Tibelelo Ye Ipitezi!
Tibelelo Ye Ipitezi!
“Mutu kaufela ya pila mi a lumela ku na, h’a na ku shwa ni kamuta.”—JOANI 11:26.
1. Bolule-lule ba ba shwile ba ka zusezwa mwa sibaka se si cwañi?
BOLULE-LULE ha ba ka zuswa kwa bafu, ha ba na ku zusezwa fa lifasi le li li mukungulu. (Likezo 24:15) Ba ka zuhela mwa sibaka se si lukisizwe hande mi ba ka fumana kuli ba lukiselizwe kale libaka mwa ku ina, liapalo, ni lico ze ñata. Ba ba ka eza zona litukiso zeo kaufela ki bomañi? Ka mo ku inezi fela ku ka pila batu mwa lifasi le linca pili zuho ya lifasi i si ka kala kale. Kono ki bomañi bona bao?
2-4. Ki sepo mañi ye ipitezi ye ba libelezi ba ba pila mwa “mazazi a maungulelo”?
2 Talelezo ya bupolofita bwa Bibele i bonisa kuli lu pila “mwa mazazi a maungulelo” a muinelo wo wa linto. * (2 Timotea 3:1) Cwale-cwale fa, Jehova Mulimu u ka kena mwa litaba za batu ni ku felisa bumaswe fa lifasi-mubu. (Samu 37:10, 11; Liproverbia 2:21, 22) Ka nako yeo, ki sifi se si ka ezahala ku ba ba sebeleza Mulimu ka busepahali?
3 Jehova h’a na ku sinya ba ba lukile hamoho ni ba ba maswe. (Samu 145:20) A li ku ba a sa ezi nto ye cwalo, mi h’a na ku eza cwalo h’a ka zwisa bumaswe kaufela mwa lifasi. (Mu bapanye Genese 18:22, 23, 26.) Mane, buka ya mafelelezo mwa Bibele i bulela ka za “buñata bo butuna bwa batu, ku si na ya kona ku ba bala; ba zwa mwa macaba kaufela, ni mwa mishobo, ni mwa masika, ni mwa lipuo kaufela,” ba “ba zwa mwa ñalelwa ye tuna.” (Sinulo 7:9, 14) Ee, buñata bo butuna ba ka punyuha ñalelwa ye tuna ili m’o lifasi la cwale le li maswe li ka fela, mi ba ka kena mwa lifasi le linca la Mulimu. Teñi m’o, mufuta wa mutu o ipeya ku utwa u ka fumana tuso ka ku tala ku zwelela kwa lituso ze nde za Mulimu za ku lukulula mufuta wa mutu kwa sibi ni lifu. (Sinulo 22:1, 2) Kacwalo, “buñata bo butuna” ha ba sa na ku tokwa ku shwa. Ki sepo kwa ku ipitela yeo!
4 Kana lwa kona ku ba ni buikolwiso ka za yona sepo ye makaza yeo? Ka ku tala luli! Jesu Kreste yena ka sibili n’a bulezi kuli ne ku ka ba ni nako f’o batu ne ba ka pila ku si na ku shwa ni kamuta. Pili a si ka zusa kale mulikan’a hae yena Lazaro, Jesu n’a bulelezi Mareta kuli: “Mutu kaufela ya pila mi a lumela ku na, h’a na ku shwa ni kamuta.”—Joani 11:26.
Ni Mina mwa Kona ku Pila ku Ya ku Ile
5, 6. Haiba mu bata ku pila ku ya ku ile mwa Paradaisi fa lifasi-mubu, ki nto mañi ye mu swanela ku eza?
5 Kana mwa bata ku pila ku ya ku ile mwa Paradaisi fa lifasi-mubu? Kana mwa lakaza ku bona balatiwa ba mina hape? Haiba ku cwalo mu lukela ku ba ni zibo ye nepahezi ka za tato ya Mulimu ni milelo ya hae. Ha n’a lapela ku Mulimu, Jesu n’a bulezi kuli: “Bupilo bo bu sa feli, kikuli ba ku zibe, Wena, Mulimu a nosi wa niti, ni y’o lumile, yena Jesu Kreste.”—Joani 17:3.
6 Ki tato ya Mulimu kuli “batu kamukana ba piliswe, mi ba fite fa zibo ya ku ziba niti.” (1 Timotea 2:3, 4) Ye ki yona nako ya ku ituta ka m’o mina, hamohocwalo ni bolule-lule ba batu ba bañwi ba ba eza tato ya Mulimu, mu kona ku pilela ku ya ku ile mwa Paradaisi fa lifasi-mubu. Lipaki za Jehova ba ka ba ba ba tabile ku mi tusa ku ituta ze ñata ka za Mulimu ni zeo a tokwa. Kiñi ha mu sa bonani mi bona kwa Ndu ya Mubuso ye li bukaufi ni mina, kamba ku ñolela kwa keyala ye li bukaufi ka ku fitisisa ye kolokisizwe fa likepe le li latelela?
[Litaluso za kwatasi]
^ para. 2 Mu bone Zibo ye Isa kwa Bupilo bo Bu Sa Feli, makepe 98-107, ye hatisizwe ki Watchtower Bible and Tract Society of New York, Inc.
[Lipuzo za Tuto]
[Siswaniso se si fa likepe 31]
“Buñata bo butuna” ha ba na ku tokwa ku shwa
