Kauhanyo 32

Mwa N’a Silelelizwe Jesu

JEHOVA fokuñwi u ezanga lika ka nzila ye nde hahulu kuli a sileleze banana ba ba sa koni ku isileleza. Ha n’o ka tambala-tambala mwa simu, wa kona ku bona nzila ye ñwi yeo ka yona Jehova a eza cwalo. Kono mwendi pili ha u na ku utwisisa se si sweli ku ezahala.

U bona nyunywani i lula fafasi bukaufi ni wena. I bonahala kuli i holofezi. I hoholola lifufa le liñwi la yona, mi ya shenya ha u lika ku i atumela. Ha u nze u latelela nyunywani yeo, i zwelapili ku shenya cwalo. Cwale, ka sipundumukela, ya fufa. Kanti lifufa la yona ne li si ka holofala ni hanyinyani! Kana wa ziba se ne i eza nyunywani yeo?—

Bukaufi ni fo ne i lulezi nyunywani yeo, twana twa yona ne tu patilwe mwa macacani. Nyunywani yeo ne i saba kuli mwendi n’o ka tu fumana ni ku tu holofaza. Kacwalo, ya ikezisa kuli ne i holofezi ilikuli i ku ise kwahule a twana t’o. Kana wa ziba ya kona ku lu sileleza sina nyunywani ha i sileleza twana twa yona?— Mwa Bibele, Jehova u bapiswa kwa nyunywani ye bizwa mbande, ye tusanga twana twa yona.—Deuteronoma 32:11, 12.

 Jesu ki yena Mwana wa butokwa ka ku fitisisa wa Jehova, mi Jehova u mu lata hahulu. Jesu ha n’a li kwa lihalimu, n’a li mutu wa moya ya m’ata sina Ndat’ahe. N’a kona ku ipabalela. Kono Jesu ha n’a til’o pepwa fa lifasi sina mbututu, n’a sa koni ku isileleza. N’a tokwa ku silelezwa.

Kuli a pete za n’a bata Mulimu kuli a t’o li eza fa lifasi, Jesu n’a na ni ku hula ni ku ba munna sakata, ya petehile. Kono Satani n’a likile ku bulaya Jesu kuli ku si ke kwa ezahala cwalo. Likande la m’o Jesu n’a batezwi ku bulaiwa ni linzila zeo ka zona Jehova n’a mu silelelize ki le linde luli. Kana wa tabela ku li utwa?—

Hamulahonyana wa ku pepwa kwa Jesu, Satani n’a tahisize nto ye n’e bonahala sina naleli ku benya mwa lihalimu kwa Upa. Banna ba ba bizwa banuhi ba ba nuha ka linaleli, ba ba itutanga za linaleli, ba latelela naleli yeo likilomita ze mianda-nda ku ya kwa Jerusalema. Teñi, ba y’o buza kwa n’a ka pepelwa yena ya n’a ka ba mulena wa Majuda. Banna be ne ba ziba se i bulela Bibele ka za seo ha ne ba buzizwe cwalo, ba alaba kuli: “Ki mwa Betelehema.”—Mateu 2:1-6.

 Heroda, mulena ya maswe ya n’a busa mwa Jerusalema, ha s’a utwile kuli ku pepilwe mulena yo munca mwa munzi wa Betelehema, u bulelela banuhi ba ba nuha ka linaleli bao kuli: ‘Mu batisise mwanana y’o, mu mu fumane, mi mu tahe mu t’o ni bulelela.’ Kana wa ziba libaka Heroda h’a bata ku ziba kwa inzi Jesu?— Libaka kikuli Heroda u na ni muna mi u bata ku mu bulaya!

Mulimu n’a silelelize cwañi Mwan’a hae?— Banuhi ba ba nuha ka linaleli bao ha se ba fumani Jesu, ba mu fa limpo. Hasamulaho, Mulimu u lemusa banuhi bao mwa tolo kuli ba si ke ba kutela ku Heroda. Kacwalo, ba kutela habo bona ka ku itusisa nzila i sili ba sa kuteli kwa Jerusalema. Heroda h’a yo zibanga kuli banuhi bao ba ile, u nyema hahulu. Ka ku lika ku bulaya Jesu, Heroda u laela kuli bashimani kaufela ba mwa Betelehema ba lilimo ze peli ni banana ku bona ba bulaiwe! Kono ka nako yeo, Jesu h’a yo mwateñi.

Kana wa ziba mw’a pilezi Jesu?— Banuhi bao ha se ba kutezi habo bona, Jehova u lemusa Josefa, munn’a Maria, kuli a zuhe ni ku matela kwahule-hule mwa Egepita. Teñi, Jesu u iketile, a li kwahule ni Heroda ya maswe. Lilimo hasamulaho, Maria ni Josefa ha ba zwile mwa Egepita, Mulimu hape u lemusa Josefa. U mu bulelela mwa tolo kuli a ye kwa Nazareta, k’o Jesu a ka yo iketa.—Mateu 2:7-23.

Kana wa bona m’o Jehova n’a silelelize Mwan’a hae?— Ku wena, ki bafi ba ba swana ni tunyunywani to tunyinyani to tu patilwe ki m’a tona mwa macacani kamba ba ba swana ni Jesu ha n’a li mwanana yo munyinyani? Kana haki wena?— Ku  na ni ba bañwi ba ba bata ku ku holofaza ni wena. Kana wa ba ziba?—

Bibele i bulela kuli Satani u swana sina tau ye lila ye bata ku lu ca. Mi sina tau ha i ketanga lifolofolo ze nyinyani, Satani ni badimona ba hae hañata ba ketanga banana. (1 Pitrosi 5:8) Kono Jehova ki ya m’ata ku fita Satani. Jehova u kona ku sileleza bana ba hae kamba ku felisa nto ye maswe kaufela yeo Satani a ba tahiseza.

Kana wa hupula mwa Kauhanyo 10 ya buka ye seo Diabulosi ni badimona ba hae ba lika ku lu ezisa?— Ba bata ku lu ezisa mufuta wa tobali w’o Mulimu a bulela kuli u maswe. Kono ki bomañi ba nosi ba ba lukela ku eza tobali?— Ki batu ba ba hulile, bo munna ni musali ba ba nyalani.

Kono ka bumai, ba bahulu ba bañwi ba lata ku ezanga tobali ni banana. Ha ba eza cwalo, bashimani ni basizana ba kana ba kalisa ku eza lika ze maswe ze ba itutile ku ba bahulu bao. Ni bona ba kalisa ku itusisa lilama za bona za tobali ka nzila ye fosahezi. Ki mona mo ne ku bezi cwalo kale-kale k’o mwa munzi wa Sodoma. Bibele i bulela kuli batu ba mwateñi, ‘micaha ni ba ba hulile,’ ne ba likile ku eza tobali ni banna be ne ba til’o potela Lota.—Genese 19:4, 5.

Kacwalo, sina Jesu ha n’a tokwa ku silelezwa, ni wena u tokwa ku silelezwa ku ba bahulu—mane niheba kwa banana ba bañwi—ba ba kana ba bata ku eza tobali ni wena. Hañata, batu bao ba ka ipumisa ku ba balikani ba hao. Mwendi mane ba kona ku ku fa nto ye ñwi ha n’o ka sepisa kuli ha u na ku bulelela mutu ufi kamba ufi ka za ze ba bata ku eza ku wena. Kono batu bao ki baitati, sina Satani ni badimona ba hae, mi ba bata fela ku itabisa. Mi ba bata ku lika ku itabisa cwalo ka ku bata ku eza tobali ni banana. Ku eza cwalo ku fosahezi hahulu!

Kana wa ziba ze ba kona ku eza kuli ba itabise?— Ba kana ba lika ku ku swala-swala kwa lilama za hao za tobali. Kamba ba kana  ba ku nguba-nguba ka lilama za bona za tobali. Kono ha u lukeli ku tuhelela ni hanyinyani mutu ufi kamba ufi ku ku swala-swala kwa lilama za bunna kamba za busali. Mane ha u lukeli ku lumeleza niheba bahulwani kamba banyani ba hao, bom’aho kamba bondat’aho. Lilama zeo za mubili wa hao ha li lukeli ku swaliwa.

U kona ku sileleza cwañi mubili wa hao kwa batu ba ba eza lika ze maswe sina zeo?— Sapili, u si ke wa lumeleza mutu ufi kamba ufi ku bapalisa lilama za hao za tobali. Mutu h’a lika ku eza cwalo, u mu bulelele ka ku tiya ni ka ku tumusa linzwi kuli: “Ha ni lati! Ni ka mi biha!” Mi mutu y’o niha n’a ka bulela kuli ze ezahezi kaufela ki mulatu wa hao, u si ke wa lumela. Ki buhata. Zamaya fela u y’o mu biha, ku si na taba kuli ki yena mañi! U lukela ku eza cwalo nih’a bulela kuli ze mu eza hamoho ki litaba za hao ni yena fela. Mutu y’o niha n’a ka ku sepisa lika ze nde kamba ku ku bemba, u lukela ku mu siya ni ku y’o mu biha.

Ha u lukeli ku saba, kono u tokwa ku tokomela. Bashemi ba hao ha ba ku eleza ka za batu kamba libaka ze kona ku ba ze maswe ku wena, u lukela ku ba teeleza. Ha u ba teeleza, u zibe mutu ya maswe h’a na ku ku holofaza.

Ha ku bale ka za ku isileleza kwa likezo ze maswe za tobali, kwa Genese 39:7-12; Liproverbia 4:14-16; 14:15, 16; 1 Makorinte 6:18; ni 2 Pitrosi 2:14.

[Siswaniso se si fa likepe 167]

Nyunywani ye i sweli ku lika cwañi ku sileleza twana twa yona?

[Siswaniso se si fa likepe 168]

Banuhi ba ba nuha ka linaleli ha se ba tile ku t’o potela Jesu, Mulimu n’a ba lemusizeñi kuli a sileleze Jesu?

[Siswaniso se si fa likepe 169]

Jesu wa mwanana u silelezwa cwañi hape?

[Siswaniso se si fa likepe 171]

Ki sifi s’o lukela ku bulela ni ku eza mutu ha n’a ka lika ku ku swala-swala kwa sa swaneli ku swala?