5

Bupilo Bu Na Ni Mulelo O Makaza

1, 2. Lu kona ku talusa cwañi kuli Mulimu u na ni mamelelo ku luna, mi ki ka kai k’o lu swanela ku sikuluhela kwa neku la likalabo kwa lipuzo ka za bupilo?

¹ Ka mo ne li ezelizwe lifasi-mubu ni libupiwa ze pila ku lona ku bonisa kuli Mubupi wa zona ki Mulimu y’a lilato ili ya babalela. Mi Linzwi la hae, yona Bibele, li bonisa kuli wa babalela; mi li lu fa likalabo ze tuna luli kwa lipuzo ze cwale ka ze: Ki kabakalañi ha lu li fa lifasi-mubu fa? mi ni ye li, Ki kakai k’o lu libile?

² Lu tokwa ku batisisa mwa Bibele kuli lu fumane likalabo zeo. Linzwi la Mulimu li bulela kuli: “Ha mu ka mu bata mu ka mu fumana. Kono ha mu ka mu fulalela, u ka mi fulalela ni Yena.” (2 Makolonika 15:2) Kacwalo he, patisiso ya litaba ze mwa Linzwi la Mulimu i bonisa nto mañi ka za mulelo wa hae kwa neku la luna?

Libaka Mulimu Ha n’a Bupile Batu

3. Ki kabakalañi Mulimu ha n’a bupile lifasi-mubu?

³ Bibele i bonisa kuli Mulimu n’a lukisize lifasi-mubu sihulu ka ku beya batu mwa munahano. Isaya 45:18 i bulela cwana ka ku ama kwa lifasi-mubu kuli Mulimu ha “si ka li bupa fela, kono ilikuli li yahiwe.” Mi fa lifasi-mubu a beya lika kaufela ze ne ba ka tokwa batu, isiñi mwa ku ba teñi fela, kono mwa ku ikola bupilo ka nzila ye tezi.—Genese, likauhanyo 1 ni 2.

4. Ki kabakalañi Mulimu ha n’a bupile batu ba pili?

⁴ Mwa Linzwi la hae, Mulimu u bulela ka za ku bupa batu ba pili, Adama ni Eva, mi ni ku bonisa seo n’a na ni sona mwa munahano kwa neku la lubasi lwa mufuta wa mutu. N’a bulezi kuli: “A lu eze mutu ka siswaniso sa luna, ni ka ku swana kwa luna; mi a buse litapi ze mwa liwate, ni ze fufa mwa mbyumbyulu, ni makomu, ni lifasi kaufela, ni ze zamaya ka mba kaufela fafasi.” (Genese 1:26) Batu ne ba na ni ku ba ni okamelo fa “lifasi kaufela” ni pupo ya lona ya lifolofolo.

5. Batu ba pili ne ba beilwe kai?

⁵ Mulimu n’a ezize simu ye tuna, ye swana sina parki mwa kalulo ye bizwa Edeni, mwa Middle East. Cwale “a nga mutu, a mu beya mwa simu ya Edeni, ku i lima ni ku i libelela.” Ne li paradaisi ye ne i na ni lika kaufela zeo batu ba pili ne ba ka tokwa ku ca. Mi ne i kopanyelelize ni “likota kaufela ze tabisa meto ha li talimwa, ze munati ha li ciwa,” hamohocwalo ni limela ze ñwi ni mifuta-futa ye miñata ya lifolofolo ye hoha mamelelo.—Genese 2:7-9, 15.

6. Batu ha ne ba bupilwe ne ba filwe tulemeno mañi twa mwa munahano ni to tu bonahala?

⁶ Mibili ya batu ba pili ne i bupilwe ka ku petahala, kacwalo ne ba si ke ba kula, ku supala, kamba ku shwa. Hape ne ba kapwekilwe tulemeno to tuñwi to tuñata, to tu cwale ka m’ata a ku iketela. Nzila yeo ne ba ezizwe ka yona i talusizwe kwa Genese 1:27, kuli: “Mi Mulimu a eza mutu ka siswaniso sa hae; a mu eza ka siswaniso sa Mulimu. A ba eza ili munna ni musali.” Bakeñisa kuli lu bupilwe ka siswaniso sa Mulimu, ne lu si ka fiwa fela tulemeno to tu bonahala ni twa mwa munahano kono hape ni twa muzamao o munde ni twa kwa moya, mi ili t’o tu lukelwa ku talelezwa kuli lu be ni tabo ya niti. Mulimu n’a ka fa likuka za ku taleleza bona butokwi b’o hamohocwalo ni butokwi bwa sico, mezi, ni moya. Sina fela Jesu Kreste ha na bulezi kuli, “mutu h’a na ku pila buhobe fela, kono u ka pila ni ona manzwi kaufela a’ zwa mwa mulomo wa [Jehova, NW].”—Mateu 4:4.

7. Bosinyalana ba pili ne ba filwe taelo ifi?

⁷ Fahalimu a seo, Mulimu n’a file taelo ye nde hahulu ku bosinyalana ba pili inze ba sa li mwa Edeni, a li: “Mu tahise lusika, mu ate, mu tale mwa lifasi.” (Genese 1:28) Kacwalo ne ba ka  kona ku pepa ni ku tahisa bana ba ba petehile. Mi palo ya buñata bwa batu ha ne i ka ekezeha, ne ba ka ba ni musebezi o wabelisa luli wa ku yandulula milulwani ya kalulo yeo ya paradaisi ya makalelo, ye swana sina parki ili ya Edeni. Kwa nalulelule, lifasi-mubu kamukana ne li ka fetulwa ku ba paradaisi, ye yahilwe ki batu ba ba petehile, ba ba li mwa tabo ba ne ba ka pila ku ya ku ile. Bibele i lu bulelela kuli ha sa lukisize zeo kaufela, “Mulimu a bona kaufela z’a ezize kuli li lukile hahulu.”—Genese 1:31; mu bone ni Samu 118:17.

8. Batu ne ba na ni ku babalela cwañi lifasi-mubu?

⁸ Ki taba ya niti kuli batu ne ba na ni ku itusisa lifasi-mubu le li yahilwe kwa neku la kuli ba tusehe. Kono seo ne si na ni ku eziwa ka nzila ye sepahala. Batu ne ba na ni ku ba likombwa z’e likute fa lifasi-mubu, isiñi basinyi ba lona. Ku sinyiwa kwa lifasi-mubu ko lu iponela kacenu ku lwanisana ni tato ya Mulimu, mi bao ba ba abana ku seo ba fulalela mulelo wa bupilo fa lifasi-mubu. Ba ka fiwa koto kwa neku la seo, kakuli Bibele i bulela kuli Mulimu u ka “yundisa ba ba shandaula lifasi.”—Sinulo 11:18.

Mulelo wa Mulimu u Sa Li Teñi

9. Ki kabakalañi ha lu na ni buikolwiso bwa kuli mulelo wa Mulimu u ka talelezwa?

⁹ Kacwalo, ku zwa kwa makalelo ne li mulelo wa Mulimu kuli lubasi lwa mufuta wa mutu lo lu petehile lu pile fa lifasi-mubu ku ya ku ile mwa paradaisi. Mi u sa li mulelo wa hae! Ku si na kuli cwañi, mulelo wo u ka talelezwa. Bibele i talusa kuli: “[Jehova, NW] wa limpi u konkile, a li: Luli, se ni hupuzi si ka bonahala, mi se ni lelile si ka taha.” “Ki se ni bulezi mi ni ka si eza; ki se ni lelile mi ni ka si feleleza.”—Isaya 14:24; 46:11.

10, 11. Jesu, Pitrosi, ni walisamu Davida ne ba bulezi cwañi ka za Paradaisi?

¹⁰ Jesu Kreste n’a kile a bulela ka za mulelo wa Mulimu wa ku kutisa sinca paradaisi fa lifasi-mubu muta n’a bulelezi mutu yo muñwi ya n’a bata sepo ya nako ya kwapili kuli: “U ka ba ni na mwa [Paradaisi].” (Luka 23:43) Muapositola Pitrosi ni yena, na bulezi ka za lifasi le linca le li  taha muta na bulezi cimo kuli: “Kono ka sepiso ya [Mulimu], lu talimezi lihalimu le linca [tukiso ya mulonga o munca o busa ku zwelela kwa lihalimu], ni lifasi le linca [sikwata se sinca sa batu fa lifasi-mubu], mo ku yahile Ku Luka.”—2 Pitrosi 3:13.

¹¹ Walisamu Davida hape n’a ñozi ka za lifasi le linca le li taha ni ka m’o li ka bela teñi ku ya ku ile. N’a bulezi cimo kuli: “Ba ba na ni niti ba ka yola sanda sa naha, Ni ku yaha mwateñi ku ya ku ile.” (Samu 37:29) K’ona libaka Jesu ha n’a file sepiso ye li: “Mbuyoti ki ya ba ba ishuwa, kakuli ba ka ca sanda sa lifasi.”—Mateu 5:5.

12, 13. Mu bulele ka manzwi a kusufezi ka za mulelo o makaza wa Mulimu kwa neku la mufuta wa mutu.

¹² Yeo ki tibelelo ye makaza hakalo, ku pila ku ya ku ile mwa paradaisi fa lifasi-mubu le li lukuluhile kwa bumaswe kaufela, bukebenga, makulanu, maswabi, ni butuku! Mwa buka ya mafelelezo ye mwa Bibele, Linzwi la Mulimu la bupolofita li bulela ka manzwi a kusufezi ka za mulelo wo o makalisa ka ku zibahaza kuli: “Mi [Mulimu] u ka takula miyoko kaufela kwa meto a bona; mi lifu ha li sa na ku ba teñi; nihaiba ku tahelwa ki maswabi ni ku lila, ni ku utwa butuku; kakuli za pili li felile.” Li ekeza kuli: “Cwale Ya inzi mwa Lubona a li: A mu bone, linto kaufela ni li eza ze nca. Hape a li: Ñola; kakuli manzwi ao a sepahala, ki a niti.”—Sinulo 21:4, 5.

¹³ Ee, Mulimu u na ni mulelo o makaza mwa munahano. Ikaba lifasi le linca la ku luka, paradaisi ya kamita, ye ne i bulezwi cimo ki Y’o ya kona ku taleleza lisepiso za hae mi u ka eza cwalo, kakuli “manzwi ao [a hae] a sepahala, ki a niti.”

[Lipuzo za Tuto]

[Maswaniso a fa likepe 20, 21]

Mulimu n’a bata kuli batu ba pile ku ya ku ile fa paradaisi ya lifasi-mubu. Mulelo w’o u sa li teñi

[Siswaniso se si fa likepe 22]

Muñ’a ndu u kona ku fa katulo ku ba ba pila mwa ndu ya hae mi ili ba ba i shandaula