Kauhanyo 30

Tuso Ya Ku Tula Boi Bwa Luna

KANA ku sebeleza Jehova ku ku belanga bunolo?— Muluti yo Mutuna n’a si ka bulela kuli ne ku ka ba bunolo. Busihu pili Jesu a si ka bulaiwa, n’a bulelezi baapositola ba hae kuli: “Lifasi ha li mi toya, mu zibe kuli li toile na, pili.”—Joani 15:18.

Pitrosi n’a itumbile kuli n’a si ke a siya Jesu, kono Jesu n’a ize Pitrosi n’a ka latula Jesu halalu ona busihu b’o. Mi Pitrosi n’a ezize honacwalo fela! (Mateu 26:31-35, 69-75) Ne ku ezahezi cwañi cwalo?— Ne ku ezahezi cwalo kakuli Pitrosi n’a sabile, mi baapositola ba bañwi ni bona ne ba sabile.

Kana wa ziba libaka baapositola ha ne ba sabile?— Ne ba palezwi ku eza nto ye ñwi ya butokwa. Ku ituta ka za yona nto yeo ku ka lu tusa ku sebeleza Jehova, ku si na taba ni zeo mutu ufi kamba ufi a kana a li bulela kamba ku li eza ku luna. Kono sapili, lu tokwa ku bona se ne si ezahezi busihu bwa mafelelezo bwani f’o Jesu n’a li ni baapositola ba hae.

Pili, ba eza hamoho mukiti wa Paseka. W’o n’e li mulalelo o ipitezi o n’o eziwanga ka silimo ka ku hupula nako f’o Mulimu n’a lukululezi batu ba hae mwa butanga mwa Egepita. Cwale Jesu u tahisa mulalelo o muñwi o ipitezi fapil’a bona. Lu ka ambola za ona mwa kauhanyo ye ñwi ni ku talusa m’o mulalelo w’o u lu tuseza ku hupula Jesu. Mulalelo w’o ha s’o felile, mi Jesu ha s’a susuelize baapositola ba hae, u ya ni bona mwa simu ya Getsemani. Seo ki sibaka se sinde se ne ba potelanga hañata-ñata.

 Jesu u ya a nosi mwa simu kuli a y’o lapela. U bulelela Pitrosi, Jakobo, ni Joani kuli ni bona ba lapele. Kono bona ba lobala. Jesu u ya a nosi halalu kuli a y’o lapela, mi h’a kutile halalu, u t’o fumana kuli Pitrosi ni ba bañwi ba lobezi! (Mateu 26:36-47) Kana wa ziba libaka ha ne ba swanela ku tona ni ku lapela?— Ha lu ambole ka za teñi.

Pili, Judasi Isikariota n’a li kwa mukiti wa Paseka hamoho ni Jesu ni baapositola ba bañwi bona busihu b’o. Sina ha u kana wa hupula, Judasi n’a bile lisholi. Cwale u ba mubeteki. Wa ziba sibaka sa mwa simu ya Getsemani k’o Jesu hañata s’a kopanezi teñi ni baapositola ba hae. Kacwalo, Judasi u taha ni masole teñi k’o kuli ba tame Jesu. Ha ba fita kwateñi, Jesu u ba buza kuli: “Mu bata mañi?”

Masole ba alaba, ba li: “Jesu.” Jesu h’a sabi, kacwalo u ba alaba kuli: “Ki na yo.” Masole ba komokiswa hahulu ki bundume bwa Jesu kuli mane ba kutela mwamulaho ni ku wela fafasi. Jesu cwale kih’a bulela kuli: ‘Haiba ki na ye mu bata, mu tuhele baapositola ba ka ba ikele.’—Joani 18:1-9.

Masole ha ba swala Jesu ni ku mu tama, baapositola ba saba mi ba mata. Kono Pitrosi ni Joani bona ba bata ku bona se si ka ezahala, kacwalo ba latelela kwahulenyana. Jesu kih’a tiswa kwa ndu ya Kayafa, yena muprisita yo muhulu. Bakeñisa kuli Joani wa zibiwa ki muprisita yo muhulu, mulibeleli wa kwa munyako u lumeleza yena ni Pitrosi ku kena mwa lapa.

Baprisita se ba kopani kale kwa ndu ya Kayafa kuli ba kalise muzeko. Ba bata kuli Jesu a bulawe. Kacwalo, ba biza lipaki ze t’o bulela buhata ka za hae. Batu ba nata Jesu ka liñindi ni ku mu bakaula. Zeo kaufela ha li nze li ezahala, Pitrosi u inzi fakaufi.

Mutanga wa musizana, yena mulibeleli ya n’a lumelelize Pitrosi ni Joani ku kena mwahali, a lemuha Pitrosi. A bulela, a li: “Ni wena, n’o ina ni Jesu.” Kono Pitrosi a latula, mane kuli nihaiba ku ziba  Jesu h’a mu zibi. Hamulahonyana, musizana yo muñwi a lemuha Pitrosi mi a bulelela be ne ba yemi bukaufi kuli: “Ni yo n’a inzi ni Jesu.” Pitrosi hape a latula, kuli h’a zibi Jesu. Ha se ku fitile nakonyana, batu ba bañwi ba bona Pitrosi mi ba mu bulelela kuli: “Luli, ni wena u wa ku bona.” Lwa bulalu, Pitrosi a latula, a li: “Ha ni zibi mutu yo.” Mane Pitrosi a konka kuli u bulela niti, mi Jesu a itemuna ni ku mu talima.—Mateu 26:57-75; Luka 22:54-62; Joani 18:15-27.

Kana wa ziba libaka Pitrosi ha n’a pumile?— Libaka n’e li kuli n’a sabile. Kono ki kabakalañi ha n’a sabile? Ki sifi sa n’a si ka eza kuli a be ni bundume? Nahana ka za teñi. Jesu n’a ezizeñi kuli a be ni bundume?— N’a lapezi ku Mulimu, mi Mulimu n’a mu tusize ku ba ni bundume. Mi u si libali kuli Jesu n’a bulelezi Pitrosi halalu kuli a lapele ni ku tona ni ku libelela. Kono ki sifi se ne si ezahezi?—

Pitrosi n’a lobezi ka linako zeo kaufela. N’a si ka lapela, mi n’a si ka libelela. Kacwalo, Jesu ha n’a tamilwe, Pitrosi n’a si ka itukiseza ze n’e ka ezahala. Hasamulaho kwa muzeko, batu ha ne ba sweli ku  nataka Jesu ni ku lela ku mu bulaya, Pitrosi n’a sabile. Kono lihora li sikai pili zeo li si ka ezahala, ki sifi sa n’a bulezi Jesu kuli baapositola ba hae ne ba lukela ku libelela?— Jesu n’a ba bulelezi kuli sina lifasi ha ne li mu toile, ne li ka ba toya ni bona.

Cwale ha lu nahane ka za nto ye kona ku ezahala ku luna ye swana ni ye n’e ezahezi ku Pitrosi. Lu nge kuli u mwa kilasi mi ba bañwi ba kala ku bulela lika ze maswe ka za batu ba ba sa caeli ndembela silutu kamba ba ba sa ezi mukiti wa Ngilisimusi. Cwale, ku cwañi yo muñwi ha n’a ka ku fetuhela ni ku ku buza kuli: “Kana ki niti  kuli wena ha u caeli ndembela silutu?” Kamba ba bañwi ba bulela kuli: “Lu utwa kuli mane ni mukiti wa Ngilisimusi ha u u ezi!” Kana n’o ka saba ku bulela niti?— Kana n’o ka bulela buhata, sina mwa n’a ezelize Pitrosi?—

Hasamulaho, Pitrosi n’a swabile hahulu kabakala ku latula Jesu. Ha n’a lemuhile za n’a ezize, a zwela kwande, mi a y’o lila. Ee, n’a kutezi ku Jesu. (Luka 22:32) Cwale nahana ka za teñi. Ki nto mañi ye kona ku lu tusa ku sa ba ni sabo ye tuna hahulu kuli mane lu bulele nto ye swana ni ya n’a bulezi Pitrosi?— U si libali kuli Pitrosi n’a si ka lapela, mi n’a si ka libelela. Kacwalo, ki sifi s’o bona wena kuli lu tokwa ku eza ilikuli lu be mulateleli wa Muluti yo Mutuna?—

Kaniti luli lu tokwa ku lapela ku Jehova kuli a lu tuse. Jesu ha n’a lapezi, kana wa ziba sa n’a mu ezelize Mulimu?— Mulimu n’a lumile lingeloi ku t’o tiisa Jesu. (Luka 22:43) Kana mangeloi a Mulimu a’ kona ku lu tusa?— Bibele i li: ‘Lingeloi la Mulimu li tibelezi, li beile ba ba mu saba mwahali; mi la ba lamulela.’ (Samu 34:7) Kono kuli Mulimu a lu tuse, lu tokwa ku eza ze ñwi, isiñi fela ku kupa tuso ka tapelo. Kana wa ziba ze ñwi ze lu tokwa ku eza?— Jesu n’a bulelezi balateleli ba hae kuli ba tone ni ku libelela. Ka m’o bonela wena, lu kona ku eza cwañi cwalo?—

Lu tokwa ku teeleza ka tokomelo ku ze bulelwa kwa mikopano ya Sikreste ni ku isa pilu ku ze lu bala mwa Bibele. Kono hape lu tokwa ku lapela kamita ku Jehova ni ku mu kupa kuli a lu tuse ku mu sebeleza. Ha lu eza cwalo, lu ka tusiwa ku sa ba ni sabo. Fohe lu ka taba ha lu ba ni nako ya ku bulelela ba bañwi ka za Muluti yo Mutuna ni Ndat’ahe.

Mañolo a’ a kona ku lu tusa ku sa lika ni hanyinyani ku tuhelela sabo ya ku saba batu ba bañwi ku lu palelwisa ku eza se si lukile: Liproverbia 29:25; Jeremia 26:12-15, 20-24; ni Joani 12:42, 43.

[Siswaniso se si fa likepe 159]

Ki kabakalañi Pitrosi, Jakobo, ni Joani ha ne ba lukela ku tona?

[Siswaniso se si fa likepe 160]

Ki kabakalañi Pitrosi ha n’a sabile hahulu kuli mane a latula Jesu?

[Siswaniso se si fa likepe 160]

U kona ku ipumana cwañi mwa muinelo o swana ni wa Pitrosi?