo. Ha ba na bufani mwa lipilu za bona. Ha ba na taba ye nde ya lilato. Ka ku fapana ni Bakreste ba niti, ba zina-zinanga kamba mane ku palelwa ku tusa ba ba tokwa tuso ili ba ba ziyelehile.

13, 14. (a) Bakwenuheli ba mwa linako za cwale ba eza cwañi bumaswe? (b) Bakwenuheli ba lika ku yawisa ba ba lapile ni ba ba shwile linyolwa lika mañi, kono ki sifi se si ka ezahala kwa mafelelezo?

¹³ Buñata bwa matanya ba ba cwalo ba fitanga fa ku toya ba ba yemela niti ya Mulimu ka ku tiya. “Pilu ya hae i ineezi ku eza bumaswe, kuli a sebeze za ku nyefulisa [Muñ’a] Bupilo ni ku mu lwanisa ka buhata bwa hae.” (Isaya 32:6b) Taba yeo ki yona luli ye ba ezize bakwenuheli ba mwa linako za cwale! Mwa linaha li sikai mwa Yurope ni Asia, bakwenuheli ba swalisani ni ba bañwi ba ba lwanisa niti. Ba sweli ku bulela litaba za buhata maswe kwa babusi, ilikuli ba ezise kuli musebezi wa Lipaki za Jehova u kwalelwe kamba kuli u si ke wa eziwa ka ku tala. Ba bonisa moya wa ‘mutanga ya maswe,’ ya n’a polofitilwe ki Jesu kuli: “Mutanga yo, haiba ki ya maswe, mi a ipulelela mwa pilu, a li: Mulen’a ka u liyehile; mi s’a kala ku nata ba ba luwilwe ni yena; a ca, a nwa ni matahwa; Mulena wa mutanga yo u ka fita mwa lizazi l’a sa mu libeleli, ni nako y’a sa zibi; u ka mu nata likoto, a mu abele sa hae ni baipi; ki mo ku na ni lililo, ni likwecameno.”—Mateu 24:48-51.

¹⁴ Kono ka nako ye, mukwenuheli “ki ya si na taba ni moya wa ya lapile, u tokwisa ya shwile linyolwa sa ku nwa.” (Isaya 32:6c) Lila ba ba lwanisa niti ba lika ku yawisa batu ba ba lapile  kwa neku la niti lico za kwa moya. Mi ba lika ku palelwisa ba ba shwile linyolwa ku nwa mezi a’ katulusa a lushango lwa Mubuso. Kono ze ka ezahala kwa mafelelezo ki z’a zibahaza Jehova kwa batu ba hae ka mupolofita wa hae yo muñwi, kuli: “Ba ka ku lwanisa, kono ha ba na ku ku kona; kakuli ni inzi ni wena ku ku lamulela, ku bulela [Muñ’a] Bupilo.”—Jeremia 1:19; Isaya 54:17.

15. Kacenu, ki bomañi sihulu ba ba li “litanya,” ki litaba mañi za ku “tamilikeza” ze ba yemezi, mi ki lifi ze zwile mwateñi?

¹⁵ Ku zwelela mwa lilimo za fahal’a mwanda wa bu 20, buhule bu ezahalile hahulu-hulu patalaza mwa linaha za Krestendomu. Libaka? Bupolofita ne bu file libaka li li liñwi kuli: “Lilwaniso za litanya ni zona li maswe; u lela milelo ye maswe ya ku sinyeza babotana ka ku ba tamilikeza, ya ishuwile taba ya hae niha i li ye lukile.” (Isaya 32:7) Ka ku taleleza ona manzwi ao, buñata bwa ba bahulu ba bulapeli sihulu ba tuhelezi batu ku eza tobali ba si ka nyalana, batu ba ba si ka nyalana ku pila hamoho, kalombe—ee, ba tuhelezi “buhule, ni mikwa ye maswe kaufela.” (Maefese 5:3) Kacwalo ba “sinyeza” babotana ka lipulelo za bona za buhata.

16. Ki nto mañi ye ezisa Bakreste ba niti ku ba ba ba tabile?

¹⁶ Ka ku fapana, talelezo ya manzwi a mupolofita a tatama ya katulusa luli! “Kono mutu ya [fana, NW] yena, litaba z’a lela ki ze pahami; mi ki mo a ka yema, mwa litaba ze pahami.” (Isaya 32:8) Jesu yena ka sibili n’a susuelize bufani ha n’a ize: “Mu fane, mi mu ka fiwa; mu ka felwa mwa kubo ya mina, tikanyo ye nde, ye shetisizwe, ye katezwi, ye suluha. Kakuli tikanyo ye mu likanya ka yona, ki yona ye mu ka likanyezwa ni mina.” (Luka 6:38) Muapositola Paulusi ni yena n’a bonisize limbuyoti ze ba fumana bafani ha n’a ñozi kuli: “Mu nze mu hupula manzwi a’ bulezwi ki Mulena Jesu, yena luli, a li: Ku na ni mbuyoti mwa ku fana, ye fita ye mwa ku fiwa.” (Likezo 20:35) Se si tabisa Bakreste ba niti haki ku ba ni bufumu kamba libubo, kono ki ku fana—sina Jehova, yena Mulimu wa bona h’a li mufani. (Mateu 5: 44, 45) Tabo ya bona ye tuna ka ku fitisisa i tahiswa ki ku eza tato ya Mulimu, ka ku ifana mwa ku zibahaza ku ba bañwi “Evangeli ya kanya ya Mulimu Ya lumbekwa.”—1 Timotea 1:11.

17. Ki bomañi kacenu ba ba swana ni “bana ba basizana ba ba sa ipilaezi ka se siñwi” b’a talusa Isaya?

¹⁷ Bupolofita bwa Isaya bu zwelapili bu li: “Mina basali ba ba iketile, a mu utwe linzwi la ka! Mina bana ba basizana ba ba sa ipilaezi ka se siñwi, mu sikekele litaba za ka lizebe! Ku ka fita mwaha o na ni mazazi a mañwi, mi mu ka ziyeleha, mina mu sa ipilaezi ka se siñwi; kakuli ku kutula sisansa sa veine ku ka ba siyo; ha ku sa na se si ka kutulwa. Mu zuhe mina ba ba iketile! Mu ngangame mina ba ba si na lipilaelo!” (Isaya 32:9-11a) Moya wa basali bao u kana wa lu hupulisa bao kacenu ba ipapata ku sebeleza Mulimu kono  ili ba ba si na cisehelo mwa musebezi wa hae. Ba ba cwalo ba fumaneha mwa likeleke za “Babilona yo mutuna, m’ahe mahule.” (Sinulo 17:5) Ka mutala, ba ba li mwa likeleke za Krestendomu ba swana hahulu sina “basali” bao b’a talusa Isaya. Bona bao ba “iketile,” ha ba na taba ni za katulo ni ziyezi ye ka tuha i ba wela.

18. Ki bomañi ba ba laelwa kuli ba “icolete masila a masaka mwa liteka,” mi ki kabakalañi?

¹⁸ Kacwalo, muhuwo u ya kwa bulapeli bwa buhata, o’ li: “Mu tubule liapalo, mu tubule, mu icolete masila a masaka mwa liteka. Mu inate fa lifuba, mu lile kabakala masimu a’ kateleha, ni kabakala likota za veine ze beya hahulu. Miutwa ni mikona i ka mela mwa naha ya sicaba sa ka, ni fahalimu a mandu a tabo kaufela, mwa munzi wa minyaka.” (Isaya 32:11b-13) Pulelo ye li “mu tubule liapalo, mu tubule” ha i bonahali ku ba ye talusa ku siyala mapunu. Mukwa wa kwakale ne li wa ku apala siapalo sa fande fahalimw’a siapalo sa mwahali. Siapalo sa fande hañata ne si zibahaza mutu kuli ki mañi. (2 Malena 10:22, 23; Sinulo 7:13, 14) Kacwalo bupolofita bu laela ba bulapeli bwa buhata kuli ba tubule liapalo za fande—yona tibahazo ya bona ya buhata ya kuli ki batanga ba Mulimu—ni ku icoleta masila a masaka, a’ bonisa kuli b’a lila kabakala katulo ye ka tuha i taha. (Sinulo 17:16) Ha ku na miselo ya silumeli ye ka fumaneha mwa likopano za bulapeli bwa Krestendomu, yona y’e ipapata ku ba “munzi wa minyaka” wa Mulimu. Miselo ha i na ku fumanwa nihaiba mwahal’a ba bañwi kaufela ba ba mwa kopano ya mwa lifasi kamukana ya bulapeli bwa buhata. Sibaka se ba ezeza misebezi ya bona si melisa fela “miutwa ni mikona,” ili ku talusa kuli si siiwa likeela.

19. Isaya u beya fa ngandaleza muinelo mañi wa “Jerusalema” ya bukwenuheli?

¹⁹ Yona swanisezo ya bumaswe yeo i ama likalulo kaufela za “Jerusalema” ya bukwenuheli: “Ndu ya bulena i ka tuhelwa, mi munzi wa batu ba bañata u ka fetuha matota;  kalundunyana ni tawala ya mulibeleli li fetuhe misima ya ka nako ni nako, i be libapalelo la limbongolo za mwa naheñi ni mafulisezo a mitapi.” (Isaya 32:14) Ee, kalundunyana ni kona ka amiwa teñi. Kona kalundunyana kao ki kalulo ya Jerusalema ye li masilelezo a’ tiile a munzi. Ku bulela kuli kalundunyana kao ka ka fetuha musima ku talusa kuli munzi u ka shandaukelela. Manzwi a Isaya a bonisa kuli “Jerusalema” ya bukwenuheli—yona Krestendomu—ha i ezi tato ya Mulimu. Kwa moya, i omelezi, ki ye lenga nihaiba niti ni mulao—i eza hahulu mane inge sibatana.

Shutano ye Makaza!

20. Ku ezahalañi moya wa Mulimu ha u selwa fahalimw’a batu ba hae?

²⁰ Ku tuha f’o, Isaya u fa sepiso ye nde ku ba ba eza tato ya Jehova. Nyandiso ifi kamba ifi ya batu ba Mulimu i ka zwelapili “ku fitela Moya wa kwahalimu ha u selwa fahalimu a luna; mi cwale lihalaupa li ka fetuha simu ya likota ze beya hahulu; mane simu ya likota ze beya hahulu i likane ni mushitu.” (Isaya 32:15) Ka tabo, ku kala ka 1919, moya wa Jehova u selilwe ka buñata fahalimw’a batu ba hae, ili ku shoshelisa sinca ka swanisezo simu ya likota ze beya ya Lipaki ba ba tozizwe. Ku tuha f’o, mushitu o’ li lingu ze ñwi u bile o yanduluka. Kopano ya hae fa lifasi kacenu i itingile fa ku konda ni ku hula. Mwa paradaisi ya kwa moya ye ezizwe sinca, “kanya ya [Muñ’a] Bupilo ni butuna bwa bulena bwa hae,” li boniswa ki batu ba hae ha ba nze ba zibahaza mwa lifasi kamukana litaba za Mubuso wa hae o taha.—Isaya 35:1, 2.

21. Ku luka, pumulo, ni buiketo li fumaneha kai kacenu?

²¹ Cwale ha mu utwe sepiso ya Jehova ye makaza: “Kiha ku atula ka mulao ku ka ikahela mwa lihalaupa, ku luka ku t’o ina mwa simu ya likota ze beya hahulu. Musebezi wa ku luka ikaba ku tahisa kozo; mi muselo wa ku luka ikaba pumulo ni buiketo.” (Isaya 32:16, 17) Nto yeo i talusa hande muinelo wa kwa moya wa batu ba Jehova kacenu! Buñata bwa batu  kacenu ba kauhanyizwe ki sitoyo, mifilifili, ni bunjebwe bo butuna bwa kwa moya. Ka ku fapana, Bakreste ba niti bona ba swalisani mwa lifasi kaufela, niha “ba zwa mwa macaba kaufela, ni mwa mishobo, ni mwa masika, ni mwa lipuo kaufela.” Ba pila ni ku sebeza ka ku lumelelana ni ku luka kwa Mulimu. Mi ba eza cwalo ka ku kolwa kuli kwa mafelelezo, ba ka ikola kozo ni buiketo ku ya ku ile.—Sinulo 7:9, 17.

22. Muinelo wa batu ba Mulimu u shutana cwañi ni wa ba ba mwa bulapeli bwa buhata?

²² Mwa paradaisi ya kwa moya, Isaya 32:18 se i kalile ku talelezwa. I li: “Sicaba sa ka si ka yaha mwa naha ya kozo, si pile mwa mandu a tiile, mwa mabaka fo ku kuzize, fo ku iketilwe.” Kono ku ba ba ipumisa fela ku ba Bakreste, “mushitu u ka feliswa ki limbwewewe; mi munzi u ka kokobezwa hahulu.” (Isaya 32:19) Ee, sina ñundupula ye buhali, katulo ya Jehova i iteekezi ku nata munzi wa buipumisi wa bulapeli bwa buhata, ili ku kokobeza “mushitu” wa bayemeli ba ona, ku ba yundiseleza!

23. Ki musebezi mañi wa mwa lifasi kamukana o’ ka tuha u fela, mi ba ba abana ku ona ba swanela ku boniwa cwañi?

²³ Kalulo ye ya bupolofita i fela ka ku bulela kuli: “Mbuyoti i fiwa mina ba ba cala kwatuko ni mezi kaufela, ba ba sa fungi komu ni mbongolo!” (Isaya 32:20) Komu ni mbongolo ne li lifolofolo ze ne ba itusisa batu ba Mulimu ba kwakale kwa ku lima masimu ni ku cala lipeu. Kacenu, batu ba Jehova ba itusisa mishini ya ku hatisa ka yona, mishini ya malaiti, ni miyaho ni litanansipoti za mwa linako za cwale kwa ku hatisa ni ku hasanya lihatiso za Bibele ze ñata-ñata. Mi sa butokwa ka ku fitisisa, ba itusisa kopano ya teokratiki ye swalisani. Babeleki ba ba itatela ba itusisa zona liitusiso zeo kwa ku cala peu ya niti ya Mubuso mwa lifasi kaufela, ili “kwatuko ni mezi kaufela.” Banna ni basali ba ba eza bolule-lule ba ba saba Mulimu se ba kutuzwi, mi ba bañwi ba bañata-ñata ba sweli ku swalisana ni bona. (Sinulo 14:15, 16) Kaniti bona bao kaufela ba swanela ku boniwa kuli ba na ni “mbuyoti”!

[Litaluso za kwatasi]

[Lipuzo za Tuto]

 [Maswaniso a fa likepe 331]

Mwa miputo ya kwa liwate la Dead Sea, Isaya kauhanyo 32 i beilwe liswayo la “X”

 [Maswaniso a fa likepe 333]

‘Likwambuyu’ kaufela u swana sina mukunda ha ku fuka moya, ni sisabelo ha ku taha pula, ni mezi mwa naha ye omile, ni muluti kwa lizazi

[Siswaniso se si fa likepe 338]

Mukreste u fumana tabo ye tuna mwa ku bulelela ba bañwi taba ye nde