Kauhanyo 40

Mwa Ku Tabiseza Mulimu

LU KONA ku ezañi kuli lu tabise Mulimu? Kana ku na ni ze lu kona ku mu fa?— Jehova u li: “Lifolofolo kamukana za mwa mushitu ki za ka.” Hape u li: “Silivera ki ya ka, ni gauda ki ya ka.” (Samu 24:1; 50:10; Hagai 2:8) Kono ku na ni nto ye ñwi ye lu kona ku fa Mulimu. Ki nto mañi yona yeo?—

Jehova wa lu tuhelela ku iketela ku mu sebeleza kamba ku sa mu sebeleza. H’a lu hapelezi ku eza z’a bata kuli lu eze. Ha lu like ku bona libaka Mulimu ha n’a lu ezize ka buikoneli bwa ku iketela ku mu sebeleza kamba ku sa mu sebeleza.

Mwendi wa ziba mushini. Ki nto ye pangezwi ku eza nto ifi kamba ifi y’a bata mupangi wa ona. Kacwalo, mushini ha u koni ku iketela za ku eza. Jehova n’a ka be a lu pangile kaufel’a luna ku ba sina mushini. N’a ka be a lu ezize ilikuli lu eze fela z’a bata yena. Kono Mulimu n’a si ka eza cwalo. Kana wa ziba libaka?— Libapaliso ze ñwi ni zona ki mishini. Ha ku siniwa kunupo ye ñwi, li eza fela ze li lukiselizwe ku eza ki mupangi wa zona. Kana u kile wa bona sibapaliso se si cwalo?— Hañata, batu ba katalanga ku bapalisa libapaliso ze eza fela lika ze li lukiselizwe ku eza. Mulimu h’a lati kuli lu mu utwe inge kuli lu mishini ye lukisizwe ku mu sebeleza. Jehova u  bata kuli lu mu sebeleze kakuli lwa mu lata ni kuli lu bata ku mu utwa.

Wena u hupula kuli Ndat’a luna wa kwa lihalimu u ikutwa cwañi ha lu mu utwa ka ku lata kwa luna?— Ha ku ni bulelele, bashemi ba hao ba ikutwanga cwañi ha u ezanga lika ka mo u li ezeza?— Bibele i li mwana ya butali “u tabisa ndat’ahe” kono mwana wa sikuba “u swabisa m’ahe.” (Liproverbia 10:1) Kana s’o lemuhile kuli ha u eza se ba ku bulelela bom’aho ni bondat’aho, ba tabelanga?— Kono ba ikutwanga cwañi ha u sa ba utwi?—

Cwale ha lu nahane ka za Jehova, Ndat’a luna wa kwa lihalimu. U lu bulelela mo lu kona ku mu tabiseza. Ha ku nge Bibele ya hao mi u apule kwa Liproverbia 27:11. Kwateñi, Mulimu u lu bulelela kuli: ‘Mwan’aka u talife, mi u tabise pilu ya ka, mi ni ka kona ku alaba ya ni nyaza.’ Kana wa ziba se ku talusa ku nyaza mutu?— Mutu u kona ku ku nyaza ka ku ku seha ni ku bulela kuli ha u koni ku eza s’o bulezi kuli wa kona ku eza. Satani u nyaza cwañi Jehova?— Ha lu bone.

U si libali kuli mwa Kauhanyo 8 ya buka ye, lu itutile kuli Satani u bata ku ba wa pili mi u bata kuli mañi ni mañi a mu utwe. Satani u bulela kuli batu ba sebeleza Jehova ka libaka fela la kuli Jehova u ka ba fa bupilo bo bu sa feli ha ba mu utwa. Satani ha n’a konile ku kwasheka bo Adama ni Eva kuli ba si ke ba utwa Jehova, Satani n’a  shemaetile Mulimu. N’a bulelezi Mulimu kuli: ‘Batu ba ku sebeleza ka libaka fela la ze ba fumana ku wena. Ha ku ni tuhelele ni ku bonise, mi na kona ku fulalelisa ufi kamba ufi ku wena.’

Ki niti kuli manzwi ao ka mw’a inezi h’a fumanehi mwa Bibele. Kono ha lu bala ka za munna ya bizwa Jobo, kwa iponelwa hande kuli Satani n’a bulezi manzwi a’ bat’o swana ni ao ku Mulimu. Kaniti n’e li kwa butokwa ku Satani ni ku Jehova ka za haiba Jobo n’a sepahala ku Mulimu kamba kutokwa. Ha lu apule mwa Libibele za luna kwa Jobo likauhanyo 1 ni 2 ilikuli lu bone se ne si ezahezi.

U lemuhe mwa Jobo kauhanyo 1 kuli Satani u kwateñi kwa lihalimu k’o mangeloi h’a taha ku t’o bona Jehova. Kacwalo Jehova u buza Satani kuli: “U zwa kai?” Satani u alaba kuli n’a sweli ku pota-pota mwa lifasi. Kacwalo, Jehova u buza kuli: ‘Kana u  lemuhile Jobo, kuli wa ni sebeleza mi h’a ezi nto ifi kamba ifi ye maswe?’—Jobo 1:6-8.

Honaf’o, Satani u kalisa ku ikemela. ‘Jobo u ku lapela fela kakuli h’a na butata. Ha n’o ka tuhela ku mu sileleza ni ku mu fuyola, u ka ku nyefula inz’a li fapil’a hao.’ Kacwalo Jehova u alaba kuli: ‘Kihona, Satani, wa kona ku eza kaufela z’o bata ku eza ku yena, kono u si ke wa holofaza yena Jobo ka sibili.’—Jobo 1:9-12.

Satani u ezañi?— U tahisa kuli batu ba uzwe likomu ni limbongolo za Jobo ni ku bulaya balisana ba zona. Cwale ku lenga lumonyi, mi lu bulaya lingu ni balisana ba zona. Ku tuha f’o, batu ba taha ku t’o uzwa likamele ni ku bulaya ba ba li lisa. Kwa mafelelezo, Satani u fukisa moya o mutuna mi u wisa ndu mo ku inzi bana ba Jobo ba 10, mi kaufel’a bona ba shwa. Ku si na taba ni zeo kaufela, Jobo u sa zwelapili ku sebeleza Jehova.—Jobo 1:13-22.

Jehova h’a bona Satani hape, Jehova u bonisa kuli Jobo u sa sepahala. Satani wa ikemela, u li: ‘Ha n’o ka ni tuhelela kuli ni mu utwise butuku mwa mubili wa hae, u ka ku nyefula fapil’a hao.’ Kacwalo,  Jehova u tuhelela Satani ku utwisa Jobo butuku kono ni ku mu lemusa kuli a si ke a bulaya Jobo.

Satani u lenga Jobo butuku mi mubili wa hae kaufela u tahelwa ki litombo. Litombo zeo li nunka hahulu kuli mane ha ku na mutu ya bata ku ba bukaufi ni yena. Mane niheba musal’a Jobo u mu bulelela kuli: “U kute Mulimu, mi u shwe!” Ba batwi ki balikani ba Jobo ba taha ku t’o mu potela mi ba t’o mu utwisa hahulu butuku ka ku bulela kuli mwendi u ezize lika ze maswe hahulu h’a tahezwi ki matata ao kaufela. Kono ku si na taba ni matata ni butuku b’o Satani a tahiseza Jobo, Jobo u zwelapili ku sebeleza Jehova ka busepahali.—Jobo 2:1-13; 7:5; 19:13-20.

Wena u nahana kuli Jehova n’a ikutwile cwañi bakeñisa busepahali bwa Jobo?— N’a tabile kakuli Jehova n’a kona ku bulelela Satani kuli: ‘Ha ku bone Jobo! Wa ni sebeleza kakuli wa tabela.’ Kana u ka ba sina Jobo, ili mutu y’o Jehova a kona ku nga sina mutala wa ku bonisa kuli Satani ki lihata?— Kaniti, ki tohonolo ku alaba nyazo ya Satani ya kuli w’a kona ku tuhelisa mutu ufi kamba ufi ku sebeleza Jehova. Jesu kaniti n’a ngile taba yeo ku ba tohonolo.

Muluti yo Mutuna ni kamuta n’a si ka tuhelela Satani ku Mu ezisa nto ifi kamba ifi ye fosahezi. Nahana fela m’o mutala wa hae n’o tabiselize Ndat’ahe! Jehova n’a kona ku supa ku Jesu ni ku alaba Satani kuli: ‘Bona Mwan’a ka! U bile ya sepahala ku na ka ku tala kakuli wa ni lata!’ Nahana hape ka za tabo y’a na ni yona Jesu ka ku tabisa pilu ya Ndat’ahe. Kabakala yona tabo yeo, Jesu mane n’a tiyezi lifu fa kota ya linyando.—Maheberu 12:2.

Kana wa bata ku ba sina Muluti yo Mutuna wa luna ni ku tabisa pilu ya Jehova?— Kanti he u zwelepili ku ituta ka za s’a bata Jehova kuli u eze, mi u mu tabise ka ku si eza!

U bale za n’a ezize Jesu kuli a tabise Mulimu ni se lu tokwa ku eza ni luna, kwa Liproverbia 23:22-25; Joani 5:30; 6:38; 8:28; ni 2 Joani 4.

[Siswaniso se si fa likepe 207]

Ki kabakalañi Mulimu ha n’a si ka lu eza kuli lu be sina mushini w’o?

[Siswaniso se si fa likepe 208]

U kona ku tabisa cwañi Jehova ni bashemi ba hao?

[Siswaniso se si fa likepe 209]

Bo Adama ni Eva ha se ba ezize sibi, Satani n’a shemaetile cwañi Jehova?

[Siswaniso se si fa likepe 210]

Jobo n’a tiyezi miliko mañi, mi ki kabakalañi ku itiisa kwa hae ha ne ku tabisize Mulimu?