Kauhanyo 10

“Nako Ya Shemubo”

Isaya 49:1-26

1, 2. (a) Isaya n’a ikozi mbuyoti mañi? (b) Ki bomañi ba ba amilwe mwa manzwi a bupolofita a’ ñozwi mwa kalulo ya pili ya Isaya kauhanyo 49?

BATU kaufela ba ba sepahala se ba shemubilwe ni ku silelezwa ki Mulimu. Kono Jehova ha ishemubeli-shemubeli fela batu. Mutu u lukela ku eza ze tokwahala kuli a fiwe mbuyoti yeo ye tuna hahulu. Ya n’a kile a eza cwalo ki Isaya. N’a shemubilwe ki Mulimu mi n’a itusisizwe ki Jehova kwa ku zibahaza tato ya Hae ku ba bañwi. Mutala wa seo u ñozwi mwa kalulo ya pili ya kauhanyo 49 ya bupolofita bwa Isaya.

² Manzwi ao a bulelelwa ka bupolofita peu ya Abrahama. Mwa talelezo ya pili, peu yeo ki sicaba sa Isilaele, se ne si simuluha ku Abrahama. Kono buñata bwa manzwi ao kaniti a ama ku Peu ya Abrahama ye ne libelezwi ka nako ye telele, yena Mesiya ya n’a sepisizwe. Manzwi a’ buyelezwi ao hape a ama kwa banyani ba Mesiya ba kwa moya, ba ba ba kalulo ya peu ya kwa moya ya Abrahama ni “Isilaele wa Mulimu.” (Magalata 3:7, 16, 29; 6:16) Sihulu, kalulo ye ya bupolofita bwa Isaya i talusa silikani se si ipitezi se si mwahal’a Jehova ni Jesu Kreste, Mwan’a hae ya latwa.—Isaya 49:26.

Ku Ketiwa ni ku Silelezwa ki Jehova

3, 4. (a) Ki ifi tuso ya na ni yona Mesiya? (b) Mesiya u bulela ku bomañi?

³ Mesiya u shemubiwa, kamba ku katelwa ki Mulimu.  Jehova u mu fa m’ata ni ze mu paka ze tokwahala kuli a pete musebezi wa hae. Kacwalo ka swanelo, ya ka ba Mesiya u li: “A mu teeleze mina lioli, a mu utwe mina macaba a kwahule: [Muñ’a] Bupilo u ni bizize ni si ka pepwa kale; ni sa li mwa mba ya boma u bulezi libizo la ka.”—Isaya 49:1.

⁴ Mesiya f’o u bulela kwa batu ba ba “kwahule.” Mesiya niha sepisizwe ku taha kwa Majuda, bukombwa bwa hae bu ka tusa macaba kaufela. (Mateu 25:31-33) “Lioli” ni “macaba” niha li si ka itama silikani ni Jehova, li swanela ku utwa Mesiya wa Isilaele kakuli u lumezwi ku t’o pilisa batu kamukana.

5. Mesiya u bulezwi cwañi fa libizo mane pili a si ka pepwa kale fa lifasi-mubu?

⁵ Bupolofita b’o bu li Jehova u ka bulela libizo la Mesiya pili a si ka pepwa kale fa lifasi-mubu. (Mateu 1:21; Luka 1:31) Kale-kale pili a si ka pepwa, Jesu u bizwa “Ya Babazwa, Muelezi, Mulimu ya Mata, Ndate wa kamita, Mulena wa Kozo.” (Isaya 9:6) Emanuele, mwendi ili libizo la mwan’a Isaya, ni lona li fita fa ku ba libizo la bupolofita la Mesiya. (Isaya 7:14; Mateu 1:21-23) Nihaiba lona la Jesu l’a ka fiwa Mesiya ili la ka biziswa ka lona la polofitwa pili a si ka pepwa kale. (Luka 1:30, 31) Libizo leo li zwa fa linzwi la Siheberu le li talusa kuli “Jehova Ki Mupilisi.” Ee luli, Jesu haki Kreste ya iketile ili yena.

6. Mulomo wa Mesiya u swana cwañi sina mukwale o buhali, mi u bulukwa cwañi?

⁶ Manzwi a bupolofita a Mesiya a zwelapili kuli: “Mulomo wa ka u u ezize sina mukwale o buhali; u ni patile mwa muluti wa lizoho la hae; mi u ni ezize lisho le li yengilwe, u ni bulukile fakaufi mwa sipusu sa masho a hae.” (Isaya 49:2) Mesiya wa Jehova ha ka t’o kalisa  bukombwa bwa fa lifasi-mubu ka 29 C.E., manzwi ni likezo za Jesu kaniti li ba sina lilwaniso ze buhali, ze yengilwe, ili ze kona ku fita kwa lipilu za bateelezi ba hae. (Luka 4:31, 32) Manzwi ni likezo za hae li nyemisa bayemeli ba Satani ni yena Satani, ya li sila se situna sa Jehova. Ku zwa fa pepelwa Jesu, Satani u lika ku Mu bulaya, kono Jesu u swana sina lisho le li bulukilwe mwa sipusu sa masho a Jehova. * W’a kona ku tiyela luli fa silelezo ya Ndat’ahe. (Samu 91:1; Luka 1:35) Ka nako ye tomilwe, Jesu u fana bupilo bwa hae kabakala batu. Kono nako i ka fita ya ka ba ndwalume wa kwa lihalimu ya m’ata ya ka ba ni lilwaniso ka nzila ye fapana. Mwa mulomo wa hae ku ka zwa mukwale o buhali. F’o, mukwale o buhali u yemela m’ata a Jesu a ku toma ni ku fitisa likatulo fahalimw’a lila za Jehova.—Sinulo 1:16.

Mutang’a Mulimu Ha Sebelezi Mbango

7. Manzwi a Jehova a kwa Isaya 49:3 a ama ku mañi, mi ki kabakalañi?

⁷ Jehova cwale u bulela manzwi a, a bupolofita: “Ki wena mutanga wa ka; ki wena Isilaele ye ni itumba ka yena.” (Isaya 49:3) Jehova u bulela kuli sicaba sa Isilaele  ki mutang’a hae. (Isaya 41:8) Kono Jesu Kreste ki yena Mutang’a Jehova yo mutuna. (Likezo 3:13) Kwa libupiwa za Mulimu, ha ku na s’a kona ku “itumba” ka sona Jehova se si fita Jesu. Kabakaleo, manzwi ao nih’a bulelelwa Isilaele f’o, ya bulelwa luli ki Jesu.—Joani 14:9; Makolose 1:15.

8. Bahabo Mesiya ba mu nga cwañi, kono Mesiya u talimela ku mañi ku atula lipeto za hae?

⁸ Kono kana haki niti kuli Jesu u shwaulwa ni ku haniwa ki buñata mwa sicaba sa habo? Ki niti. Buñata mwa sicaba sa Isilaele ha ba lumeli kuli Jesu ki yena Mutang’a Mulimu ya tozizwe. (Joani 1:11) Z’a peta Jesu kaufela fa lifasi-mubu li kana za bonwa ki batu ba ba pila mwa miteñi ya hae kuli ki ze nyinyani, mane ha li na tuso. Bo bu bonahala inge kuli ki bupalelwi b’o bwa bukombwa bwa hae bu akalezwa ki Mesiya mwa manzwi a hae a’ tatama, a’ li: “Ni sebelize mbango, ni sinyize mata a ka fela, ku sa tusi se siñwi.” (Isaya 49:4a) Manzwi ao h’a bulezwi haki kuli Mesiya u zwafile. Mu utwe manzwi a hae a’ tatama, a’ li: “Luli, litukelo za ka li ku [Muñ’a] Bupilo, mi mupuzo wa ka u ku Mulimu wa ka.” (Isaya 49:4b) Ya ziba lipeto za Mesiya ki Mulimu, haki batu.

9, 10. (a) Ki ufi musebezi wa Mesiya wa mu file Jehova, mi ki lifi z’a tahisa? (b) Bakreste kacenu ba kona ku susuezwa cwañi ki za n’a ipumani ku zona Mesiya?

⁹ Jesu sihulu u bata ku katelwa, kamba ku shemubiwa ki Mulimu. Mwa bupolofita, Mesiya u li: “Cwale [Muñ’a] Bupilo wa bulela, Yena ya ni bupezi ku ba mutang’a hae ni si ka pepwa kale, kuli i be na ya ka kutiseza Jakobo ku Yena, mi Isilaele a kubukanyezwe ku Yena; (kakuli, ni ya kutekiwa mwa meto a [Muñ’a] Bupilo, mi Mulimu wa ka ki Yena mata a ka).” (Isaya 49:5) Mesiya u tela ku t’o kutiseza lipilu za bana ba Isilaele ku  Ndat’a bona wa kwa lihalimu. Buñata ha ba lati cwalo, kono ba bañwi ba lata. Niteñi, mipuzo luli ya hae i ku Jehova Mulimu. Lipeto za hae li atulwa ka lipimo za Jehova, isi za butu.

¹⁰ Kacenu, balateleli ba Jesu fokuñwi ba kana ba ikutwa kuli ba sebeleza mbango. Mwa libaka ze ñwi, ba kana ba kutula ze ba bona bunyinyani hahulu mwa bukombwa bo ba ezize ka t’ata ni ka ku ikataza. Niteñi, ba itiisa, inze ba susuezwa ki mutala wa Jesu. Hape ba tiiswa ki manzwi a muapositola Paulusi, ya n’a ñozi kuli: “Cwale banabahesu ba ba latwa, mu tiye, mu si ke mwa zikinyeha, mi mu tiise kamita musebezi wa Mulena, inze mu ziba kuli musebezi wa mina o tata ha u na ku ba o si na tuso ku Mulena.”—1 Makorinte 15:58.

“Liseli la Macaba”

11, 12. Mesiya u bile cwañi “liseli la macaba”?

¹¹ Mwa bupolofita bwa Isaya, Jehova u susueza Mesiya ka ku mu hupulisa kuli ku ba Mutang’a Mulimu  haki “nto ye nyinyani hahulu.” Jesu u ka “zusa masika a Jakobo ni ku kutisa masialeti a’ siyezi a Isilaele.” Jehova hape u talusa kuli: “Hape ni ku fa ku ba liseli la macaba, kuli ka wena ku pilisa kwa ka ku yo fita ni kwa mafelelezo a lifasi.” (Isaya 49:6) Jesu u monyehela cwañi batu “ku yo fita ni kwa mafelelezo a lifasi” hailif’o bukombwa bwa hae bwa fa lifasi-mubu bu ezwa fela mwa Isilaele?

¹² Bibele i bonisa kuli “liseli la macaba” la Mulimu ne li si ka feliswa Jesu ha n’a zwile fa lifasi-mubu. Lilimo ze bat’o ba ze 15 ku zwa fa n’a shwezi Jesu, bo Paulusi ni Barnabasi ba balumiwa ne ba kutezi ku bulela bupolofita bwa Isaya 49:6 ni ku bulela kuli ne bu ama kwa balutiwa ba Jesu, bona banyani ba hae ba kwa moya. Ne ba ize: “Ki sona s’a laezi Mulena, a li: Ni ku beile liseli la macaba, kuli u be ku pilisa kwa ka, ku isa kwa mafelelezo a lifasi.” (Likezo 13:47) Pili a si ka shwa kale, Paulusi n’a boni teñi kuli taba ye nde ya puluso ya fitiswa isi fela kwa Majuda kono ni ku be ne “ba li teñi kaufela mwatas’a lihalimu.” (Makolose 1:6, 23) Kacenu, bomasiyaleti ba banyani ba Kreste ba ba tozizwe ba zwisezapili musebezi wo. Ka ku tusiwa ki “buñata bo butuna” bo bu eza bolule-lule, ba sebeza sina “liseli la macaba” mwa linaha ze fitelela 230 mwa lifasi kaufela.—Sinulo 7:9.

13, 14. (a) Mesiya ni balateleli ba hae ba fumaniñi mwa musebezi wa ku kutaza? (b) Ki ifi cinceho ya lika ye ezahezi?

¹³ Jehova kaniti u konile ku tiisa Mesiya Mutang’a hae, banyani ba Mesiya ba ba tozizwe, ni bote ba buñata bo butuna, ba ba swalisani ni bona mwa musebezi wa ku kutaza taba ye nde. Ki niti kuli sina Jesu, balutiwa ba hae ba shwauzwi ni ku lwaniswa. (Joani 15:20) Kono ka nako ya hae, Jehova kamita u cincanga lika ilikuli a lamulele batanga ba hae ba ba sepahala ni ku ba fa mupuzo. Ka za  Mesiya ya “nyazizwe ki nyangela” ili ya “toilwe ki sicaba,” Jehova u sepisa kuli: “Malena ba ka mu bona mi ba ka yema; manduna, bona, ba kubame fapil’a hae; kakuli [Muñ’a] Bupilo ki ya sepahala, Ya-Kenile wa Isilaele ki Yena ya ku ketile.”—Isaya 49:7.

¹⁴ Hamulaho, muapositola Paulusi n’a ñolezi Bakreste ba kwa Filipi ka za cinceho yeo ye n’e polofitilwe. N’a talusize Jesu kuli n’a kile a nyandiswa fa kota ya linyando kono hasamulaho n’a pahamisizwe ki Mulimu. Jehova n’a “pahamisize [Mutang’a hae] hahulu ni ku fita, mi u mu file Libizo le li fahalimw’a mabizo kamukana; kuli ka Libizo la Jesu, mañwele kaufela a kubame.” (Mafilipi 2:8-11) Balateleli ba Jesu ba ba sepahala ba lemusizwe kuli ni bona ba ka nyandiswa. Kono sina Mesiya, ba sepisizwe shemubo ya Jehova.—Mateu 5:10-12; 24:9-13; Mareka 10:29, 30.

“Nako Ye Swanela”

15. Ki ifi “nako” ye ipitezi ye bulezwi mwa bupolofita bwa Isaya, mi seo si bonisañi?

¹⁵ Bupolofita bwa Isaya bu zwelapili ku bulela manzwi a’ butokwa hahulu. Jehova u bulelela Mesiya kuli: “Ka nako [ya shemubo, NW], mi ka lizazi la ku pilisa ni ku tusize; ni ka ku sileleza, ni ka ku fa ku iswala bulikani ni sicaba.” (Isaya 49:8a) Bupolofita bo bu swana bu ñozwi kwa Samu 69:13-18. Walisamu u bulela za “nako ya shemubo,” ha itusisa pulelo ya kuli “nako ye swanela.” Lipulelo zeo li bonisa kuli shemubo ni silelezo za Jehova li fiwa ka nzila ye ipitezi kono ili ka nako ye tomilwe ili ya swalelele.

16. Kwa Isilaele ya kwaikale, ki ifi ye n’e li nako ya Jehova ya shemubo?

¹⁶ Nako ya shemubo n’e li lili? Mwa talelezo ya pili,  manzwi ao ne li kalulo ya bupolofita bwa za tukuluho mi n’a polofita za ku kuta kwa Majuda ku zwa mwa butanga. Sicaba sa Isilaele ne si li mwa nako ya shemubo ha ne si konile ku ‘zusa naha’ ni ku luwa sinca “lianda ze sinyehile.” (Isaya 49:8b) Cwale batu n’e si “ba ba tamilwe” mwa Babilona. Ha ne ba kutela habo bona, Jehova n’a boni teñi kuli ne ba sa ‘lapi’ kamba ku “shwa linyolwa,” kamba “ku utwa situkutuku ni lizazi.” Maisilaele be ne ba hasani ne ba selehanela hape habo bona “ba zwa kwahule . . . kwa Mutulo ni kwa Wiko.” (Isaya 49:9-12) Kono kwand’a talelezo ya pili ye tuna yeo, Bibele i bonisa kuli ku na ni litalelezo ze ñwi za bupolofita b’o.

17, 18. Ki ifi nako ya shemubo ya n’a tomile Jehova mwa lilimo za mwanda wa pili?

¹⁷ Pili, Jesu ha pepwa, mangeloi n’a shaezi kuli kozo ni shemubo za Mulimu li be teñi kwa batu. (Luka 2:13, 14) Shemubo yeo ne i filwe fela ku be ne ba na ni tumelo ku Jesu, isi kwa batu kaufela. Hamulaho Jesu n’a balezi nyangela bupolofita bwa Isaya 61:1, 2 ni ku bulela kuli ne bu talelelizwe ku yena ya n’a li mushaeli wa “mwaha wa Mulena, wa sishemo.” (Luka 4:17-21) Muapositola Paulusi n’a bulezi kuli Kreste mwa mazazi a nama ya hae, n’a filwe silelezo ye ipitezi ki Jehova. (Maheberu 5:7-9) Kacwalo nako yeo ya shemubo i talusa sishemo sa n’a na ni sona Mulimu ku Jesu ha n’a li mutu wa fa lifasi-mubu.

¹⁸ Kono ku na ni talelezo ye ñwi hape ya bupolofita b’o. Paulusi ha s’a kutezi ku bulela manzwi a Isaya a za nako ya shemubo, n’a zwezipili kuli: “Bona, nako ye swanela ki ya cwale; bona, lizazi la ku pilisa ki le.” (2 Makorinte 6:2) Paulusi n’a ñozi manzwi ao lilimo ze 22 hamulaho wa lifu la Jesu. Ku bonahala kuli puteho ya Sikreste ha se i pepilwe fa Pentekonta ya 33 C.E., Jehova  n’a ekelize kwa mwaha wa hae wa sishemo ilikuli a kopanyeleze ni balateleli ba Kreste ba ba tozizwe.

19. Bakreste kacenu ba kona ku tusiwa cwañi ki nako ya Jehova ya shemubo?

¹⁹ Ku cwañi ka za balateleli ba Jesu kacenu ba ba si ka toziwa ku ba bacalifa ba mubuso wa Mulimu wa kwa lihalimu? Kana ba ba na ni sepo ya ku pila fa lifasi-mubu ba kona ku tusiwa ki nako ya shemubo yeo? Ee luli. Buka ya Bibele ya Sinulo i bonisa kuli ye ki nako yeo Jehova a shemuba buñata bo butuna bo bu ka “zwa mwa ñalelwa ye tuna” kuli bu t’o ikola bupilo mwa paradaisi fa lifasi-mubu. (Sinulo 7:13-17) Kabakaleo, Bakreste kaufela ba kona ku itusisa nako ye nyinyani ye, yeo Jehova a shemuba batu ba ba si ka petahala.

20. Bakreste ba kona ku pima cwañi ku amuhela sishemotuna sa Jehova ku sa tusi se siñwi?

²⁰ Pili muapositola Paulusi a si ka shaela kale nako ya Jehova ya shemubo, n’a file temuso. N’a laezi Bakreste ku sa “amuhela sishemo sa Mulimu ku sa tusi se siñwi.” (2 Makorinte 6:1) Kabakaleo, Bakreste ba itusisa kolo kaufela kuli ba tabise Mulimu ni ku eza tato ya hae. (Maefese 5:15, 16) Neikaba hande ha ne ba ka latelela kelezo ya Paulusi ye li: “Banabahesu mu tokomele, mwendi yo muñwi ku mina a ka ba ni pilu ye na ni bumaswe, ye sa lumeli, mane a kauhane ni Mulimu-Ya-Pila. Kono mu kutazane ka zazi ni zazi, ha ku nze ku na ni sibaka sa kuli: Kacenu! Kuli ku tokwahale ku mina ya ka itatafaza pilu ka ku shongwa ki sibi.”—Maheberu 3:12, 13.

21. Ki afi manzwi a’ bonisa tabo a’ ungula kalulo ya pili ya Isaya kauhanyo 49?

²¹ Manzwi a bupolofita a mwahal’a Jehova ni Mesiya ha nz’a fela, Isaya u bulela manzwi a’ bonisa tabo ya hae, a’ li: “A mu opele mina mahalimu; wena lifasi  u nyakalale; ni mina malundu mu showele lipina; kakuli [Muñ’a] Bupilo u wisize sicaba sa hae pilu, mi ba hae ba ba nyandile u ka ba shwela makeke.” (Isaya 49:13) Ao luli ki manzwi a mande a’ omba-omba Maisilaele ba kwaikale ni Jesu Kreste Mutang’a Jehova yo mutuna, hamohocwalo ni batanga ba Jehova ba ba tozizwe ni balikani ba bona ba “lingu ze ñwi” kacenu!—Joani 10:16.

Jehova Ha Libali Batu ba Hae

22. Jehova u koñomeka cwañi kuli ha na ku libala batu ba hae?

²² Isaya cwale u zwelapili ku biha manzwi a Jehova. U polofita kuli Maisilaele ba ba hapilwe ba kana ba katala ni ku fela sepo. Isaya u li: “Sione n’a nza li: [Muñ’a] Bupilo u ni tobohile, Mulen’a ka u ni libezi.” (Isaya 49:14) Kana ku cwalo luli? Kana Jehova u fulalezi batu ba hae ni ku ba libala? Ka ku ba mubuleli wa Jehova, Isaya u zwelapili kuli: “Kana musali a ka libala mwan’a hae ya anya? kuli mane a si ke a shwela mwana ya zwa mwa mba ya hae makeke? E, ba ka libala bona, kono Na, ha ni na ku ku libala.” (Isaya 49:15) Ki kalabo ye lilato luli yeo ye zwa ku Jehova! Lilato la Mulimu kwa batu ba hae li fita la me ku mwan’a hae. U nahananga kamita basepahali ba hae. U ba hupulanga inge kuli mabizo a bona a ñozwi fa mazoho a hae. U li: “Ni ku ñozi mwa lingandi za mazoho a ka; makwakwa a munzi wa hao a fapil’a ka kamita.”—Isaya 49:16.

23. Paulusi n’a susuelize cwañi Bakreste ku sepa kuli Jehova ha na ku ba libala?

²³ Mwa liñolo la n’a ñolezi Magalata, muapositola Paulusi n’a laezi Bakreste kuli: “Lu si ke lwa katala ku eza hande, kakuli lu ka kutula mwa nako ya teñi ha lu sa zwafi.” (Magalata 6:9) Mi n’a ñolezi Maheberu manzwi a, a tiisa pilu: “Mulimu hasi ya si ka luka, kuli a libale misebezi  ya mina, ni lilato le mu bonisize kwa Libizo la hae.” (Maheberu 6:10) Lu si ikutwi ni hanyinyani kuli Jehova u libezi batu ba hae. Sina Sione wa kwaikale, Bakreste ba swanela ku nyakalala ni ku libelela ku Jehova ka pilu-telele. U kumalela manzwi ni lisepiso za hae za bulikani.

24. Sione i ka zuswa cwañi, mi i ka ipuza lipuzo mañi?

²⁴ Jehova, ka Isaya, u bulela manzwi a mañwi a’ wisa pilu. Ba ba “shandauzi [Sione],” ibe Mababilona kamba Majuda ba bakwenuheli, ha ba sa sabisa. “Bana” ba Sione, bona Majuda ba bahapiwa ba ba zwelapili ku sepahala ku Jehova, “ba taha ka lubilo.” Kaufela ba ka “kopana.” Kabakala ku matela ku kuta kwa Jerusalema, Majuda ba ba lukuluzwi ba ka ba nto ye kabisa muleneñi wa bona, sina “munyaliwa” ha kabiswa ka “mukabo.” (Isaya  49:17, 18) Naha ya Sione i siilwe “matota.” Mu nahane mo i ka komokela ku ba ni batu ba bañata hahulu ka nako i liñwi kuli mane naha ya yona i ka bonahala ku sinana. (Mu bale Isaya 49:19, 20.) Kabakaleo, u buza ko ba zwelela bana bao kaufela: “U ka li mwa pilu ya hao: Ki mañi ya ni pepezi bana bao? Kakuli ne ba felile ku shwa; ne ni siyezi ni li nosi, sihapiwa se si yembana kafa ni kafa; ki mañi ya ba utile bao? A mu bone, ne ni siilwe na ni li nosi; ba, ne ba li kakai?” (Isaya 49:21) Wo ki muinelo o tabisa luli wa Sione ye n’e kile ya ba mumba!

25. Mwa miteñi ye, ki ifi tukuluho ye bile kwa Isilaele wa kwa moya?

²⁵ Manzwi ao a na ni talelezo kacenu. Mwa lilimo ze t’ata za ndwa ya lifasi ya pili, Isilaele ya kwa moya ne i shandauzwi ni ku iswa mwa butanga. Kono ne i kutisizwe ni ku t’o ba mwa paradaisi ya kwa moya. (Isaya 35:1-10) Sina munzi o n’o kile wa shandaulwa o bulezwi ki Isaya, ne i tabile ku ipumana inze i fufula ka swanisezo ka balapeli ba Jehova ba ba tabile, ili ba ba mafulofulo.

‘Ndembela ya Macaba’

26. Ki ifi ketelelo ya fa Jehova kwa batu ba hae ba ba lukuluzwi?

²⁶ Ka bupolofita, Jehova cwale u isa Isaya kwa nako yeo batu ba Hae ba ka lukululwa mwa Babilona. Kana ba ka amuhela ketelelo ye ñwi ku Mulimu? Jehova u alaba kuli: “A mu bone, ni ka yemiseza macaba lizoho la ka, ni pahekele ba mishobo ndembela ya ka. Ba ka ta ba lwezi bana ba hao ba bashimani mwa mazoho a bona, ni bana ba hao ba basizana ba ba pepile fa maheta a bona.” (Isaya 49:22) Mwa talelezo ya pili, Jerusalema, ye ne kile ya ba mutomo wa mulonga ili mo ne ku inzi tempele ya Jehova, i ba “ndembela” ya Jehova. Nihaiba batu ba ba tumile ili ba ba m’ata ba macaba a sili, ba ba cwale ka “malena” ni “baoli,” ba tusa Maisilaele  ha ba nze ba kutela teñi. (Isaya 49:23a) Mwahal’a batusi bao ku na ni malena ba Peresia bo Sirusi ni Aritazerisi Longimanus ni mabasi a bona. (Ezira 5:13; 7:11-26) Mi manzwi a Isaya a na ni talelezo ye ñwi hape.

27. (a) Mwa talelezo ye tuna, ki kwa “ndembela” ifi ko ba ka selehanela batu? (b) Ki sifi se si ka ezahala macaba kaufela ha ka tokwa mwa ku ezeza kwand’a ku ipeya kwatas’a bubusi bwa Mesiya?

²⁷ Isaya 11:10 i bulela za ‘ku yemiseza macaba ndembela.’ Muapositola Paulusi n’a bulezi kuli manzwi ao a ama ku Kreste Jesu. (Maroma 15:8-12) Kacwalo, mwa talelezo ye tuna, Jesu ni babusi ba ba tozizwe ka moya b’a busa ni bona ki bona “ndembela” ya Jehova ko ba selehanela batu. (Sinulo 14:1) Nako ha i ka fita, batu kaufela ba fa lifasi-mubu, nihaiba babusi ba kacenu, ha ba na ku ba ni mukwa kwand’a ku ipeya kwatas’a bubusi bwa Mesiya. (Samu 2:10, 11; Daniele 2:44) Mafelelezo a ka ba afi? Jehova u li: “U ka ziba kuli ki Na [Jehova, NW]; ba ba sepile Na, ha ba na ku swaba.”—Isaya 49:23b.

“Cwale ku Piliswa Ku Fakaufi ni Luna”

28. (a) Ki ka manzwi afi ao Jehova hape a kolwisa batu ba hae kuli ba ka lukululwa? (b) Ki bufi buitamo bw’a sa na ni bona Jehova kwa batu ba hae?

²⁸ Ba bañwi ba ba hapezwi kwa Babilona mwendi ba ka li, ‘Kana luli Isilaele i ka lukululwa?’ Jehova u nyakisisa puzo yeo ha buza kuli: “Kikuli munna ya mata u ka amuhiwa s’a ikapezi sona? kamba ba ba hapilwe ba si na mulatu, ba ka liululwa?” (Isaya 49:24) Kalabo ki ee. Jehova u ba kolwisa kuli: “Ba ba tamilwe ki munna ya mata ba ka zwiswa, mi ba ba hapilwe ki muhali ba ka lukululwa.” (Isaya 49:25a) Yeo ki sepiso ye tiisa pilu luli! Hape, shemubo ya Jehova kwa batu ba hae i zamaelela ni buitamo bo bu tiile bwa ku ba sileleza. U bulela ka  ku utwahala hande kuli: “Ni ka lwanisa ba ba ku lwanisa, mi ni ka pilisa bana ba hao.” (Isaya 49:25b) Buitamo b’o bu sa li teñi. Sina mo ku ñolezwi kwa Zakaria 2:8, Jehova u bulelela batu ba hae kuli: “Ya mi ngunyuta, u ngunyuta taku ya liito la [ka, NW].” Ki niti kuli cwale se lu li mwa nako ya shemubo yeo batu mwa lifasi kaufela ba na ni kolo ya ku selehanela kwa Sione ya kwa moya. Kono nako yeo ya shemubo i ka fela.

29. Ki lifi ze nyenyisa ze ka ezahala ku ba ba hana ku utwa Jehova?

²⁹ Ku ka ezahalañi ku ba ba hana ka muñañatoho ku utwa Jehova ili bao mane ba nyandisa balapeli ba hae? U li: “Ba ba ku nyandisa, ni ka ba fa ku ca mibili ya bona tota, mi ba ka kolwa mali a bona, inge ya kozwi veine ye munati.” (Isaya 49:26a) Ku ka nyenyisa luli! Balwanisi ba ba muñañatoho bao ha ba na ku pila ku ya ku ile. Ba ka timezwa. Kabakaleo, ibe ka ku pilisa batu ba hae kamba ka ku timeza lila za bona, Jehova u ka bonwa kuli ki Mupilisi. “Mutu kaufela u ka ziba kuli, Na [Jehova, NW], ki Na Mupilisi ni Muliululi wa hao, Ya-Mata wa Jakobo.”—Isaya 49:26b.

30. Jehova u pilisize cwañi batu ba hae, mi ki sifi se siñwi s’a ka eza?

³⁰ Manzwi ao n’a talelelizwe pili Jehova ha n’a itusisize Sirusi ku lukulula batu ba Hae mwa butanga bwa kwa Babilona. Hape n’a talelelizwe ka 1919, Jehova ha n’a itusisize Jesu Kreste Mwan’a hae ya beilwe fa lubona ku lukulula batu ba Hae mwa butanga bwa kwa moya. Kabakaleo, Bibele i bulela kuli Jehova ni Jesu ki bapilisi. (Tite 2:11-13; 3:4-6) Jehova ki yena Mupilisi wa luna, mi Jesu, yena Mesiya, ki yena “Mulena” y’a iketezi. (Likezo 5:31) Kaniti, puluso ya Mulimu ka Jesu Kreste ya makaza. Ka taba ye nde, Jehova u lukulula ba lipilu ze sepahala ku zwa mwa butanga bwa bulapeli bwa buhata. Ka sitabelo  sa tiululo, u ba lukulula mwa butanga bwa sibi ni lifu. Ka 1919, n’a lukuluzi banyani ba Jesu mwa butanga bwa kwa moya. Mi mwa ndwa ye atumela ka bubebe ya Armagedoni, u ka lamulela buñata bo butuna bwa basepahali kwa sinyeho ye ka tulukela baezalibi.

31. Bakreste ba swanela ku ikutwa cwañi kabakala ku amuhela shemubo ya Mulimu?

³¹ Kacwalo, ki tohonolo hakalo ku amuhela shemubo ya Mulimu! Haike kaufel’a luna lu itusise hande nako ye swanela ye. Mi haike lu eze lika ka ku ziba kuli nako ki ye kuswani, lu nze lu utwa manzwi a Paulusi a n’a ñolezi Maroma, a’ li: “Mu ziba nako, kuli se li nako ya ku zuha kwa buloko. Kakuli cwale ku piliswa ku fakaufi ni luna, ku fita ha ne lu kalile ku lumela. Busihu bu tuha bu sa, lizazi li fakaufi. A lu tobohe kihona misebezi ya lififi, mi lu apale lilwaniso za liseli. Lu zamaye ka mukwa o swanela, sina musihali; isi ka ku ca maswe ni ku kolwa, ka buhule ni ku eza ze swabisa, ka likañi ni muna; kono mu apale Mulena Jesu Kreste, mi mu si ke mwa babalela nama ka ku pila ka litakazo za yona.”—Maroma 13:11-14.

32. Batu ba Mulimu ba filwe lisepiso mañi?

³² Jehova u ka zwelapili ku shemuba ba ba mamela kelezo ya hae. U ka ba fa m’ata ni buikoneli ze tokwahala kuli ba kutaze taba ye nde. (2 Makorinte 4:7) Jehova u ka itusisa batanga ba hae sina mw’a itusiseza Jesu Mueteleli wa bona. U ka eza milomo ya bona “sina mukwale o buhali” ilikuli ba ame lipilu za baishuwi ka taba ye nde. (Mateu 28:19, 20) U ka sileleza batu ba hae “mwa muluti wa lizoho la hae.” Sina “lisho le li yengilwe,” ba ka bulukwa “mwa sipusu sa masho a hae.” Ee luli, Jehova ha na ku fulalela batu ba hae!—Samu 94:14; Isaya 49:2, 15.

[Litaluso za kwatasi]

[Lipuzo za Tuto]

 [Siswaniso se si fa likepe 138]

Mesiya u swana sina “lisho le li yengilwe” le li mwa sipusu sa masho a Jehova

[Siswaniso se si fa likepe 141]

Mesiya u bile “liseli la macaba”

[Siswaniso se si fa likepe 147]

Lilato la Mulimu kwa batu ba hae li fita la me ku mwan’a hae