Mulelo wa Mulimu U Tuha U Petiwa
7
Mulelo wa Mulimu U Tuha U Petiwa
1, 2. Ki kabakalañi ha lu kona ku ikolwisa kuli Mulimu u k’a nga muhato wa ku felisa bumaswe ni manyando?
1 Nihaike kuli Mulimu u tuhelezi ku sa petahala ni manyando ka nako ye telele ka mubonelo wa mutu, h’a na ku tuhelela miinelo ye maswe ku zwelapili ku ya ku ile. Bibele i lu taluseza kuli Mulimu u na ni nako tenyene ya tomile kwa neku la ku tuhelela lika zeo kuli li ezahale.
2 “Nto ni nto i na ni nako ya yona.” (Muekelesia 3:1) Muta nako ya tomile Mulimu ya ku tuhelela bumaswe ni manyando i fita kwa mafelelezo, fo u k’a nga muhato mwa litaba za mufuta wa mutu. U ka felisa bumaswe ni manyando mi u ka taleleza mulelo wa hae wa kwa makalelo wa kuli lifasi-mubu li tale ka lubasi lwa mufuta wa mutu lo lu petehile, lo lu tabile inze ba ikola kozo ye tezi ni buiketo mwa mbombolelwa mwahal’a miinelo ya Paradaisi.
Likatulo za Mulimu
3, 4. Buka ya Liproverbia i talusa cwañi ze tahiswa ki k’u nga muhato kwa Mulimu?
3 A mu lemuhe likalulo ze sikai za bupolofita bo buñata bwa mwa Bibele bo bu bulela kuli Mulimu u k’a nga muhato, fo kikuli, miinelo ye ka ba teñi hamulaho wa likatulo za hae, seo i ka talusa kwa lubasi lwa mufuta wa mutu:
4 “Kakuli ba ba eza niti ba ka yaha mwa naha, ba ba sa nyazahali ba ine ku yona. Kono ba ba maswe ba ka kauhelwa mwa lifasi, ba ba pila ka bupumi ba zwiswe mwateñi.”—Liproverbia 2:21, 22.
5, 6. Samu 37 i bonisa cwañi se si ka ezahala muta Mulimu a’ nga muhato?
5 “Ba ba maswe ba ka yundiswa; Kono ba ba sepile [Jehova, NW] ki bona ba ba ka luwa naha. Ku sa na ni nakonyana ye nyinyani, mi ya maswe h’a sa na ku ba teñi . . . Kono ba ba ishuwa ba ka luwa naha, ba ka ikola kozo ye tuna.”—Samu 37:9-11.
6 “U sepe [Jehova, NW] mi u tiyele mwa nzila ya hae, mi u ka kambamiswa, ku y’o luwa naha; u ka bona ba ba maswe ha ba yundiswa. U lemuhe mutu wa niti, u talime ya lukile; kakuli mafelelezo a mutu yo, ki kozo. Kono ba ba sa yi ka mulao ba ka fezwa hamoho; kwa mafelelezo, lusika lwa ba ba maswe lu ka yundiswa.”—Samu 37:34, 37, 38.
7. Ki kelezo ifi ye nde yeo Linzwi la Mulimu li lu fa?
7 Kacwalo he, ka ku beya mwa munahano nako ya kwapili ye makaza ye ka ba teñi ku bao ba ba lemuha tukelo ya Mubupi ya m’ata kaufela ya ku lu busa, lu susuezwa kuli: “Pilu ya hao i hupule litaelo za ka; kakuli ki zona ze ka ku ekeleza kwa mazazi ni kwa myaha, li ku ekeleze ni kwa buiketo.” Ka buniti fela, bupilo bwa kamita bu ka ekelezwa bao ba ba keta ku eza tato ya Mulimu! Kacwalo, Linzwi la Mulimu li lu fa kelezo ye: “U sepe [Jehova, NW] ka pilu ya hao kaufela, mi u si ke wa tiyela fa butali bwa hao; u beye [Jehova, NW] mwa milelo ya hao kaufela, mi Yena u ka lukisa linzila za hao kaufela.”—Liproverbia 3:1, 2, 5, 6.
Puso ya Mulimu Y’e Zwa kwa Lihalimu
8, 9. Mulimu u ka kenisa lifasi-mubu le ka nto mañi?
8 Mulimu u ka peta ku keniswa kwa lifasi-mubu ka ku itusisa mulonga o munde ka ku fitisisa o’ mufuta wa mutu u si ka ba kale ni ona. Ki mulonga o bonahalisa butali bwa kwa lihalimu kakuli u busa ku zwelela kwa lihalimu mwatas’a ketelelo ya Mulimu. Mi Mubuso w’o wa kwa lihalimu u ka zwisa mifuta kaufela ya puso ya mufuta wa mutu fa lifasi-mubu. Batu ni kamuta ha ba sa na ku ba ni keto ya ku busa inge ba itukuluzi ku Mulimu.
9 Ka ku ama ku seo bupolofita bo bu kwa Daniele 2:44 bu bulela kuli: “Mwa mazazi a malena ao [milonga ya mwa lizazi la cwale], Mulimu wa mwa lihalimu u ka tahisa mubuso [o kwa lihalimu] o si na ku sinyeha ku ya ku ile; mi bulena bwa ona ha bu na ku shimbulukela kwa sicaba si sili [ni kamuta batu ha ba sa na ku lumelelwa ku ipusa inge ba itukuluzi ku Mulimu]. Mubuso wo, u ka ketula ni ku feza mibuso kaufela [y’e li teñi cwale]; kono ona u ka ba teñi kamita ni ku ya ku ile.”—Mu bone ni Sinulo 19:11-21; 20:4-6.
10. Ki kabakalañi ha lu kona ku ba ni buniti bwa kuli mwatas’a Mubuso wa kwa lihalimu wa Mulimu, ni kamuta ha ku sa na ku ba ni ku silafazwa kwa bubusi?
10 Kacwalo, mufuta wa mutu ni kamuta ha u sa na ku ba ni mifuta-futa ya puso ye silafezi, kakuli Mulimu ha ka tisa muinelo wo kwa mafelelezo a ona, puso ya batu ba ba itukuluzi ku yena ha i sa na ku ba teñi hape. Mi Mubuso o ka busa ku zwelela kwa lihalimu ha u na ku silafazwa, kakuli Mulimu ki yena Mutateki ni Mubukelezi wa ona. Ka ku fapahana, u ka sebeleza fa licisehelo ze nde ka ku fitisisa za babusiwa ba ona ba mufuta wa mutu. Tato ya Mulimu cwale i ka eziwa mwa lifasi-mubu kaufela sina mo i ezezwa kwa lihalimu. Ki lona libaka Jesu ha na kona ku luta balutiwa ba hae ku lapela ku Mulimu kuli: “Ku tahe mubuso wa hao; Se si latwa ki Wena si ezwe mwa lifasi, mo si ezezwa kwa lihalimu.”—Mateu 6:10.
Se Lu Li Bukaufi Hahulu Cwañi?
11. Ki kai mwa Bibele k’o lu kona ku fumana bupolofita bo bu lu tusa ku ziba bukaufi b’o lu li ku bona kwa neku la mafelelezo a muinelo wo?
11 Se lu li bukaufi hahulu cwañi ni mafelelezo a muinelo wo wa linto o’ sa kolwisi mi ni makalelo a lifasi le linca la Mulimu? Bupolofita bwa mwa Bibele ka ku utwahala hande bwa lu fa kalabo. Sina ka mutala, Jesu yena ka sibili na bulezi cimo ka za seo lu kona ku talimela ku sona ilikuli lu kone ku ziba mayemo a luna ka ku ama ku bona, sina ka mo i bulelela Bibele, bwa “ku fela kwa lifasi.” Seo si ñozwi kwa Mateu likauhanyo 24 ni 25, Mareka 13, ni Luka 21. Hape, sina ha ku ñozwi cwalo kwa 2 Timotea kauhanyo 3, muapositola Paulusi na bulezi cimo kuli ne ku ka ba ni nako ye ne i ka bizwa “mazazi a maungulelo” muta likezahalo ze fapahana-fapahana ne li ka bonisa hande silengo sa nako ye lu li ku yona.
12, 13. Jesu ni Paulusi ne ba bulezi nto mañi ka za nako ya mafelelezo?
12 Jesu na bulezi kuli nako yeo ne i ka kalisa ka likezahalo ze: “Sicaba si ka lwanisa sicaba se siñwi, mubuso u lwanise mubuso o muñwi, mi litala li ka ba teñi, ni lizikinyeho za lifasi.” (Mateu 24:7) Luka 21:11 i bonisa kuli hape na bulezi ka za “mafu a maswe mwa mabaka a mañata.” Mi hape na file temuso, kuli “bumaswe bu ka ekezeha hahulu.”—Mateu 24:12.
13 Muapositola Paulusi na bulezi cimo kuli: “Hape u zibe kuli, mwa mazazi a maungulelo, ku ka taha linako ze tata. Kakuli batu ba ka ba baitati, ba ba lata mali, ba ba itumbaeta ni ku ikuhumusa; ikaba banyefuli, ba ba sa utwi bashemi ba bona, ba ba si na buitumelo, ba ba hana za Mulimu; Ikaba batu ba ba si na lilato la taho, ba ba na ni ñole, ba ba seba batu ka buhata, ba ba sa koni ku iswala, ba ba na ni buhali, ba ba toya batu ba bande; Ikaba lishembi ni matanya, ni ba ba inuneka, ni ba ba lata minyaka, isi Mulimu; Ikaba batu ba ba eza mukwa wa bulumeli, kono se si eza mata a bulumeli ba si latuzi. . . . Batu ba lunya, ba ba puma, ba ka zwelapili mwa bumaswe, inze ba puma batu, mi ba pumiwa ni bona.”—2 Timotea 3:1-5, 13.
14, 15. Likezahalo za mwa lilimo za mwanda wo wa bu-20 li bonisize cwañi buniti bwa kuli luli lu mwa mazazi a maungulelo?
14 Kana lika zeo Jesu ni Paulusi ne ba bulezi cimo se li ezahezi mwa nako ya luna? Ee, se li ezahezi luli. Ndwa ya Lifasi ya I ne li ndwa ye maswe ka ku fitisisa haisali. Ne li ndwa ya pili ya lifasi mi ne li nako ya petuho ye tuna mwa litaba za cwale. Hamoho ni yona ndwa yeo ku bile ni ku kusufala kwa lico, matuku a yambukela, ni but’ata bo buñwi bo butuna. Likezahalo zeo za ku zwa ka 1914 ni ku zwelapili cwalo, sina ka mwa bulelela Jesu, ne li li “makalelo fela a manyando.” (Mateu 24:8) Ne li makalelo a nako ye ne i bulezwi cimo ye bizwa “mazazi a maungulelo,” makalelo a lusika lwa mafelelezo l’o ku lona Mulimu na ka tuhelela bumaswe ni manyando.
15 Ka mo ku bonahalela mwa izibela hande likezahalo za mwa lilimo za mwanda wo wa bu-20. Mwa ziba ku lyangana ni sinyeho ye se i bile teñi. Batu ba ba bat’o eza bolule b’a 100 se ba bulailwe mwa lindwa. Myanda-nda ya bolule-lule ba batu ba bañwi se ba shwile kabakala tala ni makulanu. Lizikinyeho li bulaile batu ba ba sa konwi ku baliwa. Ku keshebiswa kwa bupilo ni maluwo ku zwelapili ku ekezeha. Ku saba bukebenga se ku bile kalulo ya mupilelo wa ka zazi ni zazi. Lipimo za muzamao o munde se li kashelizwe kwatuko. Ku yuyuluka kwa palo ya buñata bwa batu ku tisa but’ata bo bu sa tatululwi. Silafazo i sweli ku sinya mayemo a bupilo mi mane ni ku bu beya mwa lubeta. Kaniti luli, se lu bile mwa mazazi a maungulelo haisali ku zwiwa ka 1914 mi se lu atumela fa kaungu-ungu ka bupolofita bwa mwa Bibele bo bu ama nako ya luna.
16. Mazazi a maungulelo a’ nga butelele bwa nako ye kuma kai?
16 Mazazi a maungulelo na ka zwelapili ka butelele bwa nako ye kuma kai? Jesu na bulezi ka ku ama kwa silengo sa nako se ne si ka ipumana mwa ku ba ni “makalelo fela a manyando” ku zwa ka 1914 ni ku zwelapili cwalo kuli: “Lusika lo lwa kacenu ha lu na ku fela, konji zeo kaufela li bonahale pili.” (Mateu 24:8, 34-36) Kacwalo, likalulo kaufela za mazazi a maungulelo li lukela ku ezahala mwahal’a nako ya ku pila kwa lusika lu lu luñwi, lona lusika lwa ka 1914. Kacwalo batu ba bañwi ba ne ba pila ka 1914 ba ka ba teñi muta muinelo wo u fita kwa mafelelezo a ona. Lusika lwa bona batu bao cwale se lu li lo lu supezi hahulu, ili ku bonisa kuli nako ye siyezi ki ye kuswani hahulu kuli Mulimu a felise muinelo wo wa linto wa cwale.
17, 18. Ki bupolofita bufi bo bu bonisa kuli lu fakaufi hahulu ni mafelelezo a lifasi le?
17 Bupolofita bo buñwi bo bu bonisa kuli mafelelezo a muinelo wo a fakaufi hahulu ne bu filwe ki muapositola Paulusi, ya n’a bulezi cimo kuli: “Lizazi la [Jehova, NW] li ka taha sina lisholi la busihu. Batu, nako ye ba ka li: Kozo ni buiketo! ki yona nako ye ba ka tulukelwa ki sinyehelo, . . . mi ha ba na ku banduka.”—1 Matesalonika 5:2, 3; mu bone ni Luka 21:34, 35.
18 Kacenu Ndwa ya ka Mulomo i felile, mi ndwa ya mwahal’a macaba neikana ya sa ba lubeta lo lutuna. Kacwalo macaba na kana a ikutwa kuli a fakaufi hahulu ni tukiso ye nca ya lifasi. Kono ha ba ka ikutwa kuli buikatazo bwa bona bw’a kondisa lika, ikaba nto ye fapahana ni se ba nahana, kakuli seo ikaba sisupo sa mafelelezo sa kuli sinyeho ya muinelo wo ye ka tiswa ki Mulimu i fakaufi hahulu. Mu hupule kuli, lipuhisano za bupolitiki ni litumelelano ka za kozo ha li tisi licinceho ni ze kana kwa batu. Ha li tahisi kuli batu ba latane. Mi babusi ba lifasi ha ba felisi bukebenga, kamba mane ku felisa matuku ni lifu. Kacwalo mu si ke mwa beya sepo ya mina kwa lizwelopili lifi kamba lifi ka za kozo ni buiketo za batu ni ku nahana kuli lifasi le, li fakaufi ni ku tatulula but’ata bwa lona. (Samu 146:3) Muhuwo o cwalo luli u ka talusa fela kuli lifasi le, li fakaufi hahulu ni mafelelezo a lona.
Ku Kutaza Taba ye Nde
19, 20. Ki bupolofita bufi bo bu ama kwa ku kutaza mwa mazazi a maungulelo b’o lu iponela inze bu talelezwa?
19 Bupolofita bo buñwi bo bu bonisa kuli se lu bile mwa mazazi a maungulelo haisali ku zwiwa ka 1914 ki bwa n’a file Jesu kuli: “Evangeli i na ni ku bulelwa pili mwa macaba kaufela.” (Mareka 13:10) Kamba sina ka mo i bulelela Mateu 24:14 kuli: “Evangeli ye ya mubuso i ka bulelwa mwa lifasi kaufela, ibe bupaki mwa macaba kamukana; kihona ku ka taha mafelelezo.”
20 Kacenu ku fita l’ili kaufela mwa litaba za kwamulaho, taba ye nde ka za mafelelezo a lifasi le ni ka za ku taha kwa Paradaisi ya lifasi le linca mwatas’a Mubuso wa Mulimu i swelwi ku kutaziwa fa lifasi-mubu kaufela. Ki bomañi? Ki bolule-lule ba Lipaki za Jehova. Ba sweli ku kutaza mwa naha ni naha fa lifasi-mubu.
21, 22. Sihulu, ki kalulo ifi ye zibahaza Lipaki za Jehova ku ba Bakreste ba niti?
21 Ka ku ekeza kwa ku kutaza kwa bona ka za Mubuso wa Mulimu, Lipaki za Jehova ba ipuluka ka mukwa o’ ba zibahaza ku ba sina balateleli ba niti ba Kreste, kakuli n’a bulezi kuli: “Se ba ka ziba batu kaufela kuli mu balutiwa ba ka ka sona, ki ha mu latana.” Kacwalo, Lipaki za Jehova ki ba ba swalisani mwa sizwale sa mwa lifasi kaufela ka tamo ye tiile ya lilato.—Joani 13:35; mu bone ni Isaya 2:2-4; Makolose 3:14; Joani 15:12-14; 1 Joani 3:10-12; 4:20, 21; Sinulo 7:9, 10.
22 Lipaki za Jehova ba lumela seo Bibele i bulela: “Mulimu h’a yi ka ku keta batu; Kono mwa sicaba ni sicaba, ya mu saba mi a eza se si lukile, u lumelelwa ki Yena.” (Likezo 10:34, 35) B’a nga Lipaki ba bañwi ba ba mwa linaha kaufela sina mizwale ni likaizeli ba kwa moya, ku si na taba ni mushobo kamba mubala. (Mateu 23:8) Mi buniti bwa kuli sizwale se si cwalo sa mwa lifasi kaufela s’a fumaneha mwa lifasi kacenu si ekeza kwa bupaki bwa kuli mulelo wa Mulimu u tuha u talelezwa.
[Lipuzo za Tuto]
[Siswaniso se si fa likepe 26]
Mubuso wa kwa lihalimu o petehile wa Mulimu u ka ba yona fela puso ya mufuta wa mutu mwa lifasi le linca
