Mu Pile Ku Ya Ku Ile mwa Paradaisi fa Lifasi-Mubu
8
Mu Pile Ku Ya Ku Ile mwa Paradaisi fa Lifasi-Mubu
1, 2. Bupilo bu ka ba bo bu cwañi mwatas’a puso ya Mubuso wa Mulimu?
1 Bupilo bu ka ba cwañi muta Mulimu a ka zwisa bumaswe ni manyando fa lifasi-mubu ni ku tisa lifasi la hae le linca mwatas’a tamaiso y’e lilato ya Mubuso wa hae wa kwa lihalimu? Mulimu u sepisa ku ‘fumbutulula sata sa hae mi ze pila kaufela li ka kula.’—Samu 145:16.
2 Litakazo za mina ze nde ki lifi? Kana haki za bupilo bwa tabo, musebezi o munde, maluwo a mañata, sibaka se si buheha, kozo mwahal’a batu kaufela, ni ku lukuluha kwa katulo ye fosahezi, makulanu, manyando, ni lifu? Mi ku cwañi ka za mubonelo wa kwa moya o’ tisa nyakalalo? Zeo kaufela li ka petiwa cwanoñu fa mwatas’a puso ya Mubuso ya Mulimu. A mu lemuhe seo bupolofita bwa Bibele bu bulela ka za limbuyoti ze makalisa ze na ni ku taha mwa lifasi le linca.
Mufuta wa Mutu u ba mwa Kozo ye Petehile
3-6. Ki sepiso ifi ye tiile ye lu na ni yona ya kuli batu ba ka ba ni kozo mwa lifasi le linca?
3 “Ki [Mulimu] ya yemisize lindwa mane ni kwa mafelelezo a lifasi; u lobile buta, u pumile lilumo fahali, u cisize makoloi [a ndwa] ka mulilo.”—Samu 46:9.
4 “Ka mikwale ya bona ba ka tula mihuma, ka malumo a bona ba ka tula licekesi; sicaba se siñwi ha si sa na ku pumela se siñwi ka lilumo, mi ha ba sa na ku ituta ndwa.”—Isaya 2:4.
5 “Ba ba ishuwa ba ka luwa naha, ba ka ikola kozo ye tuna.”—Samu 37:11.
6 “Lifasi kaufela li pumuzi, li na ni kozo; ku tabelezwa lipina za tabo.”—Isaya 14:7.
Batu ni Lifolofolo Hamoho mwa Kozo
7, 8. Ki kozo mañi ye ka ba teñi mwahal’a batu ni lifolofolo?
7 “Sitongwani si ka ina ni ngunyana, ngwe i bute ni mwan’a puli; namani ni mwan’a tau ni lisuhana li ka pila hamoho; mi mwana yo munyinyani u ka li soteza. Komu ni bere li ka fula kulokulikuñwi; manamani a zona a bute hamoho; tau i ka fula bucwañi sina komu. Mbututu ya anya u ka bapalela mwa musima wa sibili, mwana ya kwile a kenye lizoho mwa musima wa nyengo. Ha ku sa na ya ka holofaza kamba ku sinya.”—Isaya 11:6-9.
8 “Mwa lizazi leo, ni ka ba swalisa bulikani ni lifolofolo za mwa naheñi, ni linyunywani za mwa lihalimu, ni ze zamaya ka mba fafasi . . . mi ni ba pilise mwa buiketo.”—Hosea 2:18.
Buikangulo bo bu Petehile, Bupilo bo bu sa Feli
9-14. Mu taluse miinelo ya buikangulo mwa lifasi le linca.
9 “Meto a libofu kih’a ka tutubuluha, lizebe za bosusu li tibuluhe ni zona. Ibe ya toza u ka tula sina lizwii, lilimi la wa satambi li ka opela za tabo.”—Isaya 35:5, 6.
10 “[Mulimu] u ka takula miyoko kaufela kwa meto a bona; mi lifu ha li sa na ku ba teñi; nihaiba ku tahelwa ki maswabi ni ku lila, ni ku utwa butuku.”—Sinulo 21:4.
11 “Ha ku na mutu . . . ya ka ipulela kuli: Na kula.”—Isaya 33:24.
12 “Fo he, nama ya mubili wa hae ikaba ye nde ku fita ya mwanana, A kutelwe ki mata a kwa bucaha bwa hae.”—Jobo 33:25.
13 “Mpo ya sishemo sa Mulimu ki bupilo bo bu sa feli ka Jesu Kreste Mulen’a luna.”—Maroma 6:23.
14 “Mutu ufi kamba ufi ya lumela ku yena [u ka ba] . . . ni bupilo bo bu sa feli.”—Joani 3:16.
Bafu Ba Kutisezwa kwa Bupilo
15-17. Ki sepo ifi ye li teñi ka za bao ba ba shwile kale?
15 “Ku zuha kwa bafu ku ka ba teñi, kwa ba ba lukile ni ba ba si ka luka.”—Likezo 24:15.
16 “Nako ya ta, mo ba ba li mwa mabita kaufela [ba ba hupulwa ki Mulimu], ba ka utwa linzwi la hae, mi ba zwe.”—Joani 5:28, 29.
17 “Liwate la kutisa bafu ba ba ku lona; ni lifu, ni libita za kutisa bafu ba ba ku zona.”—Sinulo 20:13.
Lifasi-Mubu, Paradaisi ye Na ni Lika ze Ñata
18-22. Lifasi-mubu kaufela li ka fetulwa ku ba nto mañi?
18 “Ku ka nela lipula za limbuyoti. Kota ye calilwe mwa simu i ka na i beya za yona; mi lifasi li ka na li beya za lona, mi . . . li ka pila mwa buiketo.”—Ezekiele 34:26, 27.
19 “Lifasi li tahisize lukau lwa lona; Mulimu, Yena Mulimu wa luna, u ka lu fuyola.”—Samu 67:6.
20 “Lihalaupa li ka taba, ni lona lifasi le li omelezi; naha ye seta ya liuwa i ka wabelwa, i tunye lipalisa sina za mayangayanga.”—Isaya 35:1.
21 “Malundu ni malundunyana a ka opela ka tabo fapil’a mina, mi likota kaufela za naha li ka kandelela. Bakeñisa mukakani, ku ka mela mulombe; bakeñisa mukona ku mele mutata.”—Isaya 55:12, 13.
22 “U ka ba ni na mwa [Paradaisi].”—Luka 23:43.
Mandu a Mande ku B’ote
23, 24. Ki sepiso ifi ye tiile ye lu na ni yona ya kuli ku ka ba ni mandu a mande ku b’ote?
23 “Ba ka yaha mandu, ba pile ku ona . . . Ha ba na ku ikahela mandu mi ku pile ba sili mwateñi, kamba ku cala likota . . . mi li ciwe ki ba sili . . . baketiwa ba ka, ba ka ikola misebezi ya mazoho a bona nako ye telele. Ha ba na ku sebeza ku sa tusi se siñwi, kamba ku pepa bana ba ba sa pili.”—Isaya 65:21-23.
24 “Ba ka ina, mutu ni mutu mwa kota ya hae ya veine ni mwa kota ya hae ya feiga, ku si na ya ba sabisa.”—Mika 4:4.
Wa Kona Ku Pila Ku Ya Ku Ile mwa Paradaisi
25. Ki tibelelo ifi ye makaza ye lu na ni yona ka za nako ya kwapili?
25 Ki tibelelo ye makaza hakalo ye mwa nako ya kwapili! Ki mulelo hakalo luli wo bupilo bu kona ku ba ni ona cwale muta bu tomiwa fa sepo ye tiile ya kuli mwa lifasi le linca la Mulimu but’ata kaufela bo bu li teñi kacenu bu ka ba lika za kwamulaho! “Za kale ha li sa na ku hupulwa, nihaiba ku kutela mwa minahano.” (Isaya 65:17) Mi ki ko ku omba-omba hakalo ku ziba kuli bupilo fo ikaba bwa kamita: “[Mulimu] u mizize lifu ku ya ku ile.”—Isaya 25:8.
26. Ki sifi sinotolo ka za ku pila ku ya ku ile mwa lifasi le linca la Mulimu?
26 Kana mwa bata ku t’o pila mwa Paradaisi ya lifasi le linca yeo cwale se i li fakaufi hahulu? ‘Ki sika mañi se ni tokwa ku eza kuli ni fumane ku shemubiwa ki Mulimu ku yona nako ye ya mafelelezo a lifasi le mi ni ku zwelapili ku pila mwa lifasi le linca?’ ne mu kana mwa buza. Mu tokwa ku eza seo Jesu n’a bonisize mwa tapelo ku Mulimu: “Mi bupilo bo bu sa feli, kikuli ba ku zibe, Wena, Mulimu a nosi wa niti, ni y’o lumile, yena Jesu Kreste.”—Joani 17:3.
27. Ki sika mañi se mu lukela ku eza kuli mu be ni kabelo mwa mulelo wa Mulimu?
27 Hakulicwalo he, mu ipumanele Bibele, mi mu be ni buikolwiso ka se mu balile mwa broshuwa ye. Mu batisise ba bañwi ba ba ituta ni ku luta zona liniti zeo za Bibele. Mu zwe kwa bulapeli bo bu na ni muipo bo bu luta ni ku eza lika ze sa lumelelani ni Bibele. Mu itute mina, hamohocwalo ni ba bañwi ba ba eza bolule-lule bao se ba kalisize kale ku eza tato ya Mulimu, ka mo mu ka konela ku abana mwa mulelo wa Mulimu wa kuli batu ba ka pila ku ya ku ile mwa paradaisi fa lifasi-mubu. Mi mu beye kwa pilu seo Linzwi le li buyelezwi la Mulimu li zibahaza ka za nako ya kwapili ye li bukaufi kuli: “Lifasi la fela, ni takazo ya lona; kono ya eza tato ya Mulimu u ina ku ya ku ile.”—1 Joani 2:17.
[Lipuzo za Tuto]
[Siswaniso se si fa likepe 31]
Mulelo wa Mulimu wa ku kutisa sinca paradaisi fa lifasi-mubu u tuha u talelezwa
