Kauhanyo 44

Balikani Ba Luna Ba Lukela Ku Lata Mulimu

BALIKANI ki batu be lu lata ku ambola ni bona ni ku ba ni bona. Kono ku butokwa ku ba ni balikani ba ba swanela. Ki mañi y’o bona wena kuli ki yena mulikan’a luna yo mutuna ka ku fitisisa?— Ki Jehova Mulimu.

Kana luli lwa kona ku ba balikani ba Mulimu?— Bibele i bulela kuli Abrahama, munna ya n’a pilile kale-kale k’o, n’a li “mulikan’a Jehova.” (Jakobo 2:23, NW) Kana wa ziba libaka ha n’a li mulikan’a Jehova?— Bibele i alaba kuli Abrahama n’a utwanga Mulimu. N’a li ya utwa niha n’a kupilwe ku eza ze t’ata. Kacwalo, kuli lu be balikani ba Jehova, lu lukela ku eza ze mu tabisa, sina Abrahama ha n’a ezize cwalo mi sina Muluti yo Mutuna ha s’a ezize cwalo kamita.—Genese 22:1-14; Joani 8:28, 29; Maheberu 11:8, 17-19.

 Jesu n’a bulelezi baapositola ba hae kuli: ‘Balikani ba ka ki mina, ha mu eza se ni mi laela kaufela.’ (Joani 15:14) Bakeñisa kuli kaufela za n’a bulelezi batu Jesu ne li zwa ku Jehova, Jesu n’a bulela kuli balikani ba hae n’e li batu be ne ba eza za n’a bulela Mulimu kuli ba lukela ku eza. Ee, balikani ba hae kaufela ne ba lata Mulimu.

Balikani ba bañwi ba batuna ba Muluti yo Mutuna n’e li baapositola ba hae, mi wa kona ku ba bona fa likepe 75 la buka ye. Ne ba zamayanga ni yena ni ku mu tusa ku eza musebezi wa ku kutaza. Jesu n’a banga hahulu ni banna bao. Ne ba canga hamoho. Ne ba ambolanga za Mulimu hamoho. Mi ne ba ezanga lika ze ñwi hamoho. Kono Jesu n’a na ni balikani ba bañwi ba bañata. N’a inanga ni bona, mi ne ba banga ni linako ze nde hamoho.

Lubasi lo luñwi l’o Jesu n’a latanga ku ina ni lona ne lu pila mwa munzinyana o bizwa Betania, bukaufi fela ni muleneñi o mutuna wa Jerusalema. Kana wa ba hupula?— N’e li bo Maria ni Mareta ni kaizel’a  bona Lazaro. Jesu n’a bizanga Lazaro kuli mulikan’a hae. (Joani 11:1, 5, 11) Libaka Jesu ha n’a lata lubasi l’o ni ha n’a ikolanga ku ba ni lona n’e li kuli ne lu lata Jehova mi ne lu lata ku Mu sebeleza.

F’o ha ku talusi kuli Jesu n’a si ya sishemo kwa batu be ne ba sa sebelezi Mulimu. N’a li ya sishemo ni ku bona. Mane n’a yanga kwa mandu a bona ni ku ca ni bona. Kabakaleo, ba bañwi ba bulela kuli Jesu n’a li “mulikani wa batelisi ni wa baezalibi.” (Mateu 11:19) Niti kikuli Jesu n’a sa yangi kwa mandu a batu bao kakuli n’a tabela mupilelo wa bona. N’a ba potelanga ilikuli a ba ambote ka za Jehova. N’a likile ku ba tusa ku cinca mikwa ya bona ye maswe ilikuli ba sebeleze Mulimu.

Ne ku ezahezi cwalo zazi le liñwi mwa muleneñi wa Jeriko. Jesu n’a ipitela fela mwa munzi w’o ha n’a liba kwa Jerusalema. Ne ku na ni sikwata sa batu, mi mwa sikwata seo ne ku na ni munna ya bizwa Zakia. N’a bata ku bona Jesu. Kono Zakia n’a li yo mukuswani, mi n’a sa koni ku mu bona bakeñisa sikwata sa batu seo. Kacwalo a matela kwapili mwa nzila yeo mi a y’o pahama kwa kota ilikuli a kone ku bona hande Jesu ha n’a nz’a fita.

 Jesu ha n’a tile kwa kota yeo, a nanulela meto a hae kwateñi mi a li: ‘Akufa u tuluke, kakuli kacenu ni ka taha kwa ndu ya hao.’ Kono Zakia n’a li munna ya fumile ya n’a ezize lika ze maswe. Jesu n’a batelañi ku ya kwa ndu ya munna ya cwalo?—

N’e si kuli Jesu n’a tabela mupilelo wa yena munna y’o. N’a ile kwateñi kakuli n’a bata ku ambola ni Zakia ka za Mulimu. N’a boni kuli munna y’o n’a ikatalize hahulu kuli a mu bone. Kacwalo, n’a ziba kuli mwendi Zakia n’a ka teeleza. Yeo n’e li nako ye nde ya ku mu bulelela mwa n’a batela Mulimu kuli batu ba pilele.

Kacwalo, ki sifi se lu bona si ezahala cwale?— Zakia u tabela z’a luta Jesu. U ikutwa hahulu maswabi kakuli n’a pumanga batu, mi u sepisa ku kutisa masheleñi a n’a ngile ku si na tukelo. Cwale u ba mulateleli wa Jesu. Kihona cwale Jesu ni Zakia ba ba balikani.—Luka 19:1-10.

Ha lu latelela mutala wa Muluti yo Mutuna, kana muta o muñwi lu ka potela batu ba ba si balikani ba luna?— Ee. Kono ha lu na ku ba potela kakuli lwa tabela mupilelo wa bona. Mi ha lu na ku eza  lika ze maswe ni bona. Lu ka ba potela ilikuli lu ambole ni bona ka za Mulimu.

Kono balikani ba luna ba batuna ki bona be lu lata ku ba hahulu ni bona. Kuli ba be balikani ba ba swanela, ba lukela ku ba batu b’a lata Mulimu. Ba bañwi mwendi ha ba zibi kuli Jehova ki mañi. Kono haiba ba bata ku ituta ka za hae, lwa kona ku ba tusa. Mi ha ba ka t’o fitanga fa ku lata Jehova ka mo lu mu latela, fohe lwa kona ku ba balikani ba batuna.

Ku na ni nzila ye ñwi ye lu kona ku ziba ka yona haiba mutu wa kona ku ba mulikani yo munde. U lemuhe lika z’a eza. Kana wa ezanga lika ze maswe kwa batu ba bañwi mi kihona a seha ka za teñi? Ku eza cwalo haki ko kunde, nji cwañi?— Kana kamita mutu y’o wa kenanga mwa butata? Ha lu lati ku kena mwa butata ni yena, nji cwañi?— Kamba kana mutu y’o u ezanga lika ze maswe ka bomu mi ni ku ikutwa kuli u butali kakuli h’a si ka swaliwa? Mutu y’o niha n’a si ke a swaliwa, Mulimu u boni s’a ezize, nji cwañi?— Kana wena u bona kuli batu ba ba eza lika ze cwalo ba kona ku ba balikani ba bande?—

Ha ku nge Bibele ya hao. Ha lu bone se i bulela ka za m’o balikani ba lu amela. Liñolo li kwa 1 Makorinte kauhanyo 15, timana 33. Kana u li fumani?— Li bala kuli: “Mu si ke mwa ipuma: Litwaelano ze maswe li sinya mikwa ye minde.” F’o ku talusa kuli ha ne lu ka eza sango ni batu ba ba maswe, ni luna lwa kona ku ba ba ba maswe. Mi hape ki niti kuli balikani ba bande ba lu tusa ku ba ni mikwa ye minde.

Lu si ke lwa libala ni hanyinyani kuli Mutu wa butokwa ka ku fitisisa mwa bupilo bwa luna ki Jehova. Ha lu lati ku sinya silikani sa luna ni yena, nji cwañi?— Kacwalo, lu lukela ku tokomela ku ba fela ni balikani ba ba lata Mulimu.

Butokwa bwa ku ba ni balikani ba ba swanela bu boniswa kwa Samu 119:115; Liproverbia 13:20; 2 Timotea 2:22; ni 1 Joani 2:15.

[Siswaniso se si fa likepe 227]

Ki kabakalañi Abrahama ha n’a li ‘mulikan’a Jehova’?

[Siswaniso se si fa likepe 228]

Ki kabakalañi Jesu ha n’a banga ni lubasi l’o ha n’a yo potanga kwa Jerusalema? Kana mabizo a bona wa a ziba?

[Siswaniso se si fa likepe 229]

Zakia u pahameziñi kwa kota ye?

[Siswaniso se si fa likepe 230]

Ki kabakalañi Jesu ha potela Zakia, mi Zakia u sepisa ku ezañi?