“Libizo Le Linca”
Kauhanyo 23
“Libizo Le Linca”
1. Ki ifi sepiso ye ñozwi kwa Isaya kauhanyo 62?
KU WISWA pilu, ku omba-ombiwa, ku sepiswa ku lukululwa—zeo ki zona ze ba tokwa Majuda ba ba zwafile maswe ba ba mwa Babilona. Se ku fitile lilimo-limo ku zwa fo ne i sinyelizwe Jerusalema ni tempele ya yona. Juda, ye li likilomita ze eza 800 ku zwa Babilona, i siilwe i li matota, mi Majuda ba bonahala kuli ba libezwi ki Jehova. Ki lifi ze kona ku kondolokisa muinelo wa bona? Ki lisepiso za Jehova za kuli u ka ba kutisa habo bona ni ku ba konisa ku zusa bulapeli bo bu kenile. Kihona mabizo a’ cwale ka “Muhaniwa” ni “Matota” a ka yoliwa ki mabizo a bonisa kuli ba katelwa ki Mulimu. (Isaya 62:4; Zakaria 2:12) Kauhanyo 62 ya Isaya i tezi lisepiso zeo. Kono sina bupolofita bo buñwi bwa za tukuluho, kauhanyo ye i bulela ze ñwi hape isi fela za tukuluho ye ama Majuda ba ba mwa buhapiwa mwa Babilona. Mwa talelezo ya yona ye tuna, Isaya kauhanyo 62 i lu kolwisa kuli sicaba sa Jehova sa kwa moya, yona “Isilaele wa Mulimu,” si tamehile ku punyuha kwa moya.—Magalata 6:16.
Jehova Ha Kuzi Fela
2. Jehova u shemuba Sione ka nzila ifi hape?
2 Babilona i tulwa ka 539 B.C.E. Hamulaho, Mulena Sirusi wa Peresia u fa taelo ye konisa Majuda ba ba saba Mulimu ku kutela kwa Jerusalema ku yo zusa teñi bulapeli bwa Jehova. (Ezira 1:2-4) Ka 537 B.C.E., Majuda ba pili ku kuta se ba fitile habo bona. Jehova hape wa shemuba Jerusalema, sina mw’a boniseza manzwi a hae a bupolofita ili a’ lilato, a’ li: “Kabakala Sione ha ni na ku kuza, kabakala Jerusalema ha ni na ku pumula, ku fitela niti ya hae i bonahala sina liseli, ni ku piliswa kwa hae ku taha sina lumonyi.”—Isaya 62:1.
3. (a) Ki kabakalañi Sione ya fa lifasi-mubu ha i fulalelwa ki Jehova kwa mafelelezo, mi ki sifi sicaba se si i yola? (b) Batu ba tobohañi, mi ki lili f’o, mi lu pila mwa nako ifi kacenu?
3 Ka 537 B.C.E., Jehova n’a talelelize sepiso ya hae ya ku lukulula Sione, kamba Jerusalema. Bayahi ba yona ne ba pilisizwe ki yena mi niti ya bona ne i bonahezi sina liseli. Kono hasamulaho ba yenduka hape, ili ku zwa mwa bulapeli bo bu kenile. Kwa mafelelezo, ba hana Jesu kuli ki Mesiya, mi Jehova kacwalo a tuhela ku b’a nga kuli ki sicaba sa hae se si ketilwe. (Mateu 21:43; 23:38; Joani 1:9-13) Jehova a tisa kuli sicaba se sinca, yona “Isilaele wa Mulimu,” si pepiwe. Sicaba se sinca seo sa ba batu ba hae ba ba ipitezi, mi mwa lilimo za mwanda wa pili, lilama za sona za kutaza ka tukufalelo taba ye nde mwa lifasi kaufela la miteñi yeo. (Magalata 6:16; Makolose 1:23) Ka bumai, baapositola ha se ba shwile, batu ba toboha tumelo mi ba zwa mwa bulapeli bwa niti. Kabakaleo, kwa taha Bukreste bwa bukwenuheli, ili bo bu fumaneha kacenu mwa Krestendomu. (Mateu 13:24-30, 36-43; Likezo 20:29, 30) Ka lilimo-limo, Krestendomu i tuhelezwi ku tisa nyazo ye tuna fa libizo la Jehova. Kono ka 1914, “mwaha wa sishemo” wa Jehova wa kalisa, hamoho ni talelezo ye tuna ya kalulo ye ya bupolofita bwa Isaya.—Isaya 61:2.
4, 5. (a) Sione ni bana ba yona li swaniseza bomañi kacenu? (b) Jehova u itusisize cwañi Sione kuli “ku piliswa kwa hae [Sione] ku [tahe] sina lumonyi”?
4 Kacenu sepiso ya Jehova ya ku zusa Sione i talelelizwe fahalimw’a kopano ya hae ya kwa lihalimu, yona “Jerusalema wa kwahalimu,” ye yemelwa fa lifasi-mubu ki bana ba yona, bona Bakreste ba ba tozizwe ka moya. (Magalata 4:26) Kopano ya Jehova ya kwa lihalimu i sebeza sina mutusi ya sepahala—ya tona, ya lilato, ili ya sebeza ka t’ata. Ne li nako ye tabisa hakalo ka 1914 ha ne i pepile Mubuso wa Mesiya! (Sinulo 12:1-5) Sihulu ku kala ka 1919, bana ba yona ba fa lifasi-mubu ba kutalize kwa macaba kaufela ka za ku luka ni ku piliswa kwa yona. Sina mwa n’a polofitezi Isaya, bana bao ba monyehile mwa lififi sina lambi, ili ku benyisa liseli la bona.—Mateu 5:15, 16; Mafilipi 2:15.
5 Jehova u tonela hahulu za balapeli ba hae mi ha na ku tuhela, kamba ku ikuzeza fela, ku fitela a taleleza lisepiso za hae kaufela z’a sepisize Sione ni bana ba hae. Ba mafelelezo kwa batoziwa hamoho ni balikani ba bona ba “lingu ze ñwi” ni bona ha ba na ku ikuzeza fela. (Joani 10:16) Kaniti ba tiisize ku taluseza batu nzila inosi ye isa kwa puluso.—Maroma 10:10.
“Libizo Le Linca” L’a Fa Jehova
6. Jehova u hupulañi ka za Sione?
6 Jehova u hupulañi ka za Sione, yena musal’a hae wa kwa lihalimu, ya n’a swaniselizwe ki Jerusalema wa kwaikale? U li: “Ki mo a ka bona macaba niti ya hao, malena kaufela ba bone kanya ya hao; mi u ka biziswa libizo le linca, l’o ka bulela mulomo wa [Muñ’a] Bupilo.” (Isaya 62:2) Maisilaele ha ba nze ba eza lika ka niti, macaba h’a na mukwa kwand’a kuli a talimele ka tokomelo. Nihaiba malena ha ba na mwa ku ezeza kwand’a ku lumela kuli Jehova u itusisa Jerusalema ni kuli bubusi kaufela bwa bona ki bo bunyinyani-nyani ha bu bapanyiwa ni Mubuso wa Jehova.—Isaya 49:23.
7. Libizo le linca la Sione li talusañi?
7 Jehova cwale u paka kuli muinelo wa Sione u cincize ka ku i fa libizo le linca. Libizo le linca leo li talusa mbuyoti ni likute ze ba ikola bana ba Sione ba fa lifasi-mubu ku kala ka 537 B.C.E. * Li bonisa kuli Jehova u lumela kuli Sione ki ya hae. Kacenu, Isilaele wa Mulimu u nyangumunwa ki ku tabelwa cwalo ki Jehova, mi buñata bo butuna ba nyakalala ni yona.
8. Jehova u kutekehisize cwañi Sione?
8 Jehova ha s’a file Sione libizo la yona le linca, cwale u sepisa kuli: “U ka ba kuwani ye nde ya bulena y’a sweli mwa lizoho [Muñ’a] Bupilo, u be mushukwe wa bulena o mwa lizoho la Mulimu wa hao.” (Isaya 62:3) Jehova u bonahaza musal’a hae wa swanisezo, Sione wa kwa lihalimu, kuli batu ba komoke. (Samu 48:2; 50:2) Kuwani ye nde ya bulena ni “mushukwe wa bulena” li bonisa kuli u filwe likute ni bulena. (Zakaria 9:16) Ka ku yemela Sione ya kwa lihalimu, kamba “Jerusalema wa kwahalimu,” Isilaele wa Mulimu u tahisizwe ka ku komokisa ki lizoho la Mulimu, ona m’ata a hae h’a bulelwa ku ba a itusisizwe. (Magalata 4:26) Ka tuso ya Jehova, sicaba sa kwa moya seo si bile ni busepahali ni buipeyo bo bu ipitezi. Bolule-lule, ba batoziwa ni lingu ze ñwi, ba tiiswa ku bonisa tumelo ni lilato le lituna. Mwa Puso ya Kreste ya Lilimo ze Sikiti, batoziwa, ha se ba fumani mupuzo wa bona o mutuna wa kwa lihalimu, ba ka itusiswa ki Jehova kwa ku tiseza libupiwa ze tonga bupilo bo bu sa feli.—Maroma 8:21, 22; Sinulo 22:2.
‘Muñ’a Bupilo Wa ku Tabela’
9. Mu taluse cinceho ye taha mwa Sione.
9 Ku fiwa libizo le linca ki kalulo ye ñwi ya cinceho ye tisa tabo kwa Sione ya kwa lihalimu ye yemezwi ki bana ba yona ba fa lifasi-mubu. Lu bala kuli: “Ha u sa na ku bizwa ka la Muhaniwa, mi naha ya hao ha i sa na ku zibwa ka la Matota; kono wena u ka bewa la Mulatiwa, naha ya hao i bewe la Munyaliwa; kakuli [Muñ’a] Bupilo wa ku tabela, mi naha ya hao i ka nyalwa.” (Isaya 62:4) Sione ya fa lifasi-mubu i bile mwa matota ku zwa fo i sinyelizwe ka 607 B.C.E. Kono manzwi a Jehova a i kolwisa kuli naha ya yona i ka zuswa ni ku yahiwa hape. Sione ye kile ya sinyeha ha i sa na ku ba Muhaniwa, mi naha ya yona ha i sa na ku siiwa i li matota. Zuho ya Jerusalema ka 537 B.C.E. i talusa muinelo o munca wa yona, o fapanela kwahule ni matota e ne i bile kwamulaho. Jehova u bulela kuli Sione i ka bizwa “Mulatiwa,” mi naha ya yona i bizwe “Munyaliwa.”—Isaya 54:1, 5, 6; 66:8; Jeremia 23:5-8; 30:17; Magalata 4:27-31.
10. (a) Isilaele wa Mulimu u cincize cwañi? (b) “Naha” ya Isilaele wa Mulimu kiñi?
10 Ku kala ka 1919, ne ku bile ni cinceho ye swana kwa Isilaele wa Mulimu. Mwahal’a ndwa ya lifasi ya pili, Bakreste ba ba tozizwe ne ba bonahala ku fulalelwa ki Mulimu. Kono ka 1919, ne ba shemubilwe hape, mi bulapeli bwa bona ne bu kenisizwe. Nto yeo ne i amile lituto, kopano, ni misebezi ya bona. Isilaele wa Mulimu ya taha mwa “naha” ya yona, ili muinelo wa yona wa kwa moya, kamba liluko la musebezi.—Isaya 66:7, 8, 20-22.
11. Majuda ba nyala cwañi m’a bona?
11 Jehova ha koñomeka hape shemubo ye nca ya batu ba hae, u li: “Sina mutangana h’a nyala kalibe, ni bana ba hao ba ka ku nyala cwalo wena naha; mi sina munyali h’a tabela munyaliwa, ni [Muñ’a] Bupilo u ka ku tabela cwalo.” (Isaya 62:5) Majuda, bona “bana” ba Sione, ba kona ku nyala cwañi m’a bona? Kakuli bana ba Sione ba ba kuta ili ba ba lukuluzwi mwa butanga bwa kwa Babilona ba taha mwa muleneñi wa bona wa kale ni ku yaha teñi hape. Seo ha si ezahala, Sione ha i sa li matota kono i tala bana.—Jeremia 3:14.
12. (a) Jehova u zibahalize cwañi hande kuli Bakreste ba ba tozizwe ki kalulo ya kopano ye nyezwi ki yena? (b) Mwa n’a ezelize Jehova batu ba hae ku bonisa cwañi mutala o pahami wa mo li swanela ku bela linyalo kacenu? (Mu bone sikwenda fa likepe 342.)
12 Ka nzila ye swana, ku kala ka 1919, bana ba Sione wa kwa lihalimu ba yahile mwa naha ya bona, ili naha ya bona ya kwa moya, ye na ni libizo la bupolofita la “Munyaliwa.” Misebezi ya bona ya Sikreste mwa naha yeo i tisize kuli Bakreste ba ba tozizwe bao ba be “sicaba se si sumekelwa Libizo la [Jehova].” (Likezo 15:14) Ku tahisa kwa bona miselo ya Mubuso ni ku zibahaza libizo la Jehova ku bonisize hande-nde kuli Jehova u tabela Bakreste bao. U bonisize hande kuli ki kalulo ya kopano ye swalisani ni yena ka buñwi bo bu sa koni ku fela. Ka ku toza Bakreste bao ka moya o kenile, ku ba lukulula mwa butanga bwa kwa moya, ni ku itusisa bona kwa ku taluseza batu kaufela za sepo ya Mubuso, Jehova u bonisize kuli wa ba tabela sina munyali h’a tabela munyaliwa.—Jeremia 32:41.
“Mu Si Ke Mwa Kuza”
13, 14. (a) Mwa miteñi ya kwaikale, Jerusalema i ba cwañi munzi o fa silelezo ? (b) Mwa miteñi ya cwale, Sione i bile cwañi “munzi o lumbiwa mwa lifasi”?
13 Libizo le linca la swanisezo l’a fa Jehova li ezisa batu ba hae ku ikutwa ku iketa. Ba ziba kuli wa ba amuhela ni kuli ki yena muñ’a bona. Cwale ka ku itusisa swanisezo ye fapana, Jehova u bulela kwa batu ba hae inge ya bulela kwa munzi o na ni lukwakwa, u li: “Fa makwakwa a hao, wena Jerusalema, ni beile balibeleli; ha ba na ku kuza musihali ni busihu. Mina ba ba nze ba hupulisa [Muñ’a] Bupilo za sicaba, mu si ke mwa kuza. Mu si ke mwa mu fa sibaka, mane a zuse Jerusalema, a u eze munzi o lumbiwa mwa lifasi.” (Isaya 62:6, 7) Ka nako ye tomilwe ki Jehova bomasiyaleti ba ba sepahala ha se ba kutile ku zwa kwa Babilona, Jerusalema i ba “munzi o lumbiwa mwa lifasi”—ili muleneñi o na ni lukwakwa ili o fa silelezo kwa bayahi ba ona. Musihali ni busihu, balibeleli ba fa makwakwa ao ba tokomela ku bona kuli ku na ni silelezo mwa munzi ni ku fitisa litemuso kwa bayahi ba ona.—Nehemia 6:15; 7:3; Isaya 52:8.
14 Mwa miteñi ya cwale, Jehova u itusisize balibeleli ba hae ba ba tozizwe kuli ba bonise baishuwi mwa ku lukuluhela mwa butanga kwa bulapeli bwa buhata. Bao ba memilwe ku taha mwa kopano ya hae, mo ba silelezwa kwa silafalo ya kwa moya, mikwa ye si ya silumeli, ni ku sa tabelwa ki Jehova. (Jeremia 33:9; Zefania 3:19) Sihulu ze sileleza ka nzila yeo ki musebezi wa sitopa sa balibeleli, sa “mutanga ya sepahala, ya na ni kutwisiso,” se si fa “lico [za kwa moya] ka nako ye lukela.” (Mateu 24:45-47) “Buñata bo butuna” ba ba sebeza ni sitopa sa balibeleli ni bona ba peta kalulo ya butokwa mwa ku tisa kuli Sione ibe “munzi o lumbiwa mwa lifasi.”—Sinulo 7:9.
15. Sitopa sa balibeleli ni balikani ba bona ba sebeleza cwañi Jehova ka ku tundamena?
15 Musebezi wa sitopa sa balibeleli ni balikani ba bona u sa zwelapili! Moya wa bona wa buitomboli u bonwa ka misebezi ya ka tukufalelo ya basepahali bolule-lule ba ba tiiswa ki baokameli ba maeto ni basali ba bona; baitateli mwa mahae a fapana-fapana a Betele ni libaka ko ku hatisezwa lihatiso za Lipaki za Jehova; balumiwa; ni mapaina ba ba ipitezi, ba kamita, ni ba ku tusa. Mi hape, ba sebeza ka t’ata ku yaha Mandu a Mubuso a manca, ku lekula bakuli, ku tusa batu ba ba talimani ni butata bo bu ama likalafo, ni ku fa lituso ku ba ba ipumani mwa likozi. Buñata bwa batu ba ba itombola bao hañata ba sebezanga luli “musihali ni busihu”!—Sinulo 7:14, 15.
16. Batanga ba Jehova ‘ha ba mu fi sibaka’ ka nzila ifi?
16 Batanga ba Jehova ba susuezwa ku lapela ka ku sa lisela, ili ku lapela ku Mulimu kuli “se si latwa ki [Yena] si ezwe mwa lifasi, mo si ezezwa kwa lihalimu.” (Mateu 6:9, 10; 1 Matesalonika 5:17) Ba laelwa kuli: ‘Mu si ke mwa fa Jehova sibaka’ ku fitela litakazo ni lisepo za zuho ya bulapeli bwa niti li talelezwa. Jesu n’a koñomekile tokwahalo ya ku lapela kamita, a laela balateleli ba hae ku “huweleza ku [Mulimu] musihali ni busihu.”—Luka 18:1-8.
Ku Sebeleza Mulimu ku Ka Tisa Mupuzo
17, 18. (a) Bayahi ba Juda ba kona ku libelela ku ikola miselo ya misebezi ya bona ka nzila ifi? (b) Batu ba Jehova kacenu ba ikola cwañi miselo ya misebezi ya bona?
17 Libizo le linca leo Jehova a fa batu ba hae li ba kolwisa kuli buikatazo bwa bona haki bwa mbango. “[Muñ’a] Bupilo u konkile ka lizoho la hae la bulyo, ka lizoho la mata a hae, a li: Luli ha ni sa fa buloto bwa hao kuli i be lico za lila za hao; bana ba macaba ha ba sa na ku nwa veine ya hao, y’o ikatalelize ku lima. Kono ba ba kutuzi buloto ba ka bu ca isali bona, inze ba lumba [Muñ’a] Bupilo; mi ba ba kutuzi sisansa sa veine ba ka nwela veine mwa malapa a Ndu ye kenile.” (Isaya 62:8, 9) Lizoho la Jehova la bulyo ni lizoho la mata a hae li swaniseza m’ata a’ na ni ona. (Deuteronoma 32:40; Ezekiele 20:5) Ku konka kwa hae ka linzila zeo ku bonisa kuli u ka cinca muinelo wa Sione ku be cwañi kamba cwañi. Ka 607 B.C.E., Jehova u tuhelela lila za Sione ku i bukula ni ku lobela tutu ya yona. (Deuteronoma 28:33, 51) Kono cwale, tutu ya Sione i ka ikoliwa fela ki bañi ba yona.—Deuteronoma 14:22-27.
18 Mwa talelezo ya cwale ya sepiso ye, batu ba Jehova ba ba lukuluzwi ba ikola mbombolelwa ye tuna ya kwa moya. Ba ikola ka ku tala miselo ya mifufuzo ya bona—ili palo ye ekezeha ya balutiwa ba Sikreste ni lico ze ñata za kwa moya. (Isaya 55:1, 2; 65:14) Bakeñisa kuli batu ba hae ba sepahala, Jehova ha tuheleli lila za bona ku sinya mbombolelwa ya bona ya kwa moya kamba ku ba byangula miselo ya sebelezo ya bona ye ba eza ka moyo kaufela. Ha ku na sebelezo ya bona ku Jehova ye li ya mbango.—Malaki 3:10-12; Maheberu 6:10.
19, 20. (a) Nzila ya Majuda ya ku kutela kwa Jerusalema i lukiswa cwañi? (b) Mwa miteñi ya cwale, nzila i lukisizwe cwañi kuli baishuwi ba tahe mwa kopano ya Jehova?
19 Libizo le linca hape li tisa kuli kopano ya Jehova i be ye latiwa ki batu ba lipilu ze sepahala. Buñata ba selehanela ku yona, mi nzila i kwalulelwa bona. Bupolofita bwa Isaya bu li: “A mu zwe, mu zwele mwa minyako, mu lukise nzila ya sicaba. A mu bakanye, mu bakanye likululu, mu huhulele macwe kwande, mu yemiseze macaba ndembela.” (Isaya 62:10) Mwa talelezo ya pili, ku bonahala kuli pizo yeo i bulela za ku zwela mwa minyako ya minzi ya Babilona kuli batu ba kutele kwa Jerusalema. Ba ba kuta ba swanela ku huhula macwe mwa nzila kuli ku zamaiwe hande ni ku yemisa ndembela kuli i bonise nzila.—Isaya 11:12.
20 Ku kala ka 1919, Bakreste ba ba tozizwe ba kauhanyizwe kuli ba eze sebelezo ya Mulimu ni ku zamaya mwa “Nzila ye kenile.” (Isaya 35:8) Ne li bona ba pili ku zamaya mwa likululu la kwa moya le li zwa mwa Babilona yo mutuna. (Isaya 40:3; 48:20) Mulimu n’a ba file tohonolo ya ku etelela mwa ku shaela misebezi ya hae ye m’ata ni ku bonisa ba bañwi mwa ku kenela mwa likululu leo. Ku zwiswa mwateñi macwe—ona ku zwiswa kwa lisitataliso—sihulu ne ku ezelizwe ku ba tusa. (Isaya 57:14) Ne ba tokwa ku bona hande-nde milelo ni lituto za Mulimu. Litumelo za buhata ki lisitataliso mwa nzila ya bupilo, kono Linzwi la Jehova li swana “sina noto ye tuba licwe.” Ka lona, Bakreste ba ba tozizwe ne ba tubile lisitataliso ze ne kona ku wisa be ne ba bata ku sebeleza Jehova.—Jeremia 23:29.
21, 22. Ki ifi ndembela yeo Jehova a yemiselize ba ba zwa mwa bulapeli bwa buhata, mi lu ziba cwañi cwalo?
21 Ka 537 B.C.E., Jerusalema ne i bile ndembela ye ne susuelize bomasiyaleti ba Majuda ku kuta ni ku zusa tempele. (Isaya 49:22) Ka 1919, bomasiyaleti ba ba tozizwe ha ne ba lukuluzwi mwa butanga kwa bulapeli bwa buhata, ne ba si ka yambaela fela. Ne ba ziba ko ne ba ya, kakuli Jehova n’a ba yemiselize ndembela. Ndembela mañi? Ndembela ye swana ye polofitilwe kwa Isaya 11:10, ye li: “Ka nako yeo lituhela la Jese li ka yemisezwa macaba, ka mukwa wa ndembela.” Muapositola Paulusi u bulela kuli manzwi ao a ama ku Jesu. (Maroma 15:8, 12) Ee, ndembela yeo ki Kreste Jesu, y’a li Mulena ya busa fa Lilundu la Sione la kwa lihalimu!—Maheberu 12:22; Sinulo 14:1.
22 Bakreste ba ba tozizwe ni lingu ze ñwi ba kubukanyezwa ku Jesu Kreste kuli ba sebeleze Mulimu Mwambakani ya Pahami mwa bulapeli bo bu swalisanisa. Bubusi bwa hae bu bonisa kuli Jehova ki yena mubusi ya swanela wa pupo kamukana mi bu fuyaula basepahali ba ba zwa mwa macaba kaufela a lifasi. Kana zeo ha li swaneli ku ezisa yo muñwi ni yo muñwi wa luna ku mu fa tumbo?
“Mupilisi wa Hao Wa Ta”!
23, 24. Puluso i sweli ku tiswa cwañi ku ba ba na ni tumelo ku Mulimu?
23 Libizo le linca leo Jehova a fa kopano ya hae ye swana sina musali ya nyezwi li peta nto ye ñwi kwa neku la punyuho ya kamita ya bana ba yona. Isaya u ñola kuli: “A mu utwe, [Muñ’a] Bupilo u zibisize taba ye, mane kwa mafelelezo a lifasi, u li: A mu zibise mwan’a Sione wa musizana, mu li: Bona, Mupilisi wa hao wa ta; bona, mupuzo w’a ka fa u ku yena, mi z’a ka kutisa li mu zamaya kwapili.” (Isaya 62:11) Puluso ne i tile kwa Majuda Babilona ha ne i wile mi bona ba kutela habo bona. Kono manzwi a, a bulela za nto ye ñwi ye tuna. Zibahazo ya Jehova i lu hupulisa bupolofita bwa Zakaria ka za Jerusalema, bo bu li: “Wena mwan’a Sione wa musizana u wabelwe hahulu; u lulueze wena mwan’a Jerusalema wa musizana! Bona, mulen’a hao ki yo, u ta ku wena; ki ya lukile, ya pilisa; u ikokobelize, u pahami mbongolo, mane [mbongolo] ye [nyinyani], mwan’a mbongolo.”—Zakaria 9:9.
24 Hamulaho wa lilimo ze talu ni licika ku zwa fa n’a kolobelelizwe Jesu mwa mezi ni ku toziwa ka moya wa Mulimu, a taha mwa Jerusalema inz’a pahami mbongolo ni ku t’o kenisa tempele ya yona. (Mateu 21:1-5; Joani 12:14-16) Kacenu, Jesu Kreste ki yena ya tisa puluso ye zwa ku Jehova ku bote ba ba na ni tumelo ku Mulimu. Ku zwa fa beezwi fa bulena ka 1914, Jesu hape ki yena Muatuli ni Musilahi ya ketilwe ki Jehova. Ka 1918, ili lilimo ze talu ni licika ku zwa fa n’a beezwi fa bulena, a kenisa tempele ya Jehova ya kwa moya, ye yemelwa fa lifasi-mubu ki puteho ya Bakreste ba ba tozizwe. (Malaki 3:1-5) Ku yemiswa kwa hae sina ndembela ne li ona makalelo a ku kubukanywa ko kutuna kwa batu ba ba zwa mwa lifasi kaufela, ba ba yemela Mubuso wa Mesiya. Ka ku latelela mutala wa kwaikale, “Mupilisi” n’a tile ku Isilaele wa Mulimu ha ne ba lukuluzwi kwa Babilona yo mutuna ka 1919. “Mupuzo” kamba “z’a ka kutisa” ze bulukezwi bakutuli ba ba itombola ki bupilo bwa ku sa shwa bwa kwa lihalimu kamba bupilo bo bu sa feli fa lifasi-mubu. Bote ba ba zwelapili ku sepahala ba kona ku sepa kuli “musebezi wa [bona] o tata ha u na ku ba o si na tuso ku Mulena.”—1 Makorinte 15:58.
25. Ki ifi sepiso ye fiwa kwa batu ba Jehova?
25 Lika li ka bela hande hakalo kopano ya Jehova ya kwa lihalimu, bayemeli ba yona ba ba tozizwe ba ba fa lifasi-mubu, ni bote ba ba tiiselize ku swalisana ni bona! (Deuteronoma 26:19) Isaya n’a polofitile kuli: “Ba ka ba biza ka la Sicaba se si kenile, ni Balukululwa ba [Muñ’a] Bupilo; mi wena u ka bizwa ka la Mubatiwa, Munzi o si ka haniwa.” (Isaya 62:12) Muta o muñwi, “Jerusalema wa kwahalimu,” ya n’a yemelwa ki Isilaele wa Mulimu, n’a ikutwile ku fulalelwa. Ha na ku ikutwa cwalo hape ni kamuta. Batu ba Jehova ba ka silelezwa ki yena kamita-ni-mita, ba nze ba tabelwa ki yena ka nako kaufela.
[Litaluso za kwatasi]
^ para. 7 Mwa bupolofita bwa Bibele “libizo le linca” li kona ku talusa mayemo kamba tohonolo ye nca.—Sinulo 2:17; 3:12.
[Lipuzo za Tuto]
[Mbokisi fa likepe 342]
Mutala O Pahami wa Linyalo
Batu ha ba nyalana, ba na ni litibelelo ze ñwi ka za linyalo la bona. Kono ki lifi litibelelo za Mulimu? Tukiso ya linyalo ne i tomilwe ki yena. N’a li leleziñi?
Nto ye ñwi ye bonisa mubonelo wa Mulimu ka za taba ye ki mwa n’a sebelisanezi ni sicaba sa Isilaele. Isaya u swaniseza swalisano yeo kwa linyalo. (Isaya 62:1-5) Mu lemuhe zeo Jehova Mulimu ka ku ba “munna ya nyezi” a ezeza “munyaliwa” wa hae. Wa mu sileleza ni ku mu kenisa. (Isaya 62:6, 7, 12) Wa mu kuteka ni ku itebuha yena. (Isaya 62:3, 8, 9) Mi wa mu tabela, sina mo a boniseza mabizo a manca a’ mu fa.—Isaya 62:4, 5, 12.
Mwa Mañolo a Sigerike a Sikreste, Paulusi u kutela ku talusa mwa n’a taluselize Isaya swalisano ya Jehova ni Isilaele ha bapanya swalisano ye mwahal’a munna ni musal’a hae ku ye mwahal’a Kreste ni puteho ya Bakreste ba ba tozizwe.—Maefese 5:21-27.
Paulusi n’a susuelize Bakreste kuli ba likanyise swalisano ye mwahal’a Jesu ni puteho mwa manyalo a bona. Ha ku na lilato le li fita la n’a bonisize Jehova ku Isilaele ni la bonisize Kreste kwa puteho. Liswalisano zeo za swanisezo li fa mutala o pahami wa manyalo a Bakreste a’ kondile ili a tabo.—Maefese 5:28-33.
[Siswaniso se si fa likepe 339]
Jehova u ka bizisa Sione wa kwa lihalimu libizo le linca
[Maswaniso a fa likepe 347]
Mwa miteñi ya cwale, sitopa sa balibeleli sa Jehova ha si si ka kuza fela
