Ze Lukile Li Taha mwa Sione
Kauhanyo 22
Ze Lukile Li Taha mwa Sione
1, 2. Ki ifi cinceho ye ka tuha i taha mwa Isilaele, mi ki mañi ya ka i tisa?
TUKULUHO i shaelwe! Jehova u ikatulezi ku lukulula batu ba hae ni ku ba kutisa kwa naha ya bokukululu ba bona. Sina peu ye mela ha se ku nelile pula ye nde, ni bulapeli bwa niti hape bu ka zuha. Nako yeo ha i ka fita, ku zwafa ku ka yoliwa ki lipina za tabo, mi litoho ze ne kile za lambiwa mulola wa ku lila li ka apeswa likuwani za tumelezo ya Mulimu.
2 Ki mañi ya ka tisa zona licinceho ze nde-nde zeo? Ki Jehova fela ya kona ku eza cwalo. (Samu 9:19, 20; Isaya 40:25) Mupolofita Zefania n’a laezi ka bupolofita kuli: “U opele, wena mwan’a Sione, wa musizana; wena Isilaele, u n’o wabelwa; u tabe ka pilu ya hao kaufela, wena mwan’a Jerusalema, wa musizana. [Muñ’a] Bupilo u swalezi likatulo ze ne ku tama.” (Zefania 3:14, 15) Yeo ikaba nako ya tabo hakalo! Jehova ha ka kubukanya bomasiyaleti ba ba lukuluzwi mwa Babilona ka 537 B.C.E., ikaba inge kuli ze ne lolilwe se li ezahala luli.—Samu 126:1.
3. Manzwi a bupolofita a kwa Isaya kauhanyo 61 a na ni litalelezo lifi?
3 Tukuluho yeo i polofitilwe kwa Isaya kauhanyo 61. Kono bupolofita b’o luli niha ne bu talelelizwe ka 537 B.C.E., bu talelezwa ka butungi mwa nako ya hasamulaho. Talelezo ye tungile i ama Jesu ni balateleli ba hae mwa lilimo za mwanda wa pili ni batu ba Jehova mwa miteñi ya cwale. Kacwalo manzwi a’ buyelezwi a, a butokwa hakalo!
“Mwaha wa Sishemo”
4. Ki mañi ya lumilwe ku bulela litaba ze nde mwa talelezo ya pili ya Isaya 61:1, mi mwa talelezo ya bubeli bo, ki mañi?
4 Isaya u ñola kuli: “Moya wa Mulena [Muñ’a] Bupilo u ku na; kakuli [Muñ’a] Bupilo u ni tozize kuli ni tiseze babotana litaba ze nde; u ni lumile ku tiisa ba ba lobehile lipilu, ku bulelela ba ba hapilwe kuli ba lukuluhile, ku zibisa ba ba tamilwe mwa tolongo kuli ba kwalululezwi.” (Isaya 61:1) Ki mañi ya lumilwe ku t’o bulela litaba ze nde? Ku bonahala kuli pili ki Isaya, ya buyelezwi ki Mulimu ku ñolela bahapiwa ba mwa Babilona litaba ze nde. Niteñi, Jesu n’a bonisize talelezo ye tuna ni ku fita ha n’a bulezi kuli manzwi ao a Isaya n’a ama yena. (Luka 4:16-21) Ee, Jesu n’a lumilwe ku t’o bulelela baishuwi litaba ze nde, mi kabakaleo n’a tozizwe ka moya o kenile fa kolobezo ya hae.—Mateu 3:16, 17.
5. Ki bomañi be se ba kutalize litaba ze nde ka lilimo ze bat’o ba ze 2,000?
5 Mi hape, Jesu n’a lutile balateleli ba hae ku ba babuleli ba evangeli, kamba bakutazi ba litaba ze nde. Fa Pentekonta ya 33 C.E., ibat’o ba b’a 120 ku bona ne ba tozizwe ka moya o kenile ni ku ba bana ba Mulimu ba kwa moya. (Likezo 2:1-4, 14-42; Maroma 8:14-16) Ni bona ne ba lumilwe ku y’o bulelela baishuwi ni ba ba zwafile litaba ze nde. B’a 120 bao ne li bona ba pili ku b’a 144,000 ku toziwa cwalo. Ba mafelelezo ku bona ba sa tiile fa lifasi-mubu kacenu. Kacwalo, ka lilimo ze bat’o ba ze 2,000, balateleli ba ba tozizwe ba Jesu se ba kutalize “za ku baka ko ku isa ku Mulimu, ni za ku lumela ku Jesu Kreste Mulen’a luna.”—Likezo 20:21.
6. Ki bomañi be ne ba omba-ombilwe ki ku utwa litaba ze nde ze ne kutalizwe kwaikale, mi kacenu b’o?
6 Taba ye buyelezwi ya Isaya ne i omba-ombile Majuda ba ba bakile mwa Babilona. Mwa miteñi ya Jesu ni balutiwa ba hae, ne i omba-ombile Majuda be ne ba zwafile kabakala bumaswe mwa Isilaele ili be ne ba cucula mwa butanga kwa lizo za bulapeli bwa buhata bwa Sijuda bwa mwa lilimo za mwanda wa pili. (Mateu 15:3-6) Kacenu bolule-lule ba ba kwecekilwe ki lizo za Krestendomu za sihedeni ili ze shubulisa Mulimu ba ‘tonga ni ku lila’ kabakala bumaswe bo bu eziwa mwa bulapeli b’o. (Ezekiele 9:4) Ba ba amuhela litaba ze nde ba lukululwa kwa muinelo o shwisa makeke wo. (Mateu 9:35-38) Meto a bona a kutwisiso a kwaluluha hahulu ha ba ituta ku lapela Jehova “ka Moya ni ka niti.”—Joani 4:24.
7, 8. (a) ‘Myaha ya sishemo’ ye mibeli ki ifi? (b) Ki afi ‘mazazi a ku likanyisa batu’ a Jehova?
7 Ku na ni nako ye tomezwi ku kutazwa kwa litaba ze nde. Jesu ni balateleli ba hae ne ba laezwi ku “huweleza kuli mwaha wa sishemo wa [Muñ’a] Bupilo ki wo; ki le lizazi l’a ka likanyisa batu Mulimu wa luna; ni ku omba-omba ba ba lila kaufela.” (Isaya 61:2) Mwaha ki nako ye telele, kono u na ni makalelo ni mafelelezo. “Mwaha wa sishemo” wa Jehova ki nako yeo baishuwi ba fiwa kolo ya ku amuhela kutazo ya tukuluho.
8 Mwa lilimo za mwanda wa pili, mwaha wa sishemo wa sicaba sa Majuda ne u kalile ka 29 C.E., Jesu ha n’a kalile bukombwa bwa hae bwa fa lifasi-mubu. N’a bulelezi Majuda kuli: “Mu bake, kakuli mubuso wa kwa lihalimu u sutelezi fakaufi.” (Mateu 4:17) Mwaha wo wa sishemo n’o felile ha ne ku tile ‘lizazi la n’a likanyisize batu’ Jehova, le ne li fitile fa kaungu-ungu ka 70 C.E. muta Jehova n’a tuhelezi limpi za Maroma ku sinya Jerusalema ni tempele ya yona. (Mateu 24:3-22) Luna kacenu lu pila mwa mwaha o muñwi wa sishemo, ili o n’o kalile ka ku tomiwa kwa Mubuso wa Mulimu kwa lihalimu ka 1914. Mwaha wo wa sishemo u ka ba ni lizazi le liñwi le lituna la ku likanyisa batu muta Jehova a ka t’o sinya muinelo wo wa linto wa lifasi kamukana fa “ñalelwa ye tuna.”—Mateu 24:21.
9. Ki bomañi kacenu ba ba tusiwa ki mwaha wa sishemo wa Jehova?
9 Ki bomañi kacenu ba ba tusiwa ki mwaha wa sishemo wa Mulimu? Ki ba ba amuhela lushango, ku bonisa buishuwo, ni ku abana ka tukufalelo mwa ku shaela Mubuso wa Mulimu mwa “macaba kaufela.” (Mareka 13:10) Ba ba cwalo ba fumana kuli litaba ze nde za omba-omba luli. Kono ba ba hana lushango l’o, ili ba ba icawisa ka bomu mwaha wa sishemo wa Jehova, ba ka tuha ba tulukelwa ki lizazi leo l’a ka likanyisa batu.—2 Matesalonika 1:6-9.
Miselo ya kwa Moya Ye Lumbekisa Mulimu
10. Majuda ba ba kuta ku zwa kwa Babilona ba ikutwa cwañi ka za nto ye tuna y’a ba ezelize Jehova?
10 Majuda ba ba kuta ku zwa kwa Babilona ba lemuha kuli Jehova u ba ezelize nto ye tuna. Sililo sa bona sa ku ba batanga si fetuha tabo ni tumbo kakuli cwale ba lukuluhile. Kacwalo, Isaya u peta musebezi wa bupolofita w’a filwe, o li “ba ba lila mwa Sione, [a ba fe] kuwani ya bulena bakeñisa ku isukululela mulola fa toho; ba fiwe oli ya tabo bakeñisa maswabi; ni siapalo sa ku lumba bakeñisa moya o tonga; ba biziwe kuli ki likota ze na ni niti, likota ze calilwe ki [Muñ’a] Bupilo, Yena a lumbiwe ka zona.”—Isaya 61:3.
11. Ki bomañi mwa lilimo za mwanda wa pili be ne ba na ni libaka le linde la ku lumbeka Jehova kabakala ze tuna za n’a ezize?
11 Mwa lilimo za mwanda wa pili, Majuda be ne ba itebuhile ku lukululwa kwa bulapeli bwa buhata ni bona ne ba lumbekile Mulimu kabakala ze tuna z’a n’a ba ezelize. Moya wa bona o tonga n’o yolilwe ki “siapalo sa ku lumba” ha ne ba lukuluzwi kwa sicaba se si shwile kwa moya. Cinceho yeo pili ne i tile kwa balutiwa ba Jesu muta ku lila lifu la hae ne ku fetuhile nyakalalo ya ku tabela ku toziwa ka moya o kenile ki Mulen’a bona ya zusizwe kwa bafu. Hasamulahonyana, cinceho ye swana ne i tile kwa baishuwi b’a 3000 be ne ba amuhezi kutazo ya Bakreste be ne ba sa zo toziwa mi ba kolobezwa fa Pentekonta ya 33 C.E. (Likezo 2:41) Ne li nto ye nde luli ku sepa ku ba ni mbuyoti ya Jehova! Ku fita ku “lila mwa Sione,” ne ba amuhezi moya o kenile mi ne ba katulusizwe ki “oli ya tabo,” ye swaniseza tabo ya ba ba fuyauzwi hahulu ki Jehova.—Maheberu 1:9.
12, 13. (a) Ki bomañi be ne ba li “likota ze na ni niti” mwahal’a Majuda ba ba kuta ka 537 B.C.E.? (b) Ki bomañi ba ba bile “likota ze na ni niti” ku kala ka Pentekonta ya 33 C.E.?
12 Jehova u fa batu ba hae “likota ze na ni niti.” Likota zeo kiñi? Mwa lilimo za hamulaho wa 537 B.C.E., ne li batu be ne ba itutile Linzwi la Mulimu ni ku li yeya mi ni ku ituta ku ba ni lipimo za Jehova ze lukile. (Samu 1:1-3; Isaya 44:2-4; Jeremia 17:7, 8) Batu ba ba cwale ka Ezira, Hagai, Zakaria, ni Joshua Muprisita yo Mutuna ne li bona “likota” zeo—f’o kikuli bayemeli ba ba tiile ba niti ili be ne ba lwanisa silafalo ya kwa moya ya sicaba.
13 Ku kala ka Pentekonta ya 33 C.E., Mulimu n’a calile “likota ze na ni niti” ze ñwi mwa naha ya kwa moya ya sicaba sa hae se sinca, yona “Isilaele wa Mulimu.” Likota zeo ki Bakreste ba ba tozizwe ba ba bundume. (Magalata 6:16) Hamulaho wa lilimo-limo, “likota” zeo li fitile fa ku ba ze 144,000, mi li tahisa miselo ye lukile ye lumbekisa Jehova Mulimu. (Sinulo 14:3) Ba mafelelezo kwa “likota” ze tuna zeo ba bile teñi ku kala ka 1919, Jehova ha n’a zwisize bomasiyaleti ba Isilaele wa Mulimu mwa butanga bwa swalelele. Ka ku ba fa mezi a mañata a kwa moya, Jehova u tahisize simu ya swanisezo, ya likota ze lukile ili ze beya miselo.—Isaya 27:6.
14, 15. Ki ifi misebezi ye ne i ezizwe ki balapeli ba Jehova ba ba lukuluzwi ku kala ka (a) 537 B.C.E.? (b) 33 C.E.? (c) 1919?
14 Isaya ha koñomeka musebezi wa “likota” zeo, u zwelapili kuli: “Ba ka zusa matota a kale, ba zuse matota a samutamunene, ba yahe minzi ye n’e sinyehile [ka linako ze ñata, NW].” (Isaya 61:4) Ka taelo ya Mulena Sirusi wa Peresia, Majuda ba ba sepahala be ne ba kutile ku zwa kwa Babilona ne ba zusize Jerusalema ni tempele ya yona, ye ne siilwe i li matota ka nako ye telele hahulu. Musebezi wa ku zusa n’o ka eziwa hape mwa lilimo za hamulaho wa 33 C.E. ni 1919.
15 Ka 33 C.E., balutiwa ba Jesu ne ba zwafisizwe hahulu ki ku tamiwa, katulo, ni lifu la hae. (Mateu 26:31) Kono ne ba nyakalalile ha n’a iponahalize ku bona ha s’a zuhile kwa bafu. Mi moya o kenile ha ne u sululezwi fahalimw’a bona, ba pateha hahulu mwa musebezi wa ku kutaza taba ye nde, “mwa Jerusalema, ni mwa naha kaufela ya Judea ni ya Samaria, ni ku isa kwa mafelelezo a lifasi.” (Likezo 1:8) Kacwalo ba kalisa ku zusa bulapeli bo bu kenile. Ka nzila ye swana, ku kala ka 1919 ku ya cwalo kwapili, Jesu Kreste n’a konisize bomasiyaleti ba banyani ba hae ba ba tozizwe ku zusa “minzi ye n’e sinyehile ka linako ze ñata.” Ka lilimo-limo, ba bahulu ba bulapeli bwa Krestendomu ba palezwi ku luta zibo ya Jehova, ba i yolisize ka lizo za butu ni lituto ze si za mañolo. Bakreste ba ba tozizwe ne ba tanyezi ze ne ba eza mwa liputeho ze ne tampakani ka bulapeli bwa buhata ilikuli zuho ya bulapeli bwa niti i zwelepili. Mi ne ba kalisize musebezi o n’o t’o ba ona musebezi wa bukutazi o mutuna ka ku fitisisa haisali mwa lifasi.—Mareka 13:10.
16. Ki bomañi be se ba tusize Bakreste ba ba tozizwe mwa musebezi wa bona wa ku zusa, mi ba filwe misebezi mañi?
16 Wo ne li musebezi o mutuna. Ba sikai ba mafelelezo kwa Isilaele wa Mulimu ne ba ka kona cwañi ku peta musebezituna wo? Jehova n’a buyelezi Isaya ku zibahaza kuli: “Ba macaba ba ka ba teñi, ba lise mitapi ya mina. Bana ba basili ba be balimi ba mina, ba lime ni likota za mina za veine.” (Isaya 61:5) Ba macaba ni bana ba basili bao ba ba li nguli se ba til’o ba “buñata bo butuna” bwa “lingu ze ñwi” za Jesu. * (Sinulo 7:9; Joani 10:11, 16) Ha ba si ka toziwa ka moya o kenile kuli ba y’o pila kwa lihalimu. Kono bona ba na ni sepo ya ku pila ku ya ku ile mwa paradaisi fa lifasi-mubu. (Sinulo 21:3, 4) Nihakulicwalo, ba lata Jehova mi ba filwe musebezi wa kwa moya wa ku lisa, ku lima licalo, ni likota za veine. Misebezi ye cwalo haki ye nyazeha. Ka ketelelo ya ba mafelelezo ba Isilaele wa Mulimu, babeleki bao ba tusa ku lisa, ku babalela, ni ku kutula batu.—Luka 10:2; Likezo 20:28; 1 Pitrosi 5:2; Sinulo 14:15, 16.
17. (a) Lilama za Isilaele wa Mulimu li ka bizwa cwañi? (b) Ki sifi sitabelo si nosi se si tokwahala kwa swalelo ya libi?
17 Isilaele wa Mulimu bo? Jehova u ba bulelela, ka Isaya, kuli: “Kono mina mu ka bizwa kuli ki mina baprisita ba [Muñ’a] Bupilo; batu ba mi bulele ba li, ki mina likombwa za Mulimu wa luna; mi mu ka ca bufumu bwa macaba, mu ka ipabaza ka ze tumile za ona.” (Isaya 61:6) Mwa Isilaele wa kwaikale, Jehova n’a file baprisita ba Malivi kuli ba fange matabelo ka ku yemela baprisita ka sibili ni Maisilaele ba bañwi kaufela. Kono ka 33 C.E., Jehova a tuhela ku itusisa baprisita ba Malivi mi a kalisa tukiso ye nde ni ku fita. N’a amuhezi bupilo bo bu petehile bwa Jesu ku ba sitabelo sa libi za batu kaufela. Ku zwa f’o, ha ku na sitabelo se siñwi hape se si tokwahezi. Sitabelo sa Jesu sa sebeza ka nako kaufela.—Joani 14:6; Makolose 2:13, 14; Maheberu 9:11-14, 24.
18. Isilaele wa Mulimu i eza buprisita bo bu cwañi, mi ba filwe taelo mañi?
18 Cwale lilama za Isilaele wa Mulimu ki “baprisita ba [Muñ’a] Bupilo” ka mukwa ufi? Muapositola Pitrosi ha n’a ñolezi Bakreste ba bañwi ba ba tozizwe, n’a ize: “Mina mu lusika lo lu ketilwe, mu na ni buprisita bwa silena, mu mushobo o kenile, mu sicaba sa hae tota, kuli mu bulele ze nde za hae Yena ya mi bizelize ku zwa mwa lififi, ni ku kena mwa liseli la hae le li komokisa.” (1 Pitrosi 2:9) Kacwalo, ka sikwata, Bakreste ba ba tozizwe ki baprisita ka mulelo o ipitezi wo: wa ku bulelela macaba za kanya ya Jehova. Ba swanela ku ba lipaki za hae. (Isaya 43:10-12) Mwa mazazi kaufela a maungulo, Bakreste ba ba tozizwe ba ezize musebezituna wo ka busepahali. Kabakaleo, bolule-lule cwale ba abana ni bona mwa musebezi wa ku kutaza za Mubuso wa Jehova.
19. Ki ifi sebelezo yeo Bakreste ba ba tozizwe ba ka eza?
19 Ku zwa f’o, lilama za Isilaele wa Mulimu li na ni sepo ya ku ba baprisita ka nzila ye ñwi hape. Ha se ba shwile, ba zusezwa kwa bupilo bwa moya bwa ku sa shwa, kwa lihalimu. Teñi ko, ba ba babusi hamoho ni Jesu mwa Mubuso wa hae mi hape ba ba baprisita ba Mulimu. (Sinulo 5:10; 20:6) Kacwalo, ba ka ba ni tohonolo ya ku sebelisa lituso za sitabelo sa tiululo sa Jesu kwa batu ba ba sepahala ba fa lifasi-mubu. Mwa pono ya muapositola Joani ye ñozwi kwa Sinulo kauhanyo 22, hape ba bulelwa ku ba “likota.” (NW) “Likota” kaufela ze 144,000 li bonwa mwa lihalimu, li beya “miselo ha 12, [inze li] buzwisa miselo ka kweli ni kweli; mi matali a [likota zeo, NW] ki a ku folisa macaba.” (Sinulo 22:1, 2) Ki sebelezo ya buprisita kwa bunde yeo!
Ku Swabiswa ni ku Kendwa, Kihona ku Taha Tabo
20. Ku si na taba ni twaniso, baprisita ba ba li malena ba libelezi mbuyoti mañi?
20 Ku kala ka 1914 mwaha wa sishemo wa Jehova ha n’o kalile, buprisita bwa silena bu lwanisizwe kamita ki ba bahulu ba bulapeli bwa Krestendomu. (Sinulo 12:17) Nihakulicwalo, buikatazo kaufela bwa ku yemisa ku kutazwa kwa taba ye nde bu palezwi. Bupolofita bwa Isaya ne bu polofitile nto yeo, bu li: “Bakeñisa ku swabiswa ko ne mu swabisizwe, mu ka kutekiwa habeli ku fita; bakeñisa ku kendwa, ba ka tabela sanda sa bona; kifohe ba ka abelwa habeli kwa naha ya bona: tabo ye sa feli i be ya bona.”—Isaya 61:7.
21. Ne ku tile cwañi kuli Bakreste ba ba tozizwe ba abelwe limbuyoti habeli?
21 Mwahal’a Ndwa ya Lifasi ya I, bomasiyaleti ba ba tozizwe ne ba swabisizwe ni ku kendwa ki Krestendomu ye kuteka hahulu naha. Ba bahulu ba bulapeli ne li ba bañwi ba be ne ba tamelelize mizwale ba 8 ba ba sepahala ba kwa sibaka se situna sa tamaiso mwa Brooklyn kuli ne ba kwenuhezi mulonga. Mizwale bao ne ba tamilwe ba si na mulatu ka likweli ze 9. Kono ka maliha a 1919, ne ba lukuluzwi, mi hasamulaho mulatu kaufela o ne ba tamelelizwe n’o felisizwe. Kacwalo mulelo wa ku yemisa musebezi wa ku kutaza wa palelwa. Ku fita ku tuhelela balapeli ba hae ku swabiswa ku ya ku ile, Jehova n’a ba lukuluzi ni ku ba kutisa kwa “naha ya bona” ya kwa moya. Teñi k’o, ne ba abezwi limbuyoti habeli. Mbuyoti ya Jehova ne i yolisize ku feleleza manyando a bona kaufela. Kaniti ne ba na ni libaka la ku opela ka tabo!
22, 23. Bakreste ba ba tozizwe ba likanyisize cwañi Jehova, mi u ba fuyauzi cwañi?
22 Ze tatama z’a bulela Jehova li lu fa libaka le liñwi le ba swanela ku nyakalalela Bakreste kacenu: “Na, [Muñ’a] Bupilo, ni lata ku atula ka mulao; ni toile busholi bo bu zamaya ni bumaswe. Bana ba ka, ni ka ba fa mipuzo ye ba lukela, ni eze ni bona bulikani bo bu si na ku fela.” (Isaya 61:8) Ka tuto ya bona ya Bibele, bomasiyaleti ba ba tozizwe ne ba itutile ku lata ku atula ka mulao ni ku toya bumaswe. (Liproverbia 6:12-19; 11:20) Ne ba itutile ku ‘tula mikwale ya bona ku i eza mihuma,’ ili ku ikambusa kwa lindwa za batu ni mifilifili ya bupolitiki. (Isaya 2:4) Hape ne ba ambukile mikwa ye sa kutekehisi Mulimu, ye cwale ka busawana, bubuki, busholi, ni butahwa.—Magalata 5:19-21.
23 Bakeñisa kuli Bakreste ba ba tozizwe ba likanyisa Mubupi wa bona kwa ku lata ku atula ka mulao, Jehova u ba file “mipuzo ye ba lukela.” O muñwi wa “mipuzo” yeo ki bulikani bo bu si na ku fela—ona bulikani bo bunca—bwa n’a zibahalize Jesu kwa balateleli ba hae busihu bo ne bu latelezwi ki lizazi la lifu la hae. Ki ka bulikani b’o ha ba ba sicaba sa kwa moya, ili batu ba Mulimu ba ba ipitezi. (Jeremia 31:31-34; Luka 22:20) Ka bona bulikani b’o, Jehova u ka sebelisa lituso kaufela za sitabelo sa tiululo sa Jesu, hamoho ni swalelo ya libi kwa batoziwa ni kwa batu kaufela ba ba sepahala.
Ku Tabela Limbuyoti za Jehova
24. Ki bafi “bana” ba ba zwa mwahal’a macaba ba ba taha ku t’o fuyaulwa, mi ba fitile cwañi fa ku ba “bana”?
24 Ba bañwi kwa macaba ba lemuhile mbuyoti ya Jehova y’a file batu ba hae. Nto yeo ne i polofitilwe ki sepiso ya Jehova, ye li: “Bana ba bona ba ka zibwa mwahal’a macaba, mushobo wa bona u zibwe mwahal’a mishobo; mi kaufela ba ba ka ba bona, ba ka ziba kuli ki ba lusika lo lu fuyauzwi ki [Muñ’a] Bupilo.” (Isaya 61:9) Lilama za Isilaele wa Mulimu, bona Bakreste ba ba tozizwe, se ba mbindanile mwahal’a macaba mwa mwaha wa sishemo wa Jehova. Kacenu ba ba amuhezi bukombwa bwa bona ki bolule-lule. Ka ku sebelisana hahulu ni Isilaele wa Mulimu, ba ba zwa mwa macaba ba na ni tohonolo ya ku ba “lusika lo lu fuyauzwi ki [Muñ’a] Bupilo.” Tabo ya bona ya bonahala kwa batu kamukana.
25, 26. Bakreste kaufela ba lumelelana cwañi ni manzwi a kwa Isaya 61:10?
25 Bakreste kaufela, ili batoziwa ni lingu ze ñwi, ba libelela ku lumbeka Jehova ku ya ku ile. Ba lumelelana ka pilu kaufela ni mupolofita Isaya, ya bulela ka puyelelo kuli: “Ni ka wabelelwa hahulu [Muñ’a] Bupilo, pilu ya ka i tabele Mulimu wa ka; kakuli u ni apesize liapalo za bupilo, u ni kwahezi kubo ya ku luka, sina munyali ya apala kuwani ya sinawenga ni sina munyaliwa ya kaba za hae za butokwa.”—Isaya 61:10.
26 Bakeñisa kuli ba apezi “kubo ya ku luka,” Bakreste ba ba tozizwe ba ikatulezi ku zwelapili ku ba ba ba kenile ku Jehova. (2 Makorinte 11:1, 2) Bakeñisa kuli ba beilwe ba ba lukile ki Jehova ka mulelo wa ku pila kwa lihalimu, ha ba na ku kutela ni kamuta kwa matota a Babilona yo mutuna, ko ba lukuluzwi. (Maroma 5:9; 8:30) Liapalo za bupilo ki za butokwa hahulu ku bona. Balikani ba bona ba lingu ze ñwi ni bona ba ikatulezi ku mamela lipimo za Jehova Mulimu ze pahami za bulapeli bo bu kenile. Bakeñisa kuli “ba tapisize liapalo za bona, ba li sweufalize mwa mali a Ngunyana,” ba beilwe ba ba lukile mi ba ka punyuha “ñalelwa ye tuna.” (Sinulo 7:14; Jakobo 2:23, 25) Ku fitela nako yeo, ba likanyisa mizwale ba bona ba ba tozizwe ka ku ambuka silafalo ifi kamba ifi ya Babilona yo mutuna.
27. (a) Mwahal’a Puso ya Lilimo ze Sikiti, ki lifi ze tuna ze ka ‘tahiswa’? (b) Ku luka se ku li teñi cwañi mwahal’a batu?
27 Kacenu, balapeli ba Jehova ba tabela ku ba mwa paradaisi ya kwa moya. Mi ba ka tuha hape ba ikola Paradaisi tenyene. Lu libelezi ka lipilu za luna kaufela nako yeo, ye talusizwe ka ku utwahala hande mwa manzwi a mafelelezo a Isaya kauhanyo 61, a’ li: “Sina mo li meliseza lifasi limela za lona, kamba simu mo i meliseza ze caliwa ku yona, ni cwalo Mulena [Muñ’a] Bupilo u ka tahisa ze lukile, ze lumbwa li bonahale fapil’a macaba kaufela.” (Isaya 61:11) Mwahal’a Puso ya Kreste ya Lilimo ze Sikiti, mwa lifasi ku ka ‘tahiswa ze lukile.’ Batu ba ka huweleza ka tabo, mi ze lukile li ka yandulukela mwa lifasi kaufela. (Isaya 26:9) Kono ha lu tokwi ku libelela lizazi le lituna leo kuli lu opele milumbeko fapil’a macaba kaufela. Ku luka se ku bonahezi mwahal’a bolule-lule ba ba lumbeka Mulimu wa kwa lihalimu ni ku hasanya taba ye nde ya Mubuso wa hae. Nihaiba cwale tumelo ni sepo ya luna li lu ezisa hahulu ku tabela limbuyoti za Mulimu wa luna.
[Litaluso za kwatasi]
^ para. 16 Mwendi Isaya 61:5 ne i talelelizwe mwa miteñi ya kwaikale, kakuli ba ba si Majuda ne ba kutile ni ba ba li Majuda ka sipepo kwa Jerusalema mi ku bonahala kuli ne ba tusize mwa ku zusa naha. (Ezira 2:43-58) Kono ku zwa mwa timana 6, bupolofita b’o ku bonahala kuli bu bulela fela za Isilaele wa Mulimu.
[Lipuzo za Tuto]
[Siswaniso se si fa likepe 323]
Isaya u na ni litaba ze nde za ku bulelela Majuda ba ba li lihapwa
[Siswaniso se si fa likepe 331]
Ku kala ka 33 C.E., Jehova u calile “likota ze na ni niti” ze eza 144,000
[Siswaniso se si fa likepe 334]
Lifasi-mubu li ka tahisa ze lukile
