Kauhanyo 27

Jehova U Fuyaula Bulapeli bo Bu Kenile

Isaya 66:1-14

1. Ki lifi ze tuna ze koñomekilwe mwa kauhanyo ya mafelelezo ya Isaya, mi ki lifi lipuzo ze alabiwa?

MWA kauhanyo ya mafelelezo ya Isaya, ze ñwi za ze tuna ze bulelwa mwa buka ye ya bupolofita li koñomekwa hahulu ni ku fita, mi lipuzo ze ñwi za butokwa za alabiwa. Mwahal’a ze tuna ze koñomekwa ki ku pahama kwa Jehova, ku toya buipi kwa hae, tundamo ya hae ya ku ota ba ba maswe, ni lilato ni buiyakato bwa hae kwa basepahali. Mi hape, lipuzo ze tatama za alabiwa: Ki shutano mañi ye mwahal’a bulapeli bwa niti ni bwa buhata? Lu kona ku kolwa cwañi kuli Jehova u ka ota baipi ba ba ipapata kuli ba kenile kono ba nyandisa batu ba Mulimu? Mi Jehova u ka fuyaula cwañi ba ba sepahala ku yena?

Ze Tokwahala mwa Bulapeli bo Bu Kenile

2. Jehova u zibahazañi ka za butuna bwa hae, mi zibahazo yeo ha i talusiñi?

² Sa pili, bupolofita bu koñomeka butuna bwa Jehova, bu li: “[Muñ’a] Bupilo s’a bulela ki se, u li: Lihalimu ki lona lubona lwa ka, mi lifasi ki sipula sa buhato kwa mautu a ka. Ndu ye mu ka ni yahela i ka ba ye cwañi? Mi sibaka sa mapumulelo a ka i ka ba sifi?” (Isaya 66:1) Ba bañwi ba lumela kuli mupolofita u hanisa Majuda ku yahela sinca Jehova tempele muta sicaba si kutisezwa habo sona. Kono hakucwalo; Jehova ka sibili u ka laela kuli tempele  i zusiwe. (Ezira 1:1-6; Isaya 60:13; Hagai 1:7, 8) Kacwalo, taba ye i talusañi?

3. Kiñi ha ku swanela ku talusa lifasi-mubu kuli ki “sipula sa buhato bwa mautu” a Jehova?

³ Pili, lwa kona ku nyakisisa libaka lifasi-mubu ha li taluswa ku ba “sipula sa buhato bwa mautu” a Jehova. Pulelo yeo ha i mu kutisezi mwatasi. Kwa lika kaufela za mwahalimu ze eza bolule-lule, ki lifasi-mubu fela le li filwe libizo le li ipitezi leo. Lifasi-mubu la luna li ka ipitela ku ya ku ile, kakuli fa, ki fona fa n’a lifezi tiululo Mwan’a libanda wa Jehova, mi fa, ki fona f’a ka boniseza Jehova ka Mubuso wa Mesiya kuli bubusi bwa hae bu lukile. Kwa swanela hakalo kuli lifasi-mubu li bizwe kuli sipula sa buhato bwa mautu a Jehova! Mulena a kana a itusisa sipula se si cwalo kuli a pahame fa lubona lwa hae lo lu telele mi kihona a si eza mapumulelo a mautu a hae.

4. (a) Ki kabakalañi muyaho ufi kamba ufi fa lifasi-mubu ha u sa koni ku ba sibaka sa mapumulelo a Jehova Mulimu? (b) Pulelo ya kuli “linto zeo kaufela” i talusañi, mi lu lukela ku bulelañi ka za ku lapela Jehova?

⁴ Kono mulena ha koni ku ina fa sipula sa buhato bwa mautu a hae, mi ni Jehova ha ini fa lifasi-mubu fa. Mbali mahalimu tenyene a matuna-tuna ha koni ku mu likana! Kacwalo muyaho ufi kamba ufi wa fa lifasi-mubu ha u koni ku ba ndu luli ya Jehova. (1 Malena 8:27) Lubona ni sibaka sa mapumulelo sa Jehova li mwa liluko la kwa moya, le li taluswa ki pulelo ya kuli “lihalimu” ka mo i itusiselizwe kwa Isaya 66:1. Timana ye tatama i lu tusa ku utwisisa taba ye, i li: “Linto zeo kaufela li ezizwe ki lizoho la ka, mi ha li li teñi ki ka Na, ku bulela [Muñ’a] Bupilo.” (Isaya 66:2a) Mu nahane Jehova inze a otolozi lizoho la hae h’a nze a supa “linto zeo kaufela,” f’o kikuli zote mwa lihalimu ni fa lifasi-mubu. (Isaya 40:26; Sinulo 10:6)  Ka ku ba Mubupi ya Pahami wa zote, u swanelwa ki ze ñata isi fela muyaho u li muñwi. U lukelwa ki ze ñata, isi bulapeli bwa fahalimu fela.

5. Lu bonisa cwañi kuli lwa ‘ikokobeza, ni ku lobeha pilu’?

⁵ Ki bulapeli mañi bo bu swanela Mubusi wa Pupo Kamukana? Yena ka sibili u lu bulelela kuli: “Mutu ye ni ka talima, ki mutu ya ikokobeza, ya lobehile pilu mi a kuñiswa ki linzwi la ka.” (Isaya 66:2b) Ee, se si tokwahala mwa bulapeli bo bu kenile kikuli mulapeli a be ni pilu ye nde. (Sinulo 4:11) Mulapeli wa Jehova u lukela ku ba “ya ikokobeza, ya lobehile pilu.” Kana ku talusa kuli Jehova u bata kuli lu si ke lwa ba ni tabo? Batili, ki “Mulimu ya tabile,” mi u bata kuli balapeli ba hae ba be ni tabo ni bona. (1 Timotea 1:11, NW; Mafilipi 4:4) Niteñi, kaufel’a luna lwa fosanga hañata, mi ha lu swaneli ku keshebisa libi za luna. Li swanela ku lu tiseza ku “ikokobeza,” f’o kikuli ku swaba kuli ha lu si ka latelela milao ya Jehova ye lukile. (Samu 51:17) Lu tokwa ku bonisa kuli lu “lobehile pilu” ka ku baka, ku lwanisa mikwa ya luna ya ku hanelela ku eza sibi, ni ku lapela ku Jehova ku kupa swalelo.—Luka 11:4; 1 Joani 1:8-10.

6. Balapeli ba niti ba swanela ku ‘kuñiswa ki linzwi la Mulimu’ ka nzila ifi?

⁶ Ku zwa f’o, Jehova u bata ba ba ‘kuñiswa ki linzwi la hae.’ Kana seo si talusa kuli u bata kuli lu no ngangama ka sabo ha lu bala manzwi a hae? Batili, kono u bata kuli lu nge z’a bulela ka likute le lituna. Lu bata ha buniti kelezo ya hae, ku itusisa yona kuli i lu etelele mwa litaba kaufela za bupilo. (Samu 119:105) Lu kana hape lwa ‘kuña’ ka ku saba ona muhupulo wa ku sa utwa Mulimu, wa ku silafaza niti ya hae ka lizo za butu, kamba ku i keshebisa. Moya o cwalo wa buikokobezo wa tokwahala mwa bulapeli bo bu kenile—kono ka bumai, ha bu fumanehi hahulu mwa lifasi kacenu.

 Jehova U Toile Bulapeli bwa Buipi

7, 8. Jehova u nga cwañi bulapeli bwa fahalimu bwa balapeli ba baipi?

⁷ Isaya ha nahanisisa ba mwa miteñi ya hae, u lemuha kuli ki ba sikai fela ba ba na ni pilu ya bata Jehova kwa balapeli ba hae. Kabakaleo, Jerusalema ya bukwenuheli ya swanelwa ki katulo ya yona ye atumela. Mu bone mw’a ngela Jehova bulapeli bo bu eziwa mwateñi: “Ya bulaya komu inz’a eza mukwa fela, u swana sina ya bulaya mutu; ya eza sitabelo sa ngu u swana sina ya loba mulala wa nja; ya tahisa nubu ya bupi u likana ni ya tahisa mali a kulube; ya cisa insense u likana ni ya lumba mulimu wa siswaniso. E, ki yona mikwa ye ba iketezi, mi lipilu za bona li tabela za bona ze masila.”—Isaya 66:3.

⁸ Manzwi a, a lu hupulisa manzwi a Jehova a ñozwi mwa kauhanyo ya pili ya Isaya. Teñi k’o, Jehova n’a bulelezi batu ba hae ba baipanguli kuli bulapeli bwa bona bwa fahalimu fela ne bu sa mu tabisi mi hape mane ne bu ekeza fela kwa buhali bwa hae bo bu lukile kakuli balapeli ne li baipi. (Isaya 1:11-17) Ka nzila ye swana, Jehova cwale u swaniseza matabelo a bona kwa likezo ze situhu. Ku eza sitabelo sa komu ye tula ha ku tabisi Jehova sina mane ku bulaya mutu! Matabelo a mañwi a swanisezwa kwa matabelo a nja kamba kulube, ili lifolofolo ze masila mwa Mulao wa Mushe mi kacwalo ili ze sa swaneli ni ku ezwa sitabelo. (Livitike 11:7, 27) Kana Jehova u tuhelela fela buipi bwa bulapeli bo bu cwalo a sa fi koto?

9. Buñata bwa Majuda ba ngile cwañi likupuliso za Jehova ka Isaya, mi kiñi ze tamehile ku ba tulukela?

⁹ Jehova cwale u li: “Ni Na, ni ka ba ketela ze ba ipuma ka zona, ni ba tiseze se ba saba; kakuli ha ne ni biza, ha ku na ya alabile; ha ne [ni] bulela, ha ku na ya utwile, kono ba ya ba pila mwa bumaswe mwa meto a ka, mi ba  iketela ku eza ze ni sa lati.” (Isaya 66:4) Ku si na kakanyo, Isaya u bulela manzwi a ka buikolwiso bo bu tezi. Ka lilimo-limo, u itusisizwe ki Jehova kwa ku “biza” ni ku “bulela” kwa batu ba Hae. Mupolofita y’o wa ziba hande kuli hañata ha ku na ya mu teelelize. Bakeñisa kuli ba zwezipili ku eza bumaswe, koto i tamehile ku ba tulukela. Jehova kaniti u ka keta koto ya ku ba fa ni ku tisa ze sabisa fahalimw’a batu ba hae ba bakwenuheli.

10. Jehova mwa n’a ezelize Juda ku lu talusezañi ka za mwa ngela Krestendomu?

¹⁰ Krestendomu ya cwale ni yona i ezize lika z’a sa tabeli Jehova. Ku lapela maswaniso ku atile mwa likeleke za yona, mihupulo ni lizo za buhedeni za babazwa mwa likeleke, mi ku bata kwa yona m’ata a bupolitiki ku i kenyize hahulu mwa ku eza bubuki bwa kwa moya ni macaba a lifasi. (Mareka 7:13; Sinulo 18:4, 5, 9) Sina Jerusalema wa kwaikale, koto ye swanela ya Krestendomu—yona nto ye i “saba”—i i libile. Ze ñwi ze i ka otelwa ka swanelo ki ku nyandisa batu ba Mulimu.

11. (a) Kiñi ze ekeza kwa sibi sa bakwenuheli mwa miteñi ya Isaya? (b) Ba mwa miteñi ya Isaya ba hana cwañi basepahali ‘kabakala Libizo la Mulimu’?

¹¹ Isaya u zwelapili kuli: “A mu utwe linzwi la [Muñ’a] Bupilo, mina ba ba kuñiswa ki linzwi la hae. Banabahabo mina ba ba mi toile kabakala Libizo la ka, mi ba mi hana, ba bulela ba li: [Muñ’a] Bupilo a iponahalise ka bulena bwa hae, kuli lu bone tabo ya mina! Kono ba ka swabiswa.” (Isaya 66:5) “Banabahabo” Isaya, bona batu ba sicaba sa habo, ba filwe buikalabelo ki Mulimu bwa ku yemela Jehova Mulimu ni ku ipeya kwatas’a bubusi bwa hae. Sibi sa bona sa ku palelwa ku eza cwalo ki se situna hahulu. Kono se si ekeza kwa sibi sa bona kikuli ba toile batu ba ba sepahala, ba ba ikokobeza, inge Isaya.  Bakwenuheli bao ba toile ni ku hana basepahali kakuli basepahali bao ba yemela Jehova Mulimu ka buniti. Ka nzila yeo, ba ba hana ‘kabakala Libizo la Mulimu.’ Ka nako ye swana, batanga ba Jehova ba buhata bao ba ipapata ku mu yemela, ba itusisa ka buipi lipulelo za bulapeli ze cwale ka ya kuli “[Muñ’a] Bupilo a iponahalise ka bulena bwa hae”! *

12. Ki ifi mitala ye miñwi ya ku nyandiswa kwa batanga ba Jehova ba ba sepahala ki balapeli ba baipi?

¹² Sitoyo sa balapeli ba buhata sa ku toya balateleli ba bulapeli bo bu kenile si kalile kale. Ki talelezo ye ñwi ya bupolofita bwa kwa Genese 3:15, ye ne polofitile sitoyo sa ka nako ye telele mwahal’a peu ya Satani ni Peu ya musal’a Mulimu. Jesu n’a bulelezi balateleli ba hae ba ba  tozizwe ba mwa lilimo za mwanda wa pili kuli ni bona ne ba ka nyandiswa ki ba sicaba sa habo—ili ku lelekwa mwa masinagoge ni ku nyandiswa mane ku fita fa lifu. (Joani 16:2) Mi mwa miteñi ya cwale bo? Kwa makalelo a “mazazi a maungulelo,” batu ba Mulimu ne ba boni kuli nyandiso ye swana ne i li kwapili. (2 Timotea 3:1) Ka 1914, The Watch Tower ne i bulezi litaba ze fumaneha kwa Isaya 66:5, mi ya li: “Buñata bwa nyandiso ya batu ba Mulimu i zwelezi ku ba ba ipapata ku ba Bakreste.” Taba ye swana ne i bulezi kuli: “Ha lu zibi nji ba ka eza ze maswe ni ku fita mwa miteñi ya luna—ku lu shengoka, ku filikanya kopano, mwendi ni ku lu bulaya luli.” Manzwi ao n’a bile a niti luli! Nakonyana ku zwa fo a hasanyezwa manzwi ao, nyandiso ye ne tisizwe ki ba bahulu ba bulapeli ya ba ye t’ata hahulu mwahal’a Ndwa ya Lifasi ya I. Kono Krestendomu ne i swabisizwe, sina mo ne ku polofitezwi. Kamukwaufi?

Tukuluho Ye Bubebe ili ya ka Sipundumukela

13. Mwa talelezo ya pili, “linzwi la mulomo o mutuna [le] li zwa mwa munzi” kiñi?

¹³ Isaya u polofita kuli: “Linzwi la mulomo o mutuna li zwa mwa munzi, linzwi li zwa mwa Tempele, ki linzwi la [Muñ’a] Bupilo ya kutiseza lila za hae likezo za bona.” (Isaya 66:6) Mwa talelezo ya pili ya manzwi a, “munzi” wo ki Jerusalema, ko i inzi tempele ya Jehova. “Linzwi la mulomo o mutuna” li talusa mifilifili ya ndwa, ye utwiwa mwa munzi muta limpi za Babilona li i taseza ka 607 B.C.E. Kono talelezo ya cwale bo?

14. (a) Malaki n’a polofitileñi ka za ku taha kwa Jehova mwa tempele ya Hae? (b) Ka ku ya ka bupolofita bwa Ezekiele, ne ku ezaheziñi Jehova ha n’a tile mwa tempele ya hae? (c) Jehova ni Jesu ne ba tatubile lili tempele ya kwa moya, mi ne ku ezaheziñi ku be ne ba ipapata ku yemela bulapeli bo bu kenile?

¹⁴ Manzwi a, a Isaya a lumelelana ni litaba ze ñwi ze peli  za bupolofita, ye ñwi i ñozwi kwa Ezekiele 43:4, 6-9 mi ye ñwi kwa Malaki 3:1-5. Bo Ezekiele ni Malaki ba polofita za nako y’a taha Jehova Mulimu kwa tempele ya hae. Bupolofita bwa Malaki bu bonisa kuli Jehova u taha ku t’o tatuba ndu ya hae ya bulapeli bo bu kenile ili ku ba Mukenisi, ya hana ba ba mu sinya libizo. Pono ya Ezekiele i bonisa Jehova ku ba ya kena mwa tempele ni ku laela kuli buhule ni bulapeli bwa maswaniso kaufela bu feliswe. * Mwa talelezo ya cwale ya litaba za bupolofita zeo, ne ku na ni kezahalo ya kwa moya ya butokwa ka 1918 ye ne ama bulapeli bwa Jehova. Ku bonahala kuli Jehova ni Jesu ne ba tatubile be ne ba ipapata ku yemela bulapeli bo bu kenile. Tatubo yeo ne i tisize kuli Krestendomu ye silafezi i fulalelwe lwa mafelelezo. Kwa balateleli ba Kreste ba ba tozizwe, tatubo yeo ne li nakonyana ya ku keniswa ili ye ne i latelezwi ki tukuluho ya kwa moya ye bubebe ka 1919.—1 Pitrosi 4:17.

15. Ki kufi ku pepwa ko ku polofitwa, mi ku ba teñi cwañi ka 537 B.C.E.?

¹⁵ Tukuluho yeo i swanisezwa hande mwa litimana za Isaya ze latelela: “Butuku bu si ka kala kale, a ba a puluha; a si ka indukwa kale, a pepa mwan’a mushimani. Ki mañi ya utwile taba ye cwalo? Ki mañi ya boni ze swana sina zona? Kikuli naha i ka pepwa ka lizazi li liñwi? kamba sicaba si ka pepwa ka nako i li ñwi? Bo, Sione a sa indukwa fela, a pepa bana ba hae.” (Isaya 66:7, 8) Manzwi a, a na ni talelezo ya pili ye tabisa kwa Majuda ba ba li lihapwa mwa Babilona. Sione, kamba Jerusalema, i swanisezwa hape sina musali ya pepa, kono ki ku  pepa ko ku ipitezi luli! Ki ko ku bubebe, kwa ka sipundumukela, kuli mane ku ezahala pili butuku bwa lupepo bu si ka utwiwa kale! Yeo ki swanisezo ye swanela. Ku pepwa sinca kwa batu ba Mulimu ka ku ba sicaba se si ipitezi ka 537 B.C.E. ku ezahala ka bubebe ili ka sipundumukela kuli mane kwa komokisa. Kakuli, ki likweli li sikai fela ze fita, ku zwa nako yeo Sirusi a lukulula Majuda mwa butanga ku ya nako yeo bomasiyaleti ba ba sepahala ba fita habo bona! Kwa fapana hahulu ni likezahalo ze ne isize kwa ku pepwa kwa makalelo kwa sicaba sa Isilaele! Ka 537 B.C.E., ha ku na tokwahalo ya ku bata tukuluho ku mulena ya itakata, ha ku na tokwahalo ya ku saba mpi ye situhu, ha ku na tokwahalo ya ku yambaela mwa lihalaupa lilimo ze 40.

16. Mwa talelezo ya cwale ya Isaya 66:7, 8, Sione i swanisezañi, mi bana ba yona ba pepilwe cwañi sinca?

¹⁶ Mwa talelezo ya cwale, Sione i yemela “musali” wa kwa lihalimu wa Jehova, yona kopano ya hae ya kwa lihalimu ya libupiwa za moya. Ka 1919, “musali” y’o n’a nyakalalile ku pepa bana ba ba tozizwe ba fa lifasi-mubu ba li batu ba ba kopanyizwe hamoho, ona “sicaba.” Ku pepwa sinca k’o ne ku ezahezi ka bubebe ni ka sipundumukela. * Mwa likweli li sikai fela, batoziwa ka sikwata ne ba zwile mwa muinelo o swana sina ku shwa wa ku sa sebeza ni ku kena mwa muinelo wa ku sebeza ka ku tiya mwa “naha” ya bona, ona liluko la musebezi wa kwa moya l’a ba file Mulimu. (Sinulo 11:8-12) Ka mbumbi ya 1919, mane ne ba zibisize za ku hatiswa kwa magazini ye nca ye zamaelela ni The Watch Tower. Hatiso ye nca yeo ye ne bizwa  The Golden Age (Awake! cwale) ne i li bupaki bwa kuli batu ba Mulimu ne ba tiisizwe mi ne ba kopanyizwe hamoho hape kuli ba sebeze.

17. Jehova u kolwisa cwañi batu ba hae kuli ha ku na se si kona ku mu tibela ku peta mulelo wa hae ka za Isilaele wa kwa moya?

¹⁷ Ha ku na nto ye ñwi mwa pupo ye ne ka tibela ku pepwa sinca k’o kwa kwa moya. Timana ye tatama i bulela ona cwalo fela, i li: “Kikuli ni ka hanisa Sione ku pepa ha s’a fitile fa nako ya hae? ku buza [Muñ’a] Bupilo; mi mwana h’a sa lukela ku pepwa, ne ni ka mu tibela? ku bulela [Muñ’a] Bupilo.” (Isaya 66:9) Sina ku pepa mwana ha ku sa koni ku tibelwa ha se ku kalile, ni ku pepwa sinca kwa Isilaele ya kwa moya, ha ne se ku kalile, ne ku sa koni ku yemiswa. Ki niti kuli ne ku na ni twaniso, mi ku libelelwa twaniso ye ñwi kwapili. Kono ki Jehova a nosi ya kona ku yemisa s’a kalisize, mi ha ezangi cwalo! Niteñi, Jehova u nga cwañi batu ba hae ba ba tiisizwe?

Pabalelo Ye Musa ya Jehova

18, 19. (a) Ki ifi swanisezo ye susumeza ya itusisa Jehova, mi i sebeza cwañi kwa batu ba hae ba ba hapilwe? (b) Bomasiyaleti ba ba tozizwe kacenu ba tusizwe cwañi ki lico ni pabalelo ye lilato?

¹⁸ Litimana z’e ne ze tatama li talusa ka ku tabisa za musa wa Jehova. Pili, Isaya u li: “A mu tabele Jerusalema, mu tabe kabakala hae, mina kamukana ba ba mu lata; mu tabe ni yena, mina kamukana ba ba ne ba mu lila. Kuli mu kone ku kanya ni ku kula mabisi a hae a’ ka mi tiisa; mu ce kwa bufumu bwa kanya ya hae inze mu tabile.” (Isaya 66:10, 11) Jehova fa u itusisa swanisezo ya musali ya anyisa mbututu ya hae. Mbututu ha i utwa tala, ya lilanga ka ku swalelela. Kono ha i tiswa kwa lizwele la m’a yona kuli i anye, ku lila kwa yona ku fetuhanga tabo ni ku kula. Ka nzila ye swana, bomasiyaleti  ba Majuda ba ba sepahala mwa Babilona ba ka zwiswa ka putako mwa muinelo wa ku lila ni ku kena ku wa tabo ni wa ku ikola ha i ka fita nako ya tukuluho ni ku kutiswa. Ba ka nyakalala. Kanya ya Jerusalema i ka uncafazwa ha inze i zuswa ni ku yahiwa sinca. Mi kanya ya munzi ikaba ni kwa bayahi ba ona ba ba sepahala. Mi hape ba ka fepiwa kwa moya ka baprisita ba ba sweli musebezi.—Ezekiele 44:15, 23.

¹⁹ Isilaele ya kwa moya ni yona ne i filwe lico ze ñata hamulaho wa ku lukululwa ka 1919. Ku zwa nako yeo, lico ze taha ka “mutanga ya sepahala, ya na ni kutwisiso” li bile ze fiwa kamita. (Mateu 24:45-47) Ye luli i bile nako ya ku tiiswa pilu ni ya tabo ku bomasiyaleti ba ba tozizwe. Kono ku bile ni limbuyoti ze ñwi hape.

20. Jerusalema i filwe cwañi ‘nuka ye lusa,’ mwa miteñi ya kwaikale ni ya cwale?

²⁰ Bupolofita bu zwelapili bu li: “[Muñ’a] Bupilo s’a bulela ki se, u li: A mu bone, ni ka mu pilisa mwa kozo ye swana inge nuka; ze bubana za macaba li tale mwahae sina nuka ha i lusa. Cwale mu ka anya, mu ambekwe fa noka mi mu cikiswe fa mañwele.” (Isaya 66:12) Teñi fa, swanisezo ya ku anyisa i kopanyiwa ni swanisezo ya limbuyoti ze ñata ye bulela za “nuka” ni “nuka ha i lusa.” Jerusalema i ka fiwa kozo ye tuna ki Jehova hamoho ni “ze bubana za macaba,” ze taha kwa batu ba Mulimu ni ku ba fuyaula. Nto yeo i talusa kuli batu ba macaba ba ka selehanela kwa batu ba Jehova. (Hagai 2:7) Mwa talelezo ya kale, batu ba bañata ba macaba a fitana-fitana ne ba kumalezi luli Isilaele, ili ku ba baproselite ba Majuda. Nihakulicwalo, talelezo ye tuna ni ku fita i bile teñi mwa nako ya luna f’o “buñata bo butuna bwa batu . . . [ba] ba zwa mwa macaba kaufela, ni mwa mishobo, ni mwa  masika, ni mwa lipuo kaufela”—ba kumalezi bomasiyaleti ba Majuda ba kwa moya. Yeo luli ki nuka ye lusa ya batu ba bañata.—Sinulo 7:9; Zakaria 8:23.

21. Ki kufi ku tiiswa lipilu ko ku polofitwa ka swanisezo ye tabisa?

²¹ Isaya 66:12 hape i bulela lipulelo za lilato la me—ku cikisa mwana fa mañwele ni ku mu ambeka fa noka. Mwa timana ye tatama, muhupulo o swana u bulelwa ka nzila ye ñwi hape ye hoha mamelelo. “M’a [munna, NW] sina mw’a tiiseza mwan’a hae pilu, ni ka mi tiisa lipilu cwalo; mu ka tiiswa lipilu mwa Jerusalema.” (Isaya 66:13) Mwana y’o cwale se li “munna,” s’a hulile. Kono m’ahe u sa na ni takazo ya ku mu tiisa pilu ka nako ya ziyezi.

22. Jehova u bonisa cwañi m’ata ni musa wa lilato la hae?

²² Ka nzila ye tabisa ye, Jehova u swaniseza m’ata ni musa wa lilato la hae kwa batu ba hae. Nihaiba lilato la me le lituna ka ku fitisisa ki poniso ye nyinyani-nyani fela ya lilato le li tungile la Jehova kwa batu ba hae ba ba sepahala. (Isaya 49:15) Ki kwa butokwa hahulu kuli Bakreste kaufela ba likanyise mukwa wo wa Ndat’a bona wa kwa lihalimu! Muapositola Paulusi n’a u likanyisize, mi kacwalo a siyela mutala o munde maeluda ba mwa puteho ya Sikreste. (1 Matesalonika 2:7) Jesu mane n’a bulezi kuli lilato la sizwale ne li ka ba lona sizibelo se situna sa balateleli ba hae.—Joani 13:34, 35.

23. Mu taluse tabo ya batu ba Jehova ba ba lukuluzwi.

²³ Jehova u bonisanga lilato la hae mwa likezo. Kacwalo, u zwelapili kuli: “Mu ka li bona zeo, mi lipilu za mina li ka wabelwa; mibili ya mina i ka tiya sina bucwañi bo bunca; mi lizoho la [Muñ’a] Bupilo li ka zibwa ki batanga ba hae; kono u ka halifela lila za hae.” (Isaya 66:14) Muituti wa puo ya Siheberu u akaleza kuli pulelo ye li  “mu ka li bona zeo” i talusa kuli kai ni kai ko ba ka talima bahapiwa ba ba kutile mwa naha ya bona ye zusizwe, “ba ka bona fela tabo.” Ba ka wabelwa luli, ba ka nyakalala hahulu kuli ba kutisizwe habo bona ko ba lata. Ba ka matafazwa, inge kuli mibili ya bona ne i tiya sinca, ba ka tiiswa inge bucwañi ka nako ya litabula. Bote ba ka ziba kuli limbuyoti zeo li tisizwe ki “lizoho la [Muñ’a] Bupilo,” isi ka buikatazo bwa mutu.

24. (a) Ki lifi ze mu nahana ha mu nyakisisa likezahalo ze ama batu ba Jehova kacenu? (b) Ki ifi ye swanela ku ba katulo ya luna?

²⁴ Kana mu lemuhile lizoho la Jehova ha li sebeza kwa batu ba hae kacenu? Ha ku na mutu ya n’a ka kona ku tisa zuho ya bulapeli bo bu kenile. Ha ku na mutu ya n’a ka tisa kuli bolule-lule ba batu ba butokwa ba mwa macaba kaufela ba t’o swalisana ni bomasiyaleti ba ba sepahala mwa naha ya bona ya kwa moya. Ki Jehova Mulimu a nosi ya kona ku eza lika zeo. Liponiso zeo za lilato la Jehova li lu tiseza tabo ye tuna. Haike lu si keshebisi lilato la hae. Lu zweleñipili ku ‘kuñiswa ki linzwi la hae.’ Ha lu ikatuleleñi ku latelela likuka za Bibele ni ku tabela ku sebeleza Jehova.

[Litaluso za kwatasi]

[Lipuzo za Tuto]

[Siswaniso se si fa likepe 395]

“Linto zeo kaufela li ezizwe ki lizoho la ka”

[Siswaniso se si fa likepe 402]

Jehova u ka tiseza Sione “ze bubana za macaba”