Kauhanyo 4

Mulimu U Na Ni Libizo

HA U katana mutu lwa pili, ki ifi nto ya pili y’o u buzanga?— U buzanga libizo la hae. Kaufel’a luna lu na ni mabizo. Mulimu n’a file mutu wa pili fa lifasi libizo. N’a mu beile libizo la Adama. Musal’a Adama n’a beilwe libizo la Eva.

Kono haki batu fela ba ba na ni mabizo. Nahana ka za lika ze ñwi ze na ni mabizo. Mutu h’a ku fa sipupe kamba kamota ka ku bapalisa, n’o ka ka beya libizo, nji cwañi?— Ee, ku butokwa ku ba ni libizo.

Ha ku talime kwahalimu busihu mi u bone linaleli ze ñata-ñata. Kana u hupula kuli li na ni mabizo?— Ee, Mulimu n’a beile naleli ni naleli ye kwahalimu libizo. Bibele i lu bulelela kuli: “U bulela palo ya fo li kuma linaleli, u li beya mabizo kaufel’a zona.”—Samu 147:4.

Ku wena, ki mañi mutu wa butokwa ka ku fitisisa mwa pupo kamukana?— Ki Mulimu. Kana u hupula kuli u na ni libizo?— Jesu n’a ize U na ni. Jesu n’a kile a bulela mwa tapelo ku Mulimu kuli: ‘Ni zibisize libizo la hao kwa balateleli ba ka.’ (Joani 17:26) Kana libizo la Mulimu wa li ziba?— Linzwi la Mulimu li lu bulelela libizo la hae. Li li: “Mata a ka, ni [muñ’a] milumbeko ya ka, ki [Muñ’a] Bupilo Jehova.” Kacwalo, libizo la Mulimu ki JEHOVA.—Isaya 12:2.

U ikutwanga cwañi ba bañwi ha ba hupula libizo la hao?— Wa tabelanga, nji cwañi?— Jehova ni yena u bata kuli batu ba zibe libizo la hae. Kacwalo, lu swanela ku itusisa libizo la Jehova ha lu bulela ka za Mulimu. Muluti yo Mutuna ha n’a bulelanga ni batu, n’a itusisanga libizo la Mulimu, lona la Jehova. Nako ye ñwi, Jesu n’a ize: “Lata Jehova Mulimu wa hao ka pilu ya hao kaufela.”—Mareka 12:30, NW.

 Jesu n’a ziba kuli libizo la “Jehova” ki libizo la butokwa hahulu. Kacwalo, n’a lutile balateleli ba hae ku itusisa libizo la Mulimu. Mane n’a ba lutile ku bulela za libizo la Mulimu mwa litapelo za bona. Jesu n’a ziba kuli Mulimu u bata kuli batu kaufela ba zibe libizo la Hae, lona la Jehova.

Kale-kale k’o, Mulimu n’a bonisize butokwa bwa libizo la hae ku Mushe, ya n’a li yo muñwi wa bana ba Isilaele. Bana ba Isilaele, be ne ba bizwa Maisilaele, ne ba pila mwa naha ye bizwa Egepita. Batu ba mwa naha yeo ne ba bizwa kuli Maegepita. Ne ba ezize Maisilaele batanga mi ne ba ba nyandisanga hahulu. Mushe ha n’a hulile, n’a likile ku tusa yo muñwi wa batu bahabo yena. Seo ne si filikanyize Faro, yena Mulena wa Egepita. N’a bata ku bulaya Mushe! Kacwalo, Mushe a baleha ku zwa mwa Egepita.

Mushe n’a ile kwa naha i sili. Ne li naha ya Midiani. Teñi, Mushe a nyala mi  a kalisa ku uta lubasi. Hape n’a li mulisana. Zazi le liñwi, Mushe n’a patehile ku lisa lingu bukaufi ni lilundu, mi a bona nto ye komokisa. Sicacani ne si tuka mulilo, kono ne si sa ci! Mushe kih’a sutelela hwateñi kuli a iponele hande.

Kana wa ziba se ne si ezahezi?— Mushe a utwa linzwi fahal’a sicacani seo se ne si tuka mulilo. Linzwi leo la li: “Mushe! Mushe!” Ya n’a bulela cwalo n’e li mañi?— N’e li Mulimu! Mulimu n’a na ni musebezi o mutuna wa n’a bata kuli Mushe a eze. Mulimu n’a ize: ‘Zuha, ni ku lume ku Faro, mulena wa Maegepita, kuli u y’o zwisa mwa Egepita sicaba sa ka, bona bana ba Isilaele.’ Mulimu a sepisa ku tusa Mushe kuli a eze cwalo.

Kono Mushe a li ku Mulimu: ‘Ha ni ka ya kwa bana ba Isilaele mwa Egepita, mi ni y’o li Mulimu u ni lumile. Cwale bona ha ba ka li ku na: “Libizo la hae ki mañi?” Na, ni ka liñi?’ Mulimu a bulelela Mushe ku y’o bulelela bana ba Isilaele kuli: ‘Jehova u ni lumile ku mina, mi u ize Jehova ki lona libizo la hae ku ya ku ile.’ (Exoda 3:1-15, NW) Seo si bonisa kuli Mulimu n’a ka ipulukela libizo la Jehova.  N’a si ke a li cinca ni kamuta. Mulimu n’a bata ku zibahala ka libizo la hae, lona la Jehova, ku ya ku ile.

Mushe ha n’a kutezi kwa Egepita, Maegepita ne ba hupula kuli Jehova n’a li fela mulimu yo munyinyani wa Maisilaele. Ne ba sa zibi kuli ki yena Mulimu wa lifasi kamukana. Kacwalo, Jehova a bulelela mulena wa Egepita kuli: ‘Ni ka zibahaza libizo la ka mwa lifasi kamukana.’ (Exoda 9:16) Jehova n’a zibahalize libizo la hae. Kana wa ziba mwa n’a ezelize cwalo?—

N’a itusisize Mushe ku etelela sicaba sa Isilaele ku zwa mwa Egepita. Ha ne ba fitile kwa Liwate le Lifubelu, Jehova a eza nzila ye omile fahal’a lona. Maisilaele ba zamaya mo ku omile. Kono Faro ni limpi za hae kaufela ha se ba keni mo ku omile mwahal’a liwate, mezi a n’a ezizwe minanga kwa maneku a mabeli a wela Maegepita, mi kaufel’a bona ba shwa.

Hañihañi, batu mwa lifasi kaufela ba kala ku utwa za n’a ezize Jehova kwa Liwate le Lifubelu. Lu ziba cwañi kuli ne ba utwile ka za teñi?— Lilimo ze bat’o ba ze 40 hasamulaho, Maisilaele ne ba keni mwa Kanana, yona naha ya n’a sepisize Jehova kuli n’a ka ba fa yona. Teñi, banna ba babeli ba Maisilaele ne ba bulelezwi ki kalibe wa libizo la Rahaba kuli: “Lu utwile [Jehova, NW]  mw’a kaliselize mezi a mwa Liwate le Lifubelu fapil’a mina, nako ye mu zwa mwa Egepita.”—Joshua 2:10.

Kacenu, batu ba bañata ba swana sina Maegepita bao. Ha ba lumeli kuli Jehova ki yena Mulimu wa lifasi kamukana. Kacwalo, Jehova u bata kuli batu ba hae ba taluseze ba bañwi ka za hae. Jesu n’a ezize honacwalo. Kwa mafelelezo a bupilo bwa hae fa lifasi, n’a ize ku Jehova mwa tapelo: “Ni ba zibisize Libizo la hao.”—Joani 17:26.

Kana wa bata ku ba sina Jesu? Kanti he u  bulelele ba bañwi kuli libizo la Mulimu ki Jehova. Mwendi u ka fumana kuli batu ba bañata ha ba zibi cwalo. Kacwalo, mwendi wa kona ku ba bonisa mwa Biblele liñolo la Isaya 12:2. Ha lu nge Bibele honafa mi lu bone liñolo leo hamoho. Li bulela kuli: “A mu bone, ya ni pilisa ki Mulimu! Ki Yena ye ni sepa, mi ha ni na ku saba se siñwi; kakuli mata a ka, ni [muñ’a] milumbeko ya ka, ki [Muñ’a] Bupilo Jehova; ki Yena Mupilisi wa ka.”

Lu itutañi ka ku bala liñolo leo?— Lu ituta kuli libizo la Jehova ki la butokwa hahulu kwa mabizo kaufela. Ki lona libizo la Mulimu ya M’ata Kamukana, yena Ndat’ahe Jesu, ili Yena ya ezize linto kamukana. Mi u si libali kuli Jesu n’a ize lu swanela ku lata Jehova Mulimu ka pilu ya luna kaufela. Kana wa lata Jehova?—

Lu kona ku bonisa cwañi kuli lwa lata Jehova?— Nzila ye ñwi ki ka ku fita fa ku mu ziba sina Mulikani. Nzila ye ñwi hape ki ka ku bulelela ba bañwi libizo la hae. Lwa kona ku ba bonisa mwa Bibele luli kuli libizo la hae ki Jehova. Hape lwa kona ku bulela ka za lika ze makaza z’a pangile Jehova ni lika ze nde z’a ezize. Ku eza cwalo ku tabisa Jehova kakuli u bata kuli batu ba mu zibe. Lwa kona ku abana mwa ku eza cwalo, nji cwañi?—

Haki batu kaufela ba ba ka bata ku teeleza ha lu bulela za Jehova. Mane, batu ba bañata ne ba si ka teeleza Jesu, yena Muluti yo Mutuna, ha n’a bulezi ka za Hae. Kono nto yeo ne i si ka tuhelisa Jesu ku bulela ka za Jehova.

Kacwalo, ha lu be sina Jesu. Lu zwelepili ku bulela za Jehova. Ha lu eza cwalo, Jehova Mulimu u ka lu tabela kakuli lwa bonisa kuli lwa lata libizo la hae.

Cwale lu bale hamoho mwa Bibele litimana ze ñwi li sikai ze bonisa butokwa bwa libizo la Mulimu: Isaya 12:4, 5; Mateu 6:9; Joani 17:6; ni Maroma 10:13.

[Siswaniso se si fa likepe 27]

Kana wa ziba kuli linaleli kaufela li na ni mabizo?

[Siswaniso se si fa likepe 28]

Ki ifi nto ya butokwa yeo Mushe n’a itutile kwa sicacani se ne si tuka mulilo?

[Siswaniso se si fa likepe 29]

Mulimu n’a zibahalize cwañi libizo la hae kwa Liwate le Lifubelu?

[Maswaniso a fa likepe 30]

Jesu n’a zibahalize libizo la Mulimu.

Kana wa kona ku fumana libizo la Mulimu mwa Bibele?