Kauhanyo 36

Ki Bomañi Ba Ba Ka Zuswa Kwa Bafu? Ba Ka Pila Kai?

MWA likauhanyo ze peli ze felile, ki batu ba bakai be lu itutile ili be ne ba zusizwe kwa bafu?— Ki ba 5. Banana ku bona n’e li ba bakai?— N’e li ba balalu. Mi wa bune n’a li mutangana. Ka m’o bonela wena, nto yeo i bonisañi?—

I bonisa kuli Mulimu wa lata banana ba banyinyani ni ba ba hulile hanyinyani. Kono hape u ka zusa ba bañata ba bañwi. Kana Mulimu u ka zusa fela batu be ne ba ezize ze nde?— Lu kana lwa li ku cwalo. Kono batu ba bañata ne ba si ka ituta niti ka za Jehova Mulimu ni Mwan’a hae. Kacwalo, ne ba ezize ze maswe kakuli ne ba lutilwe lika ze fosahezi. Kana u bona kuli Jehova u ka zusa batu ba ba cwalo?—

Bibele i li: “Ku zuha kwa bafu ku ka ba teñi, kwa ba ba lukile ni  ba ba si ka luka.” (Likezo 24:15) Ki kabakalañi ba ba si ka luka, kamba be ne ba si ka eza ze lukile, ha ba ka zuswa?— Libaka kikuli ne ba si na nako ya ku ituta ka za Jehova ni ka z’a bata kuli batu ba eze.

Ka m’o bonela wena, bafu ba ka zuswa lili?— Ha ku nahane ka za nako ya n’a shwile Lazaro, ili f’o Jesu n’a sepisize Mareta kaizel’a hae, kuli: “Kaizel’a hao u ka zuha.” Mareta n’a ize: “Ni ziba kuli u ka zuha ka nako ya zuho, ka la mafelelezo.” (Joani 11:23, 24) Mareta n’a talusañi ha n’a ize Lazaro n’a ka zuha “ka la mafelelezo”?—

Mareta n’a utwile Jesu ha n’a sepisize kuli: ‘Ba ba li mwa mabita kaufela ba ka zwa mwateñi.’ (Joani 5:28, 29) Kacwalo, ‘lizazi la mafelelezo’ leo ki lizazi f’o batu kaufela ba ba hupulwa ki Mulimu ba ka zuswa kwa bafu. Lizazi la mafelelezo leo haki lizazi la lihora ze 24. Ikaba lizazi la lilimo ze 1,000. Ku lona lizazi leo, Bibele i li, ‘Mulimu u ka atula batu ba fa lifasi.’ Ku b’a ka atula ku ka kopanyelezwa ba ba zusizwe kwa bafu.—Likezo 17:31; 2 Pitrosi 3:8.

Nahana fela mo ku ka tabiseza fa lizazi leo! Fa lizazi leo la lilimo ze 1,000, batu ba bañata-ñata be se ba shwile ba ka zuswa. Jesu n’a ize sibaka mo ba ka zusezwa si bizwa kuli Paradaisi. Ha lu bone ko i ka bela Paradaisi yeo ni mo ku ka bela ku pila mwateñi.

Ha se ku siyezi lihora ze talu pili Jesu a si ka shwa fa kota ya linyando, u bulela za Paradaisi ku munna y’a li fa kota ya linyando  bukaufi ni yena. Munna y’o u bulaelwa milatu y’a ezize. Kono sona sikebenga seo ha si nze si talimela Jesu ni ku utwa ze swelwi ku bulelwa ka za Hae, sa lumela ku Jesu. Kacwalo, sikebenga seo si kupa kuli: ‘U ni hupule ha u ka kena mwa mubuso wa hao.’ Jesu wa alaba, u li: ‘Kaniti luli na ku bulelela kacenu, ni li, u ka ba ni na mwa Paradaisi.’—Luka 23:42, 43.

Jesu u talusañi ha bulela cwalo? Paradaisi i kai?— Nahana ka za teñi. Paradaisi ne i inzi kai pili?— U si libali kuli Mulimu n’a file munna wa pili, yena Adama, ni musal’a hae paradaisi ya ku pila teñi ona fa lifasi fa. Ne i bizwa kuli simu ya Edeni. Ne ku na ni lifolofolo mwa simu yeo, kono ne ku si na ye ne li holofaza. Mi ne ku na ni likota ze n’e beyanga miselo ye miñata ye munati. Hape ne ku na ni nuka ye tuna. N’e li sibaka se sinde luli sa ku pila teñi!—Genese 2:8-10.

Kacwalo, ha lu bala za kuli sikebenga seo si ka ba mwa Paradaisi, lu lukela ku hupula za kuli lifasi le li ka fetulwa ku ba sibaka se sinde sa ku pila teñi. Kana Jesu u ka ba ona fa lifasi fa ni sona sikebenga seo mwa Paradaisi?— Kutokwa. Kana wa ziba libaka h’a si ke a ba fa lifasi fa?—

Libaka kikuli Jesu u ka busa kwa lihalimu a li Mulena wa lifasi le li li Paradaisi. Kacwalo, Jesu u ka ba ni munna y’o ka ku talusa kuli Jesu u ka mu zusa kwa bafu ni ku mu babalela. Kono Jesu u  ka tuhelelañi sikebenga seo ku pila mwa Paradaisi?— Ha lu bone nji lwa kona ku fumana libaka.

Sikebenga seo si si ka ambola kale ni Jesu, kana ne si ziba ka za milelo ya Mulimu?— Kutokwa. Ne si ezize lika ze maswe kakuli ne si sa zibi niti ka za Mulimu. Mwa Paradaisi, si ka lutiwa ka za milelo ya Mulimu. Kihona si ka ba ni tohonolo ya ku bonisa kuli luli sa lata Mulimu ka ku eza tato ya Hae.

Kana mañi ni mañi ya zusizwe u ka pila mwa Paradaisi fa lifasi?— Kutokwa. Kana wa ziba libaka?— Libaka kikuli ba bañwi ba ka zuswa kuli ba y’o pila ni Jesu kwa lihalimu. Ba ka ba malena hamoho ni yena mi ba ka busa lifasi le li li Paradaisi. Ha lu bone mo lu zibela kuli ku cwalo.

Busihu pili Jesu a si ka shwa, u bulelela baapositola ba hae kuli: ‘Mwa ndu ya Ndate kwa lihalimu, ku na ni miyaho ye miñata ya ku pila teñi, mi na ikela kuli ni y’o mi lukiseza sibaka.’ Cwale Jesu u sepisa  kuli: “Ni ka kuta, ni t’o mi nga, kuli mo ni inzi, ni mina mu be kwateñi.”—Joani 14:2, 3.

Jesu u ya kai ha zuswa kwa bafu?— U ya kwa lihalimu kuli a y’o ba ni Ndat’ahe. (Joani 17:4, 5) Kacwalo, Jesu u sepisa baapositola ni balateleli ba hae ba bañwi kuli u ka ba zusa ilikuli ba kone ku ba ni yena kwa lihalimu. Ba ka ezañi k’o ni Jesu?— Bibele i bulela kuli balutiwa ba hae ba ba na ni siemba mwa “zuho ya pili” ba ka pila kwa lihalimu ni ku “busa ni yena myaha ye 1,000.”—Sinulo 5:10; 20:6; 2 Timotea 2:12.

Ki ba bakai ba ba ka ba ni siemba mwa “zuho ya pili” ni ku ba malena hamoho ni Jesu?— Jesu n’a bulelezi balutiwa ba hae kuli: ‘Wena mutapinyana, u si ke wa saba, kakuli Ndat’a mina u katezwi ku mi fa mubuso.’ (Luka 12:32) Ona “mutapinyana” w’o, o ka zuswa kuli u y’o ba mwa Mubuso wa Jesu wa kwa lihalimu, u ka ba wa batu ba palo ye tomilwe cimo. Bibele i bonisa kuli “ba ba eza 144,000” ku ba ba mwa lifasi ba ka zuswa.—Sinulo 14:1, 3.

Ki ba bakai ba ba ka pila mwa Paradaisi fa lifasi?— Bibele ha i talusi. Kono Mulimu n’a bulelezi bo Adama ni Eva ha ne ba sa li mwa simu ya Edeni kuli ba be ni bana mi ba taze lifasi. Kaniti, ne ba palezwi ku eza cwalo. Kono Mulimu u ka bona teñi kuli mulelo wa hae wa kuli lifasi li tale batu ba bande wa petahala.—Genese 1:28; Isaya 45:18; 55:11.

Nahana fela mo ku ka tabiseza ku pila mwa Paradaisi! Lifasi kaufela li ka ba sina simu. Li ka tala linyunywani ni lifolofolo mi li ka kabiswa ki likota ni lipalisa za mifuta kaufela. Ha ku na ya ka utwa butuku kabakala ku kula, mi ha ku na ya ka shwa. Batu kaufela ba ka ba balikani. Haiba lu bata ku pila ku ya ku ile mwa Paradaisi, lu lukela ku kala ku itukiseza cwale.

Ha ku bale ze ñwi ka za z’a lela ku eza Mulimu ka za lifasi, kwa Liproverbia 2:21, 22; Muekelesia 1:4; Isaya 2:4; 11:6-9; 35:5, 6; ni 65:21-24.

[Siswaniso se si fa likepe 187]

Ki kabakalañi Mulimu h’a ka zusa batu ba bañwi be ne ba si ka eza ze lukile?

[Siswaniso se si fa likepe 188]

Paradaisi yeo Jesu a bulelela munna y’o i kai?

[Siswaniso se si fa likepe 189]

Ha lu bala ka za Paradaisi, lu lukela ku nahana zañi?

[Maswaniso a fa likepe 190]

Ba ba zusizwe kwa bafu ba ka pila kai, mi ba ka ezañi?