Kauhanyo 1

Libaka Jesu Ha N’a Li Muluti Yo Mutuna

LILIMO ze fitelela 2,000 kwamulaho k’o, ne ku pepilwe mwana ya ipitezi ya n’a hulile ku t’o ba mutu yo mutuna ka ku fitisisa fa lifasi. Ha ku na niheba yo mukana ya n’a pila mwa nako yeo ya n’a na ni lifulai kamba limota. Ne ku si na lika ze cwale ka wailesi kamba TV.

Mwana y’o n’a beilwe libizo la Jesu. N’a til’o ba munna ya butali ka ku fitisisa fa lifasi. Jesu hape n’a bile muluti ya ziba hahulu ku luta. N’a talusanga ka bunolo litaba ze t’ata ilikuli batu ba kone ku li utwisisa hande.

Jesu n’a lutanga batu kwa n’a ba fumana kaufela. N’a ba lutanga a li fa likamba ni mwa mikolo. N’a ba lutanga mwa mandu ni ha n’a li mwa musipili. Jesu n’a si na mota, mi n’a sa zamayangi ka mbasi kamba sitima. Jesu n’a zamayanga ku zwa mwa sibaka se siñwi ku ya ku se siñwi, inz’a luta batu.

Lu ituta lika ze ñata kwa batu ba bañwi. Kono lwa kona ku ituta lika za butokwa ka ku fitisisa ku Jesu, yena Muluti yo Mutuna. Za n’a bulezi Jesu li fumaneha mwa Bibele. Ha lu utwa manzwi ao a mwa Bibele, ku swana inge kuli Jesu u bulela ni luna.

Ki kabakalañi Jesu ha n’a li Muluti yo Mutuna cwalo? Libaka le liñwi kikuli yena Jesu ka sibili n’a lutilwe. N’a ziba butokwa bwa ku teeleza. Kono Jesu n’a teelelize ku mañi? Ki mañi ya n’a mu lutile?— Ki Ndat’ahe. Mi Ndat’ahe Jesu ki Mulimu.

Jesu a si ka ba kale mutu wa fa lifasi, n’a pilile kwa lihalimu ni Mulimu. Kacwalo, Jesu n’a sa swani ni batu ba bañwi kakuli ha ku  na mutu yo muñwi ya kile a pila kwa lihalimu a si ka pepwa kale fa lifasi. Kwa lihalimu, Jesu n’a li Mwana yo munde, ya n’a utwa Ndat’ahe. Kacwalo, Jesu n’a kona ku luta batu za n’a itutile ku Mulimu. Wa kona ku likanyisa Jesu ka ku utwa bondat’aho ni bom’aho.

Libaka le liñwi Jesu ha n’a li Muluti yo Mutuna kikuli n’a lata batu. N’a bata ku tusa batu kuli ba itute za Mulimu. Jesu n’a lata ba bahulu, kono hape n’a lata ni banana. Mi banana ne ba tabela ku ba ni Jesu kakuli n’a bulelanga ni bona ni ku ba teeleza.

Zazi le liñwi, bashemi ba bañwi ne ba tisize bana ba bona ba banyinyani ku Jesu. Kono balikani ba Jesu ba hupula kuli Muluti yo Mutuna n’a patehile hahulu mi n’a sa koni ku bulela ni banana ba banyinyani. Kacwalo ba ba leleka. Kono Jesu n’a buleziñi?— Jesu n’a ize: “Mu tuhele bana ba banyinyani ba tahe ku na, mi mu si ke mwa ba hanisa.” Ee, Jesu n’a bata kuli banana ba banyinyani ba tahe ku yena. Kacwalo, nihaike n’a li mutu ya butali ka ku fitisisa ili wa butokwa ka ku fitisisa, Jesu  n’a bile ni nako ya ku luta banana ba banyinyani.—Mareka 10:13, 14.

Kana wa ziba libaka Jesu ha n’a lutile banana ni ku ba teeleza? Libaka le liñwi kikuli n’a bata ku ba tabisa ka ku ba bulelela lika ka za Mulimu, yena Ndat’ahe wa kwa lihalimu. U kona ku tabisa cwañi batu?— Ka ku ba bulelela lika z’o itutile ka za Mulimu.

Nako ye ñwi, Jesu n’a itusisize mwanana yo munyinyani kuli a lute balikani ba Hae tuto ya butokwa. N’a ngile mwanana y’o ni ku mu yemisa fahal’a balutiwa ba Hae. Jesu kihona a bulela kuli banna ba ba hulile bao ba lukela ku cinca mikwa ya bona ni ku ba sina yena mwanana y’o.

Jesu n’a talusizeñi ha n’a bulezi cwalo? Kana wa ziba m’o mutu ya hulile, kamba mane mwanana ya hulile, a kona ku bela sina mwanana yo munyinyani?— Mwanana yo munyinyani h’a zibi ze ñata ku fita mutu yo muhulu mi u tabela ku ituta. Kacwalo, Jesu n’a bulela kuli balutiwa ba hae ba swanela ku ishuwa, sina banana ba banyinyani ha ba ishuwa. Ee, kaufel’a luna lwa kona ku ituta z’e ñata kwa batu ba bañwi. Mi kaufel’a luna lu lukela ku lemuha kuli lituto za Jesu ki za butokwa hahulu ku fita mihupulo ya luna.—Mateu 18:1-5.

Libaka le liñwi Jesu ha n’a li Muluti yo Mutuna cwalo kikuli n’a ziba ku eza lika ku ba ze tabisa kwa batu. N’a talusanga lika ka bunolo ili ka ku utwahala hande. N’a bulelanga za  linyunywani ni lipalisa ni za lika ze ñwi ze zibahala ilikuli a tuse batu ku utwisisa za Mulimu.

Zazi le liñwi Jesu ha n’a li kwa lineku la lilundu, batu ba bañata ba taha ku yena. Jesu a ina fafasi ni ku fa ngambolo, sina ha u kona ku bona fa. Ngambolo yeo i bizwa kuli Ngambolo ya fa Lilundu. N’a ize: ‘Mu talime linyunywani za lihalimu. Ha li cali peu. Ha li buluki lico mwa matuli. Kono Mulimu ya kwa lihalimu wa li uta. Kana mina ha mu ba butokwa ku li fita?’

Jesu hape n’a ize: ‘Mu lemuhe lipalisa za mwa naheñi mo li melela. Li hula li sa sebezi. Mi mu bone bunde bwa zona! Mane ni Mulena Salumoni ya n’a fumile hahulu n’a si ka apala hande sina lipalisa za mwa naheñi. Kacwalo, Mulimu h’a babalela cwalo lipalisa ze mela, kikuli n’a si ke a mi babalela cwalo ni mina?’—Mateu 6:25-33.

Kana wa utwisisa tuto ya n’a luta Jesu f’o?— N’a sa bati kuli lu  bilaelange ka za ko lu ka fumana lico za ku ca kamba liapalo za ku tina. Mulimu wa ziba kuli lika zeo lwa li tokwa. Jesu n’a sa buleli kuli ha lu swaneli ku sebeza kuli lu fumane lico ni liapalo. Kono n’a ize lu lukela ku beya Mulimu kwapili. Ha lu eza cwalo, Mulimu u ka bona teñi kuli lu na ni lico za ku ca ni liapalo za ku tina. Kana wa lumela cwalo?—

Jesu ha n’a felize ku bulela, batu ne ba ikutwile cwañi?— Bibele i bulela kuli ne ba komokile mulutelo wa hae. Ku mu teeleza ne ku  tabisa hahulu. Za n’a bulezi ne li tusize batu ku eza ze lukile.—Mateu 7:28.

Kacwalo, ku butokwa hahulu kuli lu itute ku Jesu. Kana wa ziba mo lu kona ku ezeza cwalo?— Za n’a bulezi li ñozwi mwa buka. Kana yona buka yeo wa i ziba?— Ki Bibele ye Kenile. F’o ku talusa kuli lwa kona ku teeleza ku Jesu ka ku utwa lika ze lu bala mwa Bibele. Mane, mwa Bibele ku na ni likande le li tabisa la m’o yena Mulimu ka sibili n’a lu bulelezi kuli lu teeleze ku Jesu. Ha lu bone se ne si ezahezi.

Zazi le liñwi, Jesu n’a ile ni ba balalu ba balikani ba hae fa lilundu le liñwi le li lumbile. Mabizo a bona ki bo Jakobo, Joani, ni Pitrosi. Lu ka ituta ze ñwi ze ñata ka za banna bao, kakuli kaufel’a bona ne ba li balikani ba batuna ba Jesu. Kono fa lizazi le li ipitezi leo, pata ya Jesu ya kalisa ku benya hahulu. Mi litino za hae za benya sina liseli, sina ha u kona ku iponela f’o.

Ku tuha f’o, Jesu ni balikani ba hae ba utwa linzwi le li zwa kwa lihalimu. Ne li ize: “Yo ki Mwan’a ka ya latwa, ye ni katelwa; mu mu utwe.” (Mateu 17:1-5) Kana ya n’a bulezi cwalo wa mu ziba?— Ki Mulimu! Ee, Mulimu n’e li yena ya n’a bulezi kuli ba utwe Mwan’a hae.

Luna bo kacenu? Kana lu ka utwa Mulimu ni ku teeleza ku Mwan’a hae, yena Muluti yo Mutuna?— Kaufel’a luna lu tokwa ku eza cwalo. Kana wa hupula mo lu kona ku ezeza cwalo?—

Ee, lwa kona ku utwa Mwan’a Mulimu ka ku bala litaba ze mwa Bibele ka za bupilo bwa hae. Ku na ni lika ze nde ze ñata z’a lu bulelela Muluti yo Mutuna. U ka ikola ku ituta lika zeo ze ñozwi mwa Bibele. Mi hape u ka fumana tabo haiba u bulelela balikani ba hao lika ze nde ze u ituta.

Kuli u fumane litaba ze ñwi ze tabisa ka za lika ze nde ze tahiswa ki ku utwa Jesu, apula Bibele ya hao mi u bale Joani 3:16; 8:28-30; ni Likezo 4:12.

[Siswaniso se si fa likepe 11]

Ki kabakalañi banana ha ne ba tabela ku ba ni Jesu?

[Siswaniso se si fa likepe 12]

Banana ba ba hulile ni ba bahulu ba kona ku ituta tuto mañi ku mwanana yo munyinyani?

[Siswaniso se si fa likepe 13]

Jesu n’a luta tuto mañi ha n’a bulezi za linyunywani ni lipalisa?

[Siswaniso se si fa likepe 14]

“Yo ki Mwan’a ka . . . Mu mu utwe”