Kauhanyo 8

Ku Na Ni Ba Bañwi Ba Ba M’ata Ku Lu Fita

NA SEPA wa lumela kuli ku na ni ba bañwi ba ba m’ata, kamba ba bahulu, ba ba tiile, ku fita wena ni na. Ki mañi y’o kona ku bulela kuli u m’ata ku lu fita?— Ki Jehova Mulimu. Ku cwañi ka za Mwan’a hae, yena Muluti yo Mutuna? Kana ki ya m’ata ku lu fita?— Ee.

Jesu n’a pilile kwa lihalimu ni Mulimu. N’a li Mwana wa moya, kamba lingeloi. Kana Mulimu n’a ezize mangeloi a mañwi, kamba bana ba moya?— Ee, n’a ezize bolule-lule ba ona. Mangeloi ao ni ona ki a m’ata, a tiile hahulu ku lu fita.—Samu 104:4; Daniele 7:10.

Kana wa hupula libizo la lingeloi le ne li bulezi ni Maria?— Ki Gabriele. Ne li bulelezi Maria kuli mwan’a hae n’a ka ba Mwan’a Mulimu. Mulimu n’a beile bupilo bwa Mwan’a hae wa moya mwa mba ya Maria ilikuli Jesu a pepiwe sina mbututu fa lifasi.—Luka 1:26, 27.

Kana wa lumela makazo yeo? Kana wa lumela kuli Jesu n’a pilile ni Mulimu kwa lihalimu?— Jesu n’a ize n’a pilile teñi. Jesu n’a zibile cwañi ka za lika zeo? Ha n’a sa li mushimani, mwendi Maria n’a mu bulelezi za n’a bulezi Gabriele. Hape, mwendi Josefa n’a bulelezi Jesu kuli Ndat’ahe luli ki Mulimu.

Jesu ha n’a kolobelizwe, Mulimu mane n’a bulezi ku zwelela kwa lihalimu, kuli: “Yo ki  mwan’a ka.” (Mateu 3:17) Mi busihu pili a si ka shwa, Jesu n’a lapezi kuli: “Cwale, Wena Ndate, u ni lumbe fapil’a hao ka kanya ye ne ni na ni yona ku Wena, lifasi li si ka ezwa kale.” (Joani 17:5) F’o, Jesu n’a kupile kuli a kutisezwe kwa lihalimu ku y’o pila hape ni Mulimu. N’a kona ku pila cwañi kwateñi?— N’a kona fela ku pila teñi Jehova Mulimu ha n’a ka mu eza mutu wa moya, kamba lingeloi.

Cwale ni bata ku ku buza puzo ya butokwa. Kana mangeloi kaufela ki a mande? U hupula cwañi?— Nako ye ñwi kale-kale k’o, kaufel’a ona n’a li a mande. Libaka kikuli Jehova n’a a bupile, mi z’a eza kaufela ki ze nde. Kono cwale le liñwi la mangeloi ao la fetuha le li maswe. Ne ku tile cwañi cwalo?

Kuli lu fumane kalabo, lu lukela ku kuta kwa nako yeo Mulimu n’a ezize munna ni musali ba pili, bona bo Adama ni Eva. Batu ba bañwi ba li likande la za bona ki likande-kande fela. Kono Muluti yo Mutuna n’a ziba kuli ki la niti.

Mulimu ha n’a ezize bo Adama ni Eva, n’a ba beile mwa simu ye nde mwa sibaka se si bizwa Edeni. Yeo ne i li simu ye nde, ne i li paradaisi. Ne ba ka be ba bile ni bana ba bañata, lubasi lo lutuna, ni ku pila ku ya ku ile mwa Paradaisi. Kono ku na ni tuto ya butokwa ye ne ba tokwa ku ituta. Se lu ambozi kale za tuto yeo. Ha lu bone nji lu sa hupula.

 Jehova n’a bulelezi bo Adama ni Eva kuli ne ba kona ku ca miselo kaufela ya kwa likota ze ne ba tabela mwa simu. Kono ne ku na ni kota i liñwi ye ne ba sa swaneli ku ca kwateñi. Mulimu n’a ba bulelezi ze n’e ka ezahala ha ne ba ka ca kwateñi. N’a ize: “U ka shwa luli.” (Genese 2:17) Kacwalo, ki ifi tuto yeo bo Adama ni Eva ne ba tokwa ku ituta yona?—

N’e li tuto ya ku utwa. Bupilo bu itingile fa ku utwa Jehova Mulimu! Ne ku si ka likana kuli bo Adama ni Eva ba bulele fela kuli ne ba ka mu utwa. Ne ba na ni ku bonisa kuli ba mu utwa ka lika ze ne ba eza. Kambe ne ba bile ba ba utwa Mulimu, ne ba ka bonisa kuli ba mu lata, mi ne ba ka bata kuli a be Mubusi wa bona. Kihona ha ne ba ka kona ku pila ku ya ku ile mwa Paradaisi. Kono ha ne ba ka ca kwa kota yeo, ne ku ka bonisañi?—

Ne ku ka be ku bonisize kuli luli ne ba sa itebuhi lika za n’a ba file Mulimu. Kana n’o ka be u utwile Jehova kambe n’o li teñi mwa simu yeo?— Kwa makalelo, bo Adama ni Eva ne ba ezize cwalo. Kono cwale yo muñwi ya m’ata ku ba fita a t’o kwasheka Eva. A tahisa kuli Eva a tuhele ku utwa Jehova. N’e li mañi yena y’o?—

 Bibele i bulela kuli noha ne i bulezi ni Eva. Kono wa ziba kuli noha ha i koni ku bulela ka i li yona. Kacwalo, ne i kona cwañi ku bulela?— Lingeloi le liñwi ne li tahisize kuli ku bonahale inge kuli noha yeo ne i bulela. Kono ya n’a bulela luli n’e li lona lingeloi leo. Lingeloi leo ne li kalile ku ba ni mihupulo ye maswe. Ne li bata kuli bo Adama ni Eva ba li lapele. Ne li bata kuli ba ezange lika ze ne li bulela. Ne li bata ku yola sibaka sa Mulimu.

Kacwalo, lingeloi le li maswe leo la suña mihupulo ye maswe ku Eva. Ka ku itusisa noha, la li ku yena: ‘Mulimu n’a si ka mi bulelela niti. Ha mu na ku shwa ha mu ka ca kwa kota ye. Mu ka ba ba ba butali sina Mulimu.’ Kana wena n’o ka lumela ze ne li bulezi lingeloi leo?—

Eva a kalisa ku lakaza nto ye ñwi yeo Mulimu n’a si ka mu fa. A ca kwa muselo wa kota ye n’e hanisizwe. Mi kihona a fa Adama kwateñi. Adama n’a si ka lumela ze ne i bulezi noha. Kono takazo ya hae ya ku ba ni Eva n’e li ye tiile hahulu ku fita lilato la hae la ku lata Mulimu. Kacwalo, ni yena a ca kwa kota yeo.—Genese 3:1-6; 1 Timotea 2:14.

Ne ku zwileñi mwateñi?— Bo Adama ni Eva ba ba ba ba si ka petahala, ba supala, mi ba shwa. Mi bakeñisa kuli ne ba si ka petahala, bana ba  bona kaufela ni bona ne ba si ka petahala, mi nako ha ne i nze i ya, ni bona ba supala mi ba shwa. Mulimu n’a si ka puma! Bupilo bu itingile fa ku mu utwa. (Maroma 5:12) Bibele i lu bulelela kuli libizo la lingeloi le ne li pumile Eva ki Satani Diabulosi, mi mangeloi a mañwi a n’a fetuhile a’ maswe a bizwa badimona.—Jakobo 2:19; Sinulo 12:9.

Kana cwale wa utwisisa mo ne ku tezi kuli lingeloi le linde la n’a ezize Mulimu li fetuhe le li maswe?— N’e li ka libaka la kuli ne li kalisize ku nahana lika ze maswe. Ne li bata ku ba mwa sibaka sa pili. Ne li ziba kuli Mulimu n’a bulelezi bo Adama ni Eva ku ba ni bana, mi ne li bata kuli kaufel’a bona ba li lapele. Diabulosi u bata ku tahisa kuli batu kaufela ba tuhele ku utwa Jehova. Kacwalo, u lika ku suña mihupulo ye maswe mwa minahano ya luna.—Jakobo 1:13-15.

Diabulosi u bulela kuli ha ku na mutu ya lata Jehova ha buniti. U bulela kuli wena ni na ha lu lati Mulimu ni kuli ha lu lati luli ku eza z’a lu bulelela Mulimu. U bulela kuli lu utwanga fela Jehova lika kaufela ha li lu bela mo lu li batela. Kana Diabulosi f’o u bulela niti? Kana ki mo lu inezi cwalo?

Muluti yo Mutuna n’a ize Diabulosi ki lihata! Jesu n’a bonisize kuli luli n’a lata Jehova ka ku Mu utwa. Mi Jesu n’a sa utwangi fela Mulimu ha ne ku li bunolo ku eza cwalo. N’a ezanga cwalo nako kaufela, mane ni ka linako zeo batu ne ba mu tatafalezanga lika. N’a bile ya sepahala ku Jehova ku isa lifu. Ki kabakaleo Mulimu ha n’a mu zusize kwa bafu kuli a pile ku ya ku ile.

Kacwalo, ki ufi y’o bona kuli ki yena sila sa luna se situna ka ku fitisisa?— Ki Satani Diabulosi. Kana wa kona ku mu bona?— Kutokwa! Kono lwa ziba kuli u teñi ni kuli ki ya m’ata ili ya tiile ku lu fita. Kono ki mañi ya m’ata ku fita Diabulosi?— Ki Jehova Mulimu. Kacwalo, lwa ziba kuli Mulimu wa kona ku lu sileleza.

U bale ka za Yena ye lu lukela ku lapela: Deuteronoma 30:19, 20; Joshua 24:14, 15; Liproverbia 27:11; ni Mateu 4:10.

[Siswaniso se si fa likepe 47]

Ki lifi zeo mwendi bo Maria ni Josefa ne ba bulelezi Jesu?

[Siswaniso se si fa likepe 48, 49]

Bo Adama ni Eva ne ba ka kona cwañi ku pila ku ya ku ile mwa Paradaisi?

[Siswaniso se si fa likepe 50]

Ki mañi ya n’a tahisize kuli noha i bulele ni Eva?

[Maswaniso a fa likepe 50]

Ne ku ezaheziñi ku bo Adama ni Eva ha se ba tuhezi ku utwa Mulimu?