Kauhanyo 20

Lizoho la Jehova Hasi Le Li Kuswani

Isaya 59:1-21

1. Kiñi ze ezahala mwa Juda, mi buñata ba kakanyañi?

SICABA sa Juda si ipapata kuli si mwa bulikani ni Jehova. Niteñi, kai ni kai ku na ni butata. Katulo ye lukile ha i ipuma-pumanelwi fela, bukebenga ni nyandiso li yambile naha, mi sepo ya kuli lika li ka konda ha i talelezwi. Ku na ni ze fosahezi hahulu. Ba bañata ba kakanya haiba Jehova u ka lukisa lika muta o muñwi. Zeo ki zona ze ezahala mwa miteñi ya Isaya. Kono litaba za Isaya za miteñi yeo haki litaba-taba fela za kwaikale. Manzwi a hae a na ni litemuso za bupolofita ku bote ba ba ipapata ku lapela Mulimu kono ili ba ba sa utwi milao ya Hae. Mi bupolofita bo bu buyelezwi ili bo bu ñozwi kwa Isaya kauhanyo 59 bu fa susuezo ye lilato ku bote ba ba satalala ku sebeleza Jehova niha ba pila mwa mazazi a’ t’ata, a’ lubeta.

Ku Ikauhanya ku Mulimu wa Niti

2, 3. Ki kabakalañi Jehova ha sa silelezi Juda?

² Mu nahane fela—batu ba ba itamile bulikani ni Jehova se ba fetuhile bakwenuheli! Ba fulalezi Muezi wa bona, ili ku izwisa cwalo mwa lizoho la hae le li sileleza. Kabakaleo, ba mwa ziyezi ye tuna. Esi mwendi ba nga kuli Jehova ki yena ya ba tiselize linako ze t’ata zeo? Isaya u ba bulelela kuli: “A mu bone, lizoho la [Muñ’a] Bupilo hasi le likuswani, kuli li palelwe ku pilisa; ni lizebe za hae ha li si ka tibana kuli li palelwe ku utwa. Kono bumaswe bwa mina  ki bona bo bu mi kauhanyize ni Mulimu wa mina; libi za mina ki zona ze mi sila kwa pata ya hae, kuli a palelwe ku mi utwa.”—Isaya 59:1, 2.

³ Manzwi a’ bulezwi patalaza ki a niti. Jehova u sa li yena Mulimu ya pilisa. Ka ku ba yena “ya utwa milapelo,” u teelezanga kwa litapelo za batanga ba hae ba ba sepahala. (Samu 65:2) Kono ha fuyaulangi baezalibi. Batu ki bona beñi ba ba ikauhanyize ku Jehova. Bumaswe bwa bona ki bona bo bu tisa kuli a ba patele pata ya hae.

4. Ki ifi milatu ye lengiwa Juda?

⁴ Niti kikuli, ze i ezize Juda li maswe hahulu. Bupolofita bwa Isaya bu kolohanya ye miñwi ya milatu ye i lengiwa, bu li: “Mazoho a mina a lambakilwe mali; ni yona minwana ya mina i lambakilwe bumaswe; milomo ya mina i bulela buhata, mi malimi a mina a bulela za ku sinya.” (Isaya 59:3) Batu ba puma ni ku bulela za ku sinya. Ku bulela kuli “mazoho . . . a lambakilwe mali” ku bonisa kuli ba bañwi mane ba bulaile batu. Ki tompololo kwa butuna ku Mulimu! Kakuli Mulao w’a tomile u hanisa isi fela ku bulaya kono ni ku “toya wahenu mwa pilu ya hao.” (Livitike 19:17) Sibi se si fitelezi sa bayahi ba Juda ni ze ne zwile mwateñi li swanela ku hupulisa yo muñwi ni yo muñwi wa luna kacenu kuli lu tokwa ku lwanisa mihupulo ni maikuto a sibi. Hakusicwalo, lu kana lwa kala ku eza lika ze maswe ze ka lu kauhanya ni Mulimu.—Maroma 12:9; Magalata 5:15; Jakobo 1:14, 15.

5. Bumaswe bwa Juda bu kuma kai?

⁵ Butuku bwa sibi bu yambukezi sicaba mutumbi. Bupolofita bu li: “Ha ku na ya tisa muzeko o na ni niti, mi ha ku na ya yemela niti. Ba isepisa ka za mbango, mi ba pumana ka mashano; ba lela za ku putelelana, ba pila bumaswe.” (Isaya 59:4) Ha ku na ya bulela za niti. Nihaiba mwa likuta, ki ka siwela ku fumanwa mutu ya itingiwa kamba ya sepahala.  Juda i fulalezi Jehova mi i isepisa ka bulikani bo i isweli ni macaba, mane ni milimu ya maswaniso ye sa pili. Zeo kaufela ki za “mbango,” ha li na tuso ni ye kana. (Isaya 40:17, 23; 41:29) Kabakaleo, ki ze ñata ze bulelwa, kono kaufel’a zona ha li na tuso. Ku ezwa milelo, kono se si zwa mwateñi ki butata ni bumaswe.

6. Ze ezahala mwa Krestendomu li swana cwañi ni za mwa Juda?

⁶ Ku sa luka ni mifilifili za mwa Juda za swana hahulu ni ze ezahala mwa Krestendomu. (Mu bone taba ye li “Jerusalema wa Bukwenuheli Ki Swanisezo ya Krestendomu,” fa likepe 294.) Lindwa za lifasi ze peli ze situhu li lwanilwe ki linaha ze twi ki za Sikreste. Ku t’o fita ni la kacenu le, bulapeli bwa Krestendomu bu palezwi ku yemisa pulao ya ba mikowa i sili ni ku bulayana kwa mwahal’a mishobo ko ba ezize ba ba ku bona. (2 Timotea 3:5) Nihaike kuli Jesu n’a lutile balateleli ba hae ku sepa Mubuso wa Mulimu, macaba a Krestendomu a zwelapili ku isepisa ka lilwaniso ni bulikani bo a isweli ni ba bupolitiki. (Mateu 6:10) Mane, buñata bwa bapangi ba batuna ba lilwaniso mwa lifasi ba fumaneha mwa linaha za Krestendomu! Kaniti, Krestendomu ha i sepa kuli buikatazo ni likopano za butu li ka tisa buiketo kwapili, ni yona i isepisa ka za “mbango.”

Ku Kutula Ze Maswe

7. Ki kabakalañi milelo ya Juda ha i tisa fela ze sinya?

⁷ Bulapeli bwa maswaniso ni buputeleli ha li koni ku tahisa nyangela ye nde. Kabakala ku eza ze cwalo, Majuda ba ba sa sepahali cwale ba kutula butata bo ba ipatiselize. Lu bala kuli: “Ba ndondomona mai a sibili, mi ba eza kanyandi ka liuyi; ya ca mai a bona wa shwa; mi lii ha li pyatwa, ku zwa ku lona sibili.” (Isaya 59:5) Milelo ya Juda ku zwa fo i kalela ku ya fo i ezezwa, ha ku na za ngana ze i tahisa.  Minahano ya bona ye fosahezi i tahisa fela ze maswe, sina mwa mai a sibili ha ku zwa fela libili. Mi sicaba sa nyanda.

8. Ki sifi se si bonisa kuli ba mwa Juda ba na ni mihupulo ye fosahezi?

⁸ Bayahi ba Juda ba bañwi ba kana ba eza mifilifili kuli ba like ku isileleza, kono ba ka palelwa. M’ata a butu ha koni ku tisa silelezo sina ye tiswa ki sepo ku Jehova ni misebezi ye lukile, sina kanyandi ka liuyi ha ka sa koni ku sileleza kwa silami m’o lisila tenyene li sileleleza. Isaya u li: “Tunyandi twa bona ha tu na ku fetuha liapalo, mi ha ba na ku fumana sa ku apala ka misebezi ya bona; misebezi ya bona ki misebezi ya bumaswe, mi mwa mazoho a bona ku na ni mukwa wa ku koma ba bañwi. Mautu a bona a matela bumaswe, ba akufela ku y’o sulula mali a ba ba si na mulatu; mihupulo ya bona ki mihupulo ya ku sinya; ku lobela ni ku sinya ki yona nzila ya bona.” (Isaya 59:6, 7) Mihupulo ya ba mwa Juda i fosahezi. Ka ku eza mifilifili kuli ba tatulule butata bwa bona, ba bonisa kuli ba na ni moya wa buipanguli. Ha ba na taba kuli ba bañata be ba nyandisa ha ba na mulatu ni kuli ba bañwi ki batanga ba Mulimu ba niti.

9. Ki kabakalañi baeteleli ba Krestendomu ha ba si ke ba fumana kozo ya niti?

⁹ Manzwi a’ buyelezwi ao a lu hupulisa pulao ye tuna ye i ezize Krestendomu. Kaniti, Jehova u ka i zekiseza ku sinya maswe Bukreste libizo! Sina Majuda ba mwa miteñi ya Isaya, Krestendomu i bile ni muzamao o kopami kakuli baeteleli ba yona ba lumela kuli ki ona fela o lukile. Niha ba ambola za kozo, ha ba ezi lika ka mulao. Ki bokabemba-muca-habeli luli! Bakeñisa kuli baeteleli ba Krestendomu ba zwelapili ku itusisa mukwa wo, ha ba na ku fumana kozo ya niti. Ku swana fela sina mo bu bulelela bupolofita kuli: “Ha ba na taba ni nzila ya kozo; zamaiso ya  mulao i kwahule ni bona; linzila ze ba ikezelize ki ze kopami; mutu ufi kamba ufi ya zamaya ku zona h’a na ku pila mwa kozo.”—Isaya 59:8.

Ku Bubutela mwa Lififi la kwa Moya

10. Isaya u itumelelañi ka ku yemela Juda?

¹⁰ Jehova ha koni ku fuyaula mikwa ya Juda ya bupumi ni businyi. (Samu 11:5) Kacwalo ka ku yemela sicaba mutumbi, Isaya u itumelela mulatu wa Juda, u li: “Zamaiso ya mulao i kwahule ni luna, mi ze lukile ha lu li fumani; lu libelezi liseli, kono he ki bunsu fela; lu libelezi ku monyehelwa, bo he lu zamaya mwa lififi. Lu bubutela limota sina libofu, e, lwa bubutela inge ba ba shwile meto; bo ki  musihali lwa sitatala inge ka swalala; mwahal’a batu ba ba tiile, lu bulelwa kuli lu se lu shwile. Kaufela lu sweli ku lila sina libere, lu itiuluzi sina bonatangundu.” (Isaya 59:9-11a) Majuda ha ba si ka eza Linzwi la Mulimu lumonyi lwa mwa mautu a bona ni liseli mwa nzila ya bona. (Samu 119:105) Kabakaleo, lika li bonahala ku fifala. Nihaiba musihalituna, ba bubutela inge ki busihu. Ku swana inge kuli ba shwile. Ha ba nze ba bata tuso, ba bokolola sina libere ze lapile kamba ze holofalizwe. Ba bañwi ba itiulula ka ku shwisa makeke, sina bonatangundu ba ba inzi ba nosi.

11. Ki kabakalañi sepo ya Juda ya zamaiso ya ku luka ni puluso ha i li ya mbango?

¹¹ Isaya wa ziba hande-nde kuli ziyezi ya Juda i tiswa ki ku kwenuhela kwa yona Mulimu. U li: “Lu bata zamaiso ye lukile kono ha i bonwi; lu bata ku piliswa, kono ki kwahule ni luna. Kakuli lifoso za luna ki ze ñata fapil’a hao, libi za luna za lu tama; ku cwalo, lifoso za luna li ku luna, mi bumaswe bwa luna lwa bu ziba. Lu kile lwa ikuhumuseza [Muñ’a] Bupilo, lwa mu latula, lwa fulalela Mulimu wa luna, lwa bulela litaba za lubeta ni za petuhelo, lwa ba lwa lela, mi lwa bulela za mwa lipilu za luna za ku puma fela.” (Isaya 59:11b-13) Bakeñisa kuli bayahi ba Juda ha ba si ka baka, ni libi za bona ha li si ka swalelwa. Zamaiso ye lukile i zwile mwa naha kakuli batu ba fulalezi Jehova. Ha ba si ka sepahala mwa nto kaufela, mane ba nyandisa ni bahabo bona. Haki mo ba swanela ni ba ba mwa Krestendomu kacenu! Buñata ha ba zamaisi lika ka mulao mi hape bona ka sibili ba nyandisize Lipaki za Jehova ba ba sepahala, ba ba bata ku eza tato ya Mulimu.

Jehova U Fitisa Katulo

12. Ki ufi moya wa baatuli ba mwa Juda?

¹² Ha ku bonahali zamaiso ya mulao, ku luka, kamba niti mwa Juda. “Mi he zamaiso ya mulao i [kutezi]  mwamulaho, mi litukelo li yemi kwahule ni luna; kakuli niti i wezi mwa patelo ya munzi, mi ze lukile li palelwa ku kena mwateñi.” (Isaya 59:14) Kwamulaho wa minyako ya munzi mwa Juda, ku na ni lipatelo ko ba kopanelanga banna bahulu kuli ba atule litaba. (Ruti 4:1, 2, 11) Batu ba ba cwalo ba swanela ku atula ka ku luka ni ku eza lika ka mulao, ba sa amuheli likweta. (Deuteronoma 16:18-20) Kono bona ba atula ka ku ya ka mihupulo ya bona ya buitati. Mi mane, ba nyandisa ka bunolo mutu kaufela ya lika ha buniti ku eza ze nde. Lu bala kuli: “E, niti ya tokwahala; mi  yena ya si na taba ni bumaswe, u lobelelwa za hae.”—Isaya 59:15a.

13. Bakeñisa kuli baatuli ba Juda ba keshebisa musebezi wa bona, Jehova u ka ezañi?

¹³ Ba ba saba ku nyaza patalaza muzamao o fosahezi ba libala kuli Mulimu haki ya si na meto, ngana, ni m’ata. Isaya u ñola kuli: “[Muñ’a] Bupilo a bona zeo mi a nyaza, kakuli zamaiso ya mulao i felile mwa munzi. A lemuha kuli ha ku na munna, a komokiswa ki ku bona kuli ha ku na ya yemela niti. Hakulicwalo a ipilisa ka lizoho la hae fela; a tiiswa ki ku luka kwa hae.” (Isaya 59:15b, 16) Bakeñisa kuli baatuli ba ba ketilwe ba keshebisa musebezi wa bona, Jehova u ka eza se siñwi ka za teñi. Ha ka eza cwalo, ikaba ka ku luka ni ka m’ata.

14. (a) Ki ufi moya o ba na ni ona batu ba bañata kacenu? (b) Jehova u itukiseza cwañi ku nga muhato?

¹⁴ Ku na ni muinelo o swana kacenu. Lu pila mwa lifasi m’o buñata ba “felezwi ki maikuto kaufela.” (Maefese 4:19) Ki ba sikai ba ba lumela kuli Jehova u ka nga muhato wa ku feza bumaswe fa lifasi-mubu. Kono bupolofita bwa Isaya bu bonisa kuli Jehova wa bona hande-nde ze ba eza batu. U ezanga likatulo, mi ka nako ya hae, u fanga batu likatulo zeo. Kana likatulo za hae ki ze lukile? Isaya u bonisa kuli li lukile. Ka za sicaba sa Juda, u ñola kuli: “Ku luka, kwa ba siapalo sa [Jehova] sa ndwa sa fa sifuba; ku pilisa, kwa ba kuwani ya ndwa ya kwa toho ya hae; liapalo za hae za ba z’a to kutiseza batu; cansi ya hae ya ba ku tukufalelwa ku likanyeza batu.” (Isaya 59:17) Manzwi a bupolofita ao a swaniseza Jehova sina muhali ya itukiseza ku lwana ndwa. U lelile ku pilisa batu ba hae. Wa ziba hande kuli ku luka kwa hae ki ko ku tezi, ko ku sa hononwi. Mi u ka tukufalelwa ka bundume ha nz’a fitisa likatulo za hae. Ha ku na kakanyo kuli ku luka ku ka ba ni tulo.

15. (a) Bakreste ba niti ba ka eza cwañi Jehova ha ka fitisa katulo? (b) Likatulo za Jehova li ka ba cwañi?

 ¹⁵ Kacenu mwa linaha ze ñwi, lila za niti ba lika ku tibela musebezi wa batanga ba Jehova ka ku hasanya litaba za buhata ni za ku ba sinya libizo. Bakreste ba niti ha ba zina-zini ku yemela niti, kono ha ba batangi ku kutiseza batu bumaswe. (Maroma 12:19) Nihaiba Jehova ha ka atula Krestendomu wa bukwenuheli, balapeli ba hae ba fa lifasi-mubu ha ba na ku abana mwa ku i timeza. Ba ziba kuli Jehova ki yena ya ka kutiseza batu bumaswe ni kuli u ka nga muhato o swanela nako ha i ka fita. Bupolofita bu lu kolwisa kuli: “U ka ba kutiseza ka ku ya ka likezo za bona, buhali bu ye ku ba ba mu lwanisa, silomboti kwa lila za hae; lioli li kutelwe ki se li ezize.” (Isaya 59:18) Sina mwa miteñi ya Isaya, likatulo za Jehova li ka ba ze lukile mi hape li ka ba ze tezi. Li ka fita mane ni mwa “lioli,” f’o kikuli kwa libaka ze kwahule. Ha ku na ya ka ba kwahule hahulu kuli mane a palelwe ku fitelwa ki likatulo za Jehova.

16. Ki bomañi ba ba ka punyuha likatulo za Jehova, mi ba ka itutañi kwa punyuho ya bona?

 ¹⁶ Ba ba satalala ku eza ze lukile ba atulelwa bunde ki Jehova. Isaya u polofita kuli ku zwa kwa makalelo a lifasi ku ya kwa mafelelezo a lona—f’o kikuli lifasi kamukana—ba ba cwalo ba ka piliswa. Mi ku fumana silelezo ya Jehova ku ka ekeza hahulu kwa tompo ye tuna ni likute za bona ku yena. (Malaki 1:11) Lu bala kuli: “Ba ka saba Libizo la [Jehova, NW] ku zwa kwa Wiko; ba sabe kanya ya hae ku zwa kwa Mapazulelo a lizazi; kakuli wa ta sina mezi a mwa libuba h’a bubiswa ki ku bulula kwa [Muñ’a] Bupilo.” (Isaya 59:19) Sina liñungwa le li m’ata le li sutisa mezi a mañata a’ sinya ili a fapil’a lona ni ku zwisa zote mwa nzila mo li fita, ni moya wa Jehova u ka tanyela mikwalelo kaufela ya talelezo ya tato ya hae. Moya wa hae ki o m’ata hahulu ku fita m’ata afi kamba afi a butu. Ha ka itusisa ona kwa ku timeza batu ni macaba, u ka tula luli ka ku tala.

Sepo ni Mbuyoti za Ba Ba Bakile

17. Muliululi wa Sione ki mañi, mi u liulula lili Sione?

¹⁷ Mwa Mulao wa Mushe, Muisilaele ya n’a itekisa mwa butanga n’a kona ku lekululwa mwa butanga ki muliululi. Pili mwa buka ya bupolofita ya Isaya, Jehova u bonisizwe kuli ki Muliululi wa batu ba ba bakile. (Isaya 48:17) Cwale hape u bulelwa ku ba Muliululi wa ba ba bakile. Isaya u ñola sepiso ya Jehova ye li: “Muliululi u ka ta mwa Sione, ku ba Jakobo ba ba bakela bumaswe bwa bona, ku bulela [Muñ’a] Bupilo.” (Isaya 59:20) Sepiso ye omba-omba ye i talelezwa ka 537 B.C.E. Kono i na ni talelezo ye ñwi. Muapositola Paulusi n’a ngile manzwi ao mwa toloko ye bizwa Septuagint ni ku bonisa kuli n’a ama kwa Bakreste. N’a ñozi kuli: “Maisilaele ba ka piliswa; sina ha ku ñozwi kuli: Muliululi u ka zwa mwa Sioni kuli a feze  ku nyefula kwa Jakobo. Ki bona bulikani bo ni ka iswala ni bona, nako ye ni ka zwisa libi za bona.” (Maroma 11:26, 27) Kaniti, bupolofita bwa Isaya bu na ni talelezo ye ñwi ye tuna, ili ye fita ni mwa miteñi ya luna ni ku ya kwapili. Ka mukwa ufi?

18. Jehova n’a tahisize lili “Isilaele wa Mulimu” mi n’a i tahisize cwañi?

¹⁸ Mwa lilimo za mwanda wa pili, bomasiyaleti ba sikai ba sicaba sa Isilaele ne ba amuhezi Jesu kuli ki Mesiya. (Maroma 9:27; 11:5) Fa lizazi la Pentekonta ya 33 C.E., Jehova n’a sululezi balumeli bao ba ba bat’o ba 120 moya wa hae o kenile ni ku ba tisa mwa silikani sa hae se sinca se ne si ezizwe ka Jesu Kreste. (Jeremia 31:31-33; Maheberu 9:15) Ka lizazi leo, kwa pepiwa “Isilaele wa Mulimu,” ili sicaba se sinca seo lilama za sona li pepiwa ka moya wa Mulimu, isi ka ku simuluha ku Abrahama. (Magalata 6:16) Ku kala ka Kornele, sicaba se sinca seo ne si kopanyelelize ba macaba ba ba si ka ya kwa mupato. (Likezo 10:24-48; Sinulo 5:9, 10) Kacwalo ne ba añuzwi ki Jehova Mulimu ni ku ba bana ba hae ba kwa moya, ili babusi hamoho ni Jesu.—Maroma 8:16, 17.

19. Ki bufi bulikani bw’a iswala Jehova ni Isilaele wa Mulimu?

¹⁹ Jehova cwale u iswala bulikani ni Isilaele wa Mulimu. Lu bala kuli: “Haili Na, ki bo bulikani bo ni iswala ni bona, ku bulela [Muñ’a] Bupilo: Moya wa ka o inzi ku wena, hamoho ni manzwi a ka a ni beile mwa mulomo wa hao, h’a na ku zwa mwa mulomo wa hao, kamba ku zwa mwa milomo ya bana ba hao, ni mwa milomo ya baikulu ba hao, ku bulela [Muñ’a] Bupilo, ku kala cwale, ni ku ya ku ile.” (Isaya 59:21) Ibe kuli manzwi ao n’a talelelizwe ku Isaya ka sibili kamba n’a si ka talelezwa, kaniti n’a talelelizwe ku Jesu, ya n’a kolwisize kuli ‘n’a ka bona lusika.’ (Isaya 53:10) Jesu n’a bulezi manzwi a n’a itutile  ku Jehova, mi moya wa Jehova n’o inzi ku yena. (Joani 1:18; 7:16) Kwa swanela kuli banyani ba hae, ba ba ka busa hamoho ni yena, ba Isilaele wa Mulimu, ni bona ba amuhele moya o kenile wa Jehova ni ku kutaza litaba ze ba itutile ku Ndat’a bona wa kwa lihalimu. Kaufel’a bona ki “batu ba ba lutilwe ki Jehova.” (Isaya 54:13, NW; Luka 12:12; Likezo 2:38) Ibe kuli ki ka Isaya kamba ka Jesu, y’o mwa bupolofita u swanisezwa ki Isaya, Jehova cwale u konka kuli ha na ku ba tuhela ni kamuta kono u ka itusisa bona ku ya ku ile ba li lipaki za hae. (Isaya 43:10) Kono ki bomañi “bana” ba bona bao ili bao ni bona ba tusiwa ki bulikani b’o?

20. Sepiso ya Jehova ku Abrahama ne i talelelizwe cwañi mwa lilimo za mwanda wa pili?

²⁰ Jehova kwaikale n’a sepisize Abrahama kuli: “Macaba kamukana a lifasi a ka fiwa mbuyoti ka [peu ya, NW] hao.” (Genese 22:18) Ka ku lumelelana ni seo, bomasiyaleti ba sikai ba Isilaele wa ka sipepo be ne ba amuhezi Mesiya ne ba ile mwa macaba a mañata, ba nze ba kutaza taba ye nde ka za Kreste. Ku kala ku Kornele, bamacaba ba bañata ba ba si ka ya kwa mupato ‘ne ba filwe mbuyoti’ ka Jesu, Peu ya Abrahama. Ne ba bile kalulo ya Isilaele wa Mulimu ni ku ba kalulo ya bubeli ya peu ya Abrahama. Ki lilama za “mushobo o kenile” wa Jehova, o filwe musebezi wa kuli ba “bulele ze nde za hae Yena ya [ba] bizelize ku zwa mwa lififi, ni ku kena mwa liseli la hae le li komokisa.”—1 Pitrosi 2:9, Magalata 3:7-9, 14, 26-29.

21. (a) Ki bafi “bana” b’a tahisize Isilaele wa Mulimu mwa miteñi ya cwale? (b) “Bana” ba omba-ombiwa cwañi ki bulikani, kamba tumelelano, yeo Jehova a ezize ni Isilaele wa Mulimu?

²¹ Kacenu ku bonahala kuli lilama kaufela za Isilaele wa Mulimu li kubukanyizwe. Nihakulicwalo, macaba a sa zwelapili ku fiwa mbuyoti ye tuna mane ni ku fita.  Kamukwaufi? Kakuli Isilaele wa Mulimu u bile ni “bana,” bona balutiwa ba Jesu ba ba na ni sepo ya ku pila ku ya ku ile mwa paradaisi fa lifasi-mubu. (Samu 37:11, 29) Bona “bana” bao ni bona ba lutiwa ki Jehova mi ba lutiwa linzila za hae. (Isaya 2:2-4) Hailifo ha ba si ka kolobezwa ka moya o kenile kamba ku ngiwa ku ba mwa bulikani bo bunca, ba tiiswa ki moya o kenile wa Jehova kuli ba tule mikwalelo kaufela yeo Satani a tisa kuli a kwalele musebezi wa bona wa ku kutaza. (Isaya 40:28-31) Palo ya bona cwale se i eza bolule-lule mi i zwelapili ku ekezeha ha ba nze ba tahisa bana ba bona beñi. Bulikani kamba tumelelano ya Jehova ni batoziwa li fa “bana” bao sepo ya kuli Jehova u ka zwelapili ku itusisa ni bona hape ku ba babuleli ba hae ku ya ku ile.—Sinulo 21:3, 4, 7.

22. Lu kona ku ba ni sepo mañi ku Jehova, mi sepo yeo i swanela ku lu ama cwañi?

²² Kacwalo, haike kaufel’a luna lu zwelepili ku ba ni tumelo ku Jehova. Wa lata ku pilisa mi hape wa kona ku pilisa! Lizoho la hae ha li na ku ba le li kuswani; u ka lamulela kamita basepahali ba hae. Bote ba ba mu sepile ba ka zwelapili ku buluka manzwi a hae a mande mwa milomo ya bona “ku kala cwale, ni ku ya ku ile.”

[Lipuzo za Tuto]

[Mbokisi fa likepe 294]

Jerusalema wa Bukwenuheli Ki Swanisezo ya Krestendomu

Jerusalema, o n’o li muleneñi wa sicaba sa Mulimu se si ketilwe, i swaniseza kopano ya Mulimu ya kwa lihalimu ya libupiwa za moya ni sitopa sa Bakreste ba ba tozizwe ba ba zusezwa kwa lihalimu ba li munyaliwa wa Kreste. (Magalata 4:25, 26; Sinulo 21:2) Kono hañata bayahi ba Jerusalema ne ba sa sepahali ku Jehova, mi munzi wo n’o biziwa kuli lihule ni musali wa mubuki. (Ezekiele 16:3, 15, 30-42) Ha ne i li cwalo, Jerusalema ne li swanisezo ye swanela ya Krestendomu wa bukwenuheli.

Jesu n’a bulezi kuli Jerusalema ki ‘yena ya bulaya bapolofita, ya pobaula ka macwe ba ba lumwa ku yena.’ (Luka 13:34; Mateu 16:21) Sina Jerusalema ye ne sa sepahali, Krestendomu i ipapata ku sebeleza Mulimu wa niti kono i keluhile hahulu mwa linzila ze lukile. Lu kolweñi kuli Jehova u ka atula Krestendomu ka milao ye lukile ye swana ni ya n’a atuzi ka yona Jerusalema wa bukwenuheli.

[Siswaniso se si fa likepe 296]

Muatuli u lukela ku atula ka ku luka, ku eza ka mulao, ni ku sa amuhela likweta

[Siswaniso se si fa likepe 298]

Sina nuka ye buba, likatulo za Jehova li ka zwisa mikwalelo kaufela ye tibela ku ezwa kwa tato ya hae

[Siswaniso se si fa likepe 302]

Jehova u konka kuli batu ba hae ha ba na ku amuhiwa tohonolo ya ku ba lipaki za hae