Se Ba Tokwa Bana Kwa Bashemi

BASHEMI kaufela ba abananga mwa kezahalo ye ba sa koni ku utwisisa hande batu. Yo muñwi ni yo muñwi wa bona u fana nto ye ñwi ya mubili wa hae. Kabakaleo, nto ye hula mwa mba ya mushemi wa musali ki mutu ya pila ya kwanile hande. Kacwalo, haki nto ye komokisa kuli mbututu ha i pepiwa, batu ba bulela kuli “ku pepwa ki nto ye makaza.”

Ki niti kuli ku pepa mwana ki makalelo fela a buikalabelo bwa mushemi. Kwa makalelo, ibat’o ba kuli limbututu li itinganga hahulu kwa bashemi ba zona, kono ha li nze li hula, li tokwa ze ñwi ku fita fela pabalelo ya kwa mubili. Li tokwa tuso kuli li hule mwa munahano, mwa maikuto, ku za muzamao, ni kwa moya.

Kuli ba hule ku ba batu sakata, banana ba tokwa hahulu ku boniswa lilato ki bashemi. Nihaike ku ba bulelela kuli ba latiwa ku butokwa, ba tokwa ku boniswa cwalo ka likezo. Ee, banana ba tokwa ku tomelwa mutala o munde ki bashemi. Ba tokwa ketelelo ku za muzamao, ili likuka za ku latelela mwa bupilo. Mi ba tokwa lika zeo ku zwelela kwa bwanana bwa bona. Ze maswe za kona ku ezahala, mi mane za ezahalanga, haiba banana ha ba fiwi tuso ku fitela ha se ba hulile.

Likuka ze nde ka ku fitisisa ku ze fumaneha kai ni kai ki ze mwa Bibele. Litaelo ze tomile fa Bibele li tahisa ze nde ze ipitezi. Ka litaelo ze cwalo, bana ba fita fa ku utwisisa kuli ze ba bulelelwa haki ze ba bulela batu fela, kono ki ze bulelwa ki Mubupi wa bona, yena Ndat’a bona wa kwa lihalimu. Ku eza cwalo ku tiisa kelezo yeo ka nzila ye sa konwi ku bapanywa.

Bibele i eleza bashemi ku sebeza ka t’ata kuli ba suñe likuka ze nde mwa minahano ya bana ba bona. Kono bana ha ba nze ba hula, bashemi hañata  ba fumananga t’ata ku ambola ni bona ka za lika za butokwa hahulu. Buka ye, ya Itute ku Muluti Yo Mutuna, i lukiselizwe ku tibela butata b’o. I ka fa mina ni bana ba mina litaba za kwa moya za ku bala hamoho. Kono hape i swanela ku susueza banana kuli ba ambolisanange ni ba ba bala buka ye ni bona.

Mu ka lemuha kuli buka ye i susueza banana ku bulela mo ba ikutwela. Lipuzo ze ñata ze swanela li filwe mwa buka ye. Ha mu fita fa lipuzo zeo, mu ka bona katila (—). F’o kikuli mu hupuzwa ku kutumana ni ku susueza mwanana ku bulela maikuto a hae. Banana ba tabela ku abana teñi. Haiba ha ba abani teñi, kapili-pili b’a kona ku sa tabela ku zwelapili.

Kono sa butokwa ni ku fita kikuli lipuzo ze li ka mi tusa ku ziba z’a nahana mwan’a mina. Ki niti kuli mwanana wa kona ku fa likalabo ze si ka luka. Kono litaba ze latelela puzo ni puzo li lukiselizwe ku tusa mwanana kuli a kone ku nahananga hande.

Kalulo ye ipitezi ya buka ye ki maswaniso a yona a fitelela 230. Buñata bwa ona a na ni manzwi a susueza mwanana ku bulela mw’a ikutwela, ka ku ya ka z’a iponela ni z’a balile. Kacwalo, mu tatubisise maswaniso ao ni mwana. A kona ku tusa hahulu kwa ku koñomeka lituto ze sweli ku lutiwa.

Mwana h’a ituta ku bala, mu mu susueze kuli a mi balele buka ye ni ku ipalela yona yena muñi. H’a ka zwelapili ku i bala, kelezo ye nde ya yona i ka be i suñeha mwa munahano ni pilu ya hae. Kono kuli mu tiise ku latana kwa mina ni ku kutekana kwa mina ni mwana, mu lukela ku bala buka ye hamoho, mi mu i bale kamita.

Ka nzila ye n’e bonahala ku sa konahala lilimo-limo ze felile, banana se ba kona ku bona ni ku utwa za buhule, za mioya, ni likezo ze ñwi ze sinya. Kacwalo, ba tokwa silelezo, mi buka ye i tusa ku fa silelezo yeo ka nzila ye kutekeha, ye nongile. Kono banana sihulu ba tokwa ku libiswa ku Simbule sa butali kaufela, yena Ndat’a luna wa kwa lihalimu, Jehova Mulimu. Muluti yo Mutuna, Jesu, n’a ezanga cwalo kamita. Lu sepa hahulu kuli buka ye i ka mi tusa ni ku tusa ba mwa lubasi lwa mina ku pila ka nzila ye tabisa Jehova, ni ku fuyolwa cwalo ku ya ku ile.