Kauhanyo 12

Jesu U Lu Luta Ku Lapela

KANA wa ambolanga ni Jehova Mulimu?— U bata kuli u ambolange ni yena. Ha u ambola ni Mulimu, f’o ku taluswa kuli ki tapelo. Jesu kamita n’a ambolanga ni Ndat’ahe wa kwa lihalimu. Fokuñwi, n’a batanga ku ba a nosi ha n’a ambolanga ni Mulimu. Bibele i bulela kuli, zazi le liñwi, “A kambamela fa lilundu ku y’o lapela kwatuko; a likelelwa a sa li fateñi, a nosi.”—Mateu 14:23.

U kona ku ya kai kuli u y’o lapela ku Jehova u li u nosi?— Mwendi wa kona ku ambola ni Jehova u nosi busihu u si ka lobala kale. Jesu n’a ize: “Ha u lapela, kena mwa muzuzu, mi ha u kwalile sikwalo, u lapele Ndat’aho.” (Mateu 6:6) Kana wa lapelanga ku Jehova busihu ni busihu u si ka lobala kale?— Wa lukela ku eza cwalo.

Jesu hape n’a lapelanga batu ba bañwi ha ne ba li ni yena. Lazaro, mulikan’a hae ha n’a shwile, Jesu n’a  lapezi ni ba bañwi kwa sibaka k’o Lazaro n’a bulukilwe. (Joani 11:41, 42) Mi Jesu hape n’a lapelanga ha n’a banga ni mikopano ni balutiwa ba hae. Kana wa yanga kwa mikopano k’o litapelo li fiwanga?— Teñi k’o, ya hulile hañata ki yena ya lapelanga. U teeleze ka tokomelo ku z’a bulela, kakuli u bulela ku Mulimu ze ama wena. Kihona u ka kona ku bulela kuli “Amen” kwa tapelo yeo. Kana wa ziba se ku talusa ku bulela kuli “Amen” kwa mafelelezo a tapelo?— Ku talusa kuli wa tabela tapelo yeo. Ku talusa kuli wa lumelelana ni yona ni kuli u bata kuli i be tapelo ya hao ni wena.

Jesu hape n’a lapelanga ka nako ya lico. N’a itumelanga ku Jehova ka za sico sa hae. Kana wa lapelanga kamita pili u si ka ca lico za hao?— Ku itumela ku Jehova ka za sico lu si ka ca kale ki ko kunde. Mwendi yo muñwi a kana a lapela ha mu ca hamoho. Kono ku cwañi haiba u ca u nosi? Kamba ku cwañi haiba u ca ni batu ba ba sa itumeli ku Jehova?— Fohe u na ni ku itapelela ili wena.

Kana kamita u na ni ku lapela ka ku tumusa kwa linzwi? Kamba kana Jehova wa kona ku ku utwa ha u lapela mwa pilu ya hao?— Lwa kona ku fumana kalabo ku ze n’e ezahezi ku Nehemia. N’a li mulapeli wa Jehova, ya n’a sebezanga mwa lapa la Mulena Aritazerisi wa Muperesia. Zazi le liñwi, Nehemia n’a swabile hahulu kakuli  n’a utwile kuli mamota a Jerusalema, ona muleneñi o mutuna wa batu bahabo yena, n’a wile.

Mulena y’o ha n’a buzize Nehemia libaka ha n’a swabile cwalo, Nehemia pili a lapela mwa pilu ya hae. Nehemia kihona cwale a bulelela mulena libaka ha n’a swabile, mi a mu kupa ku mu lumeleza ku ya kwa Jerusalema ni ku y’o yaha sinca mamota ao. Ne ku ezaheziñi?—

Mulimu n’a alabile tapelo ya Nehemia. Mulena n’a ize Nehemia n’a kona ku ya! Mane mulena a fa Nehemia likota ze ñata za ku itusisa kwa ku yaha mamota ao. Kacwalo, Mulimu luli wa kona ku alaba litapelo za luna, niha lu li bulelela mwa pilu.—Nehemia 1:2, 3; 2:4-8.

Cwale nahana ka za se. Kana wa lukela ku  inamisa toho ha u lapela? Kana wa lukela ku kubama ka mañwele? U hupula cwañi?— Fokuñwi, Jesu n’a kubamanga ha n’a lapelanga. Fokuñwi hape n’a yemanga. Mi fokuñwi hape n’a inulelanga toho ya hae kwa lihalimu ha n’a lapelanga, sina ha n’a ezize cwalo ha n’a lapelela Lazaro.

Kacwalo, nto yeo i bonisañi?— I bonisa kuli sa butokwa haki mwa ku yemela kamba mwa ku inela. Fokuñwi, ki ko kunde ku inamisa toho ya hao ni ku itima kwa meto. Mi fokuñwi mwendi u ka bata ku kubama ka mañwele, sina Jesu ha n’a ezize cwalo. Kono, u si libali kuli lwa kona ku lapela ku Mulimu ka nako kaufela musihali kamba busihu, mi u ka lu utwa. Nto ya butokwa ka za tapelo kikuli lwa lumela kuli luli Jehova wa teeleza. Kana wa lumela kuli Jehova wa utwanga litapelo za hao?—

Ki lika mañi ze lu lukela ku bulela mwa litapelo za luna ku Jehova?— Ha ku ni bulelele: Ha u lapelanga, ki lika mañi z’o bulelelanga Mulimu?— Jehova u lu fanga lika ze nde ze ñata-ñata, mi ku lukile ku itumela ku yena ka zona, nji cwañi?— Lwa kona ku itumela ku yena ka za lico ze lu ca. Kono kana u kile wa itumela ku yena ka za mahalimu, likota ze nde, ni lipalisa ze buheha?— Ni zona zeo ki yena y’a li ezize.

Muta o muñwi, balutiwa ba Jesu ne ba mu kupile kuli a ba lute mwa lu lapelela. Kacwalo, Muluti yo Mutuna a ba luta, mi n’a ba bonisize lika za butokwa za ku lapelela. Kana lika zeo wa li  ziba?— Ha ku nge Bibele ya hao mi u apule kwa Mateu kauhanyo 6. Mwa litimana 9 ku isa 13, lu fumana tapelo yeo batu ba bañata ba i biza kuli ki Tapelo ya Mulena. Ha lu i bale hamoho.

Teñi, lu ituta kuli Jesu n’a lu bulelezi kuli lu lapelange ka za libizo la Mulimu. N’a ize lu lapele kuli libizo la Mulimu li be le li kenile. Libizo la Mulimu ki lifi?— Ki Jehova, mi lu lukela ku lata libizo leo.

Sa bubeli, Jesu n’a lu lutile ku lapelela Mubuso wa Mulimu kuli u tahe. Mubuso w’o ki wa butokwa kakuli u ka tahisa kozo fa lifasi ni ku li fetula ku ba paradaisi.

Sa bulalu, Muluti yo Mutuna n’a ize lu lapelele tato ya Mulimu kuli i eziwe fa lifasi mo i ezezwa kwa lihalimu. Ha lu lapelela nto yeo, fohe lu lukela ku eza z’a bata Mulimu kuli lu eze.

Ku tuha f’o, Jesu n’a lu lutile ku lapelela lico ze lu tokwa ka zazi. Hape n’a ize lu lukela ku bulelela Mulimu kuli lu swabile ha lu ezize lika ze ñwi ze fosahezi. Mi lu lukela ku kupa Mulimu kuli a lu swalele. Kono pili yena a si ka lu swalela, lu lukela ku swalela ba bañwi ha ba lu foseza. Kana ku bunolo ku wena ku eza cwalo?—

Sa mafelelezo, Jesu n’a ize lu lukela ku lapela kuli Jehova Mulimu a lu sileleze ku ya maswe, yena Satani Diabulosi. Kacwalo, zeo kaufela ki lika ze nde ze lu lukela ku lapela ku Mulimu ka za zona.

Lu lukela ku lumela kuli Jehova wa utwa litapelo za luna. Kwand’a ku mu kupa kuli a lu tuse, lu lukela ku zwelapili ku itumela ku yena. Wa tabelanga ha lu eza ze lu bulela mwa tapelo ni ha lu mu kupa lika ze swanela. Mi u ka lu fa zona lika zeo. Kana wa lumela cwalo?—

Likelezo ze ñwi ze nde ka za tapelo li kwa Maroma 12:12; 1 Pitrosi 3:12; ni 1 Joani 5:14.

[Maswaniso a fa likepe 67]

Jesu n’a lapezi ha n’a li a nosi . . . ni ha n’a li ni ba bañwi

[Siswaniso se si fa likepe 68]

Ki kabakalañi ha u lukela ku teeleza ka tokomelo kwa litapelo ze fiwa kwa mikopano?

[Maswaniso a fa likepe 69]

Ki ka linako mañi f’o u kona ku lapelela mwa pilu, sina Nehemia ha n’a ezize cwalo?

[Siswaniso se si fa likepe 70]

Ki lika mañi z’o kona ku bulelela Mulimu mwa tapelo?