Kauhanyo 17

Mwa Ku Fumanela Tabo

KAUFEL’A luna lwa lata ku ba ni tabo, nji cwañi?— Kono haki batu kaufela ba ba na ni tabo. Kana wa ziba libaka?— Libaka kikuli ha ba zibi ze tahisa tabo luli. Ba ikutwa kuli ku ba ni lika ze ñata ki kona ko ku tahisa tabo. Kono ha ba ba ni zona lika zeo, tabo ya bona ha i ineleli.

Ki ye taba ye tuna. Muluti yo Mutuna n’a ize: “Ku na ni mbuyoti mwa ku fana, ye fita ye mwa ku fiwa.” (Likezo 20:35) Kacwalo, tabo i konwa ku fumanwa cwañi?— I konwa ku fumanwa ka ku fa ba bañwi lika ni ku ba ezeza lika. Kana wa ziba cwalo?—

Ha lu nahane ka za taba yeo hape. Kana Jesu n’a talusa kuli mutu ya n’a amuhela nto ye ñwi n’a si ke a ba ya tabile?— Awa, n’a si ka bulela cwalo. Wa tabelanga ku fiwa limpo, nji cwañi?— Batu kaufela ba tabelanga. Lwa tabelanga ha lu amuhelanga lika ze nde.

Kono Jesu n’a ize ku na ni tabo ye tuna hahulu  sihulu ha lu fana. Kacwalo, ki mañi y’o bona wena kuli u fanile lika ze ñata ku fita ufi kamba ufi?— Ki Jehova Mulimu.

Bibele i bulela kuli Mulimu u “fa ze pila kamukana bupilo, ni ku buyela, ni lika kaufela.” U lu neliseza pula ku zwa kwa lihalimu ni ku lu fa lizazi, mi kacwalo licalo za kona ku mela mi lwa kona ku ca lico. (Likezo 14:17; 17:25) Ku swanezi Bibele ha i bulela kuli Jehova ki “Mulimu ya tabile”! (1 Timotea 1:11, NW) Ku ba ni bufani ku ba bañwi ki nto ye ñwi ye tabisa Mulimu. Mi ni luna ha lu fana, lwa kona ku ba ni tabo.

Cwale, ki lika mañi ze lu kona ku fa ba bañwi? N’o ka alaba cwañi?— Fokuñwi, mpo i leka masheleñi. Haiba ki mpo y’o nga mwa sintolo, u na ni ku i lifela. Kacwalo, haiba u bata ku fana mpo ye cwalo, u na ni ku buluka masheleñi ku fitela u fumana a likani a ku leka yona mpo yeo.

Kono ha ku talusi kuli limpo kaufela li lukela ku zwa mwa sintolo. Ka mutala, ha ku cisa hahulu, mezi a bata a kona ku ba a mande luli. Kacwalo, ha u fa mpo yeo ku mutu ya shwile linyolwa, wa kona ku ba ni tabo ye zwa mwa ku fana.

Mwendi zazi le liñwi wena ni bom’aho mu ka besa masikono. Ku eza cwalo ne ku ka tabisa luli. Kono ki sifi se ne u ka eza ka za a mañwi a masikono ao se ne si ka ku tahiseza tabo ye tuna ku fita ha ne u ka icela ona kaufela u nosi?— Wa kona ku fa a mañwi ku yo muñwi wa balikani ba hao sina mpo. Kana u ka bata ku eza cwalo zazi le liñwi?—

Muluti yo Mutuna ni baapositola ba hae kaufela ne ba ziba tabo ye  tahiswa ki ku fana. Kana wa ziba ze ne ba fanile kwa batu ba bañwi?— N’e li nto ye nde ka ku fitisisa mwa lifasi kaufela! Ne ba ziba niti ka za Mulimu, mi ne ba abanile ka tabo taba ye nde yeo ni ba bañwi. Ne ba ezize cwalo ba sa lumelezi mutu ufi kamba ufi ku ba fa masheleñi kabakala ze ne ba fanile.

Zazi le liñwi, muapositola Paulusi ni mulikan’a hae yo munde, yena mulutiwa Luka, ne ba katani musali cwana y’o ni yena n’a bata ku ba ni tabo ya ku fana. Ne ba mu katani kwa nuka. Bo Paulusi ni Luka ne ba ile teñi k’o kakuli ne ba utwile kuli sibaka seo ne si li sibaka sa milapelo. Mi kaniti luli, ha ne ba fitile teñi, ba katana basali ba bañwi be ne ba lapela.

Paulusi a kalisa ku bulelela basali bao taba ye nde ya za Jehova Mulimu ni Mubuso wa hae. Yo muñwi ku bona libizo la hae n’e li Lidia, mi n’a teelelize ka tokomelo. Hasamulaho, Lidia n’a bata ku eza nto ye ñwi kuli a bonise kuli n’a tabezi luli taba ye nde ya n’a utwile. Kacwalo, a susueza bo Paulusi ni Luka kuli: “Ha mu atuzi kuli ni ya sepahala, mu kene mwa ndu ya ka, mu t’o ina mwateñi.” Mi a ba hapeleza luli kuli ba ine.—Likezo 16:13-15.

Lidia n’a tabile ku ba ni batanga ba Mulimu bao mwa ndu ya hae. N’a ba latile kakuli ne ba mu tusize ku ituta za Jehova ni Jesu, ni ku mu luta ka za m’o batu ne ba kona ku pilela ku ya ku ile. N’a tabile ha n’a kona ku fa bo Paulusi ni Luka sico sa ku ca ni sibaka sa ku lobala teñi. Kacwalo, ku fana kwa Lidia ne ku mu file tabo kakuli n’a bata luli ku fana. Yeo ki nto ye lu lukela ku hupula. Mwendi mutu yo muñwi u lu bulelela kuli lu fe mpo ye ñwi. Kono haiba ha lu lati luli ku eza cwalo, ku fana k’o ha ku na ku lu tahiseza tabo.

Ka mutala, ku cwañi ha n’o ka ba ni maswiti o’ bata ku ca? Ha ne ni ka ku bulelela kuli u na ni ku fa mwanana yo muñwi a mañwi ku ona, kana n’o ka tabela ku mu fa?— Kono ku cwañi ha ne u ka ba ni maswiti mi wa katana mulikan’a hao y’o lata hahulu? Ha n’o ka  ikupulela ku ikabela ona ni mulikan’a hao, kana ku eza cwalo ne ku si ke kwa ku tabisa?—

Fokuñwi, lu latanga hahulu mutu yo muñwi kuli mane lu bata ku mu fa lika kaufela, lu sa siyalelwi ki se siñwi. Lilato la luna la ku lata Mulimu ha li nze li hula, lu lukela ku ikutwa honacwalo ka za Hae.

Muluti yo Mutuna n’a ziba ka za musali wa mubotana ya n’a ikutwile cwalo. N’a mu boni kwa tempele mwa Jerusalema. N’a na ni fela tusheleñi to tubeli twa muwaya-waya; tona t’o ki tona fela twa n’a na ni. Kono a tu beya mwa sibulukelo sa kwa tempele sina nubu, kamba mpo. Ha ku na ya n’a mu hapelelize ku eza cwalo. Buñata bwa batu teñi k’o mane ne ba si ka lemuha za n’a ezize. N’a ezize cwalo kakuli n’a tabela, mi n’a lata luli Jehova. N’a tabile ha n’a konile ku fana.—Luka 21:1-4.

Lu kona ku fana ka linzila ze ñata. Kana ku na ni ze ñwi z’o hupula ze lu kona ku fana?— Haiba lu fana kakuli lu bata ku fana luli, lu ka ba ni tabo. Ki kabakaleo Muluti yo Mutuna h’a lu bulelela kuli: “Mu fane.” (Luka 6:38) Ha lu ka eza cwalo, lu ka tabisa batu ba bañwi. Mi lu ka ba batu ba ba tabile ka ku fitisisa!

Ha lu bale ze ñwi ka za m’o ku fana ku tahiseza tabo, kwa Mateu 6:1-4; Luka 14:12-14; ni 2 Makorinte 9:7.

[Siswaniso se si fa likepe 92]

Ki kabakalañi Jehova h’a li ‘Mulimu ya tabile’?

[Siswaniso se si fa likepe 93]

Ki nto mañi ye kona ku ku tabisa ku fita ku ca masikono kaufela u nosi?

 [Siswaniso se si fa likepe 94]

Ki sifi seo Lidia a bulelela bo Paulusi ni Luka?

[Siswaniso se si fa likepe 94]

Ki kabakalañi Lidia ha tabile ku tusa bo Paulusi ni Luka?

[Siswaniso se si fa likepe 96]

Ki kabakalañi musali wa mubotana y’o ha n’a tabile ka ku fana za n’a na ni kaufela?