Ki Kabakalañi Ha Lu Shwa?
Ki Kabakalañi Ha Lu Shwa?
“Fahalimu a malundunyana kaufela se ku kutumani, mwa likota kaufela ha ku na se si utwahala ku buyela; linyunywani li lobezi mwa likota: mu libelele; ni mina honafa mu katuha mu pumula inge zona ze.”—JOHANN WOLFGANG VON GOETHE, MULOKI WA KWA GERMANY.
1, 2. (a) Batu ne ba bupilwe ni takazo mañi? (b) Ki bupilo bwa mufuta mañi b’o batu ba babeli ba pili ne ba ikozi?
MULIMU n’a bupile batu ni takazo ya ku pila ku ya ku ile. Kaniti luli, Bibele i bulela kuli n’a “beile mwa pilu ya mutu zibo ya linako ze sa feli.” (Muekelesia 3:11) Kono Mulimu n’a si ka fa fela batu takazo ya ku pila ku ya ku ile. N’a ba file ni kolo ya ku eza cwalo.
2 Bashemi ba luna ba pili, bo Adama ni Eva, ne ba bupilwe ba li ba ba petehile, ku si na se si fosahezi mwa minahano ni mibili ya bona. (Deuteronoma 32:4) Mu nahane—ba si na se si opa ni butuku, ba si na sabo ni lipilaelo! Fahalimu a seo, Mulimu n’a ba beile mwa lihae le linde la paradaisi. Mulimu n’a lelile kuli mutu a pile ku ya ku ile ni kuli nako ha i nze i ya lifasi li tale bana ba hae ba ba petehile. (Genese 1:31; 2:15) Ki kabakalañi he, ha lu shwa?
Ku Sa Utwa ku Tahisa Lifu
3. Bupilo bo bu sa feli bwa Adama ni Eva ne bu itingile fa nto mañi?
3 Mulimu n’a laezi Adama kuli: “Haili likota kaufela za simu, u ka li ca; kono kota ya ku ziba bunde ni bumaswe, yona u si ke wa i ca; kakuli nako y’o i ca, u ka shwa luli.” (Genese 2:16, 17) Kacwalo bupilo bo bu sa feli bwa bo Adama ni Eva ne bu itingile fa nto ye ñwi; ne bu itingile fa ku ipeya ku utwa Mulimu kwa bona.
4. Adama ni Eva ha ne ba ezize sibi, ki kabakalañi ha ne ba latehezwi ki sepo ya bona ya ku pila ku ya ku ile mwa Paradaisi?
4 Kono ka bumai, Adama ni Eva ne ba si ka latelela mulao wa Mulimu. (Genese 3:1-6) Ka ku eza cwalo, ne ba bile baezalibi, kakuli “sibi ki ku tula Mulao.” (1 Joani 3:4) Kacwalo, Adama ni Eva ne ba latehezwi ki sepo ya bupilo bwa kamita. Kabakalañi? Kakuli “mupuzo wa sibi ki lifu.” (Maroma 6:23) Kacwalo, Mulimu ha n’a atula Adama ni Eva n’a ize: “U liluli, mi u ka kutela mwa liluli.” Bashemi ba luna ba pili ku zwa f’o ne ba lunduzwi mwa lihae la bona la Paradaisi. Fa lizazi le ne ba ezize sibi, Adama ni Eva ne ba kalile hanyinyani-hanyinyani kono ili ka ku zwelapili mwa nzila ya lifu.—Genese 3:19, 23, 24.
“Lifu Li Tile kwa Batu Kaufela”
5. Sibi ne si keni cwañi kwa mufuta wa mutu kaufela?
5 Sibi cwale ne se si keni ka ku tunga mwa lilama za sihozo za bo Adama ni Eva. Kacwalo ne ba sa koni ku pepa bana ba ba petahalile, sina mo ku bezi kuli sibupiso se si si ka petahala ha si koni ku bupa sibyana se si petahalile. (Jobo 14:4) Kaniti, ku pepwa kaufela kwa butu ku tiiseza kuli bashemi ba luna ba pili ne ba latehezwi ki buikangulo bo bu petehile ni bupilo bo bu sa feli mi ni bana ba bona ne ba latehezwi ki zona lika zeo. Paulusi muapositola wa Mukreste n’a ñozi kuli: “Sibi sina ha si keni mwa lifasi ka mutu a li muñwi, mi ka sibi ku keni lifu, kamukwaocwalo lifu li tile kwa batu kaufela kakuli ba ezize sibi kaufela.”—Maroma 5:12; mu bapanye Samu 51:5.
6. Ki kabakalañi ha lu shwa?
6 Kacenu ba sayansi ha ba zibi libaka batu ha ba supala ni ku shwa. Bibele, nihakulicwalo, i talusa kuli lu shwa kabakala kuli lu pepilwe ni sibi, ka ku ba ba ba hozize ona muinelo wo kwa bashemi ba luna ba pili. Kono kiñi se si ezahala ku luna ha lu shwa?
[Lipuzo za Tuto]
