Kana Mw’a Tabela ku Ziba ze Ñata Ka za Bibele?

 Ki Kabakalañi Ha Mu Swanela ku Bala Bibele?

BIBELE ha i swani ni buka ifi kamba ifi—yona i na ni litaelo ze lilato ze zwa ku Mulimu. (1 Matesalonika 2:13) Haiba mu sebelisa seo Bibele i luta, mu ka tuseha hahulu. Lilato la mina ku Mulimu li ka ekezeha mi mu ka sutelela ku yena, Mufi wa “mpo ye nde kaufela, ni mpo ye petehile kaufela.” (Jakobo 1:17) Mu ka ziba mwa ku mu atumelela mwa tapelo. Ha mu ba mwa ziyezi, mwa kona ku tusiwa ki Mulimu. Haiba mu pila ka ku ya ka lipimo ze ñozwi mwa Bibele, Mulimu u ka mi fa bupilo bo bu sa feli.—Maroma 6:23.

Mwa Bibele ku na ni litaba za niti ze fa zibo. Ba ba fumana zibo ya mwa Bibele ba lukululwa kwa litumelo ze fosahezi ze ba na ni zona bolule-lule. Ka mutala, ku ziba niti ka za se si ezahala ha lu shwa ku lu lukulula kwa sabo ya kuli bafu ba kona ku lu holofaza kamba kuli bahabo luna kamba balikani ba ba shwile ba sweli ku nyanda. (Ezekiele 18:4) Ze i luta Bibele ka za zuho li tiisa lipilu za ba ba shwezwi ki balatiwa ba bona. (Joani 11:25) Ku ziba niti ka za mangeloi a maswe ku lu ezisa ku tonela likozi za litumelo za mioya ni ku lu tusa ku utwisisa libaka ha ku na ni butata bo buñata mwa lifasi.

Likuka za Mulimu ze mwa Bibele li lu bonisa mupilelo o kona ku lu tiseza buikangulo bo bunde. Ka mutala, ku ba ni “buiswalo” ku ekeza kwa buikangulo bo bunde. (1 Timotea 3:2) Ka ku ‘ikenisa kwa masila kaufela a nama ni a moya,’ lu pima ku itahiseza matuku. (2 Makorinte 7:1) Ku sebelisa kelezo ya Mulimu ye mwa Bibele hape ku tahisa tabo mwa linyalo ni buikuteki.—1 Makorinte 6:18.

Haiba mu sebelisa Linzwi la Mulimu, mu ka ba batu ba ba tabile. Zibo ya mwa Bibele i lu tusa ku fumana kozo ya mwa munahano ni buiketo mi i lu fa sepo. I lu tusa ku ituta ku ba ni mikwa ye tabisa ye cwale ka mufelañeke, lilato, tabo, kozo, musa, ni tumelo. (Magalata 5:22, 23; Maefese 4:24, 32) Mikwa ye cwalo i lu tusa ku ba munna kamba musali, ndate kamba me, kamba mwana yo munde.

Kana mu kile mwa nahana ka za kwapili? Bupolofita bwa Bibele bu lu bonisa kuli lu pila mwa miteñi ye ipitezi hahulu. Bupolofita b’o bu talusa miinelo ya lifasi kacenu mi hape bu bonisa kuli Mulimu u ka tuha a fetula lifasi le ku ba paradaisi.—Sinulo 21:3, 4.

Tuso mwa ku Utwisisa Bibele

Mwendi mu likile ku bala Bibele kono mu fumana t’ata ku i utwisisa. Mwendi ha mu zibi kwa ku fumana likalabo kwa lipuzo za mina mwa Bibele. Haiba ku cwalo, u zibe haki mina mu nosi. Kaufel’a luna lu tokwa tuso kuli lu utwisise Linzwi la Mulimu. Lipaki za Jehova, mwa linaha ze bat’o ba ze 235, ba fa tuto ya Bibele ye sa lifelwi ku bolule-lule. Ba ka tabela ku mi tusa ni mina.

Kamita ki ko kunde hahulu ku ituta Bibele ka ku zwelapili, ili ku kala ka lituto za makalelo. (Maheberu 6:1) Ha mu nze mu zwelapili ku ituta, mu ka fita fa ku utwisisa “lico ze tiile”—f’o kikuli, litaba ze tungile. (Maheberu 5:14) Bibele ki yona mutomo. Lihatiso za Bibele, ze cwale ka broshuwa ye li Ki Sifi Seo Mulimu A Tokwa ku Luna?, li ka mi tusa ku utwisisa Mañolo fo li tomile litaba ze fitana-fitana.

Kana Mw’a Tabela ku Tanda Nako ye Ñwi Ka Viki Kuli Mu Utwisise Bibele?

Hañata tuto ya Bibele i konwa ku eziwa ka nako ni mwa sibaka se mu bona kuli sa mi swanela. Ba bañata ba itutelanga mwa mandu a bona. Ba bañwi mane ba itutelanga fa luwaile. Tukiso ya tuto yeo haki sikolo sa batu ba bañata, kono ki tuto ya ka butu ye swanela miinelo ya mina, mane ye eziwa ka ku ya ka kutwisiso ni zibo ya mina. Ha ku na litatubo, mi ha mu na ku utwiswa maswabi. Lipuzo za mina za Bibele li ka alabiwa, mi mu ka ituta mwa ku sutelela ku Mulimu.

Ha mu tokwi ku lifa mali kuli mu be ni tuto ya Bibele yeo. (Mateu 10:8) I fiwa ku si na tifo kwa batu ba bulapeli kaufela ni ba ba si na bulapeli ba ba bata luli ku ekeza kwa zibo ya bona ya Linzwi la Mulimu.

Puhisano yeo ki ya bomañi? Ki ya lubasi lwa mina kaufela. Mwa kona ku mema ni balikani ba mina. Kamba haiba mwa tabela, puhisano yeo i konwa ku eziwa ni mina mu nosi.

Ba bañata ba tomanga hora i liñwi mwa sunda kuli ba itute Bibele. Haiba mwa kona ku tanda nako ye ñata kamba mu na ni fela nako ye nyinyani mwa sunda, Lipaki ba kona ku taha ku t’o mi tusa.

Kupo ya ku Ituta

Lu mi kupa kuli mu zibise Lipaki za Jehova. Nzila ye ñwi ya ku eza cwalo ka yona ki ku ñolela kwa keyala ye kwatasi. Fohe ku ka ezwa litukiso za kuli mutu yo muñwi a ezange ni mina tuto ya Bibele ya fa ndu ye sa lifelwi.

□ Mu ni lumele broshuwa ye li Ki Sifi Seo Mulimu A Tokwa ku Luna?

□ Ni kupa kuli mu ni zibise ka za tuto ya Bibele ya fa ndu ye sa lifelwi.

Konji haiba ku bonisizwe, mañolo kaufela a Bibele a zwisizwe mwa Bibele ye Kenile ya Silozi, hatiso ya 1951.