Kauhanyo 24

U Si Ke Wa Ba Lisholi Ni Kamuta!

KANA ku na ni mutu ya kile a ku uzweza nto ye ñwi?— N’o ikutwile cwañi?— Yena ya n’a uzwize nto yeo ki lisholi, mi ha ku na ya lata lisholi. Wena u nahana kuli ku tahanga cwañi kuli mutu a be lisholi? Kana ki mona mw’a pepezwi cwalo?—

Kihona lu sa z’o ituta kuli batu ba pepiwa ba na ni sibi. Kacwalo, kaufel’a luna ha lu si ka petahala. Kono ha ku na mutu ya pepilwe a li lisholi. Lisholi wa kona ku zwa mwa lubasi lo lunde. Bashemi ba hae, bahulwani ni banyani ba hae ba kona ku ba ba ba sepahala. Kono takazo ya mutu ya ku lakaza lika ze cwale ka masheleñi ni seo masheleñi a kona ku leka ya kona ku mu bisa lisholi.

Ki mañi y’o ziba wena kuli ki yena lisholi la pili?— Ha lu nahane ka za teñi. Muluti yo Mutuna n’a ziba yena mutu y’o ha N’a sa li kwa lihalimu. Lisholi y’o n’a li lingeloi. Kono bakeñisa kuli Mulimu n’a ezize mangeloi kaufela a li a petehile, lingeloi leo ne li bile cwañi lisholi?— Sina ha ne lu itutile mwa Kauhanyo 8 ya buka ye, ne li bata nto ye ñwi ye n’e si ya lona. Kana wa hupula yona nto yeo?—

Mulimu ha s’a ezize munna ni musali ba pili, lingeloi leo ne li bata ku li ba li lapele. Ne li si na tukelo ya ku lapelwa ki bona. Mulimu ki yena ye ne ba lukela ku lapela. Kono lingeloi leo la uzwa tukelo yeo! Ka ku tahisa kuli bo Adama ni Eva ba li lapele, lingeloi leo la ba lisholi. La t’o bizwa kuli Satani Diabulosi.

Ki nto mañi ye tahisa kuli mutu a be lisholi?— Ki takazo ya ku bata ku ba ni ze si za hae. Takazo yeo ya kona ku ba ye tuna hahulu kuli mane ya kona ku ezisa batu ba bande lika ze maswe. Fokuñwi,  batu ba ba banga masholi ha ba bakangi ni ku eza ze nde hape. Yo muñwi ya cwalo n’a li muapositola wa Jesu. Libizo la hae ki Judasi Isikariota.

Judasi n’a ziba kuli ku uzwa ku fosahezi kakuli n’a lutilwe Mulao wa Mulimu ku zwelela kwa bwanana bwa hae. N’a ziba kuli Mulimu muta o muñwi n’a bulelezi batu ba hae ku zwelela kwa lihalimu kuli: “U si ke wa uzwa.” (Exoda 20:15) Judasi ha s’a hulile, a t’o zibana ni Muluti yo Mutuna mi a ba yo muñwi wa balutiwa ba hae. Hasamulaho, Jesu mane a keta Judasi ku ba yo muñwi wa baapositola ba hae ba 12.

Jesu ni baapositola ba hae ne ba zamayanga hamoho. Ne ba canga lico za bona hamoho. Mi masheleñi kaufela e ne ba na ni n’a beiwanga mwa sikwama. Jesu n’a file Judasi ku babalela sikwama seo. Kaniti, masheleñi ao n’e si a Judasi. Kono kana wa ziba sa n’a ezize Judasi hamulahonyana?—

Judasi a kalisa k’u nga masheleñi mwa sikwama niha n’a sa lukeli ku eza cwalo. N’a nganga masheleñi ba bañwi ba sa mu boni, mi mane n’a likile ku fumana linzila za ku nga ka zona a mañata a mañwi. A kalisa ku nahananga za masheleñi nako kaufela. Ha lu bone se ne i tahisize takazo ye maswe yeo mazazinyana Muluti yo Mutuna a si ka bulawa kale.

Maria, kaizel’a Lazaro, mulikan’a Jesu, n’a ngile oli ye nde hahulu ni ku i sela kwa mahutu a Jesu. Kono Judasi a bilaela. Kana wa ziba libaka?— N’a ize oli yeo ne i lukela ku lekiswa mi masheleñi a yona n’a lukela ku fiwa kwa babotana. Kono yena luli n’a bata kuli ku be ni masheleñi a mañata mwa sikwama ilikuli a uzwe mwateñi.—Joani 12:1-6.

Jesu a bulelela Judasi kuli a tuhele ku kataza Maria, ya n’a bile ya sishemo hahulu. Judasi n’a si ka taba Jesu ha n’a mu bulelezi cwalo, kacwalo a ya kwa baprisita ba bahulu, be ne ba li lila za Jesu. Ne ba  bata ku tama Jesu, kono ne ba bata ku eza cwalo busihu ilikuli batu ba si ke ba ba bona.

Judasi a bulelela baprisita kuli: ‘Ni ka mi bulelela mo mu ka swalela Jesu, haiba mu ni fa masheleñi. Mu ka ni fa bukai?’

Baprisita ba alaba kuli: ‘Lu ka ku fa masheleñi a silivera a 30.’—Mateu 26:14-16.

Judasi a’ nga masheleñi ao. Ne ku swana inge kuli n’a lekisa Muluti yo Mutuna ku bona banna bao! Kana wa kona ku hupula kuli mutu wa kona ku eza nto ye maswe cwalo?— Ka bumai, ki mona mo ku ezahalelanga cwalo mutu h’a ba lisholi mi a uzwa masheleñi. U lata masheleñi ku fita mw’a latela ba bañwi kamba mane niheba Mulimu.

Mwendi u ka bulela kuli, ‘Ni kamuta ha ni na ku lata nto ifi kamba ifi ku fita mo ni latela Jehova Mulimu.’ Ki ko kunde ku ikutwa cwalo. Jesu ha n’a ketile Judasi ku ba muapositola, mwendi Judasi n’a ikutwile cwalo. Ba bañwi be ne ba bile masholi ni bona mwendi ne ba ikutwile cwalo. Ha lu ambole ka za ba bañwi ba bona.

Yo muñwi n’a li mutang’a Mulimu ya bizwa Akani, ya n’a pilile kale-kale pili Muluti yo Mutuna a si ka pepwa fa lifasi.  Akani n’a boni siapalo se sinde, gauda, ni silivera. Zeo n’e si za hae. Bibele i bulela kuli n’e li za Jehova kakuli ne li ngilwe kwa lila za batu ba Mulimu. Kono Akani n’a li bata hahulu kuli mane a li uzwa.—Joshua 6:19; 7:11, 20-22.

Ki o mutala o muñwi. Kale-kale k’o, Jehova n’a ketile Davida kuli a be mulena wa batu ba Isilaele. Zazi le liñwi, Davida a kalisa ku buha Bati-Sheba, musali yo munde. A zwelapili ku buha Bati-Sheba, inz’a nahana za ku mu tisa mwa ndu ya hae kuli a be ni yena. Kono n’a li musal’a Uria. Davida n’a lukela ku ezañi?—

Davida n’a lukela ku tuhela ku nahana za ku ba ni Bati-Sheba. Kono n’a si ka tuhela ku mu nahana. Kacwalo, Davida a mu nga ni ku mu isa kwa ndu  ya hae. Mi kihona a bulaisisa Uria. Ki kabakalañi Davida ha n’a ezize lika ze maswe cwalo?— Kakuli n’a tundamezi ku bata musal’a munna u sili.—2 Samuele 11:2-27.

Bakeñisa kuli Davida n’a bakile, Jehova a mu tuhelela kuli a pile. Kono cwale Davida a ba ni matata a mañata. Abisalomi, mwan’a hae, a bata ku nga sibaka sa Davida sa bulena. Kacwalo, batu ha ne ba tahanga ku t’o bona Davida, Abisalomi n’a ba swalanga ni ku ba tubeta. Bibele i li: ‘Abisalomi a hapa lipilu za bana ba Isilaele.’ A kolwisa batu bao kuli ba bate kuli a be mulena mwa sibaka sa Davida.—2 Samuele 15:1-12.

Kana u kile wa lakaza hahulu nto ye ñwi, inge mo ne ba lakalelize bo Akani, Davida, ni Abisalomi?— Haiba nto yeo ki ya yo muñwi, ku i inga u si ka i fiwa ki busholi. Kana wa hupula sa n’a bata Satani, yena lisholi la pili?— N’a bata kuli batu ba mu lapele ku fita ku lapela Mulimu. Kacwalo, Satani n’a uzwize ha n’a tahisize kuli bo Adama ni Eva ba mu utwe.

Mutu h’a ba ni nto ye ñwi, u na ni tukelo ya ku bulela ya lukela ku itusisa yona. Ka mutala, mwendi u ya kwa ku bapala ni banana ba bañwi mwa ndu mo ba ina. Kana ne ku ka luka ku nga nto ye ñwi mwa ndu yeo ni ku i tisa ku mina?— Kutokwa, konji haiba bondat’a bona kamba bom’a bona ba ku bulelela cwalo. Ha u’ nga nto ye ñwi ni ku i isa ku mina u sa ba kupi, b’o ki busholi.

Ki kabakalañi mwendi ha n’o ka ba mwa muliko wa ku bata ku uzwa?— Libaka kikuli u bata nto ye ñwi ye si ya hao. Niha n’o si ke wa bonwa ki mutu yo muñwi inz’o nga nto yeo, ya ku bona ki mañi?— Ki Jehova Mulimu. Mi lu lukela ku hupula kuli Mulimu u toile busholi. Kacwalo, ku lata Mulimu ni batu ba bañwi ku ka ku tusa ku sa ba lisholi ni kamuta.

Bibele i bonisa hande-nde kuli ku uzwa ku maswe. Ha ku bale Mareka 10:17-19; Maroma 13:9; ni Maefese 4:28.

[Siswaniso se si fa likepe 129]

Ki kabakalañi Judasi ha n’a uzwize?

[Maswaniso a fa likepe 130]

Ki lifi lika ze maswe ze ba sweli ku nahana bo Akani ni Davida?

[Siswaniso se si fa likepe 130]

Abisalomi n’a li lisholi ka nzila ifi?