Kauhanyo 31

Kwa Ku Fumana Ku Omba-Ombiwa

KANA fokuñwi wa ikutwanga ku swaba kamba buinosi?— Kana fokuñwi wa ikutwanga kuli mwendi ha ku na ya ku lata?— Banana ba bañwi ba ikutwanga cwalo. Kono Mulimu u sepisa kuli: ‘Na, ha ni na ku ku libala.’ (Isaya 49:15) Kana nto yeo haki ye nde ku i nahana?— Ee, Jehova Mulimu wa lu lata luli!

Muñoli yo muñwi wa Bibele n’a ize: ‘Ndate ni me, niha ba ka ni tuhela, Mulimu u ka ni nopa.’ (Samu 27:10) Ku ziba taba yeo kwa kona ku lu omba-omba luli, nji cwañi?— Jehova u lu bulelela kuli: ‘Si sabi kakuli ni na ni wena. Ni ka ku tusa.’—Isaya 41:10.

Kono fokuñwi, Jehova u tuhelelanga Satani ku lu kataza. Jehova mane u tuhelelanga Satani ku lika batanga ba Hae. Muta o muñwi, Diabulosi n’a tahiselize Jesu manyando a mañata kuli mane Jesu a lila ku Jehova kuli: ‘Mulimu wa ka, Mulimu wa ka, u ni tuheleziñi?’ (Mateu 27:46) Jesu niha n’a nyanda cwalo, n’a ziba kuli Jehova n’a sa mu lata. (Joani 10:17) Kono Jesu hape n’a ziba kuli Mulimu u tuhelela Satani ku lika batanga ba Hae ni ku ba nyandisa. Mwa kauhanyo ye ñwi, lu ka talusa libaka Mulimu h’a tuhelela Satani ku eza cwalo.

Ha lu li banana, ku banga t’ata fokuñwi ku sa ba ni boi. Ka mutala, kana u kile wa lateha muta o muñwi?— Kana n’o sabile?— Banana ba bañata ne ba ka saba. Muluti yo Mutuna n’a kile a kandeka likande la za ku lateha. Kono n’e si mwanana ya n’a latehile. N’e li ngu.

Ka linzila ze ñwi, u swana ni ngu yeo. Ka mukwa ufi? Kakuli lingu  haki ze tuna kamba ze tiile hahulu. Mi li tokwa ku babalelwa ni ku silelezwa ki mutu. Mutu ya babalela lingu u bizwa kuli mulisana.

Mwa likande la hae, Jesu n’a bulezi za mulisana ya n’a na ni lingu ze 100. Kono cwale ye ñwi ya lingu zeo ya lateha. Mwendi ne i bata ku y’o bona se si kwa buse bwa kalundu. Kono cwale ngu yeo ya t’o ba kwahule hahulu ni ze ñwi. Kana wa kona ku nahana mo ne i ikutwezi ngu yeo ha ne i talimezi kafa ni kafa ni ku bona kuli ne i inzi fela i nosi?—

Ki sifi sa n’a ezize mulisana ha n’a lemuhile kuli ye ñwi ya lingu za hae ne i tondahala? Kana n’a ize w’o n’e li mulatu wa ngu yeo mi kacwalo n’a si ke a bilaela ka za yona? Kamba kana n’a ka siya lingu ze 99 mwa sibaka se si iketile ni ku ya ku y’o bata yona ngu i liñwi fela yeo? Kana ngu i liñwi ne i swanelwa ku ezezwa buikatazo b’o kaufela?— Kambe n’e li wena ngu ye latehile yeo, kana n’o ka bata kuli mulisana a ku bata-bate?—

Mulisana y’o n’a lata hahulu lingu za hae kaufela, niheba yona yeo ye n’e latehile. Kacwalo, a ya ku y’o bata ye n’e tondahala. Nahana fela mo ne i tabezi ngu yeo ha ne i boni  mulisana inz’a taha! Mi Jesu n’a ize mulisana y’o n’a tabile kuli n’a fumani ngu ya hae. N’a tabile hahulu bakeñisa yona ku fita lingu ze ñwi ze 99 ze n’e si ka lateha. Cwale, ki mañi ya swana ni yena mulisana y’o wa mwa likande la Jesu? Ki mañi ya lu babalela sina mulisana y’o mwa n’a babalezi lingu za hae?— Jesu n’a ize Ndat’ahe wa kwa lihalimu wa lu babalela. Mi Ndat’ahe ki Jehova.

Jehova Mulimu ki yena Mulisana yo Mutuna wa batu ba hae. U lata kaufela ba ba mu sebeleza, ku kopanyeleza cwalo ni banana sina wena. H’a lati kuli ufi kamba ufi wa luna a holofale kamba ku shwa. Kaniti kwa tabisa ku ziba kuli Mulimu wa lu tokomela hahulu cwalo!—Mateu 18:12-14.

Kana luli wa lumela ku Jehova Mulimu?— Kana ki mutu wa luli ku wena?— Ki niti kuli ha lu koni ku bona Jehova. Libaka kikuli u na ni mubili o lu sa koni ku bona ka meto a luna. Kono ki mutu wa luli, mi yena wa kona ku lu bona. Wa ziba ha lu tokwa tuso. Mi lwa kona ku ambola ni yena ka tapelo, sina ha lu  ambolanga ni mutu yo muñwi fa lifasi. Jehova u bata kuli lu eze cwalo.

Kacwalo, muta u ikutwa ku swaba kamba buinosi, u lukela ku ezañi?— U ambole ni Jehova. U sutelele ku yena, mi u ka ku omba-omba ni ku ku tusa. U si libali kuli Jehova wa ku lata, mane niha u ikutwa kuli u inzi fela u nosi. Ha lu nge Bibele. Kwa Samu 23, ku kala ka timana ya pili, lu bulelelwa kuli: “[Muñ’a] Bupilo ki mulisana wa ka; ha ni na ku tokwa se siñwi. U ni pumuliseza mwa mafulisezo a matala; u ni zamaisa fakaufi ni mezi a kuzize.”

Bona s’a ekeza ku bulela muñoli y’o mwa timana 4, kuli: “E, niha ni ka zamaya mwa musindi wa muluti wa lifu, ha ni na ku saba bumaswe niheba bu li buñwi; kakuli Wena u inzi ni na; mulamu wa hao, ni lusata lwa hao, ki zona ze ni wisa pilu.” Ki mona mo ba ikutwela batu cwalo haiba Mulimu wa bona ki Jehova. Ba omba-ombiwa ha ba li mwa butata. Kana ki mona m’o ikutwela cwalo?—

Sina mulisana ya lilato h’a babalela mutapi wa hae, Jehova ni yena u babalela hande cwalo batu ba hae. U ba bonisa nzila ye lukile ya ku zamaya ka yona, mi ba mu latelela ka tabo. Mane niha ba li mwa butata, ha ba tokwi ku saba. Mulisana u itusisa lusata kamba  mulamu wa hae kuli a sileleze lingu za hae kwa lifolofolo ze kona ku li holofaza. Bibele i kandeka za m’o Davida, mulisana wa mutangana, n’a silelelize lingu za hae kwa tau ni bere. (1 Samuele 17:34-36) Mi batu ba Mulimu ba ziba kuli Jehova u ka ba sileleza ni bona. Ba kona ku ikutwa ku iketa kakuli Mulimu wa ba yemela.

Jehova kaniti wa lata lingu za hae, mi wa li tokomela ka lilato. Bibele i li: ‘U ka lisa lingu za hae sina mulisana. U ka kubukanya lingunyana mwa mazoho a hae.’—Isaya 40:11.

Kana wa ikutwa hande ku ziba kuli Jehova ki ya cwalo?— Kana wa bata ku ba yo muñwi wa lingu za hae?— Lingu za teelezanga kwa linzwi la mulisan’a zona. Za sutelelanga ku yena. Kana wa utwanga Jehova?— Kana wa sutelelanga ku yena?— Kanti he ha u tokwi ku saba. Jehova u ka ba ni wena.

Jehova ka lilato u babalela ba ba mu sebeleza. Ha lu bale hamoho se i bulela Bibele ka za seo kwa Samu 37:25; 55:22; ni Luka 12:29-31.

[Siswaniso se si fa likepe 163]

Ka m’o bonela wena, ngu ye latehile ye i ikutwa cwañi?

[Siswaniso se si fa likepe 164]

Ki mañi ya swana ni mulisana y’o ya n’a yangwezi ngu ya hae?

[Siswaniso se si fa likepe 165]

Kana Jehova ki wa luli ku wena sina bondat’aho kamba batu ba bañwi ha ba li ba luli ku wena?

[Siswaniso se si fa likepe 166]

Sina mulisana ya sileleza lingu za hae, ki mañi ya kona ku lu tusa ha lu li mwa butata?